Sri Sahasrara (Sudarshana) Stuti – శ్రీ సహస్రార (సుదర్శన) స్తుతిః


సహస్రార మహాశూర రణధీర గిరా స్తుతిమ్ |
షట్కోణరిపుహృద్బాణ సంత్రాణ కరవాణి తే || ౧ ||

యస్త్వత్తస్తప్తసుతనుః సోఽత్తి ముక్తిఫలం కిల |
నాతప్తతనురిత్యస్తౌత్ ఖ్యాతా వాక్ త్వం మహౌజస || ౨ ||

హతవక్రద్విషచ్చక్ర హరిచక్ర నమోఽస్తు తే |
ప్రకృతిఘ్నాసతాం విఘ్న త్వమభగ్నపరాక్రమ || ౩ ||

కరాగ్రే భ్రమణం విష్ణోర్యదా తే చక్ర జాయతే |
తదా ద్విధాఽపి భ్రమణం దృశ్యతేఽంతర్బహిర్ద్విషామ్ || ౪ ||

వరాదవధ్యదైత్యౌఘశిరః ఖండనచాతురీ |
హరేరాయుధ తే దృష్టా న దృష్టా యా హరాయుధే || ౫ ||

అవార్యవీర్యస్య హరేః కార్యేషు త్వం ధురంధరః |
అసాధ్యసాధకో రాట్ తే త్వం చాసాధ్యస్య సాధకః || ౬ ||

యే విఘ్నకంధరాశ్చక్ర దైతేయాస్తవ ధారయా |
త ఏవ చిత్రమనయంస్తథాఽప్యచ్ఛిన్నకంధరామ్ || ౭ ||

అరే తవాగ్రే నృహరేరరిః కోఽపి న జీవతి |
నేమే తవాగ్రే కామాద్యా నేమే జీవంత్వహో ద్విషః || ౮ ||

పవిత్ర పవివత్ త్రాహి పవిత్రీకురు చాశ్రితాన్ |
చరణ శ్రీశచరణౌ స్థిరీకురు మనస్సు నః || ౯ ||

యస్త్వం దుర్వాససః పృష్ఠనిష్ఠో దృష్టోఽఖిలైః సురైః |
అస్తావయః స్వభర్తారం సత్వం స్తావయ మద్గిరా || ౧౦ ||

భూస్థదుర్దర్శనం సర్వం ధిక్కురుష్వ సుదర్శన |
వాయోః సుదర్శనం సర్వస్యాయోధ్యం కురు తే నమః || ౧౧ ||

సుష్ఠు దర్శయ లక్ష్మీశతత్త్వం సూర్యాయుతప్రభ |
ద్వారం నః కురు హర్యాప్త్యై కృతద్వార త్వమస్యపి || ౧౨ ||

పద్యాని నిరవద్యాని వాదిరాజాభిధః సుధీః |
ద్వాదశ ద్వాదశారస్య చక్రస్య స్తుతయేఽకృత || ౧౩ ||

ఇతి శ్రీవాదిరాజయతి కృతం శ్రీ సహస్రార స్తుతిః |


మరిన్ని శ్రీ సుదర్శన స్తోత్రాలు చూడండి.


గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed