Narayaneeyam Dasakam 26 – నారాయణీయం షడ్వింశదశకమ్


షడ్వింశదశకమ్ (౨౬) – గజేన్ద్రమోక్షమ్

ఇన్ద్రద్యుమ్నః పాణ్డ్యఖణ్డాధిరాజ-
స్త్వద్భక్తాత్మా చన్దనాద్రౌ కదాచిత్ |
త్వత్సేవాయాం మగ్నధీరాలులోకే
నైవాగస్త్యం ప్రాప్తమాతిథ్యకామమ్ || ౨౬-౧ ||

కుంభోద్భూతిః సంభృతక్రోధభారః
స్తబ్ధాత్మా త్వం హస్తిభూయం భజేతి |
శప్త్వాథైనం ప్రత్యగాత్సోఽపి లేభే
హస్తీన్ద్రత్వం త్వత్స్మృతివ్యక్తిధన్యమ్ || ౨౬-౨ ||

దుగ్ధాంభోధేర్మధ్యభాజి త్రికూటే
క్రీడన్ శైలే యూథపోఽయం వశాభిః |
సర్వాన్జన్తూనత్యవర్తిష్ట శక్త్యా
త్వద్భక్తానాం కుత్ర నోత్కర్షలాభః || ౨౬-౩ ||

స్వేన స్థేమ్నా దివ్యదేహత్వశక్త్యా
సోఽయం ఖేదానప్రజానన్ కదాచిత్ |
శైలప్రాన్తే ఘర్మతాన్తః సరస్యాం
యూథైస్సార్ధం త్వత్ప్రణున్నోఽభిరేమే || ౨౬-౪ ||

హూహూస్తావద్దేవలస్యాపి శాపత్-
గ్రాహీభూతస్తజ్జలే వర్తమానః |
జగ్రాహైనం హస్తినం పాదదేశే
శాన్త్యర్థం హి శ్రాన్తిదోఽసి స్వకానామ్ || ౨౬-౫ ||

త్వత్సేవాయా వైభవాద్దుర్నిరోధం
యుద్ధ్యన్తం తం వత్సరాణాం సహస్రమ్ |
ప్రాప్తే కాలే త్వత్పదైకాగ్ర్యసిద్ధ్యై
నక్రాక్రాన్తం హస్తివర్యం వ్యధాస్త్వమ్ || ౨౬-౬ ||

ఆర్తివ్యక్తప్రాక్తనజ్ఞానభక్తిః
శుణ్డోత్క్షిప్తైః పుణ్డరీకైః సమర్చన్ |
పూర్వాభ్యస్తం నిర్విశేషాత్మనిష్ఠం
స్తోత్రం శ్రేష్ఠం సోఽన్వగాదీత్పరాత్మన్ || ౨౬-౭ ||

శ్రుత్వా స్తోత్రం నిర్గుణస్థం సమస్తం
బ్రహ్మేశాద్యైర్నాహమిత్యప్రయాతే |
సర్వాత్మా త్వం భూరికారుణ్యవేగాత్
తార్క్ష్యారూఢః ప్రేక్షితోఽభూః పురస్తాత్ || ౨౬-౮ ||

హస్తీన్ద్రం తం హస్తపద్మేన ధృత్వా
చక్రేణ త్వం నక్రవర్యం వ్యదారీః |
గన్ధర్వేఽస్మిన్ముక్తశాపే స హస్తీ
త్వత్సారూప్యం ప్రాప్య దేదీప్యతే స్మ || ౨౬-౯ ||

ఏతద్వృత్తం త్వాం చ మాం చ ప్రగే యో
గాయేత్సోఽయం భూయసే శ్రేయసే స్యాత్ |
ఇత్యుక్త్వైనం తేన సార్ధం గతస్త్వం
ధిష్ణ్యం విష్ణో పాహి వాతాలయేశ || ౨౬-౧౦ ||

ఇతి షడ్వింశదశకం సమాప్తమ్ |


సంపూర్ణ శ్రీమన్నారాయణీయం (౧౦౦ దశకాలు) చూడండి.


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments

One thought on “Narayaneeyam Dasakam 26 – నారాయణీయం షడ్వింశదశకమ్

  1. Hi my husband was suffering with hip bone fracture for so many years.
    Please give me sthothram for healing my husband bones fractures please help
    I will do for my husband

స్పందించండి

error: Not allowed