Read in తెలుగు / ಕನ್ನಡ / தமிழ் / देवनागरी / English (IAST)
|| నిశాకరభవిష్యాఖ్యానమ్ ||
ఏవముక్త్వా మునిశ్రేష్ఠమరుదం దుఃఖితో భృశమ్ |
అథ ధ్యాత్వా ముహూర్తం తు భగవానిదమబ్రవీత్ || ౧ ||
పక్షౌ చ తే ప్రపక్షౌ చ పునరన్యౌ భవిష్యతః |
ప్రాణాశ్చ చక్షుషీ చైవ విక్రమశ్చ బలం చ తే || ౨ ||
పురాణే సుమహత్కార్యం భవిష్యతి మయా శ్రుతమ్ |
దృష్టం మే తపసా చైవ శ్రుత్వా చ విదితం మమ || ౩ ||
రాజా దశరథో నామ కశ్చిదిక్ష్వాకునందనః |
తస్య పుత్రో మహాతేజా రామో నామ భవిష్యతి || ౪ ||
అరణ్యం చ సహ భ్రాత్రా లక్ష్మణేన గమిష్యతి |
తస్మిన్నర్థే నియుక్తః సన్ పిత్రా సత్యపరాక్రమః || ౫ ||
నైరృతో రావణో నామ తస్య భార్యాం హరిష్యతి |
రాక్షసేంద్రో జనస్థానాదవధ్యః సురదానవైః || ౬ ||
సా చ కామైః ప్రలోభ్యంతీ భక్ష్యైర్భోజ్యైశ్చ మైథిలీ |
న భోక్ష్యతి మహాభాగా దుఃఖే మగ్నా యశస్వినీ || ౭ ||
పరమాన్నం తు వైదేహ్యా జ్ఞాత్వా దాస్యతి వాసవః |
యదన్నమమృతప్రఖ్యం సురాణామపి దుర్లభమ్ || ౮ ||
తదన్నం మైథిలీ ప్రాప్య విజ్ఞాయేంద్రాదిదం త్వితి |
అగ్రముద్ధృత్య రామాయ భూతలే నిర్వపిష్యతి || ౯ ||
యది జీవతి మే భర్తా లక్ష్మణేన సహ ప్రభుః |
దేవత్వం గచ్ఛతోర్వాపి తయోరన్నమిదం త్వితి || ౧౦ ||
ఏష్యంత్యన్వేషకాస్తస్యా రామదూతాః ప్లవంగమాః |
ఆఖ్యేయా రామమహిషీ త్వయా తేభ్యో విహంగమ || ౧౧ ||
సర్వథా హి న గంతవ్యమీదృశః క్వ గమిష్యసి |
దేశకాలౌ ప్రతీక్షస్వ పక్షౌ త్వం ప్రతిపత్స్యసే || ౧౨ ||
నోత్సహేయమహం కర్తుమద్యైవ త్వాం సపక్షకమ్ |
ఇహస్థస్త్వం తు లోకానాం హితం కార్యం కరిష్యసి || ౧౩ ||
త్వయాపి ఖలు తత్కార్యం తయోశ్చ నృపపుత్రయోః |
బ్రాహ్మణానాం సురాణాం చ మునీనాం వాసవస్య చ || ౧౪ ||
ఇచ్ఛామ్యహమపి ద్రష్టుం భ్రాతరౌ రామలక్ష్మణౌ |
నేచ్ఛే చిరం ధారయితుం ప్రాణాంస్త్యక్ష్యే కలేవరమ్ |
మహర్షిస్త్వబ్రవీదేవం దృష్టతత్త్వార్థదర్శనః || ౧౫ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ద్విషష్టితమః సర్గః || ౬౨ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక: శరన్నవరాత్రుల సందర్భంగా "శ్రీ లలితా స్తోత్రనిధి" మరియు "శ్రీ దుర్గా స్తోత్రనిధి" పుస్తకములు కొనుగోలుకు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
