Read in తెలుగు / ಕನ್ನಡ / தமிழ் / देवनागरी / English (IAST)
|| సంపాతిపక్షప్రరోహః ||
ఏతైరన్యైశ్చ బహుభిర్వాక్యైర్వాక్యవిదాం వరః |
మాం ప్రశస్యాభ్యనుజ్ఞాప్య ప్రవిష్టః స స్వమాశ్రమమ్ || ౧ ||
కందరాత్తు విసర్పిత్వా పర్వతస్య శనైః శనైః |
అహం వింధ్యం సమారుహ్య భవతః ప్రతిపాలయే || ౨ ||
అద్య త్వేతస్య కాలస్య సాగ్రం వర్షశతం గతమ్ |
దేశకాలప్రతీక్షోఽస్మి హృది కృత్వా మునేర్వచః || ౩ ||
మహాప్రస్థానమాసాద్య స్వర్గతే తు నిశాకరే |
మాం నిర్దహతి సంతాపో వితర్కైర్బహుభిర్వృతమ్ || ౪ ||
ఉత్థితాం మరణే బుద్ధిం మునివాక్యైర్నివర్తయే |
బుద్ధిర్యా తేన మే దత్తా ప్రాణానాం రక్షణాయ తు || ౫ ||
సా మేఽపనయతే దుఃఖం దీప్తేవాగ్నిశిఖా తమః |
బుద్ధ్యతా చ మయా వీర్యం రావణస్య దురాత్మనః || ౬ ||
పుత్రః సంతర్జితో వాగ్భిర్న త్రాతా మైథిలీ కథమ్ |
తస్యా విలపితం శ్రుత్వా తౌ చ సీతావినాకృతౌ || ౭ ||
న మే దశరథస్నేహాత్ పుత్రేణోత్పాదితం ప్రియమ్ |
తస్య త్వేవం బ్రువాణస్య సంపాతేర్వానరైః సహ || ౮ ||
ఉత్పేతతుస్తదా పక్షౌ సమక్షం వనచారిణామ్ |
స దృష్ట్వా స్వాం తనుం పక్షైరుద్గతైరరుణచ్ఛదైః || ౯ ||
ప్రహర్షమతులం లేభే వానరాంశ్చేదమబ్రవీత్ |
ఋషేర్నిశాకరస్యైవ ప్రభావాదమితాత్మనః || ౧౦ ||
ఆదిత్యరశ్మినిర్దగ్ధౌ పక్షౌ మే పునరుత్థితౌ |
యౌవనే వర్తమానస్య మమాసీద్యః పరాక్రమః || ౧౧ ||
తమేవాద్యానుగచ్ఛామి బలం పౌరుషమేవ చ |
సర్వథా క్రియతాం యత్నః సీతామధిగమిష్యథ || ౧౨ ||
పక్షలాభో మమాయం వః సిద్ధిప్రత్యయకారకః |
ఇత్యుక్త్వా స హరీన్ సర్వాన్ సంపాతిః పతగోత్తమః || ౧౩ ||
ఉత్పపాత గిరేః శృంగాజ్జిజ్ఞాసుః ఖగమాం గతిమ్ |
తస్య తద్వచనం శ్రుత్వా ప్రీతిసంహృష్టమానసాః |
బభూవుర్హరిశార్దూలా విక్రమాభ్యుదయోన్ముఖాః || ౧౪ ||
అథ పవనసమానవిక్రమాః
ప్లవగవరాః ప్రతిలబ్ధపౌరుషాః |
అభిజిదభిముఖా దిశం యయు-
-ర్జనకసుతాపరిమార్గణోన్ముఖాః || ౧౫ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే త్రిషష్టితమః సర్గః || ౬౩ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
