Kishkindha Kanda Sarga 45 – కిష్కింధాకాండ పంచచత్వారింశః సర్గః (౪౫)


|| వానరబలప్రతిష్ఠా ||

సర్వాంశ్చాహూయ సుగ్రీవః ప్లవగాన్ ప్లవగర్షభః |
సమస్తానబ్రవీద్భూయో రామకార్యార్థసిద్ధయే || ౧ ||

ఏవమేతద్విచేతవ్యం యన్మయా పరికీర్తితమ్ |
తదుగ్రశాసనం భర్తుర్విజ్ఞాయ హరిపుంగవాః || ౨ ||

శలభా ఇవ సంఛాద్య మేదినీం సంప్రతస్థిరే |
రామః ప్రస్రవణే తస్మిన్ న్యవసత్సహలక్ష్మణః || ౩ ||

ప్రతీక్షమాణస్తం మాసం యః సీతాధిగమే కృతః |
ఉత్తరాం తు దిశం రమ్యాం గిరిరాజసమావృతామ్ || ౪ ||

ప్రతస్థే హరిభిర్వీరో హరిః శతవలిస్తదా |
పూర్వాం దిశం ప్రతి యయౌ వినతో హరియూథపః || ౫ ||

తారాంగదాదిసహితః ప్లవగః పవనాత్మజః |
అగస్త్యచరితామాశాం దక్షిణాం హరియూథపః || ౬ ||

పశ్చిమాం తు దిశం ఘోరాం సుషేణః ప్లవగేశ్వరః |
ప్రతస్థే హరిశార్దూలో భృశం వరుణపాలితామ్ || ౭ ||

తతః సర్వా దిశో రాజా చోదయిత్వా యథాతథమ్ |
కపిసేనాపతీన్ ముఖ్యాన్ ముమోద సుఖితః సుఖమ్ || ౮ ||

ఏవం సంచోదితాః సర్వే రాజ్ఞా వానరయూథపాః |
స్వాం స్వాం దిశమభిప్రేత్య త్వరితాః సంప్రతస్థిరే || ౯ ||

ఆనయిష్యామహే సీతాం హనిష్యామశ్చ రావణమ్ |
నదంతశ్చోన్నదంతశ్చ గర్జంతశ్చ ప్లవంగమాః || ౧౦ ||

క్ష్వేలంతో ధావమానాశ్చ వినదంతో మహాబలాః |
అహమేకో హనిష్యామి ప్రాప్తం రావణమాహవే || ౧౧ ||

తతశ్చోన్మథ్య సహసా హరిష్యే జనకాత్మజామ్ |
వేపమానాం శ్రమేణాద్య భవద్భిః స్థీయతామితి || ౧౨ ||

ఏక ఏవాహరిష్యామి పాతాలాదపి జానకీమ్ |
విమథిష్యామ్యహం వృక్షాన్ పాతయిష్యామ్యహం గిరీన్ || ౧౩ ||

ధరణీం దారయిష్యామి క్షోభయిష్యామి సాగరాన్ |
అహం యోజనసంఖ్యాయాః ప్లవితా నాత్ర సంశయః || ౧౪ ||

శతం యోజనసంఖ్యాయాః శతం సమధికం హ్యహమ్ |
భూతలే సాగరే వాపి శైలేషు చ వనేషు చ || ౧౫ ||

పాతాలస్యాపి వా మధ్యే న మమాచ్ఛిద్యతే గతిః |
ఇత్యేకైకం తదా తత్ర వానరా బలదర్పితాః |
ఊచుశ్చ వచనం తత్ర హరిరాజస్య సన్నిధౌ || ౧౬ ||

ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే పంచచత్వారింశః సర్గః || ౪౫ ||


సంపూర్ణ వాల్మీకి రామాయణే కిష్కింధాకాండ చూడండి.


గమనిక : రాబోయే మహాశివరాత్రి సందర్భంగా "శ్రీ శివ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed