Read in తెలుగు / ಕನ್ನಡ / தமிழ் / देवनागरी / English (IAST)
|| హనూమత్సందేశః ||
విశేషేణ తు సుగ్రీవో హనుమత్యర్థముక్తవాన్ |
స హి తస్మిన్ హరిశ్రేష్ఠే నిశ్చితార్థోఽర్థసాధనే || ౧ ||
అబ్రవీచ్చ హనూమంతం విక్రాంతమనిలాత్మజమ్ |
సుగ్రీవః పరమప్రీతః ప్రభుః సర్వవనౌకసామ్ || ౨ ||
న భూమౌ నాంతరిక్షే వా నాంబరే నామరాలయే |
నాప్సు వా గతిసంగం తే పశ్యామి హరిపుంగవ || ౩ ||
సాసురాః సహగంధర్వాః సనాగనరదేవతాః |
విదితాః సర్వలోకాస్తే ససాగరధరాధరాః || ౪ ||
గతిర్వేగశ్చ తేజశ్చ లాఘవం చ మహాకపే |
పితుస్తే సదృశం వీర మారుతస్య మహాత్మనః || ౫ ||
తేజసా వాపి తే భూతం సమం భువి న విద్యతే |
తద్యథా లభ్యతే సీతా తత్త్వమేవోపపాదయ || ౬ ||
త్వయ్యేవ హనుమన్నస్తి బలం బుద్ధిః పరాక్రమః |
దేశకాలానువృత్తిశ్చ నయశ్చ నయపండిత || ౭ ||
తతః కార్యసమాసంగమవగమ్య హనూమతి |
విదిత్వా హనుమంతం చ చింతయామాస రాఘవః || ౮ ||
సర్వథా నిశ్చితార్థోఽయం హనూమతి హరీశ్వరః |
నిశ్చితార్థకరశ్చాపి హనుమాన్ కార్యసాధనే || ౯ ||
తదేవం ప్రస్థితస్యాస్య పరిజ్ఞాతస్య కర్మభిః |
భర్త్రా పరిగృహీతస్య ధ్రువః కార్యఫలోదయః || ౧౦ ||
తం సమీక్ష్య మహాతేజా వ్యవసాయోత్తరం హరిమ్ |
కృతార్థ ఇవ సంవృత్తః ప్రహృష్టేంద్రియమానసః || ౧౧ ||
దదౌ తస్య తతః ప్రీతః స్వనామాంకోపశోభితమ్ |
అంగులీయమభిజ్ఞానం రాజపుత్ర్యాః పరంతపః || ౧౨ ||
అనేన త్వాం హరిశ్రేష్ఠ చిహ్నేన జనకాత్మజా |
మత్సకాశాదనుప్రాప్తమనుద్విగ్నాఽనుపశ్యతి || ౧౩ ||
వ్యవసాయశ్చ తే వీర సత్త్వయుక్తశ్చ విక్రమః |
సుగ్రీవస్య చ సందేశః సిద్ధిం కథయతీవ మే || ౧౪ ||
స తం గృహ్య హరిశ్రేష్ఠః స్థాప్య మూర్ధ్ని కృతాంజలిః |
వందిత్వా చరణౌ చైవ ప్రస్థితః ప్లవగోత్తమః || ౧౫ ||
స తత్ప్రకర్షన్ హరిణాం బలం మహ-
-ద్బభూవ వీరః పవనాత్మజః కపిః |
గతాంబుదే వ్యోమ్ని విశుద్ధమండలః
శశీవ నక్షత్రగణోపశోభితః || ౧౬ ||
అతిబల బలమాశ్రితస్తవాహం
హరివరవిక్రమ విక్రమైరనల్పైః |
పవనసుత యథాఽభిగమ్యతే సా
జనకసుతా హనుమంస్తథా కురుష్వ || ౧౭ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే చతుశ్చత్వారింశః సర్గః || ౪౪ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక : రాబోయే మహాశివరాత్రి సందర్భంగా "శ్రీ శివ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.