Read in తెలుగు / ಕನ್ನಡ / தமிழ் / देवनागरी / English (IAST)
ధ్యానమ్ |
త్రిపాద్భస్మప్రహరణస్త్రిశిరా రక్తలోచనః |
స మే ప్రీతస్సుఖం దద్యాత్ సర్వామయపతిర్జ్వరః ||
స్తోత్రం |
విద్రావితే భూతగణే జ్వరస్తు త్రిశిరాస్త్రిపాత్ |
[* పాఠభేదః –
మహాదేవప్రయుక్తోఽసౌ ఘోరరూపో భయావహః |
ఆవిర్బభూవ పురతః సమరే శార్ఙ్గధన్వనః ||
*]
అభ్యధావత దాశార్హం దహన్నివ దిశో దశ ||
అథ నారాయణో దేవస్తం దృష్ట్వా వ్యసృజజ్జ్వరమ్ || ౧ ||
మాహేశ్వరో వైష్ణవశ్చ యుయుధాతే జ్వరావుభౌ |
మాహేశ్వరః సమాక్రన్దన్వైష్ణవేన బలార్దితః || ౨ ||
అలబ్ధ్వాఽభయమన్యత్ర భీతో మాహేశ్వరో జ్వరః |
శరణార్థీ హృషీకేశం తుష్టావ ప్రయతాంజలిః || ౩ ||
జ్వర ఉవాచ ||
నమామి త్వాఽనంతశక్తిం పరేశం
సర్వాత్మానం కేవలం జ్ఞప్తిమాత్రమ్ |
విశ్వోత్పత్తిస్థానసంరోధహేతుం
యత్తద్బ్రహ్మ బ్రహ్మలింగం ప్రశాంతమ్ || ౪ ||
కాలో దైవం కర్మ జీవః స్వభావో
ద్రవ్యం క్షేత్రం ప్రాణ ఆత్మా వికారః |
తత్సంఘాతో బీజరోహప్రవాహ-
-స్త్వన్మాయైషా తన్నిషేధం ప్రపద్యే || ౫ ||
నానాభావైర్లీలయైవోపపన్నై-
-ర్దేవాన్సాధూన్లోకసేతూన్బిభర్షి |
హంస్యున్మార్గాన్హింసయా వర్తమానాన్
జన్మైతత్తే భారహారాయ భూమేః || ౬ ||
తప్తోఽహం తే తేజసా దుఃసహేన
శాంతోగ్రేణాత్యుల్బణేన జ్వరేణ |
తావత్తాపో దేహినాం తేఽంఘ్రిమూలం
నో సేవేరన్యావదాశానుబద్ధాః || ౭ ||
శ్రీ భగవానువాచ ||
త్రిశిరస్తే ప్రసన్నోఽస్మి వ్యేతు తే మజ్జ్వరాద్భయమ్ |
యో నౌ స్మరతి సంవాదం తస్య త్వన్నభవేద్భయమ్ || ౮ ||
ఇత్యుక్తోఽచ్యుతమానమ్య గతో మాహేశ్వరో జ్వరః |
బాణస్తు రథమారూఢః ప్రాగాద్యోత్స్యంజనార్దనమ్ || ౯ ||
ఇతి శ్రీమద్భాగవతే దశమస్కంధే త్రిషష్టితమోఽధ్యాయే జ్వరకృత కృష్ణస్తోత్రమ్ |
మరిన్ని శ్రీ కృష్ణ స్తోత్రాలు చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
