Read in తెలుగు / ಕನ್ನಡ / தமிழ் / देवनागरी / English (IAST)
|| prahastayuddham ||
akampanavadhaṁ śrutvā kruddhō vai rākṣasēśvaraḥ |
kiñciddīnamukhaścāpi sacivāṁstānudaikṣataḥ || 1 ||
sa tu dhyātvā muhūrtaṁ tu mantribhiḥ saṁvicārya ca |
tatastu rāvaṇaḥ pūrvadivasē rākṣasādhipaḥ || 2 ||
purīṁ pariyayau laṅkāṁ sarvāngulmānavēkṣitum |
tāṁ rākṣasagaṇairguptāṁ gulmairbahubhirāvr̥tām || 3 ||
dadarśa nagarīṁ laṅkāṁ patākādhvajamālinīm |
ruddhāṁ tu nagarīṁ dr̥ṣṭvā rāvaṇō rākṣasēśvaraḥ || 4 ||
uvācāmarṣataḥ kālē prahastaṁ yuddhakōvidam |
purasyōpaniviṣṭasya sahasā pīḍitasya vā || 5 ||
nānyaṁ yuddhātprapaśyāmi mōkṣaṁ yuddhaviśārada |
ahaṁ vā kumbhakarṇō vā tvaṁ vā sēnāpatirmama || 6 ||
indrajidvā nikumbhō vā vahēyurbhāramīdr̥śam |
sa tvaṁ balamataḥ śīghramādāya parigr̥hya ca || 7 ||
vijayāyābhiniryāhi yatra sarvē vanaukasaḥ |
niryāṇādēva tē nūnaṁ capalā harivāhinī || 8 ||
nardatāṁ rākṣasēndrāṇāṁ śrutvā nādaṁ draviṣyati |
capalā hyavinītāśca calacittāśca vānarāḥ || 9 ||
na sahiṣyanti tē nādaṁ siṁhanādamiva dvipāḥ |
vidrutē ca balē tasminrāmaḥ saumitriṇā saha || 10 ||
avaśastē nirālambaḥ prahasta vaśamēṣyati |
āpatsaṁśayitā śrēyō na tu niḥsaṁśayīkr̥tā || 11 ||
pratilōmānulōmaṁ vā yadvā nō manyasē hitam |
rāvaṇēnaivamuktastu prahastō vāhinīpatiḥ || 12 ||
rākṣasēndramuvācēdamasurēndramivōśanā |
rājanmantritapūrvaṁ naḥ kuśalaiḥ saha mantribhiḥ || 13 ||
vivādaścāpi nō vr̥ttaḥ samavēkṣya parasparam |
pradānēna tu sītāyāḥ śrēyō vyavasitaṁ mayā || 14 ||
apradānē punaryuddhaṁ dr̥ṣṭamētattathaiva naḥ |
sō:’haṁ dānaiśca mānaiśca satataṁ pūjitastvayā || 15 ||
sāntvaiśca vividhaiḥ kālē kiṁ na kuryāṁ priyaṁ tava |
na hi mē jīvitaṁ rakṣyaṁ putradāradhanāni vā || 16 ||
tvaṁ paśya māṁ juhūṣantaṁ tvadarthaṁ jīvitaṁ yudhi |
ēvamuktvā tu bhartāraṁ rāvaṇaṁ vāhinīpatiḥ || 17 ||
uvācēdaṁ balādhyakṣānprahastaḥ purataḥ sthitān |
samānayata mē śīghraṁ rākṣasānāṁ mahadbalam || 18 ||
madbāṇāśanivēgēna hatānāṁ ca raṇājirē |
adya tr̥pyantu māṁsādāḥ pakṣiṇaḥ kānanaukasām || 19 ||
ityuktāstē prahastēna balādhyakṣāḥ kr̥tatvarāḥ |
balamudyōjayāmāsustasminrākṣasamandirē || 20 ||
sā babhūva muhūrtēna tigmanānāvidhāyudhaiḥ |
laṅkā rākṣasavīraistairgajairiva samākulā || 21 ||
hutāśanaṁ tarpayatāṁ brāhmaṇāṁśca namasyatām |
ājyagandhaprativahaḥ surabhirmārutō vavau || 22 ||
srajaśca vividhākārā jagr̥hustvabhimantritāḥ |
saṅgrāmasajjāḥ saṁhr̥ṣṭā dhārayanrākṣasāstadā || 23 ||
sadhanuṣkāḥ kavacinō vēgādāplutya rākṣasāḥ |
rāvaṇaṁ prēkṣya rājānaṁ prahastaṁ paryavārayan || 24 ||
athāmantrya ca rājānaṁ bhērīmāhatya bhairavām |
ārurōha rathaṁ divyaṁ prahastaḥ sajjakalpitam || 25 ||
hayairmahājavairyuktaṁ samyaksūtasusamyatam |
mahājaladanirghōṣaṁ sākṣāccandrārkabhāsvaram || 26 ||
uragadhvajadurdharṣaṁ suvarūthaṁ svavaskaram |
suvarṇajālasamyuktaṁ prahasantamiva śriyā || 27 ||
tatastaṁ rathamāsthāya rāvaṇārpitaśāsanaḥ |
laṅkāyā niryayau tūrṇaṁ balēna mahatā:’:’vr̥taḥ || 28 ||
tatō dundubhinirghōṣaḥ parjanyaninadōpamaḥ |
vāditrāṇāṁ ca ninadaḥ pūrayanniva sāgaram || 29 ||
śuśruvē śaṅkhaśabdaśca prayātē vāhinīpatau |
ninadantaḥ svarānghōrānrākṣasā jagmuragrataḥ || 30 ||
bhīmarūpā mahākāyāḥ prahastasya puraḥsarāḥ |
narāntakaḥ kumbhahanurmahānādaḥ samunnataḥ || 31 ||
prahastasacivā hyētē niryayuḥ parivārya tam |
vyūḍhēnaiva sughōrēṇa pūrvadvārātsa niryayau || 32 ||
gajayūthanikāśēna balēna mahatā vr̥taḥ |
sāgarapratimaughēna vr̥tastēna balēna saḥ || 33 ||
prahastō niryayau tūrṇaṁ kālāntakayamōpamaḥ |
tasya niryāṇaghōṣēṇa rākṣasānāṁ ca nardatām || 34 ||
laṅkāyāṁ sarvabhūtāni vinēdurvikr̥taiḥ svaraiḥ |
vyabhramākāśamāviśya māṁsaśōṇitabhōjanāḥ || 35 ||
maṇḍalānyapasavyāni khagāścakrū rathaṁ prati |
vamantyaḥ pāvakajvālāḥ śivā ghōraṁ vavāśirē || 36 ||
antarikṣātpapātōlkā vāyuśca paruṣō vavau |
anyōnyamabhisaṁrabdhā grahāśca na cakāśirē || 37 ||
mēghāśca kharanirghōṣā rathasyōpari rakṣasaḥ |
vavr̥ṣū rudhiraṁ cāsya siṣicuśca puraḥsarān || 38 ||
kētumūrdhani gr̥dhrō:’sya nilīnō dakṣiṇāmukhaḥ |
tudannubhayataḥ pārśvaṁ samagrāmaharatprabhām || 39 ||
sārathērbahuśaścāsya saṅgrāmamavagāhataḥ |
pratōdō nyapataddhastātsūtasya hayasādinaḥ || 40 ||
niryāṇaśrīśca yāsyāsīdbhāsvarā vasudurlabhā |
sā nanāśa muhūrtēna samē ca skhalitā hayāḥ || 41 ||
prahastaṁ tvabhiniryāntaṁ prakhyātabalapauruṣam |
yudhi nānāpraharaṇā kapisēnā:’bhyavartata || 42 ||
atha ghōṣaḥ sutumulō harīṇāṁ samajāyata |
vr̥kṣānārujatāṁ caiva gurvīrāgr̥hṇatāṁ śilāḥ || 43 ||
nadatāṁ rākṣasānāṁ ca vānarāṇāṁ ca garjatām |
ubhē pramuditē sainyē rakṣōgaṇavanaukasām || 44 ||
vēgitānāṁ samarthānāmanyōnyavadhakāṅkṣiṇām |
parasparaṁ cāhvayatāṁ ninādaḥ śrūyatē mahān || 45 ||
tataḥ prahastaḥ kapirājavāhinīṁ
abhipratasthē vijayāya durmatiḥ |
vivr̥ddhavēgāṁ ca vivēśa tāṁ camūṁ
yathā mumūrṣuḥ śalabhō vibhāvasum || 46 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē saptapañcāśaḥ sargaḥ || 57 ||
yuddhakāṇḍa aṣṭapañcāśaḥ sargaḥ (58) >>
See vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
