Read in తెలుగు / ಕನ್ನಡ / தமிழ் / देवनागरी / English (IAST)
|| indravaradānam ||
pratiyātē tu kākutsthē mahēndraḥ pākaśāsanaḥ | [pratiprayātē]
abravītparamaprītō rāghavaṁ prāñjaliṁ sthitam || 1 ||
amōghaṁ darśanaṁ rāma tavāsmākaṁ parantapa |
prītiyuktāḥ sma tēna tvaṁ brūhi yanmanasēcchasi || 2 ||
ēvamuktastu kākutsthaḥ pratyuvāca kr̥tāñjaliḥ |
lakṣmaṇēna saha bhrātrā sītayā saha bhāryayā || 3 ||
yadi prītiḥ samutpannā mayi sarvasurēśvara |
vakṣyāmi kuru tē satyaṁ vacanaṁ vadatāṁ vara || 4 ||
mama hētōḥ parākrāntā yē gatā yamasādanam |
tē sarvē jīvitaṁ prāpya samuttiṣṭhantu vānarāḥ || 5 ||
matkr̥tē viprayuktā yē putrairdāraiśca vānarāḥ |
matpriyēṣvabhiyuktāśca na mr̥tyuṁ gaṇayanti ca || 6 ||
tvatprasādātsamēyustē varamētadahaṁ vr̥ṇē |
nīrujō nirvraṇāṁścaiva sampannabalapauruṣān || 7 ||
gōlāṅgūlāṁstathaivarkṣāndraṣṭumicchāmi mānada |
akālē cāpi mukhyāni mūlāni ca phalāni ca || 8 ||
nadyaśca vimalāstatra tiṣṭhēyuryatra vānarāḥ |
śrutvā tu vacanaṁ tasya rāghavasya mahātmanaḥ || 9 ||
mahēndraḥ pratyuvācēdaṁ vacanaṁ prītilakṣaṇam |
mahānayaṁ varastāta tvayōktō raghunandana || 10 ||
dvirmayā nōktapūrvaṁ hi tasmādētadbhaviṣyati |
samutthāsyanti harayō yē hatā yudhi rākṣasaiḥ || 11 ||
r̥kṣāśca sahagōpucchā nikr̥ttānanabāhavaḥ |
nīrujō nirvraṇāścaiva sampannabalapauruṣāḥ || 12 ||
samutthāsyanti harayaḥ suptā nidrākṣayē yathā |
suhr̥dbhirbāndhavaiścaiva jñātibhiḥ svajanairapi || 13 ||
sarva ēva samēṣyanti samyuktāḥ parayā mudā |
akālē puṣpaśabalāḥ phalavantaśca pādapāḥ || 14 ||
bhaviṣyanti mahēṣvāsa nadyaśca salilāyutāḥ |
savraṇaiḥ prathamaṁ gātraiḥ saṁvr̥ttairnirvraṇaiḥ punaḥ || 15 ||
tataḥ samutthitāḥ sarvē suptvēva haripuṅgavāḥ |
babhūvurvānarāḥ sarvē kimētaditi vismitāḥ || 16 ||
tē sarvē vānarāstasmai rāghavāyābhyavādayan |
kākutsthaṁ paripūrṇārthaṁ dr̥ṣṭvā sarvē surōttamāḥ || 17 ||
ūcustē prathamaṁ stutvā stavārhaṁ sahalakṣmaṇam |
gacchāyōdhyāmitō vīra visarjaya ca vānarān || 18 ||
maithilīṁ sāntvayasvaināmanuraktāṁ tapasvinīm |
śatrughnaṁ ca mahātmānaṁ mātr̥̄ḥ sarvāḥ parantapa || 19 ||
bhrātaraṁ paśya bharataṁ tvacchōkādvratadhāriṇam |
abhiṣēcaya cātmānaṁ paurāngatvā praharṣaya || 20 ||
ēvamuktvā tamāmantrya rāmaṁ saumitriṇā saha |
vimānaiḥ sūryasaṅkāśairhr̥ṣṭā jagmuḥ surā divam || 21 ||
abhivādya ca kākutsthaḥ sarvāṁstāṁstridaśōttamān |
lakṣmaṇēna saha bhrātrā vāsamājñāpayattadā || 22 ||
tatastu sā lakṣmaṇarāmapālitā
mahācamūrhr̥ṣṭajanā yaśasvinī |
śriyā jvalantī virarāja sarvatō
niśā praṇītēva hi śītaraśminā || 23 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē trayōviṁśatyuttaraśatatamaḥ sargaḥ || 123 ||
yuddhakāṇḍa caturviṁśatyuttaraśatatamaḥ sargaḥ (124) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.