Read in తెలుగు / ಕನ್ನಡ / தமிழ் / देवनागरी / English (IAST)
|| sītābhartumukhōdīkṣaṇam ||
sa uvāca mahāprājñamabhigamya plavaṅgamaḥ |
rāmaṁ vacanamarthajñō varaṁ sarvadhanuṣmatām || 1 ||
yannimittō:’yamārambhaḥ karmaṇāṁ ca phalōdayaḥ |
tāṁ dēvīṁ śōkasantaptāṁ maithilīṁ draṣṭumarhasi || 2 ||
sā hi śōkasamāviṣṭā bāṣpaparyākulēkṣaṇā |
maithilī vijayaṁ śrutvā tava harṣamupāgamat || 3 ||
pūrvakātpratyayāccāhamuktō viśvastayā tayā |
bhartāraṁ draṣṭumicchāmi kr̥tārthaṁ sahalakṣmaṇam || 4 ||
ēvamuktō hanumatā rāmō dharmabhr̥tāṁ varaḥ |
agacchatsahasā dhyānamīṣadbāṣpapariplutaḥ || 5 ||
dīrghamuṣṇaṁ viniśvasya mēdinīmavalōkayan |
uvāca mēghasaṅkāśaṁ vibhīṣaṇamupasthitam || 6 ||
divyāṅgarāgāṁ vaidēhīṁ divyābharaṇabhūṣitām |
iha sītāṁ śiraḥsnātāmupasthāpaya mā ciram || 7 ||
ēvamuktastu rāmēṇa tvaramāṇō vibhīṣaṇaḥ |
praviśyāntaḥpuraṁ sītāṁ svābhiḥ strībhiracōdayat || 8 ||
divyāṅgarāgā vaidēhi divyābharaṇabhūṣitā |
yānamārōha bhadraṁ tē bhartā tvāṁ draṣṭumicchati || 9 ||
ēvamuktā tu vēdēhī pratyuvāca vibhīṣaṇam |
asnātā draṣṭumicchāmi bhartāraṁ rākṣasādhipa || 10 ||
tasyāstadvacanaṁ śrutvā pratyuvāca vibhīṣaṇaḥ |
yadāha rājā bhartā tē tattathā kartumarhasi || 11 ||
tasya tadvacanaṁ śrutvā maithilī bhartr̥dēvatā |
bhartr̥bhaktivratā sādhvī tathēti pratyabhāṣata || 12 ||
tataḥ sītāṁ śiraḥsnātāṁ yuvatībhiralaṅkr̥tām |
mahārhābharaṇōpētāṁ mahārhāmbaradhāriṇīm || 13 ||
ārōpya śibikāṁ dīptāṁ parārdhyāmbarasaṁvr̥tām |
rakṣōbhirbahubhirguptāmājahāra vibhīṣaṇaḥ || 14 ||
sō:’bhigamya mahātmānaṁ jñātvā:’pi dhyānamāsthitam |
praṇataśca prahr̥ṣṭaśca prāptaṁ sītāṁ nyavēdayat || 15 ||
tāmāgatāmupaśrutya rakṣōgr̥hacirōṣitām |
harṣō dainyaṁ ca rōṣaśca trayaṁ rāghavamāviśat || 16 ||
tataḥ pārśvagataṁ dr̥ṣṭvā savimarśaṁ vicārayan |
vibhīṣaṇamidaṁ vākyamahr̥ṣṭaṁ rāghavō:’bravīt || 17 ||
rākṣasādhipatē saumya nityaṁ madvijayē rata |
vaidēhī sannikarṣaṁ mē śīghraṁ samupagacchatu || 18 ||
sa tadvacanamājñāya rāghavasya vibhīṣaṇaḥ |
tūrṇamutsāraṇē yatnaṁ kārayāmāsa sarvataḥ || 19 ||
kañcukōṣṇīṣiṇastatra vētrajarjarapāṇayaḥ |
utsārayantaḥ puruṣāḥ samantātparicakramuḥ || 20 ||
r̥kṣāṇāṁ vānarāṇāṁ ca rākṣasānāṁ ca sarvaśaḥ |
vr̥ndānyutsāryamāṇāni dūramutsasr̥justadā || 21 ||
tēṣāmutsāryamāṇānāṁ sarvēṣāṁ dhvanirutthitaḥ |
vāyunōdvartamānasya sāgarasyēva nisvanaḥ || 22 ||
utsāryamāṇāṁstāndr̥ṣṭvā samantājjātasambhramān |
dākṣiṇyāttadamarṣācca vārayāmāsa rāghavaḥ || 23 ||
saṁrabdhaścābravīdrāmaścakṣuṣā pradahanniva |
vibhīṣaṇaṁ mahāprājñaṁ sōpālambhamidaṁ vacaḥ || 24 ||
kimarthaṁ māmanādr̥tya kliśyatē:’yaṁ tvayā janaḥ |
nivartayainamudyōgaṁ janō:’yaṁ svajanō mama || 25 ||
na gr̥hāṇi na vastrāṇi na prākārāstiraskriyāḥ |
nēdr̥śā rājasatkārā vr̥ttamāvaraṇaṁ striyāḥ || 26 ||
vyasanēṣu na kr̥cchrēṣu na yuddhēṣu svayaṁvarē |
na kratau na vivāhē ca darśanaṁ duṣyati striyāḥ || 27 ||
saiṣā yuddhagatā caiva kr̥cchrē ca mahati sthitā |
darśanē:’syā na dōṣaḥ syānmatsamīpē viśēṣataḥ || 28 ||
[* adhikaślōkaṁ –
visr̥jya śibikāṁ tasmātpadbhyāmēvōpasarpatu |
samīpē mama vaidēhīṁ paśyantvētē vanaukasaḥ ||
*]
tadānaya samīpaṁ mē śīghramēnāṁ vibhīṣaṇa |
sītā paśyatu māmēṣā suhr̥dgaṇavr̥taṁ sthitam || 29 ||
ēvamuktastu rāmēṇa savimarśō vibhīṣaṇaḥ |
rāmasyōpānayatsītāṁ sannikarṣaṁ vinītavat || 30 ||
tatō lakṣmaṇasugrīvau hanumāṁśca plavaṅgamaḥ |
niśamya vākyaṁ rāmasya babhūvurvyathitā bhr̥śam || 31 ||
kalatranirapēkṣaiśca iṅgitairasya dāruṇaiḥ |
aprītamiva sītāyāṁ tarkayanti sma rāghavam || 32 ||
lajjayā tvavalīyantī svēṣu gātrēṣu maithilī |
vibhīṣaṇēnānugatā bhartāraṁ sā:’bhyavartata || 33 ||
sā vastrasaṁruddhamukhī lajjayā janasaṁsadi |
rurōdāsādya bhartāramāryaputrēti bhāṣiṇī || 34 ||
vismayācca praharṣācca snēhācca patidēvatā |
udaikṣata mukhaṁ bhartuḥ saumyaṁ saumyatarānanā || 35 ||
atha samapanudanmanaḥklamaṁ sā
suciramadr̥ṣṭamudīkṣya vai priyasya |
vadanamuditapūrṇacandrakāntaṁ
vimalaśaśāṅkanibhānanā tadānīm || 36 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē saptadaśōttaraśatatamaḥ sargaḥ || 117 ||
yuddhakāṇḍa aṣṭādaśōttaraśatatamaḥ sargaḥ (118) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.