Read in తెలుగు / ಕನ್ನಡ / தமிழ் / देवनागरी / English (IAST)
|| aṅgulīyakapradānam ||
bhūya ēva mahātējā hanumānmārutātmajaḥ |
abravītpraśritaṁ vākyaṁ sītāpratyayakāraṇāt || 1 ||
vānarō:’haṁ mahābhāgē dūtō rāmasya dhīmataḥ |
rāmanāmāṅkitaṁ cēdaṁ paśya dēvyaṅgulīyakam || 2 ||
pratyayārthaṁ tavānītaṁ tēna dattaṁ mahātmanā |
samāśvasihi bhadraṁ tē kṣīṇaduḥkhaphalā hyasi || 3 ||
gr̥hītvā prēkṣamāṇā sā bhartuḥ karavibhūṣaṇam |
bhartāramiva samprāptā jānakī muditā:’bhavat || 4 ||
cāru tadvadanaṁ tasyāstāmraśuklāyatēkṣaṇam |
aśōbhata viśālākṣyā rāhumukta ivōḍurāṭ || 5 ||
tataḥ sā hrīmatī bālā bhartr̥sandēśaharṣitā |
parituṣṭā priyaṁ kr̥tvā praśaśaṁsa mahākapim || 6 ||
vikrāntastvaṁ samarthastvaṁ prājñastvaṁ vānarōttama |
yēnēdaṁ rākṣasapadaṁ tvayaikēna pradharṣitam || 7 ||
śatayōjanavistīrṇaḥ sāgarō makarālayaḥ |
vikramaślāghanīyēna kramatā gōṣpadīkr̥taḥ || 8 ||
na hi tvāṁ prākr̥taṁ manyē vānaraṁ vānararṣabha |
yasya tē nāsti santrāsō rāvaṇānnāpi sambhramaḥ || 9 ||
arhasē ca kapiśrēṣṭha mayā samabhibhāṣitum |
yadyasi prēṣitastēna rāmēṇa viditātmanā || 10 ||
prēṣayiṣyati durdharṣō rāmō na hyaparīkṣitam |
parākramamavijñāya matsakāśaṁ viśēṣataḥ || 11 ||
diṣṭyā sa kuśalī rāmō dharmātmā satyasaṅgaraḥ |
lakṣmaṇaśca mahātējāḥ sumitrānandavardhanaḥ || 12 ||
kuśalī yadi kākutsthaḥ kiṁ nu sāgaramēkhalām |
mahīṁ dahati kōpēna yugāntāgnirivōtthitaḥ || 13 ||
athavā śaktimantau tau surāṇāmapi nigrahē |
mamaiva tu na duḥkhānāmasti manyē viparyayaḥ || 14 ||
kaccinna vyathitō rāmaḥ kaccinna paritapyatē |
uttarāṇi ca kāryāṇi kurutē puruṣōttamaḥ || 15 ||
kaccinna dīnaḥ sambhrāntaḥ kāryēṣu ca na muhyati |
kaccitpuruṣakāryāṇi kurutē nr̥patēḥ sutaḥ || 16 ||
dvividhaṁ trividhōpāyamupāyamapi sēvatē |
vijigīṣuḥ suhr̥tkaccinmitrēṣu ca parantapaḥ || 17 ||
kaccinmitrāṇi labhatē mitraiścāpyabhigamyatē |
kaccitkalyāṇamitraśca mitraiścāpi puraskr̥taḥ || 18 ||
kaccidāśāsti dēvānāṁ prasādaṁ pārthivātmajaḥ |
kaccitpuruṣakāraṁ ca daivaṁ ca pratipadyatē || 19 ||
kaccinna vigatasnēhaḥ vivāsānmayi rāghavaḥ | [prasādāt]
kaccinmāṁ vyasanādasmānmōkṣayiṣyati vānara || 20 ||
sukhānāmucitō nityamasukhānāmanūcitaḥ |
duḥkhamuttaramāsādya kaccidrāmō na sīdati || 21 ||
kausalyāyāstathā kaccitsumitrāyāstathaiva ca |
abhīkṣṇaṁ śrūyatē kaccitkuśalaṁ bharatasya ca || 22 ||
mannimittēna mānārhaḥ kaccicchōkēna rāghavaḥ |
kaccinnānyamanā rāmaḥ kaccinmāṁ tārayiṣyati || 23 ||
kaccidakṣauhiṇīṁ bhīmāṁ bharatō bhrātr̥vatsalaḥ |
dhvajinīṁ mantribhirguptāṁ prēṣayiṣyati matkr̥tē || 24 ||
vānarādhipatiḥ śrīmānsugrīvaḥ kaccidēṣyati |
matkr̥tē haribhirvīrairvr̥tō dantanakhāyudhaiḥ || 25 ||
kaccicca lakṣmaṇaḥ śūraḥ sumitrānandavardhanaḥ |
astraviccharajālēna rākṣasānvidhamiṣyati || 26 ||
raudrēṇa kaccidastrēṇa jvalatā nihataṁ raṇē |
drakṣyāmyalpēna kālēna rāvaṇaṁ sasuhr̥jjanam || 27 ||
kaccinna taddhēmasamānavarṇaṁ
tasyānanaṁ padmasamānagandhi |
mayā vinā śuṣyati śōkadīnaṁ
jalakṣayē padmamivātapēna || 28 ||
dharmāpadēśāttyajataśca rājyaṁ
māṁ cāpyaraṇyaṁ nayataḥ padātim |
nāsīdvyathā yasya na bhīrna śōkaḥ
kaccicca dhairyaṁ hr̥dayē karōti || 29 ||
na cāsya mātā na pitā ca nānyaḥ
snēhādviśiṣṭō:’sti mayā samō vā |
tāvattvahaṁ dūta jijīviṣēyaṁ
yāvatpravr̥ttiṁ śr̥ṇuyāṁ priyasya || 30 ||
itīva dēvī vacanaṁ mahārthaṁ
taṁ vānarēndraṁ madhurārthamuktvā |
śrōtuṁ punastasya vacō:’bhirāmaṁ
rāmārthayuktaṁ virarāma rāmā || 31 ||
sītāyā vacanaṁ śrutvā mārutirbhīmavikramaḥ |
śirasyañjalimādhāya vākyamuttaramabravīt || 32 ||
na tvāmihasthāṁ jānītē rāmaḥ kamalalōcanē |
tēna tvāṁ nānayatyāśu śacīmiva purandaraḥ || 33 ||
śrutvaiva tu vacō mahyaṁ kṣipramēṣyati rāghavaḥ |
camūṁ prakarṣanmahatīṁ haryr̥kṣagaṇasaṁ-kulām || 34 ||
viṣṭambhayitvā bāṇaughairakṣōbhyaṁ varuṇālayam |
kariṣyati purīṁ laṅkāṁ kākutsthaḥ śāntarākṣasām || 35 ||
tatra yadyantarā mr̥tyuryadi dēvāḥ sahāsurāḥ |
sthāsyanti pathi rāmasya sa tānapi vadhiṣyati || 36 ||
tavādarśanajēnāryē śōkēna sa pariplutaḥ |
na śarma labhatē rāmaḥ siṁhārdita iva dvipaḥ || 37 ||
malayēna ca vindhyēna mēruṇā mandarēṇa ca |
dardurēṇa ca tē dēvi śapē mūlaphalēna ca || 38 ||
yathā sunayanaṁ valgu bimbōṣṭhaṁ cārukuṇḍalam |
mukhaṁ drakṣyasi rāmasya pūrṇacandramivōditam || 39 ||
kṣipraṁ drakṣyasi vaidēhi rāmaṁ prasravaṇē girau |
śatakratumivāsīnaṁ nākapr̥ṣṭhasya mūrdhani || 40 ||
na māṁsaṁ rāghavō bhuṅktē na cāpi madhu sēvatē |
vanyaṁ suvihitaṁ nityaṁ bhaktamaśnāti pañcamam || 41 ||
naiva daṁ-śānna maśakānna kīṭānna sarīsr̥pān |
rāghavō:’panayēdgātrāttvadgatēnāntarātmanā || 42 ||
nityaṁ dhyānaparō rāmō nityaṁ śōkaparāyaṇaḥ |
nānyaccintayatē kiñcitsa tu kāmavaśaṁ gataḥ || 43 ||
anidraḥ satataṁ rāmaḥ suptō:’pi ca narōttamaḥ |
sītēti madhurāṁ vāṇīṁ vyāharanpratibudhyatē || 44 ||
dr̥ṣṭvā phalaṁ vā puṣpaṁ vā yadvānyatsumanōharam |
bahuśō hā priyētyēvaṁ śvasaṁstvāmabhibhāṣatē || 45 ||
sa dēvi nityaṁ paritapyamāna-
-stvāmēva sītētyabhibhāṣamāṇaḥ |
dhr̥ḍhavratō rājasutō mahātmā
tavaiva lābhāya kr̥taprayatnaḥ || 46 ||
sā rāmasaṁ-kīrtanavītaśōkā
rāmasya śōkēna samānaśōkā |
śaranmukhē sāmbudaśēṣacandrā
niśēva vaidēhasutā babhūva || 47 ||
ityārṣē śrīmadrāmāyaṇē vālmīkīyē ādikāvyē sundarakāṇḍē ṣaṭtriṁśaḥ sargaḥ || 36 ||
sundarakāṇḍa saptatriṁśaḥ sargaḥ (37)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.