Read in తెలుగు / ಕನ್ನಡ / தமிழ் / देवनागरी / English (IAST)
|| hanūmatkr̥tyākr̥tyavicintanam ||
hanumānapi viśrāntaḥ sarvaṁ śuśrāva tattvataḥ |
sītāyāstrijaṭāyāśca rākṣasīnāṁ ca tarjanam || 1 ||
avēkṣamāṇastāṁ dēvīṁ dēvatāmiva nandanē |
tatō bahuvidhāṁ cintāṁ cintayāmāsa vānaraḥ || 2 ||
yāṁ kapīnāṁ sahasrāṇi subahūnyayutāni ca |
dikṣu sarvāsu mārgantē sēyamāsāditā mayā || 3 ||
cārēṇa tu suyuktēna śatrōḥ śaktimavēkṣatā |
gūḍhēna caratā tāvadavēkṣitamidaṁ mayā || 4 ||
rākṣasānāṁ viśēṣaśca purī cēyamavēkṣitā |
rākṣasādhipatērasya prabhāvō rāvaṇasya ca || 5 ||
yuktaṁ tasyāpramēyasya sarvasattvadayāvataḥ |
samāśvāsayituṁ bhāryāṁ patidarśanakāṅkṣiṇīm || 6 ||
ahamāśvāsayāmyēnāṁ pūrṇacandranibhānanām |
adr̥ṣṭaduḥkhāṁ duḥkhārtāṁ duḥkhasyāntamagacchatīm || 7 ||
yadyapyahamimāṁ dēvīṁ śōkōpahatacētanām |
anāśvāsya gamiṣyāmi dōṣavadgamanaṁ bhavēt || 8 ||
gatē hi mayi tatrēyaṁ rājaputrī yaśasvinī |
paritrāṇamavindantī jānakī jīvitaṁ tyajēt || 9 ||
mayā ca sa mahābāhuḥ pūrṇacandranibhānanaḥ |
samāśvāsayituṁ nyāyyaḥ sītādarśanalālasaḥ || 10 ||
niśācarīṇāṁ pratyakṣamanarhaṁ cāpi bhāṣaṇam |
kathaṁ nu khalu kartavyamidaṁ kr̥cchragatō hyaham || 11 ||
anēna rātriśēṣēṇa yadi nāśvāsyatē mayā |
sarvathā nāsti sandēhaḥ parityakṣyati jīvitam || 12 ||
rāmaśca yadi pr̥cchēnmāṁ kiṁ māṁ sītā:’bravīdvacaḥ |
kimahaṁ taṁ pratibrūyāmasambhāṣya sumadhyamām || 13 ||
sītāsandēśarahitaṁ māmitastvarayā gatam |
nirdahēdapi kākutsthaḥ kruddhastīvrēṇa cakṣuṣā || 14 ||
yadi cōdyōjayiṣyāmi bhartāraṁ rāmakāraṇāt |
vyarthamāgamanaṁ tasya sasainyasya bhaviṣyati || 15 ||
antaraṁ tvahamāsādya rākṣasīnāmiha sthitaḥ |
śanairāśvāsayiṣyāmi santāpabahulāmimām || 16 ||
ahaṁ tvatitanuścaiva vānaraśca viśēṣataḥ |
vācaṁ cōdāhariṣyāmi mānuṣīmiha saṁskr̥tām || 17 ||
yadi vācaṁ pradāsyāmi dvijātiriva saṁskr̥tām |
rāvaṇaṁ manyamānā māṁ sītā bhītā bhaviṣyati || 18 ||
vānarasya viśēṣēṇa kathaṁ syādabhibhāṣaṇam |
avaśyamēva vaktavyaṁ mānuṣaṁ vākyamarthavat || 19 ||
mayā sāntvayituṁ śakyā nānyathēyamaninditā |
sēyamālōkya mē rūpaṁ jānakī bhāṣitaṁ tathā || 20 ||
rakṣōbhistrāsitā pūrvaṁ bhūyastrāsaṁ gamiṣyati |
tatō jātaparitrāsā śabdaṁ kuryānmanasvinī || 21 ||
jānamānā viśālākṣī rāvaṇaṁ kāmarūpiṇam |
sītayā ca kr̥tē śabdē sahasā rākṣasīgaṇaḥ || 22 ||
nānāpraharaṇō ghōraḥ samēyādantakōpamaḥ |
tatō māṁ samparikṣipya sarvatō vikr̥tānanāḥ || 23 ||
vadhē ca grahaṇē caiva kuryuryatnaṁ yathābalam |
gr̥hya śākhāḥ praśākhāśca skandhāṁścōttamaśākhinām || 24 ||
dr̥ṣṭvā viparidhāvantaṁ bhavēyurbhayaśaṅkitāḥ |
mama rūpaṁ ca samprēkṣya vanē vicaratō mahat || 25 ||
rākṣasyō bhayavitrastā bhavēyurvikr̥tānanāḥ |
tataḥ kuryuḥ samāhvānaṁ rākṣasyō rakṣasāmapi || 26 ||
rākṣasēndraniyuktānāṁ rākṣasēndranivēśanē |
tē śūlaśaktinistriṁśavividhāyudhapāṇayaḥ || 27 ||
āpatēyurvimardē:’sminvēgēnōdvignakāriṇaḥ |
saṁruddhastaiḥ suparitō vidhamanrakṣasāṁ balam || 28 ||
śaknuyāṁ na tu samprāptuṁ paraṁ pāraṁ mahōdadhēḥ |
māṁ vā gr̥hṇīyurāplutya bahavaḥ śīghrakāriṇaḥ || 29 ||
syādiyaṁ cāgr̥hītārthā mama ca grahaṇaṁ bhavēt |
hiṁsābhirucayō hiṁsyurimāṁ vā janakātmajām || 30 ||
vipannaṁ syāttataḥ kāryaṁ rāmasugrīvayōridam |
uddēśē naṣṭamārgē:’sminrākṣasaiḥ parivāritē || 31 ||
sāgarēṇa parikṣiptē guptē vasati jānakī |
viśastē vā gr̥hītē vā rakṣōbhirmayi samyugē || 32 ||
nānyaṁ paśyāmi rāmasya sāhāyyaṁ kāryasādhanē |
vimr̥śaṁśca na paśyāmi yō hatē mayi vānaraḥ || 33 ||
śatayōjanavistīrṇaṁ laṅghayēta mahōdadhim |
kāmaṁ hantuṁ samarthō:’smi sahasrāṇyapi rakṣasām || 34 ||
na tu śakṣyāmi samprāptuṁ paraṁ pāraṁ mahōdadhēḥ |
asatyāni ca yuddhāni saṁśayō mē na rōcatē || 35 ||
kaśca niḥsaṁśayaṁ kāryaṁ kuryātprājñaḥ sasaṁśayam |
prāṇatyāgaśca vaidēhyā bhavēdanabhibhāṣaṇē || 36 ||
ēṣa dōṣō mahānhi syānmama sītābhibhāṣaṇē |
bhūtāścārthā vinaśyanti dēśakālavirōdhitāḥ || 37 ||
viklavaṁ dūtamāsādya tamaḥ sūryōdayē yathā |
arthānarthāntarē buddhirniścitā:’pi na śōbhatē || 38 ||
ghātayanti hi kāryāṇi dūtāḥ paṇḍitamāninaḥ |
na vinaśyētkathaṁ kāryaṁ vaiklavyaṁ na kathaṁ bhavēt || 39 ||
laṅghanaṁ ca samudrasya kathaṁ nu na vr̥thā bhavēt |
kathaṁ nu khalu vākyaṁ mē śr̥ṇuyānnōdvijēta vā || 40 ||
iti sañcintya hanumāṁścakāra matimānmatim |
rāmamakliṣṭakarmāṇaṁ svabandhumanukīrtayan || 41 ||
naināmudvējayiṣyāmi tadbandhugatamānasām |
ikṣvākūṇāṁ variṣṭhasya rāmasya viditātmanaḥ || 42 ||
śubhāni dharmayuktāni vacanāni samarpayan |
śrāvayiṣyāmi sarvāṇi madhurāṁ prabruvangiram |
śraddhāsyati yathā hīyaṁ tathā sarvaṁ samādadhē || 43 ||
iti sa bahuvidhaṁ mahānubhāvō
jagatipatēḥ pramadāmavēkṣamāṇaḥ |
madhuramavitathaṁ jagāda vākyaṁ
drumaviṭapāntaramāsthitō hanūmān || 44 ||
ityārṣē śrīmadrāmāyaṇē vālmīkīyē ādikāvyē sundarakāṇḍē triṁśaḥ sargaḥ || 30 ||
sundarakāṇḍa ēkatriṁśaḥ sargaḥ (31)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
