Read in తెలుగు / ಕನ್ನಡ / தமிழ் / देवनागरी / English (IAST)
|| rāvaṇāgamanam ||
tathā viprēkṣamāṇasya vanaṁ puṣpitapādapam |
vicinvataśca vaidēhīṁ kiñcicchēṣā niśābhavat || 1 ||
ṣaḍaṅgavēdaviduṣāṁ kratupravarayājinām |
śuśrāva brahmaghōṣāṁśca virātrē brahmarakṣasām || 2 ||
atha maṅgalavāditraiḥ śabdaiḥ śrōtramanōharaiḥ |
prābudhyata mahābāhurdaśagrīvō mahābalaḥ || 3 ||
vibudhya tu yathākālaṁ rākṣasēndraḥ pratāpavān |
srastamālyāmbaradharō vaidēhīmanvacintayat || 4 ||
bhr̥śaṁ niyuktastasyāṁ ca madanēna madōtkaṭaḥ |
na sa taṁ rākṣasaḥ kāmaṁ śaśākātmani gūhitum || 5 ||
sa sarvābharaṇairyuktō bibhracchriyamanuttamām |
tāṁ nagairbahubhirjuṣṭāṁ sarvapuṣpaphalōpagaiḥ || 6 ||
vr̥tāṁ puṣkariṇībhiśca nānāpuṣpōpaśōbhitām |
sadāmadaiśca vihagairvicitrāṁ paramādbhutām || 7 ||
īhāmr̥gaiśca vividhairjuṣṭāṁ dr̥ṣṭimanōharaiḥ |
vīthīḥ samprēkṣamāṇaśca maṇikāñcanatōraṇāḥ || 8 ||
nānāmr̥gagaṇākīrṇāṁ phalaiḥ prapatitairvr̥tām |
aśōkavanikāmēva prāviśatsantatadrumām || 9 ||
aṅganāśatamātraṁ tu taṁ vrajantamanuvrajat |
mahēndramiva paulastyaṁ dēvagandharvayōṣitaḥ || 10 ||
dīpikāḥ kāñcanīḥ kāścijjagr̥hustatra yōṣitaḥ |
vālavyajanahastāśca tālavr̥ntāni cāparāḥ || 11 ||
kāñcanairapi bhr̥ṅgārairjahruḥ salilamagrataḥ |
maṇḍalāgrānbr̥sīṁścaiva gr̥hyānyāḥ pr̥ṣṭhatō yayuḥ || 12 ||
kācidratnamayīṁ sthālīṁ pūrṇāṁ pānasya bhāminī |
dakṣiṇā dakṣiṇēnaiva tadā jagrāha pāṇinā || 13 ||
rājahaṁsapratīkāśaṁ chatraṁ pūrṇaśaśiprabham |
sauvarṇadaṇḍamaparā gr̥hītvā pr̥ṣṭhatō yayau || 14 ||
nidrāmadaparītākṣyō rāvaṇasyōttamāḥ striyaḥ |
anujagmuḥ patiṁ vīraṁ ghanaṁ vidyullatā iva || 15 ||
vyāviddhahārakēyūrāḥ samāmr̥ditavarṇakāḥ |
samāgalitakēśāntāḥ sasvēdavadanāstathā || 16 ||
ghūrṇantyō madaśēṣēṇa nidrayā ca śubhānanāḥ |
svēdakliṣṭāṅgakusumāḥ sumālyākulamūrdhajāḥ || 17 ||
prayāntaṁ nairr̥tapatiṁ nāryō madiralōcanāḥ |
bahumānācca kāmācca priyā bhāryāstamanvayuḥ || 18 ||
sa ca kāmaparādhīnaḥ patistāsāṁ mahābalaḥ |
sītāsaktamanā mandō madāñcitagatirbabhau || 19 ||
tataḥ kāñcīninādaṁ ca nūpurāṇāṁ ca niḥsvanam |
śuśrāva paramastrīṇāṁ sa kapirmārutātmajaḥ || 20 ||
taṁ cāpratimakarmāṇamacintyabalapauruṣam |
dvāradēśamanuprāptaṁ dadarśa hanumānkapiḥ || 21 ||
dīpikābhiranēkābhiḥ samantādavabhāsitam |
gandhatailāvasiktābhirdhriyamāṇābhiragrataḥ || 22 ||
kāmadarpamadairyuktaṁ jihmatāmrāyatēkṣaṇam |
samakṣamiva kandarpamapaviddhaśarāsanam || 23 ||
mathitāmr̥taphēnābhamarajō vastramuttamam |
salīlamanukarṣantaṁ vimuktaṁ saktamaṅgadē || 24 ||
taṁ patraviṭapē līnaḥ patrapuṣpaghanāvr̥taḥ |
samīpamivasaṅkrāntaṁ nidhyātumupacakramē || 25 ||
avēkṣamāṇastu tatō dadarśa kapikuñjaraḥ |
rūpayauvanasampannā rāvaṇasya varastiyaḥ || 26 ||
tābhiḥ parivr̥tō rājā surūpābhirmahāyaśāḥ |
tanmr̥gadvijasaṅghuṣṭaṁ praviṣṭaḥ pramadāvanam || 27 ||
kṣībō vicitrābharaṇaḥ śaṅkukarṇō mahābalaḥ |
tēna viśravasaḥ putraḥ sa dr̥ṣṭō rākṣasādhipaḥ || 28 ||
vr̥taḥ paramanārībhistārābhiriva candrāmāḥ |
taṁ dadarśa mahātējāstējōvantaṁ mahākapiḥ || 29 ||
rāvaṇō:’yaṁ mahābāhuriti sañcintya vānaraḥ |
avaplutō mahātējā hanumānmārutātmajaḥ || 30 ||
sa tathā:’pyugratējāḥ sannirdhūtastasya tējasā |
patraguhyāntarē saktō hanumānsaṁvr̥tō:’bhavat || 31 ||
sa tāmasitakēśāntāṁ suśrōṇīṁ saṁhatastanīm |
didr̥kṣurasitāpāṅgāmupāvartata rāvaṇaḥ || 32 ||
ityārṣē śrīmadrāmāyaṇē vālmīkīyē ādikāvyē sundarakāṇḍē aṣṭādaśaḥ sargaḥ || 18 ||
sundarakāṇḍa ēkōnaviṁśaḥ sargaḥ (19)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.