Sri Vishnu Mahimna Stotram – śrī viṣṇu mahimnaḥ stōtram

stōtranidhi → śrī viṣṇu stōtrāṇi → śrī viṣṇu mahimnaḥ stōtram

mahimnastē pāraṁ vidhiharaphaṇīndraprabhr̥tayō
vidurnādyāpyajñaścalamatirahaṁ nātha nu katham |
vijānīyāmaddhā nalinanayanātmīyavacasō
viśuddhyai vakṣyāmīṣadapi tu tathāpi svamatitaḥ || 1 ||

yadāhurbrahmaikē puruṣamitarē karma ca parē-
-:’parē buddhaṁ cānyē śivamapi ca dhātāramaparē |
tathā śaktiṁ kēcidgaṇapatimutārkaṁ ca sudhiyō
matīnāṁ vai bhēdāttvamasi tadaśēṣaṁ mama matiḥ || 2 ||

śivaḥ pādāmbhastē śirasi dhr̥tavānādarayutaṁ
tathā śaktiścāsau tava tanujatējōmayatanuḥ |
dinēśaṁ caivāmuṁ tava nayanamūcustu nigamā-
-stvadanyaḥ kō dhyēyō jagati kila dēvō vada vibhō || 3 ||

kvacinmatsyaḥ kūrmaḥ kvacidapi varāhō narahariḥ
kvacit kharvō rāmō daśarathasutō nandatanayaḥ |
kvacidbuddhaḥ kalkī viharasi kubhārāpahr̥tayē
svatantrō:’jō nityō vibhurapi tavākrīḍanamidam || 4 ||

hr̥tāmnāyēnōktaṁ stavanavaramākarṇya vidhinā
drutaṁ mātsyaṁ dhr̥tvā vapurajaraśaṅkhāsuramathō |
kṣayaṁ nītvā mr̥tyōrnigamagaṇamuddhr̥tya jaladhē-
-raśēṣaṁ saṅguptaṁ jagadapi ca vēdaikaśaraṇam || 5 ||

nimajjantaṁ vārdhau nagavaramupālōkya sahasā
hitārthaṁ dēvānāṁ kamaṭhavapuṣāviśya gahanam |
payōrāśiṁ pr̥ṣṭhē tamajita salīlaṁ dhr̥tavatō
jagaddhātustē:’bhūtkimu sulabhabhārāya girikaḥ || 6 ||

hiraṇyākṣaḥ kṣōṇīmaviśadasurō nakranilayaṁ
samādāyāmartyaiḥ kamalajamukhairambaragataiḥ |
stutēnānantātmannaciramavabhāti sma vidhr̥tā
tvayā daṁṣṭrāgrē:’sāvavanirakhilā kanduka iva || 7 ||

hariḥ kvāstītyuktē danujapatinā:’:’pūryanikhilaṁ
jagannādaiḥ stambhānnarahariśarīrēṇa karajaiḥ |
samutpatyāśūrasyasuravaramādāritavata-
-stava khyātā bhūman kimu jagati nō sarvagatatā || 8 ||

vilōkyā:’jaṁ dvārgaṁ kapaṭalaghukāyaṁ suraripu-
-rniṣiddhō:’pi prādādasuraguruṇātmīyamakhilam |
prasannastadbhaktyā tyajasi kila nādyāpi bhavanaṁ
balērbhaktādhīnyaṁ tava viditamēvāmarapatē || 9 ||

samādhāvāsaktaṁ nr̥patitanayairvīkṣya pitaraṁ
hataṁ bāṇaiḥ rōṣādgurutaramupādāya paraśum |
vinā kṣatraṁ viṣṇō kṣititalamaśēṣaṁ kr̥tavasō-
-:’sakr̥t kiṁ bhūbhārōddharaṇapaṭutā tē na viditā || 10 ||

samārādhyōmēśaṁ tribhuvanamidaṁ vāsavamukhaṁ
vaśē cakrē cakrinnagaṇayadaniśaṁ jagadidam |
gatō:’sau laṅkēśastvaciramatha tē bāṇaviṣayaṁ
na kēnāptaṁ tvattaḥ phalamavinayasyāsuraripō || 11 ||

kvaciddivyaṁ śauryaṁ kvacidapi raṇē kāpuruṣatā
kvacidgītājñānaṁ kvacidapi parastrīviharaṇam |
kvacinmr̥tsnāśitvaṁ kvacidapi ca vaikuṇṭhavibhava-
-ścaritraṁ tē nūnaṁ śaraṇada vimōhāya kudhiyām || 12 ||

na hiṁsyādityēva dhruvamavitathaṁ vākyamabudhai-
-ryathāgnīṣōmīyaṁ paśumiti tu viprairnigaditam |
tavaitannāsthānē:’suragaṇavimōhāya gadataḥ
samr̥ddhirnīcānāṁ nayakara hi duḥkhāya jagataḥ || 13 ||

vibhāgē varṇānāṁ nigamanicayē cāvanitalē
viluptē sañjātō dvijavaragr̥hē śambhalapurē |
samāruhyāśvaṁ tvaṁ lasadasikarō mlēcchanikarān
nihantāsyunmattān kila kaliyugāntē yugapatē || 14 ||

gabhīrē kāsārē jalacaravarākr̥ṣṭacaraṇō
raṇē:’śaktō majjannabhayada jalē:’cintayadasau |
yadā nāgēndrastvāṁ sapadi padapāśādapagatō
gataḥ svargaṁ sthānaṁ bhavati vipadāṁ tē kimu janaḥ || 15 ||

sutaiḥ pr̥ṣṭō vēdhāḥ prativacanadānē:’prabhurasā-
-vathātmanyātmānaṁ śaraṇamagamattvāṁ trijagatām |
tatastē:’stātaṅkā yayuratha mudaṁ haṁsavapuṣā
tvayā tē sārvajñaṁ prathitamamarēśēha kimu nō || 16 ||

samāviddhō māturvacanaviśikhairāśu vipinaṁ
tapaḥ kr̥tvā gatvā tava parama tōṣāya paramam |
dhruvō lēbhē divyaṁ padamacalamalpē:’pi vayasi
kimastyasminlōkē tvayi varada tuṣṭē duradhigam || 17 ||

vr̥kādbhītastūrṇaṁ svajanabhayabhittvāṁ paśupati-
-rbhramanlōkān sarvān śaraṇamupayātē:’tha danujaḥ |
svayaṁ bhasmībhūtastava vacanabhaṅgyudgatamatiḥ
ramēśa hō māyā tava duranumēyā:’khilajanaiḥ |18 ||

hr̥taṁ daityairdr̥ṣṭvā:’mr̥taghaṭamajayyaistu nayataḥ
kaṭākṣaiḥ sammōhaṁ yuvatiparavēṣēṇa ditijān |
samagraṁ pīyūṣaṁ subhagasurapūgāyadadataḥ
samasyāpi prāyastava khalu hi bhr̥tyēṣvabhiratiḥ || 19 ||

samākr̥ṣṭā duṣṭairdrupadatanayā:’labdhaśaraṇā
sabhāyāṁ sarvātmaṁstava caraṇamuccairupagatā |
samakṣaṁ sarvēṣāmabhavadaciraṁ cīranicayaṁ
smr̥tēstē sāphalyaṁ nayanaviṣayaṁ nō kimu satām || 20 ||

vadantyēkē sthānaṁ tava varada vaikuṇṭhamaparē
gavāṁ lōkaṁ lōkaṁ phaṇinilayapātālamitarē |
tathānyē kṣīrōdaṁ hr̥dayanalinaṁ cāpi tu satāṁ
na manyē tat sthānaṁ tvahamiha ca yatrāsi na vibhō || 21 ||

śivō:’haṁ rudrāṇāmahamamararājō diviṣadāṁ
munīnāṁ vyāsō:’haṁ suravara samudrō:’smi sarasām |
kubērō yakṣāṇāmiti tava vacō mandamatayē
na jānē tajjātaṁ jagati nanu yannāsi bhagavan || 22 ||

śirō nākō nētrē śaśidinakarāvambaramurō
diśaḥ śrōtrē vāṇī nigamanikarastē kaṭirilā |
akūpārō vastiścaraṇamapi pātālamiti vai
svarūpaṁ tē:’jñātvā nr̥tanumavajānanti kudhiyaḥ || 23 ||

śarīraṁ vaikuṇṭhaṁ hr̥dayanalinaṁ vāsasadanaṁ
manōvr̥ttistārkṣyō matiriyamathō sāgarasutā |
vihārastē:’vasthātritayamasavaḥ pārṣadagaṇō
na paśyaṁstyajñāstvamiha bahirahō yāti janatā || 24 ||

sughōraṁ kāntāraṁ viśati ca taṭākaṁ sugahanaṁ
tathōttuṅgaṁ śr̥ṅgaṁ sapadi ca samārōhati girēḥ |
prasūnārthaṁ cētō:’mbujamamalamēkaṁ tvayi vibhō
samarpyājñastūrṇaṁ bata na ca sukhaṁ vindati janaḥ || 25 ||

kr̥taikāntāvāsā vigatanikhilāśāḥ śamaparāḥ
jitaśvāsōcchvāsāstruṭitabhavapāśāḥ suyaminaḥ |
paraṁ jyōtiḥ paśyantyanaghamabhipaśyantu mama tu
śriyāśliṣṭaṁ bhūyānnayanaviṣayaṁ tē kila vapuḥ || 26 ||

kadā gaṅgōttuṅgā:’malatarataraṅgācca pulinē
vasannāśāpāśādakhilakhaladāśādapagataḥ |
ayē lakṣmīkāntāmbujanayana tātā:’marapatē
prasīdētyājalpannamaravara nēṣyāmi samayam || 27 ||

kadā śr̥ṅgaiḥ sphītē munigaṇaparītē himanagē
drumāvītē śītē suramadhuragītē prativasan |
kvaciddhyānāsaktō viṣayasuviraktō bhavaharaṁ
smaraṁstē pādābjaṁ janihara samēṣyāmi vilayam || 28 ||

sudhāpānaṁ jñānaṁ na ca vipuladānaṁ na nigamō
na yāgō nō yōgō na ca nikhilabhōgōparamaṇam |
japō nō nō tīrthavratamiha na cōgraṁ tvayi tapō
vinā bhaktiṁ tē:’laṁ bhavabhayavināśāya madhuhan || 29 ||

namaḥ sarvēṣṭāya śrutiśikharadr̥ṣṭāya ca namō
namō:’saṁśliṣṭāya tribhuvananiviṣṭāya ca namaḥ |
namō vispaṣṭāya praṇavaparimr̥ṣṭāya ca namō
namastē sarvātman punarapi punastē mama namaḥ || 30 ||

kaṇān kaścidvr̥ṣṭērgaṇananipuṇastūrṇamavanē-
-stathā:’śēṣān pāṁsūnamita kalayēccāpi tu janaḥ |
nabhaḥ piṇḍīkuryādaciramapicēccarmavadidaṁ
tathāpīśāsau tē kalayitumalaṁ nākhilaguṇān || 31 ||

kva māhātmyaṁ sīmōjjhitamaviṣayaṁ vēdavacasāṁ
vibhō mē:’tō cētaḥ kva ca vividhatāpāhatamidam |
mayēdaṁ yatkiñcidgaditamatha bālyēna tu gurō
gr̥hāṇaitacchuddhārpitamiha na hēyaṁ hi mahatām || 32 ||

iti haristavanaṁ sumanōharaṁ
paramahaṁsajanēna samīritam |
sugamasundarasārapadāspadaṁ
tadidamastu harēraniśaṁ mudē || 33 ||

gadārathāṅgāmbujakambudhāriṇō
ramāsamāśliṣṭatanōstanōtu naḥ |
bilēśayādhīśaśarīraśāyinaḥ
śivastavō:’jasramayaṁ paraṁ harēḥ || 34 ||

paṭhēdimaṁ yastu naraḥ parastavaṁ
samāhitō:’ghaughaghanaprabhañjanam |
sa vindatē:’trākhila bhōgasampadō
mahīyatē viṣṇupadē tatō dhruvam || 35 ||

iti śrīmatparamahaṁsasvāmi brahmānanda viracitaṁ śrī viṣṇu mahimnaḥ stōtram ||

---

See more śrī viṣṇu stōtrāṇi for chanting.

Did you see any mistake/variation in the content above? Click here to report mistakes and corrections in Stotranidhi content.