Sri Varaha Ashtottara Shatanama Stotram – śrī varāhāṣṭōttaraśatanāma stōtram


dhyānam |
śvētaṁ sudarśanadarāṅkitabāhuyugmaṁ
daṁṣṭrākarālavadanaṁ dharayā samētam |
brahmādibhiḥ suragaṇaiḥ parisēvyamānaṁ
dhyāyēdvarāhavapuṣaṁ nigamaikavēdyam ||

stōtram |
śrīvarāhō mahīnāthaḥ pūrṇānandō jagatpatiḥ |
nirguṇō niṣkalō:’nantō daṇḍakāntakr̥davyayaḥ || 1 ||

hiraṇyākṣāntakr̥ddēvaḥ pūrṇaṣāḍguṇyavigrahaḥ |
layōdadhivihārī ca sarvaprāṇihitērataḥ || 2 ||

anantarūpō:’nantaśrīrjitamanyurbhayāpahaḥ |
vēdāntavēdyō vēdī ca vēdagarbhaḥ sanātanaḥ || 3 ||

sahasrākṣaḥ puṇyagandhaḥ kalpakr̥t kṣitibhr̥ddhariḥ |
padmanābhaḥ surādhyakṣō hēmāṅgō dakṣiṇāmukhaḥ || 4 ||

mahākōlō mahābāhuḥ sarvadēvanamaskr̥taḥ |
hr̥ṣīkēśaḥ prasannātmā sarvabhaktabhayāpahaḥ || 5 ||

yajñabhr̥dyajñakr̥tsākṣī yajñāṅgō yajñavāhanaḥ |
havyabhuk havyadēvaśca sadā:’vyaktaḥ kr̥pākaraḥ || 6 ||

dēvabhūmiguruḥ kāntō dharmaguhyō vr̥ṣākapiḥ |
sravattuṇḍō vakradaṁṣṭrō nīlakēśō mahābalaḥ || 7 ||

pūtātmā vēdanētā ca vēdahartr̥śirōharaḥ |
vēdāntavidvēdaguhyaḥ sarvavēdapravartakaḥ || 8 ||

gabhīrākṣastridhāmā ca gabhīrātmā:’marēśvaraḥ |
ānandavanagō divyō brahmanāsāsamudbhavaḥ || 9 ||

sindhutīranivāsī ca kṣēmakr̥tsāttvatāṁ patiḥ |
indratrātā jagattrātā cēndradōrdaṇḍagarvahā || 10 ||

bhaktavaśyō sadōdyuktō nijānandō ramāpatiḥ |
śrutipriyaḥ śubhāṅgaśca puṇyaśravaṇakīrtanaḥ || 11 ||

satyakr̥tsatyasaṅkalpaḥ satyavāksatyavikramaḥ |
satyēnigūḍhaḥ satyātmā kālātītō guṇādhikaḥ || 12 ||

paraṁ-jyōtiḥ paraṁ-dhāma paramaḥ puruṣaḥ paraḥ |
kalyāṇakr̥tkaviḥ kartā karmasākṣī jitēndriyaḥ || 13 ||

karmakr̥tkarmakāṇḍasyasampradāyapravartakaḥ |
sarvāntakaḥ sarvagaśca sarvadaḥ sarvabhakṣakaḥ || 14 ||

sarvalōkapatiḥ śrīmān śrīmuṣṇēśaḥ śubhēkṣaṇaḥ |
sarvadēvapriyaḥ sākṣītyētannāmāṣṭakaṁ śatam || 15 ||

sarvavēdādhikaṁ puṇyaṁ varāhasya mahātmanaḥ |
satataṁ prātarutthāya samyagācamya vāriṇā || 16 ||

jitāsanō jitakrōdhaḥ paścānmantramudīrayēt |
brāhmaṇō brahmavidyāyāṁ ca kṣatriyō rājyamāpnuyāt || 17 ||

vaiśyō dhanasamr̥ddhaḥ syāt śūdraḥ sukhamavāpnuyāt |
sakāmō labhatē kāmānniṣkāmō mōkṣamāpnuyāt || 18 ||

iti śrīvarāhapurāṇē dharaṇīvarāhasaṁvādē śrībhūvarāhāṣṭōttarastavaḥ |


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed