Read in తెలుగు / ಕನ್ನಡ / தமிழ் / देवनागरी / English (IAST)
dhyānam |
sakalakuśaladātrīṁ bhaktimuktipradātrīṁ
tribhuvanajanayitrīṁ duṣṭadhīnāśayitrīm |
janakadharaṇiputrīṁ darpidarpaprahantrīṁ
hariharavidhikartrīṁ naumi sadbhaktabhartrīm ||
brahmaṇō vacanaṁ śrutvā rāmaḥ kamalalōcanaḥ |
prōnmīlya śanakairakṣī vēpamānō mahābhujaḥ || 1 ||
praṇamya śirasā bhūmau tējasā cāpi vihvalaḥ |
bhītaḥ kr̥tāñjalipuṭaḥ prōvāca paramēśvarīm || 2 ||
kā tvaṁ dēvi viśālākṣi śaśāṅkāvayavāṅkitē |
na jānē tvāṁ mahādēvi yathāvadbrūhi pr̥cchatē || 3 ||
rāmasya vacanaṁ śrutvā tataḥ sā paramēśvarī |
vyājahāra raghuvyāghraṁ yōgināmabhayapradā || 4 ||
māṁ viddhi paramāṁ śaktiṁ mahēśvarasamāśrayām |
ananyāmavyayāmēkāṁ yāṁ paśyanti mumukṣavaḥ || 5 ||
ahaṁ vai sarvabhāvānāmātmā sarvāntarā śivā |
śāśvatī sarvavijñānā sarvamūrtipravartikā || 6 ||
anantānantamahimā saṁsārārṇavatāriṇī |
divyaṁ dadāmi tē cakṣuḥ paśya mē padamaiśvaram || 7 ||
ityuktvā virarāmaiṣā rāmō:’paśyacca tatpadam |
kōṭisūryapratīkāśaṁ viṣvaktējōnirākulam || 8 ||
jvālāvalīsahasrāḍhyaṁ kālānalaśatōpamam |
daṁṣṭrākarālaṁ durdharṣaṁ jaṭāmaṇḍalamaṇḍitam || 9 ||
triśūlavarahastaṁ ca ghōrarūpaṁ bhayāvaham |
praśāmyatsaumyavadanamanantaiśvaryasamyutam || 10 ||
candrāvayavalakṣmāḍhyaṁ candrakōṭisamaprabham |
kirīṭinaṁ gadāhastaṁ nūpurairupaśōbhitam || 11 ||
divyamālyāmbaradharaṁ divyagandhānulēpanam |
śaṅkhacakrakaraṁ kāmyaṁ trinētraṁ kr̥ttivāsasam || 12 ||
antaḥsthaṁ cāṇḍabāhyasthaṁ bāhyābhyantarataḥ param |
sarvaśaktimayaṁ śāntaṁ sarvākāraṁ sanātanam || 13 ||
brahmēndrōpēndrayōgīndrairīḍyamānapadāmbujam |
sarvataḥ pāṇipādaṁ tatsarvatō:’kṣiśirōmukham || 14 ||
sarvamāvr̥tya tiṣṭhantaṁ dadarśa padamaiśvaram |
dr̥ṣṭvā ca tādr̥śaṁ rūpaṁ divyaṁ māhēśvaraṁ padam || 15 ||
tayaiva ca samāviṣṭaḥ sa rāmō hr̥tamānasaḥ |
ātmanyādhāya cātmānamōṅkāraṁ samanusmaran || 16 ||
nāmnāmaṣṭasahasrēṇa tuṣṭāva paramēśvarīm |
stōtram |
sītōmā paramā śaktiranantā niṣkalāmalā || 17 ||
śāntā māhēśvarī nityā śāśvatī paramākṣarā |
acintyā kēvalānantā śivātmā paramātmikā || 18 ||
anādiravyayā śuddhā dēvātmā sarvagōcarā |
ēkānēkavibhāgasthā māyātītā sunirmalā || 19 ||
mahāmāhēśvarī śaktā mahādēvī nirañjanā |
kāṣṭhā sarvāntarasthā ca cicchaktiratilālasā || 20 ||
jānakī mithilānandā rākṣasāntavidhāyinī |
rāvaṇāntakarī ramyā rāmavakṣaḥsthalālayā || 21 ||
umā sarvātmikā vidyā jyōtīrūpā:’yutākṣarī |
śāntiḥ pratiṣṭhā sarvēṣāṁ nivr̥ttiramr̥tapradā || 22 ||
vyōmamūrtirvyōmamayī vyōmādhārā:’cyutā latā |
anādinidhanā yōṣā kāraṇātmā kalākulā || 23 ||
nandaprathamajā nābhiramr̥tasyāntasaṁśrayā |
prāṇēśvarapriyā mātāmahī mahiṣavāhinī || 24 ||
prāṇēśvarī prāṇarūpā pradhānapuruṣēśvarī |
sarvaśaktiḥ kalā kāṣṭhā jyōtsnēndōrmahimāspadā || 25 ||
sarvakāryaniyantrī ca sarvabhūtēśvarēśvarī |
anādiravyaktaguṇā mahānandā sanātanī || 26 ||
ākāśayōniryōgasthā sarvayōgēśvarēśvarī |
śavāsanā citāntaḥsthā mahēśī vr̥ṣavāhanā || 27 ||
bālikā taruṇī vr̥ddhā vr̥ddhamātā jarāturā |
mahāmāyā suduṣpūrā mūlaprakr̥tirīśvarī || 28 ||
saṁsārayōniḥ sakalā sarvaśaktisamudbhavā |
saṁsārasārā durvārā durnirīkṣyā durāsadā || 29 ||
prāṇaśaktiḥ prāṇavidyā yōginī paramā kalā |
mahāvibhūtirdurdharṣā mūlaprakr̥tisambhavā || 30 ||
anādyanantavibhavā parātmā puruṣō balī |
sargasthityantakaraṇī sudurvācyā duratyayā || 31 ||
śabdayōniḥ śabdamayī nādākhyā nādavigrahā |
pradhānapuruṣātītā pradhānapuruṣātmikā || 32 ||
purāṇī cinmayī puṁsāmādiḥ puruṣarūpiṇī |
bhūtāntarātmā kūṭasthā mahāpuruṣasañjñitā || 33 ||
janmamr̥tyujarātītā sarvaśaktisamanvitā |
vyāpinī cānavacchinnā pradhānā supravēśinī || 34 ||
kṣētrajñā śaktiravyaktalakṣaṇā malavarjitā |
anādimāyāsambhinnā tritattvā prakr̥tirguṇā || 35 ||
mahāmāyā samutpannā tāmasī pauruṣaṁ dhruvā |
vyaktāvyaktātmikā kr̥ṣṇā raktā śuklā prasūtikā || 36 ||
svakāryā kāryajananī brahmāsyā brahmasaṁśrayā |
vyaktā prathamajā brāhmī mahatī jñānarūpiṇī || 37 ||
vairāgyaiśvaryadharmātmā brahmamūrtirhr̥disthitā |
jayadā jitvarī jaitrī jayaśrīrjayaśālinī || 38 ||
sukhadā śubhadā satyā śubhā saṅkṣōbhakāriṇī |
apāṁ yōniḥ svayambhūtirmānasī tattvasambhavā || 39 ||
īśvarāṇī ca śarvāṇī śaṅkarārdhaśarīriṇī |
bhavānī caiva rudrāṇī mahālakṣmīrathāmbikā || 40 ||
māhēśvarī samutpannā bhuktimuktiphalapradā |
sarvēśvarī sarvavarṇā nityā muditamānasā || 41 ||
brahmēndrōpēndranamitā śaṅkarēcchānuvartinī |
īśvarārdhāsanagatā raghūttamapativratā || 42 ||
sakr̥dvibhāvitā sarvā samudrapariśōṣiṇī |
pārvatī himavatputrī paramānandadāyinī || 43 ||
guṇāḍhyā yōgadā yōgyā jñānamūrtivikāsinī |
sāvitrī kamalā lakṣmīḥ śrīranantōrasisthitā || 44 ||
sarōjanilayā śubhrā yōganidrā sudarśanā |
sarasvatī sarvavidyā jagajjyēṣṭhā sumaṅgalā || 45 ||
vāsavī varadā vācyā kīrtiḥ sarvārthasādhikā |
vāgīśvarī sarvavidyā mahāvidyā suśōbhanā || 46 ||
guhyavidyā:’:’tmavidyā ca sarvavidyā:’:’tmabhāvitā |
svāhā viśvambharī siddhiḥ svadhā mēdhā dhr̥tiḥ śrutiḥ || 47 ||
nābhiḥ sunābhiḥ sukr̥tirmādhavī naravāhinī |
pūjyā vibhāvarī saumyā bhaginī bhōgadāyinī || 48 ||
śōbhā vaṁśakarī līlā māninī paramēṣṭhinī |
trailōkyasundarī ramyā sundarī kāmacāriṇī || 49 ||
mahānubhāvamadhyasthā mahāmahiṣamardinī |
padmamālā pāpaharā vicitramukuṭānanā || 50 ||
kāntā citrāmbaradharā divyābharaṇabhūṣitā |
haṁsākhyā vyōmanilayā jagatsr̥ṣṭivivardhinī || 51 ||
niryantrā mantravāhasthā nandinī bhadrakālikā |
ādityavarṇā kaumārī mayūravaravāhinī || 52 ||
vr̥ṣāsanagatā gaurī mahākālī surārcitā |
aditirniyatā raudrī padmagarbhā vivāhanā || 53 ||
virūpākṣī lēlihānā mahāsuravināśinī |
mahāphalā:’navadyāṅgī kāmapūrā vibhāvarī || 54 ||
vicitraratnamukuṭā praṇatardhivivardhinī |
kauśikī karṣiṇī rātristridaśārtivināśinī || 55 ||
virūpā ca surūpā ca bhīmā mōkṣapradāyinī |
bhaktārtināśinī bhavyā bhavabhāvavināśinī || 56 ||
nirguṇā nityavibhavā niḥsārā nirapatrapā |
yaśasvinī sāmagītirbhavāṅganilayālayā || 57 ||
dīkṣā vidyādharī dīptā mahēndravinipātinī |
sarvātiśāyinī vidyā sarvaśaktipradāyinī || 58 ||
sarvēśvarapriyā tārkṣī samudrāntaravāsinī |
akalaṅkā nirādhārā nityasiddhā nirāmayā || 59 ||
kāmadhēnurvēdagarbhā dhīmatī mōhanāśinī |
niḥsaṅkalpā nirātaṅkā vinayā vinayapradā || 60 ||
jvālāmālāsahasrāḍhyā dēvadēvī manōnmanī |
urvī gurvī guruḥ śrēṣṭhā saguṇā ṣaḍguṇātmikā || 61 ||
mahābhagavatī bhavyā vasudēvasamudbhavā |
mahēndrōpēndrabhaginī bhaktigamyaparāyaṇā || 62 ||
jñāna jñēyā jarātītā vēdāntaviṣayā gatiḥ |
dakṣiṇā dahanā bāhyā sarvabhūtanamaskr̥tā || 63 ||
yōgamāyā vibhāvajñā mahāmōhā mahīyasī |
satyā sarvasamudbhūtirbrahmavr̥kṣāśrayā matiḥ || 64 ||
bījāṅkurasamudbhūtirmahāśaktirmahāmatiḥ |
khyātiḥ pratijñā citsaṁvinmahāyōgēndraśāyinī || 65 ||
vikr̥tiḥ śāṅkarī śāstrī gandharvayakṣasēvitā |
vaiśvānarī mahāśālā dēvasēnā guhapriyā || 66 ||
mahārātrī śivānandā śacī duḥsvapnanāśinī |
pūjyā:’pūjyā jagaddhātrī durvijñēyasvarūpiṇī || 67 ||
guhāmbikā guhōtpattirmahāpīṭhā marutsutā |
havyavāhāntarā gārgī havyavāhasamudbhavā || 68 ||
jagadyōnirjaganmātā jaganmr̥tyurjarātigā |
buddhirmātā buddhimatī puruṣāntaravāsinī || 69 ||
tapasvinī samādhisthā trinētrā divisaṁsthitā |
sarvēndriyamanōmātā sarvabhūtahr̥disthitā || 70 ||
saṁsāratāriṇī vidyā brahmavādimanōlayā |
brahmāṇī br̥hatī brāhmī brahmabhūtā bhayāvaniḥ || 71 ||
hiraṇmayī mahārātriḥ saṁsāraparivartikā |
sumālinī surūpā ca tāriṇī bhāvinī prabhā || 72 ||
unmīlanī sarvasahā sarvapratyayasākṣiṇī |
tapinī tāpinī viśvā bhōgadā dhāriṇī dharā || 73 ||
susaumyā candravadanā tāṇḍavāsaktamānasā |
sattvaśuddhikarī śuddhirmalatrayavināśinī || 74 ||
jagatpriyā jaganmūrtistrimūrtiramr̥tāśrayā |
nirāśrayā nirāhārā niraṅkuśaraṇōdbhavā || 75 ||
cakrahastā vicitrāṅgī sragviṇī padmadhāriṇī |
parāparavidhānajñā mahāpuruṣapūrvajā || 76 ||
vidyēśvarapriyā vidyā vidyujjihvā jitaśramā |
vidyāmayī sahasrākṣī sahasraśravaṇātmajā || 77 ||
sahasraraśmi padmasthā mahēśvarapadāśrayā |
jvālinī sadmanā vyāptā taijasī padmarōdhikā || 78 ||
mahādēvāśrayā mānyā mahādēvamanōramā |
vyōmalakṣmīḥ siṁharathā cēkitānyamitaprabhā || 79 ||
viśvēśvarī vimānasthā viśōkā śōkanāśinī |
anāhatā kuṇḍalinī nalinī padmavāsinī || 80 ||
śatānandā satāṁ kīrtiḥ sarvabhūtāśayasthitā |
vāgdēvatā brahmakalā kalātītā kalāvatī || 81 ||
brahmarṣirbrahmahr̥dayā brahmaviṣṇuśivapriyā |
vyōmaśaktiḥ kriyāśaktirjanaśaktiḥ parāgatiḥ || 82 ||
kṣōbhikā raudrikā:’bhēdyā bhēdābhēdavivarjitā |
abhinnā bhinnasaṁsthānā vaṁśinī vaṁśahāriṇī || 83 ||
guhyaśaktirguṇātītā sarvadā sarvatōmukhī |
bhaginī bhagavatpatnī sakalā kālakāriṇī || 84 ||
sarvavitsarvatōbhadrā guhyātītā guhāvaliḥ |
prakriyā yōgamātā ca gandhā viśvēśvarēśvarī || 85 ||
kapilā kapilākāntā kanakābhā kalāntarā |
puṇyā puṣkariṇī bhōktrī purandarapuraḥsarā || 86 ||
pōṣaṇī paramaiśvaryabhūtidā bhūtibhūṣaṇā |
pañcabrahmasamutpattiḥ paramātmātmavigrahā || 87 ||
narmōdayā bhānumatī yōgijñēyā manōjavā |
bījarūpā rajōrūpā vaśinī yōgarūpiṇī || 88 ||
sumantrā mantriṇī pūrṇā hlādinī klēśanāśinī |
manōharī manōrakṣī tāpasī vēdarūpiṇī || 89 ||
vēdaśaktirvēdamātā vēdavidyāprakāśinī |
yōgēśvarēśvarī mālā mahāśaktirmanōmayī || 90 ||
viśvāvasthā vīramuktirvidyunmālā vihāyasī |
pīvarī surabhī vandyā nandinī nandavallabhā || 91 ||
bhāratī paramānandā parāparavibhēdikā |
sarvapraharaṇōpētā kāmyā kāmēśvarēśvarī || 92 ||
acintyā:’cintyamahimā durlēkhā kanakaprabhā |
kūṣmāṇḍī dhanaratnāḍhyā sugandhā gandhadāyinī || 93 ||
trivikramapadōdbhūtā dhanuṣpāṇiḥ śirōhayā |
sudurlabhā dhanādhyakṣā dhanyā piṅgalalōcanā || 94 ||
bhrāntiḥ prabhāvatī dīptiḥ paṅkajāyatalōcanā |
ādyā hr̥tkamalōdbhūtā parāmātā raṇapriyā || 95 ||
satkriyā girijā nityaśuddhā puṣpanirantarā |
durgā kātyāyanī caṇḍī carcikā śāntavigrahā || 96 ||
hiraṇyavarṇā rajanī jaganmantrapravartikā |
mandarādrinivāsā ca śāradā svarṇamālinī || 97 ||
ratnamālā ratnagarbhā pr̥thvī viśvapramāthinī |
padmāsanā padmanibhā nityatuṣṭāmr̥tōdbhavā || 98 ||
dhunvatī duṣprakampā ca sūryamātā dr̥ṣadvatī |
mahēndrabhaginī māyā varēṇyā varadarpitā || 99 ||
kalyāṇī kamalā rāmā pañcabhūtavarapradā |
vācyā varēśvarī nandyā durjayā duratikramā || 100 ||
kālarātrirmahāvēgā vīrabhadrahitapriyā |
bhadrakālī jaganmātā bhaktānāṁ bhadradāyinī || 101 ||
karālā piṅgalākārā nāmavēdā mahānadā |
tapasvinī yaśōdā ca yathādhvaparivartinī || 102 ||
śaṅkhinī padminī sāṅkhyā sāṅkhyayōgapravartikā |
caitrī saṁvatsarā rudrā jagatsampūraṇīndrajā || 103 ||
śumbhāriḥ khēcarī khasthā kambugrīvā kalipriyā |
kharadhvajā kharārūḍhā parārdhyā paramālinī || 104 ||
aiśvaryaratnanilayā viraktā garuḍāsanā |
jayantī hr̥dguhā ramyā sattvavēgā gaṇāgraṇīḥ || 105 ||
saṅkalpasiddhā sāmyasthā sarvavijñānadāyinī |
kalikalmaṣahantrī ca guhyōpaniṣaduttamā || 106 ||
nityadr̥ṣṭiḥ smr̥tirvyāptiḥ puṣṭistuṣṭiḥ kriyāvatī |
viśvāmarēśvarēśānā bhuktirmuktiḥ śivāmr̥tā || 107 ||
lōhitā sarvamātā ca bhīṣaṇā vanamālinī |
anantaśayanānādyā naranārāyaṇōdbhavā || 108 ||
nr̥siṁhī daityamathinī śaṅkhacakragadādharā |
saṅkarṣaṇasamutpattirambikōpāntasaṁśrayā || 109 ||
mahājvālā mahāmūrtiḥ sumūrtiḥ sarvakāmadhuk |
suprabhā sutarāṁ gaurī dharmakāmārthamōkṣadā || 110 ||
bhrūmadhyanilayā:’pūrvā pradhānapuruṣā balī |
mahāvibhūtidā madhyā sarōjanayanā:’sanā || 111 ||
aṣṭādaśabhujā nāṭyā nīlōtpaladalaprabhā |
sarvaśaktyā samārūḍhā dharmādharmānuvarjitā || 112 ||
vairāgyajñānaniratā nirālōkā nirindriyā |
vicitragahanā dhīrā śāśvatasthānavāsinī || 113 ||
sthānēśvarī nirānandā triśūlavaradhāriṇī |
aśēṣadēvatāmūrtirdēvatā paradēvatā || 114 ||
gaṇātmikā girēḥ putrī niśumbhavinipātinī |
avarṇā varṇarahitā nirvarṇā bījasambhavā || 115 ||
anantavarṇānanyasthā śaṅkarī śāntamānasā |
agōtrā gōmatī gōptrī guhyarūpā guṇāntarā || 116 ||
gōśrīrgavyapriyā gaurī gaṇēśvaranamaskr̥tā |
satyamātrā satyasandhā trisandhyā sandhivarjitā || 117 ||
sarvavādāśrayā sāṅkhyā sāṅkhyayōgasamudbhavā |
asaṅkhyēyāpramēyākhyā śūnyā śuddhakulōdbhavā || 118 ||
bindunādasamutpattiḥ śambhuvāmā śaśiprabhā |
visaṅgā bhēdarahitā manōjñā madhusūdanī || 119 ||
mahāśrīḥ śrīsamutpattistamaḥpārē pratiṣṭhitā |
tritattvamātā trividhā susūkṣmapadasaṁśrayā || 120 ||
śāntyatītā malātītā nirvikārā nirāśrayā |
śivākhyā citranilayā śivajñānasvarūpiṇī || 121 ||
daityadānavanirmātrī kāśyapī kālakarṇikā |
śāstrayōniḥ kriyāmūrtiścaturvargapradarśitā || 122 ||
nārāyaṇī navōdbhūtā kaumudī liṅgadhāriṇī |
kāmukī lalitā tārā parāparavibhūtidā || 123 ||
parāntajātamahimā vaḍavā vāmalōcanā |
subhadrā dēvakī sītā vēdavēdāṅgapāragā || 124 ||
manasvinī manyumātā mahāmanyusamudbhavā |
amr̥tyuramr̥tāsvādā puruhūtā puruplutā || 125 ||
aśōcyā bhinnaviṣayā hiraṇyarajatapriyā |
hiraṇyā rājatī haimī hēmābharaṇabhūṣitā || 126 ||
vibhrājamānā durjñēyā jyōtiṣṭōmaphalapradā |
mahānidrāsamudbhūtirbalīndrā satyadēvatā || 127 ||
dīrghā kakudminī vidyā śāntidā śāntivardhinī |
lakṣmyādiśaktijananī śakticakrapravartikā || 128 ||
triśaktijananī janyā ṣaḍūrmiparivarjitā |
svāhā ca karmakaraṇī yugāntadalanātmikā || 129 ||
saṅkarṣaṇā jagaddhātrī kāmayōniḥ kirīṭinī |
aindrī trailōkyanamitā vaiṣṇavī paramēśvarī || 130 ||
pradyumnadayitā dāntā yugmadr̥ṣṭistrilōcanā |
mahōtkaṭā haṁsagatiḥ pracaṇḍā caṇḍavikramā || 131 ||
vr̥ṣāvēśā viyanmātrā vindhyaparvatavāsinī |
himavanmērunilayā kailāsagirivāsinī || 132 ||
cāṇūrahantrī tanayā nītijñā kāmarūpiṇī |
vēdavidyāvrataratā dharmaśīlā:’nilāśanā || 133 ||
ayōdhyānilayā vīrā mahākālasamudbhavā |
vidyādharapriyā siddhā vidyādharanirākr̥tiḥ || 134 ||
āpyāyantī vahantī ca pāvanī pōṣaṇī khilā |
mātr̥kā manmathōdbhūtā vārijā vāhanapriyā || 135 ||
karīṣiṇī svadhā vāṇī vīṇāvādanatatparā |
sēvitā sēvikā sēvā sinīvālī garutmatī || 136 ||
arundhatī hiraṇyākṣī maṇidā śrīvasupradā |
vasumatī vasōrdhārā vasundharāsamudbhavā || 137 ||
varārōhā varārhā ca vapuḥsaṅgasamudbhavā |
śrīphalī śrīmatī śrīśā śrīnivāsā haripriyā || 138 ||
śrīdharī śrīkarī kamprā śrīdharā īśavīraṇī |
anantadr̥ṣṭirakṣudrā dhātrīśā dhanadapriyā || 139 ||
nihantrī daityasiṁhānāṁ siṁhikā siṁhavāhinī |
susēnā candranilayā sukīrtiśchinnasaṁśayā || 140 ||
balajñā baladā vāmā lēlihānā:’mr̥tasravā |
nityōditā svayañjyōtirutsukāmr̥tajīvinī || 141 ||
vajradaṁṣṭrā vajrajihvā vaidēhī vajravigrahā |
maṅgalyā maṅgalā mālā malinā malahāriṇī || 142 ||
gāndharvī gāruḍī cāndrī kambalāśvatarapriyā |
saudāminī janānandā bhrukuṭīkuṭilānanā || 143 ||
karṇikārakarā kakṣā kaṁsaprāṇāpahāriṇī |
yugandharā yugāvartā trisandhyā harṣavardhinī || 144 ||
pratyakṣadēvatā divyā divyagandhā divāparā |
śakrāsanagatā śākrī sādhvī nārī śavāsanā || 145 ||
iṣṭā viśiṣṭā śiṣṭēṣṭā śiṣṭā śiṣṭaprapūjitā |
śatarūpā śatāvartā vinītā surabhiḥ surā || 146 ||
surēndramātā sudyumnā suṣumṇā sūryasaṁsthitā |
samīkṣā satpratiṣṭhā ca nivr̥ttirjñānapāragā || 147 ||
dharmaśāstrārthakuśalā dharmajñā dharmavāhanā |
dharmādharmavinirmātrī dhārmikāṇāṁ śivapradā || 148 ||
dharmaśaktirdharmamayī vidharmā viśvadharmiṇī |
dharmāntarā dharmamadhyā dharmapūrvā dhanapriyā || 149 ||
dharmōpadēśā dharmātmā dharmalabhyā dharādharā |
kapālī śākalāmūrtiḥ kalākalitavigrahā || 150 ||
sarvaśaktivinirmuktā sarvaśaktyāśrayāśrayā |
sarvā sarvēśvarī sūkṣmā susūkṣmā jñānarūpiṇī || 151 ||
pradhānapuruṣēśānī mahāpuruṣasākṣiṇī |
sadāśivā viyanmūrtirdēvamūrtiramūrtikā || 152 ||
ēvaṁ nāmnāṁ sahasrēṇa tuṣṭāva raghunandanaḥ |
kr̥tāñjalipuṭō bhūtvā sītāṁ hr̥ṣṭatanūruhām || 153 ||
bhāradvāja mahābhāga yaścaitat stōtramadbhutam |
paṭhēdvā pāṭhayēdvāpi sa yāti paramaṁ padam || 154 ||
brahmakṣatriyaviḍyōnirbrahma prāpnōti śāśvatam |
śūdraḥ sadgatimāpnōti dhanadhānyavibhūtayaḥ || 154 ||
bhavanti stōtramahātmyādētat svastyayanaṁ mahat |
mārībhayē rājabhayē tathā cōrāgnijē bhayē || 156 ||
vyādhīnāṁ prabhavē ghōrē śatrūtthānē ca saṅkaṭē |
anāvr̥ṣṭibhayē vipra sarvaśāntikaraṁ param || 157 ||
yadyadiṣṭatamaṁ yasya tatsarvaṁ stōtratō bhavēt |
yatraitatpaṭhyatē samyak sītānāmasahasrakam || 158 ||
rāmēṇa sahitā dēvī tatra tiṣṭhatyasaṁśayam |
mahāpāpātipāpāni vilayaṁ yānti suvrata || 159 ||
ityārṣē śrīmadrāmāyaṇē vālmīkīyē ādikāvyē adbhutōttarakāṇḍē śrīsītāsahasranāmastōtrakathanaṁ nāma pañcaviṁśatitamaḥ sargaḥ ||
See more śrī rāma stōtrāṇi for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
