Sri Narasimha Mantra Raja Pada Stotram – śrī nr̥siṁha mantrarājapada stōtram

by Stotra Nidhi Updated on July 1, 2020

pārvatyuvāca –
mantrāṇāṁ paramaṁ mantraṁ guhyānāṁ guhyamēva ca |
brūhi mē nārasiṁhasya tattvaṁ mantrasya durlabham ||

śaṅkara uvāca –
vr̥ttōtphullaviśālākṣaṁ vipakṣakṣayadīkṣitaṁ |
ninādatrastaviśvāṇḍaṁ viṣṇumugraṁ namāmyaham || 1 ||

sarvairavadhyatāṁ prāptaṁ sabalaughaṁ ditēssutaṁ |
nakhāgraiśśakalīcakrēyastaṁ vīraṁ namāmyaham || 2 ||

pādāvaṣṭabdhapātālaṁ mūrdhā:’:’viṣṭatriviṣṭapaṁ |
bhujapraviṣṭāṣṭadiśaṁ mahāviṣṇuṁ namāmyaham || 3 ||

jyōtīmṣyarkēndunakṣatrajvalanādīnyanukramāt |
jvalanti tējasā yasya taṁ jvalantaṁ namāmyaham || 4 ||

sarvēndriyairapi vinā sarvaṁ sarvatra sarvadā |
jānāti yō namāmyādyaṁ tamahaṁ sarvatōmukham || 5 ||

naravatsiṁhavaccaiva rūpaṁ yasya mahātmanaḥ |
mahāsaṭaṁ mahādamṣṭraṁ taṁ nr̥siṁhaṁ namāmyaham || 6 ||

yannāmasmaraṇādbhītā bhūtavētālarākṣasāḥ |
rōgādyāśca praṇaśyanti bhīṣaṇaṁ taṁ namāmyaham || 7 ||

sarvē:’pi yaṁ samāśritya sakalaṁ bhadramaśnutē |
śriyā ca bhadrayā juṣṭō yastaṁ bhadraṁ namāmyaham || 8 ||

sākṣātsvakālē samprāptaṁ mr̥tyuṁ śatrugaṇānapi |
bhaktānāṁ nāśayēdyastu mr̥tyumr̥tyuṁ namāmyaham || 9 ||

namaskārātmakaṁ yasmai vidhāyātmanivēdanaṁ |
tyaktaduḥkhō:’khilānkāmānaśnutē taṁ namāmyaham || 10 ||

dāsabhūtāssvatassarvē hyātmānaḥ paramātmanaḥ |
atō:’hamapi tē dāsa iti matvā namāmyaham || 11 ||

śaṅkarēṇādarātprōktaṁ padānāṁ tattvamuttamaṁ |
trisandhyaṁ yō japēttasya vidyā:’:’yuśśrīśca vardhatē || 12 ||

iti śrī śaṅkarakr̥ta śrīnr̥siṁhamantrarājapadastōtram |

Facebook Comments