Read in తెలుగు / ಕನ್ನಡ / தமிழ் / देवनागरी / English (IAST)
vandē gajēndravadanaṁ
vāmāṅkārūḍhavallabhāśliṣṭam |
kuṅkumaparāgaśōṇaṁ
kuvalayinījārakōrakāpīḍam || 1 ||
sa jayati suvarṇaśailaḥ
sakalajagaccakrasaṅghaṭitamūrtiḥ |
kāñcananikuñjavāṭī-
-kandaladamarīprapañcasaṅgītaḥ || 2 ||
harihayanairr̥tamāruta-
-haritāmantēṣvavasthitaṁ tasya |
vinumaḥ sānutritayaṁ
vidhiharigaurīśaviṣṭapādhāram || 3 ||
madhyē punarmanōhara-
-ratnarucistabakarañjitadigantam |
upari catuḥśatayōjana-
-muttuṅgaṁ śr̥ṅgapuṅgavamupāsē || 4 ||
tatra catuḥśatayōjana-
-pariṇāhaṁ dēvaśilpinā racitam |
nānāsālamanōjñaṁ
namāmyahaṁ nagaramādividyāyāḥ || 5 ||
prathamaṁ sahasrapūrvaka-
-ṣaṭśatasaṅkhyākayōjanaṁ paritaḥ |
valayīkr̥tasvagātraṁ
varaṇaṁ śaraṇaṁ vrajāmyayōrūpam || 6 ||
tasyōttarē samīraṇa-
-yōjanadūrē taraṅgitacchāyaḥ |
ghaṭayatu mudaṁ dvitīyō
ghaṇṭāstanasāranirmitaḥ sālaḥ || 7 ||
ubhayōrantarasīma-
-nyuddāmabhramararañjitōdāram |
upavanamupāsmahē vaya-
-mūrīkr̥tamandamārutasyandam || 8 ||
āliṅgya bhadrakālī-
-māsīnastatra hariśilāśyāmām |
manasi mahākālō mē
viharatu madhupānavibhramannētraḥ || 9 ||
tārtīyīkō varaṇa-
-stasyōttarasīmni vātayōjanataḥ |
tāmrēṇa racitamūrti-
-stanutāmācandratārakaṁ bhadram || 10 ||
madhyē tayōśca maṇimaya-
-pallavaśākhāprasūnapakṣmalitām |
kalpānōkahavāṭīṁ
kalayē makarandapaṅkilāvālām || 11 ||
tatra madhumādhavaśrī-
-taruṇībhyāṁ taraladr̥kcakōrābhyām |
āliṅgitō:’vatānmā-
-maniśaṁ prathamarturāttapuṣpāstraḥ || 12 ||
namata taduttarabhāgē
nākipathōllaṅghiśr̥ṅgasaṅghātam |
sīsākr̥tiṁ turīyaṁ
sitakiraṇālōkanirmalaṁ sālam || 13 ||
sāladvayāntarālē
saralālikapōtacāṭusubhagāyām |
santānavāṭikāyāṁ
saktaṁ cētō:’stu satatamasmākam || 14 ||
tatra tapanātirūkṣaḥ
sāmrājñīcaraṇasāndritasvāntaḥ |
śukraśuciśrīsahitō
grīṣmarturdiśatu kīrtimākalpam || 15 ||
uttarasīmani tasyō-
-nnataśikharōtkampihāṭakapatākaḥ |
prakaṭayatu pañcamō naḥ
prākāraḥ kuśalamārakūṭamayaḥ || 16 ||
prākārayōśca madhyē
pallavitānyabhr̥tapañcamōnmēṣā |
haricandanadruvāṭī-
-haratādāmūlamasmadanutāpam || 17 ||
tatra nabhaḥ śrīmukhyai-
-staruṇīvargaiḥ samanvitaḥ paritaḥ |
vajrāṭ-ṭahāsamukharō
vāñchāpūrtiṁ tanōtu varṣartuḥ || 18 ||
mārutayōjanadūrē
mahanīyastasya cōttarē bhāgē |
bhadraṁ kr̥ṣīṣṭa ṣaṣṭhaḥ
prākāraḥ pañcalōhadhātumayaḥ || 19 ||
anayōrmadhyē santata-
-maṅkūraddivyakusumagandhāyām |
mandāravāṭikāyāṁ
mānasamaṅgīkarōtu mē vihr̥tim || 20 ||
tasyāmiṣōrjalakṣmī-
-taruṇībhyāṁ śaradr̥tuḥ sadā sahitaḥ |
abhyarcayan sa jīyā-
-dambāmāmōdamēduraiḥ kusumaiḥ || 21 ||
tasyarṣisaṅkhyayōjana-
-dūrē dēdīpyamānaśr̥ṅgaughaḥ |
kaladhautakalitamūrtiḥ
kalyāṇaṁ diśatu saptamaḥ sālaḥ || 22 ||
madhyē tayōrmarutpatha
laṅghitaviṭapāgravirutakalakaṇṭhā |
śrīpārijātavāṭī
śriyamaniśaṁ diśatu śītalōddēśā || 23 ||
tasyāmatipriyābhyāṁ
saha khēlan sahasahasyalakṣmībhyām |
sāmantō jhaṣakētō-
-rhēmantō bhavatu hēmavr̥ddhyai naḥ || 24 ||
uttaratastasya mahā-
-nudbhaṭahutabhukṣikhāruṇamayūkhaḥ |
tapanīyakhaṇḍaracita-
-stanutādāyuṣyamaṣṭamō varaṇaḥ || 25 ||
kādambavipinavāṭī-
-manayōrmadhyabhuvi kalpitāvāsām |
kalayāmi sūnakōraka-
-kandalitāmōdatundilasamīrām || 26 ||
tasyāmatiśiśirākr̥ti-
-rāsīnastapatapasyalakṣmībhyām |
śivamaniśaṁ kurutānmē
śiśirartuḥ satataśītaladigantaḥ || 27 ||
tasyāṁ kadambavāṭyāṁ
tatprasavāmōdamilitamadhugandham |
saptāvaraṇamanōjñaṁ
śaraṇaṁ samupaimi mantriṇīśaraṇam || 28 ||
tatrālayē viśālē
tapanīyāracitataralasōpānē |
māṇikyamaṇḍapānta-
-rmahitē siṁhāsanē sumaṇikhacitē || 29 ||
bindutripañcakōṇa-
-dvipanr̥pavasuvēdadalakurēkhāḍhyē |
cakrē sadā niviṣṭāṁ
ṣaṣṭhyaṣṭatriṁśadakṣarēśānīm || 30 ||
tāpiñchamēcakābhāṁ
tālīdalaghaṭitakarṇatāṭaṅkām |
tāmbūlapūritamukhīṁ
tāmrādharabimbadr̥ṣṭadarahāsām || 31 ||
kuṅkumapaṅkiladēhāṁ
kuvalayajīvātuśāvakavataṁsām |
kōkanadaśōṇacaraṇāṁ
kōkilanikvāṇakōmalālāpām || 32 ||
vāmāṅgagalitacūlīṁ
vanamālyakadambamālikābharaṇām |
muktālalantikāñcita
mugdhālikamilitacitrakōdārām || 33 ||
karavidhr̥takīraśāvaka-
-kalaninadavyaktanikhilanigamārthām |
vāmakucasaṅgivīṇāvādana-
-saukhyārdhamīlitākṣiyugām || 34 ||
āpāṭalāṁśukadharā-
-mādirasōnmēṣavāsitakaṭākṣām |
āmnāyasāragulikā-
-mādyāṁ saṅgītamātr̥kāṁ vandē || 35 ||
tasya ca suvarṇasāla-
-syōttaratastaruṇakuṅkumacchāyaḥ |
śamayatu mama santāpaṁ
sālō navamaḥ sa puṣparāgamayaḥ || 36 ||
anayōrantaravasudhāḥ
praṇumaḥ pratyagrapuṣparāgamayīḥ |
siṁhāsanēśvarīmanu-
-cintananistandrasiddhanīrandhrāḥ || 37 ||
tatsālōttaradēśē
taruṇajapākiraṇadhōraṇīśōṇaḥ |
praśamayatu padmarāga-
-prākārō mama parābhavaṁ daśamaḥ || 38 ||
antarabhūkr̥tavāsā-
-nanayōrapanītacittavaimatyān |
cakrēśīpadabhaktāṁ-
-ścāraṇavargānaharniśaṁ kalayē || 39 ||
sāraṅgavāhayōjanadūrē-
-:’saṅghaṭitakētanastasya |
gōmēdakēna racitō
gōpāyatu māṁ samunnataḥ sālaḥ || 40 ||
vapradvayāntarōrvyāṁ
vaṭukairvividhaiśca yōginībr̥ndaiḥ |
satataṁ samarcitāyāḥ
saṅkarṣaṇyāḥ praṇaumi caraṇābjam || 41 ||
tāpasayōjanadūrē
tasya samuttuṅga gōpurōpētaḥ |
vāñchāpūrtyai bhavatā-
-dvajramaṇīnikaranirmitō vapraḥ || 42 ||
varaṇadvitayāntaratō
vāsajuṣō vihitamadhurasāsvādāḥ |
rambhādivibudhavēśyā
racayantu mahāntamasmadānandam || 43 ||
tatra sadā pravahantī
taṭinī vajrābhidhā ciraṁ jīyāt |
caṭulōrmijālanr̥tya-
-tkalahaṁsīkulakalakvaṇitapuṣṭā || 44 ||
rōdhasi tasyā rucirē
vajrēśī jayati vajrabhūṣāḍhyā |
vajrapradānatōṣita-
-vajrimukhatridaśavinutacāritrā || 45 ||
tasyōdīcyāṁ hariti
stavakitasuṣamāvalīḍhaviyadantaḥ |
vaiḍūryaratnaracitō
vaimalyaṁ diśatu cētasō varaṇaḥ || 46 ||
adhimadhyamētayōḥ puna-
-rambācaraṇāvalambitasvāntān |
kārkōṭakādināgān
kalayāmaḥ kiṁ ca balimukhān danujān || 47 ||
gandhavahasaṅkhyayōjana-
-dūrē gaganōrdhvajāṅghikastasya |
vāsavamaṇipraṇītō
varaṇō bahalayatu vaiduṣīṁ viśadām || 48 ||
madhyakṣōṇyāmanayō-
-rmahēndranīlātmakāni ca sarāṁsi |
śātōdarīsahāyā-
-nbhūpālānapi punaḥ punaḥ praṇumaḥ || 49 ||
āśugayōjanadūrē
tasyōrdhvaṁ kāntidhavalitadigantaḥ |
muktāviracitagātrō
muhurasmākaṁ mudē bhavatu sālaḥ || 50 ||
āvr̥ttyōradhimadhyaṁ
pūrvasyāṁ diśi purandaraḥ śrīmān |
abhramuviṭādhirūḍhō
vibhramamasmākamaniśamātanutāt || 51 ||
tatkōṇē vyajanasru-
-ktōmarapātrasruvānnaśaktidharaḥ |
svāhāsvadhāsamētaḥ
sukhayatu māṁ havyavāhanaḥ suciram || 52 ||
dakṣiṇadigantarālē
daṇḍadharō nīlanīradacchāyaḥ |
tripurāpadābjabhaktastirayatu
mama nikhilamaṁhasāṁ nikaram || 53 ||
tasyaiva paścimāyāṁ
diśi dalitēndīvaraprabhāśyāmaḥ |
khēṭāsiyaṣṭidhārī
khēdānapanayatu yātudhānō mē || 54 ||
tasyā uttaradēśē
dhavalāṅgō vipulajhaṣavarārūḍhaḥ |
pāśāyudhāttapāṇiḥ
pāśī vidalayatu pāśajālāni || 55 ||
vandē taduttarahari-
-tkōṇē vāyuṁ camūruvaravāham |
kōrakitatattvabōdhā-
-ngōrakṣapramukhayōginō:’pi muhuḥ || 56 ||
taruṇīriḍāpradhānā-
-stisrō vātasya tasya kr̥tavāsāḥ |
pratyagrakāpiśāyana-
-pānaparibhrāntalōcanāḥ kalayē || 57 ||
tallōkapūrvabhāgē
dhanadaṁ dhyāyāmi śēvadhikulēśam |
api māṇibhadramukhyā-
-nambācaraṇāvalambinō yakṣān || 58 ||
tasyaiva pūrvasīmani
tapanīyāracitagōpurē nagarē |
kātyāyanīsahāyaṁ
kalayē śītāṁśukhaṇḍacūḍālam || 59 ||
tatpuraṣōḍaśavaraṇa-
-sthalabhājastaruṇacandracūḍālān |
rudrādhyāyē paṭhitā-
-nrudrāṇīsahacarānbhajē rudrān || 60 ||
pavamānasaṅkhyayōjana-
-dūrē bālatr̥ṇmēcakastasya |
sālō marakataracitaḥ
sampadamacalāṁ śriyaṁ ca puṣṇātu || 61 ||
āvr̥tiyugmāntaratō
haritamaṇīnivahamēcakē dēśē |
hāṭakatālīvipinaṁ
hālāghaṭaghaṭitaviṭapamākalayē || 62 ||
tatraiva mantriṇīgr̥ha-
-pariṇāhaṁ taralakētanaṁ sadanam |
marakatasaudhamanōjñaṁ
dadyādāyūṁṣi daṇḍanāthāyāḥ || 63 ||
sadanē tatra harinmaṇi-
-saṅghaṭitē maṇḍapē śatastambhē |
kārtasvaramayapīṭhē
kanakamayāmburuhakarṇikāmadhyē || 64 ||
bindutrikōṇavartula-
-ṣaḍasravr̥ttadvayānvitē cakrē |
sañcāriṇī daśōttara-
śatārṇamanurājakamalakalahaṁsī || 65 ||
kōlavadanā kuśēśaya-
-nayanā kōkārimaṇḍitaśikhaṇḍā |
santaptakāñcanābhā
sandhyāruṇacēlasaṁvr̥tanitambā || 66 ||
halamusalaśaṅkhacakrā-
-:’ṅkuśapāśābhayavarasphuritahastā |
kūlaṅkaṣānukampā
kuṅkumajambālitastanābhōgā || 67 ||
dhūrtānāmatidūrā-
-vārtāśēṣāvalagnakamanīyā |
ārtālīśubhadātrī
vārtālī bhavatu vāñchitārthāya || 68 ||
tasyāḥ paritō dēvīḥ
svapnēśyunmattabhairavīmukhyāḥ |
praṇamata jambhinyādyāḥ
bhairavavargāṁśca hētukapramukhān || 69 ||
pūrvōktasaṅkhyayōjana-
-dūrē pūyāṁśupāṭalastasya |
vidrāvayatu madārtiṁ
vidrumasālō viśaṅkaṭadvāraḥ || 70 ||
āvaraṇayōraharniśa-
-mantarabhūmauprakāśaśālinyām |
āsīnamambujāsana-
-mabhinavasindūragauramahamīḍē || 71 ||
varaṇasya tasya māruta-
-yōjanatō vipulagōpuradvāraḥ |
sālō nānāratnaiḥ
saṅghaṭitāṅgaḥ kr̥ṣīṣṭa madabhīṣṭam || 72 ||
antarakakṣyāmanayō-
-raviralaśōbhāpicaṇḍilōddēśām |
māṇikyamaṇḍapākhyāṁ
mahatīmadhihr̥dayamaniśamākalayē || 73 ||
tatra sthitaṁ prasannaṁ
taruṇatamālapravālakiraṇābham |
karṇāvalambikuṇḍala-
-kandalitābhīśukavacitakapōlam || 74 ||
śōṇādharaṁ śucismita-
-mēṇāṅkavadanamēdhamānakr̥pam |
mugdhaiṇamadaviśēṣaka-
-mudritaniṭilēndurēkhikāruciram || 75 ||
nālīkadalasahōdara-
-nayanāñcalaghaṭitamanasijākūtam |
kamalākaṭhinapayōdhara-
-kastūrīghusr̥ṇapaṅkilōraskam || 76 ||
cāmpēyagandhikaiśyaṁ
śampāsabrahmacārikauśēyam |
śrīvatsakaustubhadharaṁ
śritajanarakṣādhurīṇacaraṇābjam || 77 ||
kambusudarśanavilasa-
-tkarapadmaṁ kaṇṭhalōlavanamālam |
mucukundamōkṣaphaladaṁ
mukundamānandakandamavalambē || 78 ||
tadvaraṇōttarabhāgē
tārāpatibimbacumbinijaśr̥ṅgaḥ |
vividhamaṇīgaṇaghaṭitō
vitaratu sālō vinirmalāṁ dhiṣaṇām || 79 ||
prākāradvitayāntara-
-kakṣyāṁ pr̥thuratnanikarasaṅkīrṇām |
namata sahasrastambhaka-
-maṇḍapanāmnātiviśrutāṁ bhuvanē || 80 ||
praṇumastatra bhavānī-
-sahacaramīśānamindukhaṇḍadharam |
śr̥ṅgāranāyikāmanu-
-śīlanabhājō:’pi bhr̥ṅginandimukhān || 81 ||
tasyaiṇavāhayōjana-
-dūrē vandē manōmayaṁ vapram |
aṅkūranmaṇikiraṇā-
-mantarakakṣyāṁ ca nirmalāmanayōḥ || 82 ||
tatraivāmr̥tavāpīṁ
taralataraṅgāvalīḍhataṭayugmām |
muktāmayakalahaṁsī-
-mudritakanakāravindasandōhām || 83 ||
śakrōpalamayabhr̥ṅgī-
-saṅgītōnmēṣaghōṣitadigantām |
kāñcanamayāṅgavilasa-
-tkāraṇḍavaṣaṇḍatāṇḍavamanōjñām || 84 ||
kuruvindātmakahallaka-
-kōrakasuṣamāsamūhapāṭalitām |
kalayē sudhāsvarūpāṁ
kandalitāmandakairavāmōdām || 85 ||
tadvāpikāntarālē taralē
maṇipōtasīmni viharantīm |
sindūrapāṭalāṅgīṁ
sitakiraṇāṅkūrakalpitavataṁsām || 86 ||
parvēndubimbavadanāṁ
pallavaśōṇādharasphuritahāsām |
kuṭilakabarīṁ kuraṅgī-
-śiśunayanāṁ kuṇḍalasphuritagaṇḍām || 87 ||
nikaṭasthapōtanilayāḥ
śaktīḥ śayavidhr̥tahēmaśr̥ṅgajalaiḥ |
pariṣiñcantīṁ parita-
-stārāṁ tāruṇyagarvitāṁ vandē || 88 ||
prāguktasaṅkhyayōjanadūrē
praṇamāmi buddhimayasālam |
anayōrantarakakṣyā-
-maṣṭāpadapuṣṭamēdinīṁ rucirām || 89 ||
kādambarīnidhānāṁ
kalayāmyānandavāpikāṁ tasyām |
śōṇāśmanivahanirmita-
-sōpānaśrēṇiśōbhamānataṭīm || 90 ||
māṇikyataraṇinilayāṁ
madhyē tasyā madāruṇakapōlām |
amr̥tēśītyabhidhānā-
-mantaḥ kalayāmi vāruṇīṁ dēvīm || 91 ||
sauvarṇakēnipātana-
-hastāḥ saundaryagarvitā dēvyaḥ |
tatpurataḥ sthitibhājō
vitarantvasmākamāyuṣō vr̥ddhim || 92 ||
tasya pr̥ṣadaśvayōjana-
-dūrē:’haṅkārasālamatituṅgam |
vandē tayōśca madhyē
kakṣyāṁ valamānamalayapavamānām || 93 ||
vinumō vimarśavāpīṁ
sauṣumnasudhāsvarūpiṇīṁ tatra |
vēlātilaṅghyavīcī-
-kōlāhalabharitakūlavanavāṭīm || 94 ||
tatraiva salilamadhyē
tāpiñchadalaprapañcasuṣamābhām |
śyāmalakañcukalasitāṁ
śyāmāviṭabimbaḍambaraharāsyām || 95 ||
ābhugnamasr̥ṇacillī-
-hasitāyugmaśarakārmukavilāsām |
mandasmitāñcitamukhīṁ
maṇimayatāṭaṅkamaṇḍitakapōlām || 96 ||
kuruvindataraṇinilayāṁ
kulācalaspardhikucanamanmadhyām |
kuṅkumaviliptagātrīṁ
kurukullāṁ manasi kurmahē satatam || 97 ||
tatsālōttarabhāgē
bhānumayaṁ vapramāśrayē dīptam |
madhyaṁ ca vipulamanayō-
-rmanyē viśrāntamātapōdgāram || 98 ||
tatra kuruvindapīṭhē
tāmarasē kanakakarṇikāghaṭitē |
āsīnamaruṇavāsasa-
-mamlānaprasavamālikābharaṇam || 99 ||
cakṣuṣmatīprakāśana-
-śakticchāyāsamāracitakēlim |
māṇikyamukuṭaramyaṁ
manyē mārtāṇḍabhairavaṁ hr̥dayē || 100 ||
indumayasālamīḍē
tasyōttaratastuṣāragirigauram |
atyantaśiśiramāruta-
-manayōrmadhyaṁ ca candrikōdgāram || 101 ||
tatra prakāśamānaṁ
tārānikaraiḥ pariṣkr̥tōddēśam |
amr̥tamayakāntikandala-
-mantaḥ kalayāmi kundasitamindum || 102 ||
śr̥ṅgārasālamīḍē
śr̥ṅgōllasitaṁ taduttarē bhāgē |
madhyasthalē tayōrapi
mahitāṁ śr̥ṅgārapūrvikāṁ parikhām || 103 ||
tatra maṇinausthitābhi-
-stapanīyāviracitāgrahastābhiḥ |
śr̥ṅgāradēvatābhiḥ
sahitaṁ parikhādhipaṁ bhajē madanam || 104 ||
śr̥ṅgāravaraṇavaryasyōttarataḥ
sakalavibudhasaṁsēvyam |
cintāmaṇigaṇaracitaṁ
cintāṁ dūrīkarōtu mē sadanam || 105 ||
maṇisadanasālayōradhi-
-madhyaṁ daśatālabhūmiruhadīrghaiḥ |
parṇaiḥ suvarṇavarṇai-
-ryuktāṁ kāṇḍaiśca yōjanōttuṅgaiḥ || 106 ||
mr̥dulaistālīpañcaka-
-mānairmilitāṁ ca kēsarakadambaiḥ |
santatagalitamaranda-
-srōtōniryanmilindasandōhām || 107 ||
pāṭīrapavanabālaka-
-dhāṭīniryatparāgapiñjaritām |
kalahaṁsīkulakalakala-
-kūlaṅkaṣaninadanicayakamanīyām || 108 ||
padmāṭavīṁ bhajāmaḥ
parimalakallōlapakṣmalōpāntām |
[* dēvyarghyapātradhārī
tasyāḥ pūrvadiśi daśakalāyuktaḥ | *]
valayitamūrtirbhagavā-
-nvahniḥ krōśōnnataściraṁ pāyāt || 109 ||
tatrādhārē dēvyāḥ
pātrīrūpaḥ prabhākaraḥ śrīmān |
dvādaśakalāsamētō
dhvāntaṁ mama bahulamāntaraṁ bhindyāt || 110 ||
tasmin dinēśapātrē
taraṅgitāmōdamamr̥tamayamarghyam |
candrakalātmakamamr̥taṁ
sāndrīkuryādamandamānandam || 111 ||
amr̥tē tasminnabhitō
viharantyō vividhamaṇitaraṇibhājaḥ |
ṣōḍaśa kalāḥ sudhāṁśōḥ
śōkāduttārayantu māmaniśam || 112 ||
tatraiva vihr̥tibhājō
dhātr̥mukhānāṁ ca kāraṇēśānām |
sr̥ṣṭyādirūpikāstāḥ
śamayantvakhilāḥ kalāśca santāpam || 113 ||
kīnāśavaruṇakinnara-
-rājadigantēṣu ratnagēhasya |
kalayāmi tānyajasraṁ
kalayantvāyuṣyamarghyapātrāṇi || 114 ||
pātrasthalasya purataḥ
padmāramaṇavidhipārvatīśānām |
bhavanāni śarmaṇē nō
bhavantu bhāsā pradīpitajaganti || 115 ||
sadanasyānalakōṇē
satataṁ praṇamāmi kuṇḍamāgnēyam |
tatra sthitaṁ ca vahniṁ
taralaśikhājaṭilamambikājanakam || 116 ||
tasyāsuradiśi tādr̥śa-
-ratnaparisphuritaparvanavakāḍhyam |
cakrātmakaṁ śatāṅgaṁ
śatayōjanamunnataṁ bhajē divyam || 117 ||
tatraiva diśi niṣaṇṇaṁ
tapanīyadhvajaparamparāśliṣṭam |
rathamaparaṁ ca bhavānyā
racayāmō manasi ratnamayacūḍam || 118 ||
bhavanasya vāyubhāgē
pariṣkr̥tō vividhavaijayantībhiḥ |
racayatu mudaṁ rathēndraḥ
sacivēśānyāḥ samastavandyāyāḥ || 119 ||
kurmō:’dhihr̥dayamaniśaṁ
krōḍāsyāyāḥ śatāṅgamūrdhanyam |
rudradiśi ratnadhāmnō
ruciraśalākāprapañcakañcukitam || 120 ||
paritō dēvīdhāmnaḥ
praṇītavāsā manusvarūpiṇyaḥ |
kurvantu raśmimālā-
-kr̥tayaḥ kuśalāni dēvatā nikhilāḥ || 121 ||
prāgdvārasya bhavānī-
-dhāmnaḥ pārśvadvayāracitavāsē |
mātaṅgīkiṭimukhyau
maṇisadanē manasi bhāvayāmi ciram || 122 ||
yōjanayugalābhōgā
tatkrōśapariṇāhayaiva bhittyā ca |
cintāmaṇigr̥habhūmi-
-rjīyādāmnāyamayacaturdvārā || 123 ||
dvārē dvārē dhāmnaḥ
piṇḍībhūtā navīnabimbābhāḥ |
vidadhatu vipulāṁ kīrtiṁ
divyā lauhityasiddhyō dēvyaḥ || 124 ||
maṇisadanasyāntaratō
mahanīyē ratnavēdikāmadhyē |
bindumayacakramīḍē
pīṭhānāmupari viracitāvāsam || 125 ||
cakrāṇāṁ sakalānāṁ
prathamamadhaḥ sīmaphalakavāstavyāḥ |
aṇimādisiddhayō mā-
-mavantu dēvī prabhāsvarūpiṇyaḥ || 126 ||
aṇimādisiddhiphalaka-
-syōparihariṇāṅkakhaṇḍakr̥tacūḍāḥ |
bhadraṁ pakṣmalayantu
brāhmīpramukhāśca mātarō:’smākam || 127 ||
tasyōpari maṇiphalakē
tāruṇyōttuṅgapīnakucabhārāḥ |
saṅkṣōbhiṇīpradhānāḥ
bhrānti vidrāvayantu daśa mudrāḥ || 128 ||
phalakatrayasvarūpē
pr̥thulē trailōkyamōhanē cakrē |
dīvyantu prakaṭākhyā-
-stāsāṁ kartrīṁ ca bhagavatī tripurā || 129 ||
tadupari vipulē dhiṣṇyē
taraladr̥śastaruṇakōkanadabhāsaḥ |
kāmākarṣiṇyādyāḥ
kalayē dēvīḥ kalādharaśikhaṇḍāḥ || 130 ||
sarvāśāparipūrakacakrē-
-:’smin guptayōginīsēvyāḥ |
tripurēśī mama duritaṁ
tudyāt kaṇṭhāvalambimaṇihārā || 131 ||
tasyōpari maṇipīṭhē
tāmrāmbhōruhadalaprabhāśōṇāḥ |
dhyāyāmyanaṅgakusumā-
-pramukhā dēvīśca vidhr̥takūrpāsāḥ || 132 ||
saṅkṣōbhakārakē:’smiṁ-
-ścakrē śrītripurasundarī sākṣāt |
gōptrī guptatarākhyāḥ
gōpāyatu māṁ kr̥pārdrayā dr̥ṣṭyā || 133 ||
saṅkṣōbhiṇīpradhānāḥ
śaktīstasyōrdhvavalayakr̥tavāsāḥ |
ālōlanīlavēṇī-
-rantaḥ kalayāmi yauvanōnmattāḥ || 134 ||
saubhāgyadāyakē:’smiṁ-
-ścakrēśī tripuravāsinī jīyāt |
śaktīśca sampradāyābhidhāḥ
samastāḥ pramōdayantvaniśam || 135 ||
maṇipīṭhōpari tāsāṁ
mahati caturhastavistr̥tē valayē |
santataviracitavāsāḥ
śaktīḥ kalayāmi sarvasiddhimukhāḥ || 136 ||
sarvārthasādhakākhyē
cakrē:’muṣmin samastaphaladātrī |
tripurā śrīrmama kuśalaṁ
diśatāduttīrṇayōginīsēvyā || 137 ||
tāsāṁ nilayasyōpari
dhiṣṇyē kausumbhakañcukamanōjñāḥ |
sarvājñādyāḥ dēvyaḥ
sakalāḥ sampādayantu mama kīrtim || 138 ||
cakrē samastarakṣā-
-karanāmnyasmin samastajanasēvyām |
manasi nigarbhāsahitāṁ
manyē śrītripuramālinīṁ dēvīm || 139 ||
sarvajñāsadanasyōpari
cakrē vipulē samākalitagēhāḥ |
vandē vaśinīmukhyāḥ
śaktīḥ sindūrarēṇurucaḥ || 140 ||
śrīsarvarōgaharākhya-
-cakrē:’smiṁstripurapūrvikāṁ siddhām |
vandē rahasyanāmnā
vēdyābhiḥ śaktibhiḥ sadā sēvyām || 141 ||
vaśinīgr̥hōpariṣṭā-
-dviṁśatihastōnnatē mahāpīṭhē |
śamayantu śatrubr̥ndaṁ
śastrāṇyastrāṇi cādidampatyōḥ || 142 ||
śastrasadanōpariṣṭā-
-dvalayē valavairiratnasaṅghaṭitē |
kāmēśvarīpradhānāḥ
kalayē dēvīḥ samastajanavandyāḥ || 143 ||
cakrē:’tra sarvasiddhiprada-
-nāmani sarvaphaladātrī |
tripurāmbāvatu satataṁ
parāpararahasyayōginīsēvyā || 144 ||
kāmēśvarīgr̥hōparivalayē
vividhamanusampradāyajñāḥ |
catvārō yuganāthā
jayantu mitrēśapūrvakāḥ guravaḥ || 145 ||
nāthabhavanōpariṣṭā-
-nnānāratnacayamēdurē pīṭhē |
kāmēśyādyā nityāḥ
kalayantu mudaṁ tithisvarūpiṇyaḥ || 146 ||
nityāsadanasyōpari
nirmalamaṇinivahaviracitē dhiṣṇyē |
kuśalaṁ ṣaḍaṅgadēvyaḥ
kalayantvasmākamuttaralanētrāḥ || 147 ||
sadanasyōpari tāsāṁ
sarvānandamayanāmakē bindau |
pañcabrahmākārāṁ
mañcaṁ praṇamāmi maṇigaṇākīrṇam || 148 ||
paritō maṇimañcasya
pralambamānā niyantritā pāśaiḥ |
māyāmayī javanikā
mama duritaṁ haratu mēcakacchāyā || 149 ||
mañcasyōpari lamba-
-nmadanīpunnāgamālikābharitam |
harigōpamayavitānaṁ
haratādālasyamaniśamasmākam || 150 ||
paryaṅkasya bhajāmaḥ
pādānbimbāmbudēnduhēmarucaḥ |
ajaharirudrēśamayā-
-nanalāsuramārutēśakōṇasthān || 151 ||
phalakaṁ sadāśivamayaṁ
praṇaumi sindūrarēṇukiraṇābham |
ārabhyāṅgēśīnāṁ
sadanātkalitaṁ ca ratnasōpānam || 152 ||
paṭ-ṭōpadhānagaṇḍaka-
-catuṣṭayasphuritapāṭalāstaraṇam |
paryaṅkōpari ghaṭitaṁ
pātu ciraṁ haṁsatūlaśayanaṁ naḥ || 153 ||
tasyōpari nivasantaṁ
tāruṇyaśrīniṣēvitaṁ satatam |
āvr̥ntapullahallaka-
-marīcikāpuñjamañjulacchāyam || 154 ||
sindūraśōṇavasanaṁ
śītāṁśustabakacumbitakirīṭam |
kuṅkumatilakamanōhara-
-kuṭilālikahasitakumudabandhuśiśum || 155 ||
pūrṇēndubimbavadanaṁ
phullasarōjātalōcanatritayam |
taralāpāṅgataraṅgita-
-śapharāṅkanaśāstrasampradāyārtham || 156 ||
maṇimayakuṇḍalapuṣya-
-nmarīcikallōlamāṁsalakapōlam |
vidrumasahōdarādhara-
-visr̥marasusmitakiśōrasañcāram || 157 ||
āmōdikusumaśēkhara-
-mānīlabhrūlatāyugamanōjñam |
vīṭīsaurabhavīcī-
-dviguṇitavaktrāravindasaurabhyam || 158 ||
pāśāṅkuśēkṣucāpa-
-prasavaśarasphuritakōmalakarābjam |
kāśmīrapaṅkilāṅgaṁ
kāmēśaṁ manasi kurmahē satatam || 159 ||
tasyāṅkabhuvi niṣaṇṇāṁ
taruṇakadambaprasūnakiraṇābhām |
śītāṁśukhaṇḍacūḍāṁ
sīmantanyastasāndrasindūrām || 160 ||
kuṅkumalalāmabhāsva-
-nniṭilāṁ kuṭilataracillikāyugalām |
nālīkatulyanayanāṁ
nāsāñcalanaṭitamauktikābharaṇām || 161 ||
aṅkuritamandahāsa-
-maruṇādharakāntivijitabimbābhām |
kastūrīmakarīyuta-
-kapōlasaṅkrāntakanakatāṭaṅkām || 162 ||
karpūrasāndravīṭī-
-kabalitavadanāravindakamanīyām |
kambusahōdarakaṇṭha-
-pralambamānācchamauktikakalāpām || 163 ||
kahlāradāmakōmala-
-bhujayugalasphuritaratnakēyūrām |
karapadmamūlavilasa-
-tkāñcanamayakaṭakavalayasandōhām || 164 ||
pāṇicatuṣṭayavilasa-
-tpāśāṅkuśapuṇḍracāpapuṣpāstrām |
kūlaṅkaṣakucaśikharāṁ
kuṅkumakardamitaratnakūrpāsām || 165 ||
aṇudāyādavalagnā-
-mambudaśōbhāsanābhirōmalatām |
māṇikyakhacitakāñcī-
-marīcikākrāntamāṁsalanitambām || 166 ||
karabhōrukāṇḍayugalāṁ
jaṅghājitakāmajaitratūṇīrām |
prapadaparibhūtakūrmāṁ
pallavasacchāyapadayugamanōjñām || 167 ||
kamalabhavakañjalōcana-
-kirīṭaratnāṁśurañjitapadābjām |
unmastakānukampā-
-muttaralāpāṅgapōṣitānaṅgām || 168 ||
ādimarasāvalambā-
-manidaṁ prathamōktivallarīkalikām |
ābrahmakīṭajananī-
-mantaḥ kalayāmi sundarīmaniśam || 169 ||
kastu kṣitau paṭīyā-
-nvastu stōtuṁ śivāṅkavāstavyam |
astu cirantanasukr̥taiḥ
prastutakāmyāya tanmama purastāt || 170 ||
prabhusammitōktigamyaṁ
paramaśivōtsaṅgatuṅgaparyaṅkam |
tējaḥ kiñcana divyaṁ
puratō mē bhavatu puṇḍrakōdaṇḍam || 171 ||
madhurimabharitaśarāsaṁ
makarandasyandimārgaṇōdāram |
kairaviṇīviṭacūḍaṁ
kaivalyāyāstu kiñcana mahō naḥ || 172 ||
akṣudramikṣucāpaṁ
parōkṣamavalagnasīmni tryakṣam |
kṣapayatu mē kṣēmētara-
-mukṣarathaprēmapakṣmalaṁ tējaḥ || 173 ||
bhr̥ṅgarucisaṅgarakarāpāṅgaṁ
śr̥ṅgāratuṅgamaruṇāṅgam |
maṅgalamabhaṅguraṁ mē
ghaṭayatu gaṅgādharāṅgasaṅgi mahaḥ || 174 ||
prapadājitakūrmamūrjita-
-karuṇaṁ bharmarucinirmathanadēham |
śritavarma marma śambhōḥ
kiñcana mama narma śarma nirmātu || 175 ||
kālakuralālikālima-
-kandalavijitāli vidhr̥tamaṇivāli |
milatu hr̥di pulinajaghanaṁ
bahulitagalagaralakēli kimapi mahaḥ || 176 ||
kuṅkumatilakitaphālā
kuruvindacchāyapāṭaladukūlā |
karuṇāpayōdhivēlā
kācana cittē cakāstu mē līlā || 177 ||
puṣpandhayarucivēṇyaḥ
pulinābhōgatrapākaraśrēṇyaḥ |
jīyāsurikṣupāṇyaḥ
kāścana kāmārikēlisākṣiṇyaḥ || 178 ||
tapanīyāṁśukabhāṁsi
drākṣāmādhuryanāstikavacāṁsi |
katicana śucaṁ mahāṁsi
kṣapayatu kapālitōṣitamanāṁsi || 179 ||
asitakacamāyatākṣaṁ
kusumaśaraṁ kūlamudvahakr̥pārdram |
ādimarasādhidaivata-
-mantaḥ kalayē harāṅkavāsi mahaḥ || 180 ||
karṇōpāntataraṅgita-
-kaṭākṣavispandikaṇṭhadaghnakr̥pām |
kāmēśvarāṅkanilayāṁ
kāmapi vidyāṁ purātanīṁ kalayē || 181 ||
aravindakāntyaruntuda-
-vilōcanadvandvasundaramukhēndu |
chandaḥ kandalamandira-
-mantaḥpuramainduśēkharaṁ vandē || 182 ||
bimbinikurambaḍambara-
-viḍambakacchāyamambaravalagnam |
kambugalamambudakucaṁ
bimbōkaṁ kamapi cumbatu manō mē || 183 ||
kamapi kamanīyarūpaṁ
kalayāmyantaḥ kadambakusumāḍhyam |
campakarucirasuvēṣaiḥ
sampāditakāntyalaṅkr̥tadigantam || 184 ||
śampārucibhara-
-garhāsampādakakāntikavacitadigantam |
siddhāntaṁ nigamānāṁ
śuddhāntaṁ kimapi śūlinaḥ kalayē || 185 ||
udyaddinakaraśōṇā-
-nutpalabandhustanandhayāpīḍān |
karakalitapuṇḍracāpā-
-nkalayē kānapi kapardinaḥ prāṇān || 186 ||
raśanālasajjaghanayā
rasanājīvātucāpabhāsurayā |
ghrāṇāyuṣkaraśarayā
ghrātaṁ cittaṁ kayāpi vāsanayā || 187 ||
sarasijasahayudhvadr̥śā
śampālatikāsanābhivigrahayā |
bhāsā kayāpi cētō
nāsāmaṇiśōbhivadanayā bharitam || 188 ||
navayāvakābhasicayānvitayā
gajayānayā dayāparayā |
dhr̥tayāminīśakalayā
dhiyā kayāpi kṣatāmayā hi vayam || 189 ||
alamalamakusumabāṇai-
-rabimbaśōṇairapuṇḍrakōdaṇḍaiḥ |
akumudabāndhavacūḍai-
-ranyairiha jagati daivataṁ manyaiḥ || 190 ||
kuvalayasadr̥kṣanayanaiḥ
kulagirikūṭasthabandhukucabhāraiḥ |
karuṇāspandikaṭākṣaiḥ
kavacitacittō:’smi katipayaiḥ kutukaiḥ || 191 ||
natajanasulabhāya namō
nālīkasanābhilōcanāya namaḥ |
nanditagiriśāya namō
mahasē navanīpapāṭalāya namaḥ || 192 ||
kādambakusumadāmnē
kāyacchāyākaṇāyitāryamṇē |
sīmnē cirantanagirāṁ
bhūmnē kasmaicidādadē praṇatim || 193 ||
kuṭilakabarībharēbhyaḥ
kuṅkumasabrahmacārikiraṇēbhyaḥ |
kūlaṅkaṣastanēbhyaḥ
kurmaḥ praṇatiṁ kulādrikutukēbhyaḥ || 194 ||
kōkanadaśōṇacaraṇā-
-tkōmalakuralālivijitaśaivālāt |
utpalasagandhinayanā-
-durarīkurmō na dēvatamānyām || 195 ||
āpāṭalādharāṇā-
-mānīlasnigdhabarbarakacānām |
āmnāyajīvanānā-
-mākūtānāṁ harasya dāsō:’ham || 196 ||
puṅkhitavilāsahāsa-
-sphuritāsu purāhitāṅkanilayāsu |
magnaṁ manō madīyaṁ
kāsvapi kāmārijīvanāḍīṣu || 197 ||
lalitā pātu śirō mē
lalāṭamambā ca madhumatīrūpā |
bhrūyugmaṁ ca bhavānī
puṣpaśarā pātu lōcanadvandvam || 198 ||
pāyānnāsāṁ bālā
subhagā dantāṁśca sundarī jihvām |
adharōṣṭhamādiśakti-
-ścakrēśī pātu mē ciraṁ cibukam || 199 ||
kāmēśvarī ca karṇau
kāmākṣī pātu gaṇḍayōryugalam |
śr̥ṅgāranāyikāvyā-
-dvadanaṁ siṁhāsanēśvarī ca galam || 200 ||
skandaprasūśca pātu
skandhau bāhū ca pāṭalāṅgī mē |
pāṇī ca padmanilayā
pāyādaniśaṁ nakhāvalīrvijayā || 201 ||
kōdaṇḍinī ca vakṣaḥ
kukṣiṁ cāvyāt kulācalatanūjā |
kalyāṇī ca valagnaṁ
kaṭiṁ ca pāyātkalādharaśikhaṇḍā || 202 ||
ūrudvayaṁ ca pāyā-
-dumā mr̥ḍānī ca jānunī rakṣēt |
jaṅghē ca ṣōḍaśī mē
pāyāt pādau ca pāśasr̥ṇihastā || 203 ||
prātaḥ pātu parā māṁ
madhyāhnē pātu maṇigr̥hādhīśā |
śarvāṇyavatu ca sāyaṁ
pāyādrātrau ca bhairavī sākṣāt || 204 ||
bhāryāṁ rakṣatu gaurīṁ
pāyāt putrāṁśca bindugr̥hapīṭhā |
śrīvidyā ca yaśō mē
śīlaṁ cāvyācciraṁ mahārājñī || 205 ||
pavanamayi pāvakamayi
kṣōṇīmayi gaganamayi kr̥pīṭamayi |
ravimayi śaśimayi diṅmayi
samayamayi prāṇamayi śivē pāhi || 206 ||
kāli kapālini śūlini
bhairavi mātaṅgi pañcami tripurē |
vāgdēvi vindhyavāsini
bālē bhuvanēśi pālaya ciraṁ mām || 207 ||
abhinavasindūrābhā-
-mamba tvāṁ cintayanti yē hr̥dayē |
upari nipatanti tēṣā-
-mutpalanayanākaṭākṣakallōlāḥ || 208 ||
vargāṣṭakamilitābhi-
-rvaśinīmukhyābhirāvr̥tāṁ bhavatīm |
cintayatāṁ sitavarṇāṁ
vācō niryāntyayatnatō vadanāt || 209 ||
kanakaśalākāgaurīṁ
karṇavyālōlakuṇḍaladvitayām |
prahasitamukhīṁ ca bhavatīṁ
dhyāyantō yē ta ēva bhūdhanadāḥ || 210 ||
śīrṣāmbhōruhamadhyē
śītalapīyūṣavarṣiṇīṁ bhavatīm |
anudinamanucintayatā-
-māyuṣyaṁ bhavati puṣkalamavanyām || 211 ||
madhurasmitāṁ madāruṇanayanāṁ
mātaṅgakumbhavakṣōjām |
candravataṁsinīṁ tvāṁ
savidhē paśyanti sukr̥tinaḥ kēcit || 212 ||
lalitāyāḥ stavaratnaṁ
lalitapadābhiḥ praṇītamāryābhiḥ |
pratidinamavanau paṭhatāṁ
phalāni vaktuṁ pragalbhatē saiva || 213 ||
sadasadanugrahanigraha-
-gr̥hītamunivigrahō bhagavān |
sarvāsāmupaniṣadāṁ
durvāsā jayati dēśikaḥ prathamaḥ || 214 ||
iti maharṣidurvāsaḥ viracitaṁ śrīlalitāstavaratnam |
See more śrī lalitā stōtrāṇi for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
