Read in తెలుగు / ಕನ್ನಡ / தமிழ் / देवनागरी / English (IAST)
tāmāhvayāmi subhagāṁ lakṣmīṁ trailōkyapūjitām |
ēhyēhi dēvi padmākṣi padmākarakr̥tālayē || 1 ||
āgacchāgaccha varadē paśya māṁ svēna cakṣuṣā |
āyāhyāyāhi dharmārthakāmamōkṣamayē śubhē || 2 ||
ēvaṁ vidhaiḥ stutipadaiḥ satyaiḥ satyārthasaṁstutā |
kanīyasī mahābhāgā candrēṇa paramātmanā || 3 ||
niśākaraśca sā dēvī bhrātarau dvau payōnidhēḥ |
utpannamātrau tāvāstāṁ śivakēśavasaṁśritau || 4 ||
sanatkumārastamr̥ṣiṁ samābhāṣya purātanam |
prōktavānitihāsaṁ tu lakṣmyāḥ stōtramanuttamam || 5 ||
athēdr̥śānmahāghōrāddāridryānnarakātkatham |
muktirbhavati lōkē:’smin dāridryaṁ yāti bhasmatām || 6 ||
sanatkumāra uvāca |
pūrvaṁ kr̥tayugē brahmā bhagavān sarvalōkakr̥t |
sr̥ṣṭiṁ nānāvidhāṁ kr̥tvā paścāccintāmupēyivān || 7 ||
kimāhārāḥ prajāstvētāḥ sambhaviṣyanti bhūtalē |
tathaiva cāsāṁ dāridryātkathamuttaraṇaṁ bhavēt || 8 ||
dāridryānmaraṇaṁ śrēyastviti sañcintya cētasi |
kṣīrōdasyōttarē kūlē jagāma kamalōdbhavaḥ || 9 ||
tatra tīvraṁ tapastaptvā kadācitparamēśvaram |
dadarśa puṇḍarīkākṣaṁ vāsudēvaṁ jagadgurum || 10 ||
sarvajñaṁ sarvaśaktīnāṁ sarvāvāsaṁ sanātanam |
sarvēśvaraṁ vāsudēvaṁ viṣṇuṁ lakṣmīpatiṁ prabhum || 11 ||
sōmakōṭipratīkāśaṁ kṣīrōdavimalē jalē |
anantabhōgaśayanaṁ viśrāntaṁ śrīnikētanam || 12 ||
kōṭisūryapratīkāśaṁ mahāyōgēśvarēśvaram |
yōganidrārataṁ śrīśaṁ sarvāvāsaṁ surēśvaram || 13 ||
jagadutpattisaṁhārasthitikāraṇakāraṇam |
lakṣmyādiśaktikaraṇaṁ jātamaṇḍalamaṇḍitam || 14 ||
āyudhairdēhavadbhiśca cakrādyaiḥ parivāritam |
durnirīkṣyaṁ suraiḥ siddhairmahāyōniśatairapi || 15 ||
ādhāraṁ sarvaśaktīnāṁ paraṁ tējaḥ sudussaham |
prabuddhaṁ dēvamīśānaṁ dr̥ṣṭvā kamalasambhavaḥ || 16 ||
śirasyañjalimādhāya stōtraṁ pūrvamuvāca ha |
manōvāñchitasiddhiṁ tvaṁ pūrayasva mahēśvara || 17 ||
jitaṁ tē puṇḍarīkṣa namastē viśvabhāvana |
namastē:’stu hr̥ṣīkēśa mahāpuruṣapūrvaja || 18 ||
sarvēśvara jayānanda sarvāvāsa parātpara |
prasīda mama bhaktasya chindhi sandēhajaṁ tamaḥ || 19 ||
ēvaṁ stutaḥ sa bhagavān brahmaṇā:’vyaktajanmanā |
prasādābhimukhaḥ prāha harirviśrāntalōcanaḥ || 20 ||
śrībhagavānuvāca |
hiraṇyagarbha tuṣṭō:’smi brūhi yattē:’bhivāñchitam |
tadvakṣyāmi na sandēhō bhaktō:’si mama suvrata || 21 ||
kēśavādvacanaṁ śrutvā karuṇāviṣṭacētanaḥ |
pratyuvāca mahābuddhirbhagavantaṁ janārdanam || 22 ||
caturvidhaṁ bhavasyāsya bhūtasargasya kēśava |
paritrāṇāya mē brūhi rahasyaṁ paramādbhutam || 23 ||
dāridryaśamanaṁ dhanyaṁ manōjñaṁ pāvanaṁ param |
sarvēśvara mahābuddhē svarūpaṁ bhairavaṁ mahat || 24 ||
śriyaḥ sarvātiśāyinyāstathā jñānaṁ ca śāśvatam |
nāmāni caiva mukhyāni yāni gauṇāni cācyuta || 25 ||
tvadvaktrakamalōtthāni śrōtumicchāmi tattvataḥ |
iti tasya vacaḥ śrutvā prativākyamuvāca saḥ || 26 ||
śrībhagavānuvāca |
mahāvibhūtisamyuktā ṣāḍguṇyavapuṣaḥ prabhō |
bhagavadvāsudēvasya nityaṁ caiṣā:’napāyinī || 27 ||
ēkaiva vartatē:’bhinnā jyōtsnēva himadīdhitēḥ |
sarvaśaktyātmikā caiva viśvaṁ vyāpya vyavasthitā || 28 ||
sarvaiśvaryaguṇōpētā nityaśuddhasvarūpiṇī |
prāṇaśaktiḥ parā hyēṣā sarvēṣāṁ prāṇināṁ bhuvi || 29 ||
śaktīnāṁ caiva sarvāsāṁ yōnibhūtā parā kalā |
ahaṁ tasyāḥ paraṁ nāmnāṁ sahasramidamuttamam || 30 ||
śr̥ṇuṣvāvahitō bhūtvā paramaiśvaryabhūtidam |
dēvyākhyāsmr̥timātrēṇa dāridryaṁ yāti bhasmatām || 31 ||
atha stōtram ||
ōṁ śrīḥ padmā prakr̥tiḥ sattvā śāntā cicchaktiravyayā |
kēvalā niṣkalā śuddhā vyāpinī vyōmavigrahā || 32 ||
vyōmapadmakr̥tādhārā parā vyōmā matōdbhavā |
nirvyōmā vyōmamadhyasthā pañcavyōmapadāśritā || 33 ||
acyutā vyōmanilayā paramānandarūpiṇī |
nityaśuddhā nityatr̥ptā nirvikārā nirīkṣaṇā || 34 ||
jñānaśaktiḥ kartr̥śaktirbhōktr̥śaktiḥ śikhāvahā |
snēhābhāsā nirānandā vibhūtirvimalā calā || 35 ||
anantā vaiṣṇavī vyaktā viśvānandā vikāśinī |
śaktirvibhinnasarvārtiḥ samudraparitōṣiṇī || 36 ||
mūrtiḥ sanātanī hārdī nistaraṅgā nirāmayā |
jñānajñēyā jñānagamyā jñānajñēyavikāsinī || 37 ||
svacchandaśaktirgahanā niṣkampārciḥ sunirmalā |
svarūpā sarvagā:’pārā br̥ṁhiṇī suguṇōrjitā || 38 ||
akalaṅkā nirādhārā nissaṅkalpā nirāśrayā |
asaṅkīrṇā suśāntā ca śāśvatī bhāsurī sthirā || 39 ||
anaupamyā nirvikalpā niryantrā yantravāhinī |
abhēdyā bhēdinī bhinnā bhāratī vaikharī khagā || 40 ||
agrāhyā grāhikā gūḍhā gambhīrā viśvagōpinī |
anirdēśyā:’pratihatā nirbījā pāvanī parā || 41 ||
apratarkyā:’parimitā bhavabhrāntivināśinī |
ēkā dvirūpā trividhā asaṅkhyātā surēśvarī || 42 ||
supratiṣṭhā mahādhātrī sthitirvr̥ddhirdhruvā gatiḥ |
īśvarī mahimā r̥ddhiḥ pramōdā ujjvalōdyamā || 43 ||
akṣayā vardhamānā ca suprakāśā vihaṅgamā |
nīrajā jananī nityā jayā rōciṣmatī śubhā || 44 ||
tapōnudā ca jvālā ca sudīptiścāṁśumālinī |
apramēyā tridhā sūkṣmā parā nirvāṇadāyinī || 45 ||
avadātā suśuddhā ca amōghākhyā paramparā |
sandhānakī śuddhavidyā sarvabhūtamahēśvarī || 46 ||
lakṣmīstuṣṭirmahādhīrā śāntirāpūraṇēnavā |
anugrahāśaktirādyā jagajjyēṣṭhā jagadvidhiḥ || 47 ||
satyā prahvā kriyāyōgyā hyaparṇā hlādinī śivā |
sampūrṇāhlādinī śuddhā jyōtiṣmatyamatāvahā || 48 ||
rajōvatyarkapratibhā:’:’karṣiṇī karṣiṇī rasā |
parā vasumatī dēvī kāntiḥ śāntirmatiḥ kalā || 49 ||
kalā kalaṅkarahitā viśālōddīpanī ratiḥ |
sambōdhinī hāriṇī ca prabhāvā bhavabhūtidā || 50 ||
amr̥tasyandinī jīvā jananī khaṇḍikā sthirā |
dhūmā kalāvatī pūrṇā bhāsurā sumatī rasā || 51 ||
śuddhā dhvaniḥ sr̥tiḥ sr̥ṣṭirvikr̥tiḥ kr̥ṣṭirēva ca |
prāpaṇī prāṇadā prahvā viśvā pāṇḍuravāsinī || 52 ||
avanirvajranalikā citrā brahmāṇḍavāsinī |
anantarūpā:’nantātmā:’nantasthā:’nantasambhavā || 53 ||
mahāśaktiḥ prāṇaśaktiḥ prāṇadātrī ratimbharā |
mahāsamūhā nikhilā icchādhārā sukhāvahā || 54 ||
pratyakṣalakṣmīrniṣkampā prarōhā buddhigōcarā |
nānādēhā mahāvartā bahudēhavikāsinī || 55 ||
sahasrāṇī pradhānā ca nyāyavastuprakāśikā |
sarvābhilāṣapūrṇēcchā sarvā sarvārthabhāṣiṇī || 56 ||
nānāsvarūpaciddhātrī śabdapūrvā purātanā |
vyaktā:’vyaktā jīvakēśā sarvēcchāparipūritā || 57 ||
saṅkalpasiddhā sāṅkhyēyā tattvagarbhā dharāvahā |
bhūtarūpā citsvarūpā triguṇā guṇagarvitā || 58 ||
prajāpatīśvarī raudrī sarvādhārā sukhāvahā |
kalyāṇavāhikā kalyā kalikalmaṣanāśinī || 59 ||
nīrūpōdbhinnasantānā suyantrā triguṇālayā |
mahāmāyā yōgamāyā mahāyōgēśvarī priyā || 60 ||
mahāstrī vimalā kīrtirjayā lakṣmīrnirañjanā |
prakr̥tirbhagavanmāyāśaktirnidrā yaśaskarī || 61 ||
cintā buddhiryaśaḥ prajñā śāntirāprītivardhinī |
pradyumnamātā sādhvī ca sukhasaubhāgyasiddhidā || 62 ||
kāṣṭhā niṣṭhā pratiṣṭhā ca jyēṣṭhā śrēṣṭhā jayāvahā |
sarvātiśāyinī prītirviśvaśaktirmahābalā || 63 ||
variṣṭhā vijayā vīrā jayantī vijayapradā |
hr̥dgr̥hā gōpinī guhyā gaṇagandharvasēvitā || 64 ||
yōgīśvarī yōgamāyā yōginī yōgasiddhidā |
mahāyōgēśvaravr̥tā yōgā yōgēśvarapriyā || 65 ||
brahmēndrarudranamitā surāsuravarapradā |
trivartmagā trilōkasthā trivikramapadōdbhavā || 66 ||
sutārā tāriṇī tārā durgā santāriṇī parā |
sutāriṇī tārayantī bhūritārēśvaraprabhā || 67 ||
guhyavidyā yajñavidyā mahāvidyā suśōbhitā |
adhyātmavidyā vighnēśī padmasthā paramēṣṭhinī || 68 ||
ānvīkṣikī trayī vārtā daṇḍanītirnayātmikā |
gaurī vāgīśvarī gōptrī gāyatrī kamalōdbhavā || 69 ||
viśvambharā viśvarūpā viśvamātā vasupradā |
siddhiḥ svāhā svadhā svastiḥ sudhā sarvārthasādhinī || 70 ||
icchā sr̥ṣṭirdyutirbhūtiḥ kīrtiḥ śraddhā dayā matiḥ |
śrutirmēdhā dhr̥tirhrīḥ śrīrvidyā vibudhavanditā || 71 ||
anasūyā ghr̥ṇā nītirnirvr̥tiḥ kāmadhukkarā |
pratijñā santatirbhūtirdyauḥ prajñā viśvamāninī || 72 ||
smr̥tirvāgviśvajananī paśyantī madhyamā samā |
sandhyā mēdhā prabhā bhīmā sarvākārā sarasvatī || 73 ||
kāṅkṣā māyā mahāmāyā mōhinī mādhavapriyā |
saumyābhōgā mahābhōgā bhōginī bhōgadāyinī || 74 ||
sudhautakanakaprakhyā suvarṇakamalāsanā |
hiraṇyagarbhā suśrōṇī hāriṇī ramaṇī ramā || 75 ||
candrā hiraṇmayī jyōtsnā ramyā śōbhā śubhāvahā |
trailōkyamaṇḍanā nārīnarēśvaravarārcitā || 76 ||
trailōkyasundarī rāmā mahāvibhavavāhinī |
padmasthā padmanilayā padmamālāvibhūṣitā || 77 ||
padmayugmadharā kāntā divyābharaṇabhūṣitā |
vicitraratnamukuṭā vicitrāmbarabhūṣaṇā || 78 ||
vicitramālyagandhāḍhyā vicitrāyudhavāhanā |
mahānārāyaṇī dēvī vaiṣṇavī vīravanditā || 79 ||
kālasaṅkarṣiṇī ghōrā tattvasaṅkarṣiṇī kalā |
jagatsampūraṇī viśvā mahāvibhavabhūṣaṇā || 80 ||
vāruṇī varadā vyākhyā ghaṇṭākarṇavirājitā |
nr̥siṁhī bhairavī brāhmī bhāskarī vyōmacāriṇī || 81 ||
aindrī kāmadhanuḥ sr̥ṣṭiḥ kāmayōnirmahāprabhā |
dr̥ṣṭā kāmyā viśvaśaktirbījagatyātmadarśanā || 82 ||
garuḍārūḍhahr̥dayā cāndrī śrīrmadhurānanā |
mahōgrarūpā vārāhī nārasiṁhī hatāsurā || 83 ||
yugāntahutabhugjvālā karālā piṅgalā kalā |
trailōkyabhūṣaṇā bhīmā śyāmā trailōkyamōhinī || 84 ||
mahōtkaṭā mahāraktā mahācaṇḍā mahāsanā |
śaṅkhinī lēkhinī svasthā likhitā khēcarēśvarī || 85 ||
bhadrakālī caikavīrā kaumārī bhagamālinī |
kalyāṇī kāmadhugjvālāmukhī cōtpalamālikā || 86 ||
bālikā dhanadā sūryā hr̥dayōtpalamālikā |
ajitā varṣiṇī rītirbhēruṇḍā garuḍāsanā || 87 ||
vaiśvānarī mahāmāyā mahākālī vibhīṣaṇā |
mahāmandāravibhavā śivānandā ratipriyā || 88 ||
udrītiḥ padmamālā ca dharmavēgā vibhāvanī |
satkriyā dēvasēnā ca hiraṇyarajatāśrayā || 89 ||
sahasāvartamānā ca hastinādaprabōdhinī |
hiraṇyapadmavarṇā ca haribhadrā sudurdharā || 90 ||
sūryā hiraṇyaprakaṭasadr̥śī hēmamālinī |
padmānanā nityapuṣṭā dēvamātā:’mr̥tōdbhavā || 91 ||
mahādhanā ca yā śr̥ṅgī kardamī kambukandharā |
ādityavarṇā candrābhā gandhadvārā durāsadā || 92 ||
varārcitā varārōhā varēṇyā viṣṇuvallabhā |
kalyāṇī varadā vāmā vāmēśī vindhyavāsinī || 93 ||
yōganidrā yōgaratā dēvakīkāmarūpiṇī |
kaṁsavidrāviṇī durgā kaumārī kauśikī kṣamā || 94 ||
kātyāyanī kālarātrirniśitr̥ptā sudurjayā |
virūpākṣī viśālākṣī bhaktānāṁ parirakṣiṇī || 95 ||
bahurūpā svarūpā ca virūpā rūpavarjitā |
ghaṇṭāninādabahulā jīmūtadhvaninissvanā || 96 ||
mahādēvēndramathinī bhrukuṭīkuṭilānanā |
satyōpayācitā caikā kaubērī brahmacāriṇī || 97 ||
āryā yaśōdāsutadā dharmakāmārthamōkṣadā |
dāridryaduḥkhaśamanī ghōradurgārtināśinī || 98 ||
bhaktārtiśamanī bhavyā bhavabhargāpahāriṇī |
kṣīrābdhitanayā padmā kamalā dharaṇīdharā || 99 ||
rukmiṇī rōhiṇī sītā satyabhāmā yaśasvinī |
prajñādhārā:’mitaprajñā vēdamātā yaśōvatī || 100 ||
samādhirbhāvanā maitrī karuṇā bhaktavatsalā |
antarvēdī dakṣiṇā ca brahmacaryaparāgatiḥ || 101 ||
dīkṣā vīkṣā parīkṣā ca samīkṣā vīravatsalā |
ambikā surabhiḥ siddhā siddhavidyādharārcitā || 102 ||
sudīptā lēlihānā ca karālā viśvapūrakā |
viśvasaṁhāriṇī dīptistāpanī tāṇḍavapriyā || 103 ||
udbhavā virajā rājñī tāpanī bindumālinī |
kṣīradhārāsuprabhāvā lōkamātā suvarcasā || 104 ||
havyagarbhā cājyagarbhā juhvatō yajñasambhavā |
āpyāyanī pāvanī ca dahanī dahanāśrayā || 105 ||
mātr̥kā mādhavī mucyā mōkṣalakṣmīrmahardhidā |
sarvakāmapradā bhadrā subhadrā sarvamaṅgalā || 106 ||
śvētā suśuklavasanā śuklamālyānulēpanā |
haṁsā hīnakarī haṁsī hr̥dyā hr̥tkamalālayā || 107 ||
sitātapatrā suśrōṇī padmapatrāyatēkṣaṇā |
sāvitrī satyasaṅkalpā kāmadā kāmakāminī || 108 ||
darśanīyā dr̥śā dr̥śyā spr̥śyā sēvyā varāṅganā |
bhōgapriyā bhōgavatī bhōgīndraśayanāsanā || 109 ||
ārdrā puṣkariṇī puṇyā pāvanī pāpasūdanī |
śrīmatī ca śubhākārā paramaiśvaryabhūtidā || 110 ||
acintyānantavibhavā bhavabhāvavibhāvanī |
niśrēṇiḥ sarvadēhasthā sarvabhūtanamaskr̥tā || 111 ||
balā balādhikā dēvī gautamī gōkulālayā |
tōṣiṇī pūrṇacandrābhā ēkānandā śatānanā || 112 ||
udyānanagaradvāraharmyōpavanavāsinī |
kūṣmāṇḍī dāruṇā caṇḍā kirātī nandanālayā || 113 ||
kālāyanā kālagamyā bhayadā bhayanāśinī |
saudāminī mēgharavā daityadānavamardinī || 114 ||
jaganmātā:’bhayakarī bhūtadhātrī sudurlabhā |
kāśyapī śubhadānā ca vanamālā śubhā varā || 115 ||
dhanyā dhanyēśvarī dhanyā ratnadā vasuvardhinī |
gāndharvī rēvatī gaṅgā śakunī vimalānanā || 116 ||
iḍā śāntikarī caiva tāmasī kamalālayā |
ājyapā vajrakaumārī sōmapā kusumāśrayā || 117 ||
jagatpriyā ca sarathā durjayā khagavāhanā |
manōbhavā kāmacārā siddhacāraṇasēvitā || 118 ||
vyōmalakṣmīrmahālakṣmīstējōlakṣmīḥ sujājvalā |
rasalakṣmīrjagadyōnirgandhalakṣmīrvanāśrayā || 119 ||
śravaṇā śrāvaṇī nētrī rasanāprāṇacāriṇī |
viriñcimātā vibhavā varavārijavāhanā || 120 ||
vīryā vīrēśvarī vandyā viśōkā vasuvardhinī |
anāhatā kuṇḍalinī nalinī vanavāsinī || 121 ||
gāndhāriṇīndranamitā surēndranamitā satī |
sarvamaṅgalyamāṅgalyā sarvakāmasamr̥ddhidā || 122 ||
sarvānandā mahānandā satkīrtiḥ siddhasēvitā |
sinīvālī kuhū rākā amā cānumatirdyutiḥ || 123 ||
arundhatī vasumatī bhārgavī vāstudēvatā |
mayūrī vajravētālī vajrahastā varānanā || 124 ||
anaghā dharaṇirdhīrā dhamanī maṇibhūṣaṇā |
rājaśrīrūpasahitā brahmaśrīrbrahmavanditā || 125 ||
jayaśrīrjayadā jñēyā sargaśrīḥ svargatiḥ satām |
supuṣpā puṣpanilayā phalaśrīrniṣkalapriyā || 126 ||
dhanurlakṣmīstvamilitā parakrōdhanivāriṇī |
kadrūrdhanāyuḥ kapilā surasā suramōhinī || 127 ||
mahāśvētā mahānīlā mahāmūrtirviṣāpahā |
suprabhā jvālinī dīptistr̥ptirvyāptiḥ prabhākarī || 128 ||
tējōvatī padmabōdhā madalēkhāruṇāvatī |
ratnā ratnāvalībhūtā śatadhāmā śatāpahā || 129 ||
triguṇā ghōṣiṇī rakṣyā nardinī ghōṣavarjitā |
sādhyā:’ditirditirdēvī mr̥gavāhā mr̥gāṅkagā || 130 ||
citranīlōtpalagatā vr̥ṣaratnakarāśrayā |
hiraṇyarajatadvandvā śaṅkhabhadrāsanasthitā || 131 ||
gōmūtragōmayakṣīradadhisarpirjalāśrayā |
marīciścīravasanā pūrṇacandrārkaviṣṭarā || 132 ||
susūkṣmā nirvr̥tiḥ sthūlā nivr̥ttārātirēva ca |
marīcijvālinī dhūmrā havyavāhā hiraṇyadā || 133 ||
dāyinī kālinī siddhiḥ śōṣiṇī samprabōdhinī |
bhāsvarā saṁhatistīkṣṇā pracaṇḍajvalanōjjvalā || 134 ||
sāṅgā pracaṇḍā dīptā ca vaidyutiḥ sumahādyutiḥ |
kapilā nīlaraktā ca suṣumnā visphuliṅginī || 135 ||
arciṣmatī ripuharā dīrghā dhūmāvalī jarā |
sampūrṇamaṇḍalā pūṣā sraṁsinī sumanōharā || 136 ||
jayā puṣṭikarī chāyā mānasā hr̥dayōjjvalā |
suvarṇakaraṇī śrēṣṭhā mr̥tasañjīvanī raṇē || 137 ||
viśalyakaraṇī śubhrā sandhinī paramauṣadhiḥ |
brahmiṣṭhā brahmasahitā aindavī ratnasambhavā || 138 ||
vidyutprabhā bindumatī trisvabhāvaguṇāmbikā |
nityōditā nityadr̥ṣṭā nityakāmakarīṣiṇī || 139 ||
padmāṅkā vajracihnā ca vakradaṇḍavibhāsinī |
vidēhapūjitā kanyā māyā vijayavāhinī || 140 ||
māninī maṅgalā mānyā māninī mānadāyinī |
viśvēśvarī gaṇavatī maṇḍalā maṇḍalēśvarī || 141 ||
haripriyā bhaumasutā manōjñā matidāyinī |
pratyaṅgirā sōmaguptā manō:’bhijñā vadanmatiḥ || 142 ||
yaśōdharā ratnamālā kr̥ṣṇā trailōkyabandhinī |
amr̥tā dhāriṇī harṣā vinatā vallakī śacī || 143 ||
saṅkalpā bhāminī miśrā kādambaryamr̥tā prabhā |
āgatā nirgatā vajrā suhitā sahitā:’kṣatā || 144 ||
sarvārthasādhanakarī dhāturdhāraṇikā:’malā |
karuṇādhārasambhūtā kamalākṣī śaśipriyā || 145 ||
saumyarūpā mahādīptā mahājvālā vikāsinī |
mālā kāñcanamālā ca sadvajrā kanakaprabhā || 146 ||
prakriyā paramā yōktrī kṣōbhikā ca sukhōdayā |
vijr̥mbhaṇā ca vajrākhyā śr̥ṅkhalā kamalēkṣaṇā || 147 ||
jayaṅkarī madhumatī haritā śaśinī śivā |
mūlaprakr̥tirīśānī yōgamātā manōjavā || 148 ||
dharmōdayā bhānumatī sarvābhāsā sukhāvahā |
dhurandharā ca bālā ca dharmasēvyā tathāgatā || 149 ||
sukumārā saumyamukhī saumyasambōdhanōttamā |
sumukhī sarvatōbhadrā guhyaśaktirguhālayā || 150 ||
halāyudhā ca kāvīrā sarvaśāstrasudhāriṇī |
vyōmaśaktirmahādēhā vyōmagā madhumanmayī || 151 ||
gaṅgā vitastā yamunā candrabhāgā sarasvatī |
tilōttamōrvaśī rambhā svāminī surasundarī || 152 ||
bāṇapraharaṇā bālā bimbōṣṭhī cāruhāsinī |
kakudminī cārupr̥ṣṭhā dr̥ṣṭādr̥ṣṭaphalapradā || 153 ||
kāmyacārī ca kāmyā ca kāmācāravihāriṇī |
himaśailēndrasaṅkāśā gajēndravaravāhanā || 154 ||
aśēṣasukhasaubhāgyasampadāṁ yōniruttamā |
sarvōtkr̥ṣṭā sarvamayī sarvā sarvēśvarapriyā || 155 ||
sarvāṅgayōniḥ sā:’vyaktā sampradhānēśvarēśvarī |
viṣṇuvakṣaḥsthalagatā kimataḥ paramucyatē || 156 ||
parā nirmahimā dēvī harivakṣaḥsthalāśrayā |
sā dēvī pāpahantrī ca sānnidhyaṁ kurutānmama || 157 ||
iti nāmnāṁ sahasraṁ tu lakṣmyāḥ prōktaṁ śubhāvaham |
parāvarēṇa bhēdēna mukhyagauṇēna bhāgataḥ || 158 ||
yaścaitatkīrtayēnnityaṁ śr̥ṇuyādvāpi padmaja |
śuciḥ samāhitō bhūtvā bhaktiśraddhāsamanvitaḥ || 159 ||
śrīnivāsaṁ samabhyarcya puṣpadhūpānulēpanaiḥ |
bhōgaiśca madhuparkādyairyathāśakti jagadgurum || 160 ||
tatpārśvasthāṁ śriyaṁ dēvīṁ sampūjya śrīdharapriyām |
tatō nāmasahasrēṇa tōṣayētparamēśvarīm || 161 ||
nāmaratnāvalīstōtramidaṁ yaḥ satataṁ paṭhēt |
prasādābhimukhī lakṣmīḥ sarvaṁ tasmai prayacchati || 162 ||
yasyā lakṣmyāśca sambhūtāḥ śaktayō viśvagāḥ sadā |
kāraṇatvaṁ na tiṣṭhanti jagatyasmiṁścarācarē || 163 ||
tasmātprītā jaganmātā śrīryasyācyutavallabhā |
suprītāḥ śaktayastasya siddhimiṣṭāṁ diśanti hi || 164 ||
ēka ēva jagatsvāmī śaktimānacyutaḥ prabhuḥ |
tadaṁśaśaktimantō:’nyē brahmēśānādayō yathā || 168 ||
tathaivaikā parā śaktiḥ śrīstasya karuṇāśrayā |
jñānādiṣāḍguṇyamayī yā prōktā prakr̥tiḥ parā || 166 ||
ēkaikaśaktiḥ śrīstasyā dvitīyātmani vartatē |
parā parēśī sarvēśī sarvākārā sanātanī || 167 ||
anantanāmadhēyā ca śakticakrasya nāyikā |
jagaccarācaramidaṁ sarvaṁ vyāpya vyavasthitā || 168 ||
tasmādēkaiva paramā śrīrjñēyā viśvarūpiṇī |
saumyā saumyēna rūpēṇa saṁsthitā naṭajīvavat || 169 ||
yō yō jagati pumbhāvaḥ sa viṣṇuriti niścayaḥ |
yā yā tu nārībhāvasthā tatra lakṣmīrvyavasthitā || 170 ||
prakr̥tēḥ puruṣāccānyastr̥tīyō naiva vidyatē |
atha kiṁ bahunōktēna naranārīmayō hariḥ || 171 ||
anēkabhēdabhinnastu kriyatē paramēśvaraḥ |
mahāvibhūtiṁ dayitāṁ yē stuvantyacyutapriyām || 172 ||
tē prāpnuvanti paramāṁ lakṣmīṁ saṁśuddhacētasaḥ |
padmayōniridaṁ prāpya paṭhan stōtramidaṁ kramāt || 173 ||
divyamaṣṭaguṇaiśvaryaṁ tatprasādācca labdhavān |
sakāmānāṁ ca phaladāmakāmānāṁ ca mōkṣadām || 174 ||
pustakākhyāṁ bhayatrātrīṁ sitavastrāṁ trilōcanām |
mahāpadmaniṣaṇṇāṁ tāṁ lakṣmīmajaratāṁ namaḥ || 175 ||
karayugalagr̥hītaṁ pūrṇakumbhaṁ dadhānā
kvacidamalagatasthā śaṅkhapadmākṣapāṇiḥ |
kvacidapi dayitāṅgē cāmaravyagrahastā
kvacidapi sr̥ṇipāśaṁ bibhratī hēmakāntiḥ || 176 ||
iti padmapurāṇē kāśmīravarṇanē hiraṇyagarbhahr̥dayē sarvakāmapradāyakaṁ puruṣōttamaprōktaṁ śrī lakṣmī sahasranāma stōtram ||
See more daśamahāvidyā stōtrāṇi for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
