Shiva Sankalpa Upanishad – śivasaṅkalpopaniṣat


oṃ yene̱daṃ bhū̱taṃ bhuva̍naṃ bhavi̱ṣyatpari̍gṛhītama̱mṛte̍na̱ sarvam̎ |
yena̍ ya̱jñastrā̍yate sa̱ptaho̍tā̱ tanme̱ mana̍: śi̱vasa̍ṅka̱lpama̍stu || 1

yena̱ karmā̍ṇi pra̱cara̍nti̱ dhīrā̱ yato̍ vā̱cā mana̍sā̱ cāru̱yanti̍ |
yatsammi̍ta̱ṃ mana̍ssa̱ñcara̍nti prā̱ṇina̱stanme̱ mana̍: śi̱vasa̍ṅka̱lpama̍stu || 2

yena̱ karmā̎ṇya̱paso̍ manī̱ṣiṇo̍ ya̱jñe śṛ̍ṇvanti vi̱tathe̍ṣu̱ dhīrā̎: |
yada̍pū̱rvaṃ yakṣa̱manta̍ṃ pra̱jānā̱ṃ tanme̱ mana̍: śi̱vasa̍ṅka̱lpama̍stu || 3

yatpra̱jñāna̍mu̱ta ceto̱ dhṛti̍śca̱ yajjyoti̍ra̱ntara̱mṛta̍ṃ pra̱jāsu̍ |
yasmā̱nna ṛ̱te kiñca̱na karma̍ kri̱yate̱ tanme̱ mana̍: śi̱vasa̍ṅka̱lpama̍stu || 4

su̱ṣā̱ra̱thiraśvā̍niva̱yaṃ ma̍nu̱ṣyā̎nmeni̱yute̍pa̱śubhi̍rvā̱jinī̍vān |
hṛtpravi̱ṣṭa̱ṃ ya̱daca̍ra̱ṃ yavi̍ṣṭha̱ṃ tanme̱ mana̍: śi̱vasa̍ṅka̱lpama̍stu || 5

yasmi̱nnṛca̱: sāma̱ yajūg̍ṃṣi̱ yasmi̍n prati̱ṣṭhāra̍śa̱nābhā̍vi̱bhārā̎: |
yasmigg̍ṃ ści̱tagṃ sarva̱mota̍ṃ pra̱jānā̱ṃ tanme̱ mana̍: śi̱vasa̍ṅka̱lpama̍stu || 6

yadatra̍ ṣa̱ṣṭhaṃ tri̱śatag̍ṃ su̱vīrya̍ṃ ya̱jñasya̱ gu̱hyaṃ nava̍nāva̱ māyyam̎ |
daśa̍ pañca tri̱g̱ṃśata̱ṃ yatpa̍ra̱ṃ tanme̱ mana̍: śi̱vasa̍ṅka̱lpama̍stu || 7

yajjāgra̍to dū̱ramu̱daiti̱ sarva̱ntatsu̱ptasya̍ tathai̱vaiti̍ |
dū̱ra̱ṃ ga̱maṃ jyoti̍ṣā̱ṃ jyoti̱reka̱ṃ tanme̱ mana̍: śi̱vasa̍ṅka̱lpama̍stu || 8

yene̱daṃ viśva̱ṃ jaga̍to ba̱bhūva̍ ye de̱vāpi̍ maha̱to jā̱tave̍dāḥ |
tade̱vāgnistadvā̱yustatsūrya̱stadu̍ca̱ndramā̱stanme̱ mana̍: śi̱vasa̍ṅka̱lpama̍stu || 9

yena̱dyauḥ pṛ̍thi̱vī cā̱ntari̍kṣaṃ ca̱ ye parva̍tāḥ pra̱diśo̱ diśa̍śca |
tene̱daṃ jaga̱dvyāpta̍ṃ pra̱jānā̱ṃ tanme̱ mana̍: śi̱vasa̍ṅka̱lpama̍stu || 10

ye ma̍no̱ hṛda̍ya̱ṃ ye ca̍ de̱vā ye di̱vyā āpo̱ ye sū̎rya ra̱śmiḥ |
te śrotre̱ cakṣu̍ṣī sa̱ñcara̍nta̱ṃ tanme̱ mana̍: śi̱vasa̍ṅka̱lpama̍stu || 11

aci̍ntya̱ṃ cāpra̍meya̱ṃ ca̱ vya̱ktā̱vyakta̍ para̱ṃ ca ya̍t |
sūkṣmā̎tsū̱kṣmata̍raṃ jñe̱ya̱ṃ tanme̱ mana̍: śi̱vasa̍ṅka̱lpama̍stu || 12

ekā̍ ca da̱śa śa̱taṃ ca̍ sa̱hasra̍ṃ cā̱yuta̍ṃ ca |
ni̱yuta̍ṃ ca pra̱yuta̱ṃ cārbu̍daṃ ca̱ nya̍rbudaṃ ca̱
tanme̱ mana̍: śi̱vasa̍ṅka̱lpama̍stu || 13

ye pa̍ñca pa̱ñcāda̱śa śa̱tag̍ṃ sa̱hasra̍ma̱yuta̱ṃ nya̍rbudaṃ ca |
te a̍gni ci̱tteṣṭa̍kā̱stāgṃ śarī̍ra̱ṃ tanme̱ mana̍: śi̱vasa̍ṅka̱lpama̍stu || 14

vedā̱hame̱taṃ puru̍ṣaṃ ma̱hānta̍mādi̱tyava̍rṇa̱ṃ tama̍sa̱: para̍stāt |
yasya̱ yoni̱ṃ pari̱paśya̍nti̱ dhīrā̱stanme̱ mana̍: śi̱vasa̍ṅka̱lpama̍stu || 15

yasyai̱taṃ dhīrā̎: pu̱nanti̍ ka̱vayo̎ bra̱hmāṇa̍me̱taṃ tvā̍ vṛṇuta̱mindum̎ |
sthā̱va̱raṃ jaṅga̍ma̱ṃ dyaurā̍kā̱śaṃ tanme̱ mana̍: śi̱vasa̍ṅka̱lpama̍stu || 16

parā̎tpa̱rata̍raṃ cai̱va̱ ta̱tparā̎ccaiva̱ yatpa̍ram |
ya̱tparā̱tpara̍to jñe̱ya̱ṃ tanme̱ mana̍: śi̱vasa̍ṅka̱lpama̍stu || 17

parā̎tpa̱rata̍raṃ bra̱hma̱ ta̱tparā̎tpara̱to hari̍: |
yatparā̱tpara̍to’dhī̱śa̱ṃ tanme̱ mana̍: śi̱vasa̍ṅka̱lpama̍stu || 18

yā vedādiṣu̍ gāya̱trī sa̱rvavyā̍pī ma̱heśva̍rī |
ṛgyajussāmā̍tharvai̱śca̱ tanme̱ mana̍: śi̱vasa̍ṅka̱lpama̍stu || 19

yo vai̍ de̱vaṃ ma̍hāde̱va̱ṃ pra̱yata̍: praṇava̱śśuci̍: |
yassarve̍ sarva̍ vedai̱śca tanme̱ mana̍: śi̱vasa̍ṅka̱lpama̍stu || 20

praya̍taḥ praṇa̍voṅkā̱ra̱ṃ pra̱ṇava̍ṃ puru̱ṣotta̍mam |
oṅkāraṃ praṇa̍vātmā̱na̱ṃ tanme̱ mana̍: śi̱vasa̍ṅka̱lpama̍stu || 21

yo’sau̍ sa̱rveṣu̍ vede̱ṣu̱ paṭhyate̎ hyaja īśva̍raḥ |
a̱kā̱yo nirgu̍ṇo hyā̱tmā̱ tanme̱ mana̍: śi̱vasa̍ṅka̱lpama̍stu || 22

gobhi̱rjuṣṭa̱ṃ dhane̍na̱ hyāyu̍ṣā ca̱ bale̍na ca |
pra̱jayā̍ pa̱śubhi̍: puṣkarā̱kṣaṃ tanme̱ mana̍: śi̱vasa̍ṅka̱lpama̍stu || 23

trya̍mbakaṃ yajāmahe suga̱ndhiṃ pu̍ṣṭi̱vardha̍nam |
u̱rvā̱ru̱kami̍va̱ bandha̍nānmṛ̱tyormu̍kṣīya̱
mā’mṛtā̱ttanme̱ mana̍: śi̱vasa̍ṅka̱lpama̍stu || 24

kailā̍sa̱ śikha̍re ra̱mye̱ śa̱ṅkara̍sya śi̱vāla̍ye |
de̱vatā̎statra̍ moda̱nti̱ tanme̱ mana̍: śi̱vasa̍ṅka̱lpama̍stu || 25

kailā̍sa̱śikha̍rāvā̱sā hi̱mava̍dgiri̱ saṃsthi̍tam |
nī̱la̱ka̱ṇṭhaṃ tri̍ṇetra̱ṃ ca̱ tanme̱ mana̍: śi̱vasa̍ṅka̱lpama̍stu || 26

vi̱śvata̍ścakṣuru̱ta vi̱śvato̍ mukho vi̱śvato̍ hasta u̱ta vi̱śvata̍spāt |
saṃ bā̱hubhyā̱ṃ nama̍ti̱ sampata̍trai̱rdyāvā̍pṛthi̱vī ja̱naya̍nde̱va eka̱stanme̱ mana̍: śi̱vasa̍ṅka̱lpama̍stu || 27

ca̱turo̍ ve̱dāna̍dhīyī̱ta̱ sa̱rvaśā̎strama̱yaṃ vidu̍: |
i̱ti̱hā̱sa pu̍rāṇā̱nāṃ tanme̱ mana̍: śi̱vasa̍ṅka̱lpama̍stu || 28

mā no̍ ma̱hānta̍mu̱ta mā no̍ arbha̱kaṃ mā na̱ ukṣa̍ntamu̱ta mā na̍ ukṣi̱tam |
māno̎vadhīḥ pi̱tara̱ṃ motamā̱tara̍ṃ pri̱yāmāna̍sta̱nuvo̍ rudra rīriṣa̱stanme̱ mana̍: śi̱vasa̍ṅka̱lpama̍stu || 29

māna̍sto̱ke tana̍ye̱ mā na̱ āyu̍ṣi̱ mā no̱ goṣu̱ mā no̱ aśve̍ṣu rīriṣaḥ |
vī̱rānmāno̍ rudra bhāmi̱to’va̍dhīrha̱viṣma̍nto̱ nama̍sā vidhemate̱ tanme̱ mana̍: śi̱vasa̍ṅka̱lpama̍stu || 30

ṛ̱ta̱g̱ṃ sa̱tyaṃ pa̍raṃ bra̱hma̱ pu̱ruṣa̍ṃ kṛṣṇa̱piṅga̍lam |
ū̱rdhvare̍taṃ vi̍rūpā̱kṣa̱ṃ vi̱śvarū̍pāya̱ vai namo̱ nama̱stanme̱ mana̍: śi̱vasa̍ṅka̱lpama̍stu || 31

kadru̱drāya̱ prace̍tase mī̱ḍhuṣṭa̍māya̱ tavya̍se | vo̱cema̱ śanta̍magṃ hṛ̱de |
sarvo̱ hye̍ṣa ru̱drastasmai̍ ru̱drāya̱ namo̍ astu̱ tanme̱ mana̍: śi̱vasa̍ṅka̱lpama̍stu || 32

brahma̍jajñā̱naṃ pra̍tha̱maṃ pu̱rastā̱dvisī̍ma̱taḥ su̱ruco̍ ve̱na ā̍vaḥ |
sa bu̱dhniyā̍ upa̱mā a̍sya vi̱ṣṭhāḥ sa̱taśca̱ yoni̱masa̍taśca̱ viva̱stanme̱ mana̍: śi̱vasa̍ṅka̱lpama̍stu || 33

yaḥ prā̍ṇa̱to ni̍miṣa̱to ma̍hi̱tvaika̱ idrājā̱ jaga̍to ba̱bhūva̍ |
ya īśe̍ a̱sya dvi̱pada̱ścatu̍ṣpada̱: kasmai̍ de̱vāya̍ ha̱viṣā̍ vidhema̱ tanme̱ mana̍: śi̱vasa̍ṅka̱lpama̍stu || 34

ya ā̎tma̱dā ba̍la̱dā yasya̱ viśva̍ u̱pāsa̍te pra̱śiṣa̱ṃ yasya̍ de̱vāḥ |
yasya̍ chā̱yā’mṛta̱ṃ yasya̍ mṛ̱tyuḥ kasmai̍ de̱vāya̍ ha̱viṣā̍ vidhema̱ tanme̱ mana̍: śi̱vasa̍ṅka̱lpama̍stu || 35

yo ru̱dro a̱gnau yo a̱psu ya oṣa̍dhīṣu̱ yo ru̱dro viśvā̱ bhuva̍nā”vi̱veśa̱ tasmai̍ ru̱drāya̱ namo̍ astu̱ tanme̱ mana̍: śi̱vasa̍ṅka̱lpama̍stu || 36

ga̱ndha̱dvā̱rāṃ du̍rādha̱rṣā̱ṃ ni̱tyapu̍ṣṭāṃ karī̱ṣiṇī̎m |
ī̱śvarīg̍ṃ sarva̍bhūtā̱nā̱ṃ tāmi̱hopa̍hvaye̱ śriya̱ṃ tanme̱ mana̍: śi̱vasa̍ṅka̱lpama̍stu || 37

namakaṃ cama̍kaṃ cai̱va̱ pu̱ruṣasū̎ktaṃ ca̱ yadvi̍duḥ |
ma̱hā̱de̱vaṃ ca̍ tattu̱lya̱ṃ tanme̱ mana̍: śi̱vasa̍ṅka̱lpama̍stu || 38

ya idagṃ śiva̍saṅka̱lpa̱gṃ sa̱dā dhyā̍yanti̱ brāhma̍ṇāḥ |
te para̍ṃ mokṣaṃ ga̍miṣya̱nti̱ tanme̱ mana̍: śi̱vasa̍ṅka̱lpama̍stu || 39


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed