Read in తెలుగు / ಕನ್ನಡ / தமிழ் / English (IAST)
nārāyaṇīyaṁ dvicatvāriṁśadaśakam (42) – śakaṭāsuravadham |
kadāpi janmarkṣadinē tava prabhō nimantritajñātivadhūmahīsurā |
mahānasastvāṁ savidhē nidhāya sā mahānasādau vavr̥tē vrajēśvarī || 42-1 ||
tatō bhavattrāṇaniyuktabālaka-prabhītisaṅkrandanasaṅkulāravaiḥ |
vimiśramaśrāvi bhavatsamīpataḥ parisphuṭaddārucaṭaccaṭāravaḥ || 42-2 ||
tatastadākarṇanasaṁbhramaśrama-prakampivakṣōjabharā vrajāṅganāḥ |
bhavantamantardadr̥śuḥ samantatō viniṣpataddāruṇadārumadhyagam || 42-3 ||
śiśōrahō kiṁ kimabhūditi drutaṁ pradhāvya nandaḥ paśupāśca bhūsurāḥ |
bhavantamālōkya yaśōdayā dhr̥taṁ samāśvasannaśrujalārdralōcanāḥ || 42-4 ||
kaskō nu kautaskuta ēṣa vismayō viśaṅkaṭaṁ yacchakaṭaṁ vipāṭitam |
na kāraṇaṁ kiñcidihēti tē sthitāḥ svanāsikādattakarāstvadīkṣakāḥ || 42-5 ||
kumārakasyāsya payōdharārthinaḥ prarōdanē lōlapadāṁbujāhatam |
mayā mayā dr̥ṣṭamanō viparyagāditīśa tē pālakabālakā jaguḥ || 42-6 ||
bhiyā tadā kiñcidajānatāmidaṁ kumārakāṇāmatidurghaṭaṁ vacaḥ |
bhavatprabhāvāvidurairitīritaṁ manāgivāśaṅkyata dr̥ṣṭapūtanaiḥ || 42-7 ||
pravālatāmraṁ kimidaṁ padaṁ kṣataṁ sarōjaramyau nu karau virōjitau |
iti prasarpatkaruṇātaraṅgitā-stvadaṅgamāpaspr̥śuraṅganājanāḥ || 42-8 ||
ayē sutaṁ dēhi jagatpatēḥ kr̥pātaraṅgapātātparipātamadya mē |
iti sma saṅgr̥hya pitā tvadaṅgakaṁ muhurmuhuḥ śliṣyati jātakaṇṭakaḥ || 42-9 ||
anōnilīnaḥ kila hantumāgataḥ surārirēvaṁ bhavatā vihiṁsitaḥ |
rajō:’pi nō dr̥ṣṭamamuṣya tatkathaṁ sa śuddhasattvē tvayi līnavāndhruvam || 42-10 ||
prapūjitaistatra tatō dvijātibhirviśēṣatō laṁbhitamaṅgalāśiṣaḥ |
vrajaṁ nijairbālyarasairvimōhayanmarutpurādhīśa rujāṁ jahīhi mē || 42-11 ||
iti dvicatvāriṁśadaśakaṁ samāptam |
See complete nārāyaṇīyam for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
