Read in తెలుగు / ಕನ್ನಡ / தமிழ் / देवनागरी / English (IAST)
|| mātr̥svastyayanam ||
sā:’panīya tamāyāsamupaspr̥śya jalaṁ śuciḥ |
cakāra mātā rāmasya maṅgalāni manasvinī || 1 ||
na śakyasē vārayituṁ gacchēdānīṁ raghūttama |
śīghraṁ ca vinivartasva vartasva ca satāṁ kramē || 2 ||
yaṁ pālayasi dharmaṁ tvaṁ dhr̥tyā ca niyamēna ca |
sa vai rāghavaśārdūla dharmastvāmabhirakṣatu || 3 ||
yēbhyaḥ praṇamasē putra caityēṣvāyatanēṣu ca |
tē ca tvāmabhirakṣantu vanē saha maharṣibhiḥ || 4 ||
yāni dattāni tē:’strāṇi viśvāmitrēṇa dhīmatā |
tāni tvāmabhirakṣantu guṇaiḥ samuditaṁ sadā || 5 ||
pitr̥śuśrūṣayā putra mātr̥śuśrūṣayā tathā |
satyēna ca mahābāhō ciraṁ jīvābhirakṣitaḥ || 6 ||
samitkuśapavitrāṇi vēdyaścāyatanāni ca |
sthaṇḍilāni vicitrāṇi śailā vr̥kṣāḥ kṣupā hradāḥ || 7 ||
pataṅgāḥ pannagāḥ siṁhāstvāṁ rakṣantu narōttama |
svasti sādhyāśca viśvē ca marutaśca maharṣayaḥ || 8 ||
svasti dhātā vidhātā ca svasti pūṣā bhagō:’ryamā |
lōkapālāśca tē sarvē vāsavapramukhāstathā || 9 ||
r̥tavaścaiva pakṣāśca māsāḥ saṁvatsarāḥ kṣapāḥ |
dināni ca muhūrtāśca svasti kurvantu tē sadā || 10 ||
smr̥tirdhr̥tiśca dharmaśca pātu tvāṁ putra sarvataḥ |
skandaśca bhagavāndēvaḥ sōmaśca sabr̥haspatiḥ || 11 ||
saptarṣayō nāradaśca tē tvāṁ rakṣantu sarvataḥ |
yē cāpi sarvataḥ siddhā diśaśca sadigīśvarāḥ || 12 ||
stutā mayā vanē tasminpāntu tvāṁ putra nityaśaḥ |
śailāḥ sarvē samudrāśca rājā varuṇa ēva ca || 13 ||
dyaurantarikṣaṁ pr̥thivī nadyaḥ sarvāstathaiva ca |
nakṣatrāṇi ca sarvāṇi grahāśca sahadēvatāḥ || 14 ||
ahōrātrē tathā sandhyē pāntu tvāṁ vanamāśritam |
r̥tavaścaiva ṣaṭ puṇyā māsāḥ saṁvatsarāstathā || 15 ||
kalāśca kāṣṭhāśca tathā tava śarma diśantu tē |
mahāvanē vicaratō munivēṣasya dhīmataḥ || 16 ||
tavādityāśca daityāśca bhavantu sukhadāḥ sadā |
rākṣasānāṁ piśācānāṁ raudrāṇāṁ krūrakarmaṇām || 17 ||
kravyādānāṁ ca sarvēṣāṁ mā bhūtputraka tē bhayam |
plavagā vr̥ścikā daṁśā maśakāścaiva kānanē || 18 ||
sarīsr̥pāśca kīṭāśca mā bhūvangahanē tava |
mahādvipāśca siṁhāśca vyāghrā r̥kṣāśca daṁṣṭriṇaḥ || 19 ||
mahiṣāḥ śr̥ṅgiṇō raudrā na tē druhyantu putraka |
nr̥māṁsabhōjinō raudrā yē cānyē sattvajātayaḥ || 20 ||
mā ca tvāṁ hiṁsiṣuḥ putra mayā sampūjitāstviha |
āgamāstē śivāḥ santu siddhyantu ca parākramāḥ || 21 ||
sarvasampattayē rāma svastimāngaccha putraka |
svasti tē:’stvāntarikṣēbhyaḥ pārthivēbhyaḥ punaḥ punaḥ || 22 ||
sarvēbhyaścaiva dēvēbhyō yē ca tē paripanthinaḥ |
śukraḥ sōmaśca sūryaśca dhanadō:’tha yamastathā || 23 || [guruḥ]
pāntu tvāmarcitā rāma daṇḍakāraṇyavāsinam |
agnirvāyustathā dhūmō mantrāścarṣimukhāccyutāḥ || 24 ||
upasparśanakālē tu pāntu tvāṁ raghunandana |
sarvalōkaprabhurbrahmā bhūtabhartā tatharṣayaḥ || 25 ||
yē ca śēṣāḥ surāstē tvāṁ rakṣantu vanavāsinam |
iti mālyaiḥ suragaṇāngandhaiścāpi yaśasvinī || 26 ||
stutibhiścānurūpābhirānarcāyatalōcanā | [anukūlābhiḥ]
jvalanaṁ samupādāya brāhmaṇēna mahātmanā || 27 ||
hāvayāmāsa vidhinā rāmamaṅgalakāraṇāt |
ghr̥taṁ śvētāni mālyāni samidhaḥ śvētasarṣapān || 28 ||
upasampādayāmāsa kausalyā paramāṅganā |
upādhyāyaḥ sa vidhinā hutvā śāntimanāmayam || 29 ||
hutahavyāvaśēṣēṇa bāhyaṁ balimakalpayat |
madhudadhyakṣataghr̥taiḥ svastivācya dvijāṁstataḥ || 30 ||
vācayāmāsa rāmasya vanē svastyayanakriyāḥ |
tatastasmai dvijēndrāya rāmamātā yaśasvinī || 31 ||
dakṣiṇāṁ pradadau kāmyāṁ rāghavaṁ cēdamabravīt |
yanmaṅgalaṁ sahasrākṣē sarvadēvanamaskr̥tē || 32 ||
vr̥tranāśē samabhavattattē bhavatu maṅgalam |
yanmaṅgalaṁ suparṇasya vinatā:’kalpayatpurā || 33 ||
amr̥taṁ prārthayānasya tattē bhavatu maṅgalam |
amr̥tōtpādanē daityān ghnatō vajradharasya yat || 34 ||
aditirmaṅgalaṁ prādāttattē bhavatu maṅgalam |
trīnvikramānprakramatō viṣṇōramitatējasaḥ || 35 ||
yadāsīnmaṅgalaṁ rāma tattē bhavatu maṅgalam |
r̥tavaḥ sāgarā dvīpā vēdā lōkā diśaśca tē || 36 ||
maṅgalāni mahābāhō diśantu śubhamaṅgalāḥ |
iti putrasya śēṣāṁśca kr̥tvā śirasi bhāminī || 37 ||
gandhaiścāpi samālabhya rāmamāyatalōcanā |
ōṣadhīṁ cāpi siddhārthāṁ viśalyakaraṇīṁ śubhām || 38 ||
cakāra rakṣāṁ kausalyā mantrairabhijajāpa ca |
uvācātiprahr̥ṣṭēva sā duḥkhavaśavartinī || 39 ||
vāṅmātrēṇa na bhāvēna vācā saṁsajjamānayā |
ānamya mūrdhni cāghrāya pariṣvajya yaśasvinī || 40 ||
avadatputra siddhārthō gaccha rāma yathāsukham |
arōgaṁ sarvasiddhārthamayōdhyāṁ punarāgatam || 41 ||
paśyāmi tvāṁ sukhaṁ vatsa susthitaṁ rājavartmani |
pranaṣṭaduḥkhasaṅkalpā harṣavidyōtitānanā || 42 ||
drakṣyāmi tvāṁ vanātprāptaṁ pūrṇacandramivōditam |
bhadrāsanagataṁ rāma vanavāsādihāgatam || 43 || [bhadraṁ]
drakṣyāmi ca punastvāṁ tu tīrṇavantaṁ piturvacaḥ |
maṅgalairupasampannō vanavāsādihāgataḥ |
vadhvā mama ca nityaṁ tvaṁ kāmān saṁvardha yāhi bhō || 44 ||
mayārcitā dēvagaṇāḥ śivādayō
maharṣayō bhūtamahāsurōragāḥ |
abhiprayātasya vanaṁ cirāya tē
hitāni kāṅkṣantu diśaśca rāghava || 45 ||
itīva cāśrupratipūrṇalōcanā
samāpya ca svastyayanaṁ yathāvidhi |
pradakṣiṇaṁ caiva cakāra rāghavaṁ
punaḥ punaścāpi nipīḍya sasvajē || 46 ||
tathā tu dēvyā sa kr̥tapradakṣiṇō
nipīḍya mātuścaraṇau punaḥ punaḥ |
jagāma sītānilayaṁ mahāyaśāḥ
sa rāghavaḥ prajvalitaḥ svayā śriyā || 47 ||
ityārṣē śrīmadrāmāyaṇē vālmīkīyē ādikāvyē ayōdhyākāṇḍē pañcaviṁśaḥ sargaḥ || 25 ||
ayōdhyākāṇḍa ṣaḍviṁśaḥ sargaḥ (26) >>
See more śrī rāma stōtrāṇi for chanting.
See more vālmīki rāmāyaṇam for chanting.
See vālmīki rāmāyaṇē ayōdhyakāṇḍa for chanting.
గమనిక: రాబోయే ధనుర్మాసం సందర్భంగా "శ్రీ కృష్ణ స్తోత్రనిధి" ముద్రించుటకు ఆలోచన చేయుచున్నాము. ఇటీవల మేము "శ్రీ సాయి స్తోత్రనిధి" పుస్తకము విడుదల చేశాము.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
