Read in తెలుగు / ಕನ್ನಡ / தமிழ் / देवनागरी / English (IAST)
|| agastyāśramaḥ ||
agrataḥ prayayau rāmaḥ sītā madhyē sumadhyamā |
pr̥ṣṭhatastu dhanuṣpāṇirlakṣmaṇō:’nujagāma ha || 1 ||
tau paśyamānau vividhān śailaprasthānvanāni ca |
nadīśca vividhā ramyā jagmatuḥ sītayā saha || 2 ||
sārasāṁścakravākāṁśca nadīpulinacāriṇaḥ |
sarāṁsi ca sapadmāni yuktāni jalajaiḥ khagaiḥ || 3 ||
yūthabaddhāṁśca pr̥ṣatānmadōnmattānviṣāṇinaḥ |
mahiṣāṁśca varāhāṁśca nāgāṁśca drumavairiṇaḥ || 4 ||
tē gatvā dūramadhvānaṁ lambamānē divākarē |
dadr̥śuḥ sahitā ramyaṁ taṭākaṁ yōjanāyatam || 5 ||
padmapuṣkarasambādhaṁ gajayūthairalaṅkr̥tam |
sārasairhaṁsakādambaiḥ saṅkulaṁ jalacāribhiḥ || 6 ||
prasannasalilē ramyē tasminsarasi śuśruvē |
gītavāditranirghōṣō na tu kaścana dr̥śyatē || 7 ||
tataḥ kautūhalādrāmō lakṣmaṇaśca mahābalaḥ |
muniṁ dharmabhr̥taṁ nāma praṣṭuṁ samupacakramē || 8 ||
idamatyadbhutaṁ śrutvā sarvēṣāṁ nō mahāmunē |
kautūhalaṁ mahajjātaṁ kimidaṁ sādhu kathyatām || 9 ||
vaktavyaṁ yadi cēdvipra nātiguhyamapi prabhō |
tēnaivamuktō dharmātmā rāghavēṇa munistadā || 10 ||
prabhāvaṁ sarasaḥ kr̥tsnamākhyātumupacakramē |
idaṁ pañcāpsarō nāma taṭākaṁ sārvakālikam || 11 ||
nirmitaṁ tapasā rāma muninā māṇḍakarṇinā |
sa hi tēpē tapastīvraṁ māṇḍakarṇirmahāmuniḥ || 12 ||
daśa varṣasahasrāṇi vāyubhakṣō jalāśrayaḥ |
tataḥ pravyathitāḥ sarvē dēvāḥ sāgnipurōgamāḥ || 13 ||
abruvanvacanaṁ sarvē parasparasamāgatāḥ |
asmākaṁ kasyacitsthānamēṣa prārthayatē muniḥ || 14 ||
iti saṁvignamanasaḥ sarvē tē tridivaukasaḥ |
tatra kartuṁ tapōvighnaṁ dēvaiḥ sarvairniyōjitāḥ || 15 ||
pradhānāpsarasaḥ pañca vidyutsadr̥śavarcasaḥ | [ccalita]
apsarōbhistatastābhirmunirdr̥ṣṭaparāvaraḥ || 16 ||
nītō madanavaśyatvaṁ surāṇāṁ kāryasiddhayē |
tāścaivāpsarasaḥ pañca munēḥ patnītvamāgatāḥ || 17 ||
taṭākē nirmitaṁ tāsāmasminnantarhitaṁ gr̥ham |
tathaivāpsarasaḥ pañca nivasantyō yathāsukham || 18 ||
ramayanti tapōyōgānmuniṁ yauvanamāsthitam |
tāsāṁ saṅkrīḍamānānāmēṣa vāditraniḥsvanaḥ || 19 ||
śrūyatē bhūṣaṇōnmiśrō gītaśabdō manōharaḥ |
āścaryamiti tasyaitadvavacanaṁ bhāvitātmanaḥ || 20 ||
rāghavaḥ pratijagrāha saha bhrātrā mahāyaśāḥ |
ēvaṁ kathayamānasya dadarśāśramamaṇḍalam || 21 ||
kuśacīraparikṣiptaṁ brāhmyā lakṣmyā samāvr̥tam |
praviśya saha vaidēhyā lakṣmaṇēna ca rāghavaḥ || 22 ||
uvāsa munibhiḥ sarvaiḥ pūjyamānō mahāyaśāḥ |
tathā tasminsa kākutsthaḥ śrīmatyāśramamaṇḍalē || 23 ||
uṣitvā tu sukhaṁ tatra pūjyamānō maharṣibhiḥ |
jagāma cāśramāṁstēṣāṁ paryāyēṇa tapasvinām || 24 ||
yēṣāmuṣitavānpūrvaṁ sakāśē sa mahāstravit |
kvacitparidaśānmāsānēkaṁ saṁvatsaraṁ kvacit || 25 ||
kvacicca caturō māsānpañcaṣaṭ cāparānkvacit |
aparatrādhikaṁ māsādapyardhamadhikaṁ kvacit || 26 ||
trīn māsānaṣṭamāsāṁśca rāghavō nyavasatsukham |
tathā saṁvasatastasya munīnāmāśramēṣu vai || 27 ||
ramataścānukūlyēna yayuḥ saṁvatsarā daśa |
parivr̥tya ca dharmajñō rāghavaḥ saha sītayā || 28 ||
sutīkṣṇasyāśramaṁ śrīmānpunarēvājagāma ha |
sa tamāśramamāsādya munibhiḥ pratipūjitaḥ || 29 ||
tatrāpi nyavasadrāmaḥ kiñcitkālamarindamaḥ |
athāśramasthō vinayātkadācittaṁ mahāmunim || 30 ||
upāsīnaḥ sa kākutsthaḥ sutīkṣṇamidamabravīt |
asminnaraṇyē bhagavannagastyō munisattamaḥ || 31 ||
vasatīti mayā nityaṁ kathāḥ kathayatāṁ śrutam |
na tu jānāmi taṁ dēśaṁ vanasyāsya mahattayā || 32 ||
kutrāśramamidaṁ puṇyaṁ maharṣēstasya dhīmataḥ |
prasādāttatrabhavataḥ sānujaḥ saha sītayā || 33 ||
agastyamabhigacchēyamabhivādayituṁ munim |
manōrathō mahānēṣa hr̥di mē parivartatē || 34 ||
yadahaṁ taṁ munivaraṁ śuśrūṣēyamapi svayam |
iti rāmasya sa muniḥ śrutvā dharmātmanō vacaḥ || 35 ||
sutīkṣṇaḥ pratyuvācēdaṁ prītō daśarathātmajam |
ahamapyētadēva tvāṁ vaktukāmaḥ salakṣmaṇam || 36 ||
agastyamabhigacchēti sītayā saha rāghava |
diṣṭyā tvidānīmarthē:’sminsvayamēva bravīṣi mām || 37 ||
ahamākhyāmi tē vatsa yatrāgastyō mahāmuniḥ |
yōjanānyāśramādasmāttathā catvāri vai tataḥ || 38 ||
dakṣiṇēna mahāñchrīmānagastyabhrāturāśramaḥ |
sthalīprāyē vanōddēśē pippalīvanaśōbhitē || 39 ||
bahupuṣpaphalē ramyē nānāśakunināditē |
padminyō vividhāstatra prasannasalilāḥ śivāḥ || 40 ||
haṁsakāraṇḍavākīrṇāścakravākōpaśōbhitāḥ |
tatraikāṁ rajanīṁ vyuṣya prabhātē rāma gamyatām || 41 ||
dakṣiṇāṁ diśamāsthāya vanaṣaṇḍasya pārśvataḥ |
tatrāgastyāśramapadaṁ gatvā yōjanamantaram || 42 ||
ramaṇīyē vanōddēśē bahupādapasaṁvr̥tē |
raṁsyatē tatra vaidēhī lakṣmaṇaśca saha tvayā || 43 ||
sa hi ramyō vanōddēśō bahupādapasaṅkulaḥ |
yadi buddhiḥ kr̥tā draṣṭumagastyaṁ taṁ mahāmunim || 44 ||
adyaiva gamanē buddhiṁ rōcayasva mahāyaśaḥ |
iti rāmō munēḥ śrutvā saha bhrātrā:’bhivādya ca || 45 ||
pratasthē:’gastyamuddiśya sānujaḥ sītayā saha |
paśyanvanāni ramyāṇi parvatāṁścābhrasannibhān || 46 ||
sarāṁsi saritaścaiva pathi mārgavaśānugāḥ |
sutīkṣṇēnōpadiṣṭēna gatvā tēna pathā sukham || 47 ||
idaṁ paramasaṁhr̥ṣṭō vākyaṁ lakṣmaṇamabravīt |
ētadēvāśramapadaṁ nūnaṁ tasya mahātmanaḥ || 48 ||
agastyasya munērbhrāturdr̥śyatē puṇyakarmaṇaḥ |
yathā hi mē vanasyāsya jñātāḥ pathi sahasraśaḥ || 49 ||
sannatāḥ phalabhārēṇa puṣpabhārēṇa ca drumāḥ |
pippalīnāṁ ca pakvānāṁ vanādasmādupāgataḥ || 50 ||
gandhō:’yaṁ pavanōtkṣiptaḥ sahasā kaṭukōdayaḥ |
tatra tatra ca dr̥śyantē saṅkṣiptāḥ kāṣṭhasañcayāḥ || 51 ||
lūnāśca pathi dr̥śyantē darbhā vaiḍūryavarcasaḥ |
ētacca vanamadhyasthaṁ kr̥ṣṇābhraśikharōpamam || 52 ||
pāvakasyāśramasthasya dhūmāgraṁ sampradr̥śyatē |
viviktēṣu ca tīrthēṣu kr̥tasnātā dvijātayaḥ || 53 ||
puṣpōpahāraṁ kurvanti kusumaiḥ svayamārjitaiḥ |
tatsutīkṣṇasya vacanaṁ yathā saumya mayā śrutam || 54 ||
agastyasyāśramō bhrāturnūnamēṣa bhaviṣyati |
nigr̥hya tarasā mr̥tyuṁ lōkānāṁ hitakāmyayā || 55 ||
yasya bhrātrā kr̥tēyaṁ dikcharaṇyā puṇyakarmaṇā |
ihaikadā kila krūrō vātāpirapi cēlvalaḥ || 56 ||
bhrātarau sahitāvāstāṁ brāhmaṇaghnau mahāsurau |
dhārayanbrāhmaṇaṁ rūpamilvalaḥ saṁskr̥taṁ vadan || 57 ||
āmantrayati viprān sma śrāddhamuddiśya nirghr̥ṇaḥ |
bhrātaraṁ saṁskr̥taṁ kr̥tvā tatastaṁ mēṣarūpiṇam || 58 ||
tāndvijānbhōjayāmāsa śrāddhadr̥ṣṭēna karmaṇā |
tatō bhuktavatāṁ tēṣāṁ viprāṇāmilvalō:’bravīt || 59 ||
vātāpē niṣkramasvēti svarēṇa mahatā vadan |
tatō bhrāturvacaḥ śrutvā vātāpirmēṣavannadan || 60 ||
bhittvā bhittvā śarīrāṇi brāhmaṇānāṁ viniṣpatat |
brāhmaṇānāṁ sahasrāṇi tairēvaṁ kāmarūpibhiḥ || 61 ||
vināśitāni saṁhatya nityaśaḥ piśitāśanaiḥ |
agastyēna tadā dēvaiḥ prārthitēna maharṣiṇā || 62 ||
anubhūya kila śrāddhē bhakṣitaḥ sa mahāsuraḥ |
tataḥ sampannamityuktvā dattvā hastōdakaṁ tataḥ || 63 ||
bhrātaraṁ niṣkramasvēti cēlvalaḥ sō:’bhyabhāṣata |
sa taṁ tathā bhāṣamāṇaṁ bhrātaraṁ vipraghātinam || 64 ||
abravītprahasandhīmānagastyō munisattamaḥ |
kutō niṣkramituṁ śaktirmayā jīrṇasya rakṣasaḥ || 65 ||
bhrātustē mēṣarūpasya gatasya yamasādanam |
atha tasya vacaḥ śrutvā bhrāturnidhanasaṁśrayam || 66 ||
pradharṣayitumārēbhē muniṁ krōdhānniśācaraḥ |
sō:’bhidravanmuniśrēṣṭhaṁ muninā dīptatējasā || 67 ||
cakṣuṣā:’nalakalpēna nirdagdhō nidhanaṁ gataḥ |
tasyāyamāśramō bhrātustaṭākavanaśōbhitaḥ || 68 ||
viprānukampayā yēna karmēdaṁ duṣkaraṁ kr̥tam |
ēvaṁ kathayamānasya tasya saumitriṇā saha || 69 ||
rāmasyāstaṁ gataḥ sūryaḥ sandhyākālō:’bhyavartata |
upāsya paścimāṁ sandhyāṁ saha bhrātrā yathāvidhi || 70 ||
pravivēśāśramapadaṁ tamr̥ṣiṁ sō:’bhyavādayat |
samyak pratigr̥hītaśca muninā tēna rāghavaḥ || 71 ||
nyavasattāṁ niśāmēkāṁ prāśya mūlaphalāni ca |
tasyāṁ rātryāṁ vyatītāyāṁ vimalē sūryamaṇḍalē || 72 ||
bhrātaraṁ tamagastyasya hyāmantrayata rāghavaḥ |
abhivādayē tvāṁ bhagavansukhamadhyuṣitō niśām || 73 ||
āmantrayē tvāṁ gacchāmi guruṁ tē draṣṭumagrajam |
gamyatāmiti tēnōktō jagāma raghunandanaḥ || 74 ||
yathōddiṣṭēna mārgēṇa vanaṁ taccāvalōkayan |
nīvārānpanasāṁstālāṁstimiśānvañjulāndhavān || 75 ||
ciribilvānmadhūkāṁśca bilvānapi ca tindukān |
puṣpitānpuṣpitāgrābhirlatābhiranuvēṣṭitān || 76 ||
dadarśa rāmaḥ śataśastatra kāntārapādapān |
hastihastairvimr̥ditānvānarairupaśōbhitān || 77 ||
mattaiḥ śakunisaṅghaiśca śataśaśca praṇāditān |
tatō:’bravītsamīpasthaṁ rāmō rājīvalōcanaḥ || 78 ||
pr̥ṣṭhatō:’nugataṁ vīraṁ lakṣmaṇaṁ lakṣmivardhanam |
snigdhapatrā yathā vr̥kṣā yathā śāntamr̥gadvijāḥ || 79 || [kṣāntā]
āśramō nātidūrasthō maharṣērbhāvitātmanaḥ |
agastya iti vikhyātō lōkē svēnaiva karmaṇā || 80 ||
āśramō dr̥śyatē tasya pariśrāntaśramāpahaḥ |
prājyadhūmākulavanaścīramālāpariṣkr̥taḥ || 81 ||
praśāntamr̥gayūthaśca nānāśakunināditaḥ |
nigr̥hya tarasā mr̥tyuṁ lōkānāṁ hitakāmyayā || 82 ||
dakṣiṇā dikkr̥tā yēna śaraṇyā puṇyakarmaṇā |
tasyēdamāśramapadaṁ prabhāvādyasya rākṣasaiḥ || 83 ||
digiyaṁ dakṣiṇā trāsāddr̥śyatē nōpabhujyatē |
yadāprabhr̥ti cākrāntā digiyaṁ puṇyakarmaṇā || 84 ||
tadāprabhr̥tinirvairāḥ praśāntā rajanīcarāḥ |
nāmnā cēyaṁ bhagavatō dakṣiṇā dikpradakṣiṇā || 85 ||
prathitā triṣu lōkēṣu durdharṣā krūrakarmabhiḥ |
mārgaṁ nirōddhuṁ niratō bhāskarasyācalōttamaḥ || 86 ||
nidēśaṁ pālayanyasya vindhyaḥ śailō na vardhatē |
ayaṁ dīrghāyuṣastasya lōkē viśrutakarmaṇaḥ || 87 ||
agastyasyāśramaḥ śrīmānvinītajanasēvitaḥ |
ēṣa lōkārcitaḥ sādhurhitē nityarataḥ satām || 88 ||
asmānabhigatānēṣa śrēyasā yōjayiṣyati |
ārādhayiṣyāmyatrāhamagastyaṁ taṁ mahāmunim || 89 ||
śēṣaṁ ca vanavāsasya saumya vatsyāmyahaṁ prabhō |
atra dēvāḥ sagandharvāḥ siddhāśca paramarṣayaḥ || 90 ||
agastyaṁ niyatāhāraṁ satataṁ paryupāsatē |
nātra jīvēnmr̥ṣāvādī krūrō vā yadi vā śaṭhaḥ || 91 ||
nr̥śaṁsaḥ kāmavr̥ttō vā munirēṣa tathāvidhaḥ |
atra dēvāśca yakṣāśca nāgāśca patagaiḥ saha || 92 ||
vasanti niyatāhārā dharmamārādhayiṣṇavaḥ |
atra siddhā mahātmānō vimānaiḥ sūryasannibhaiḥ || 93 ||
tyaktadēhā navairdēhaiḥ svaryātāḥ paramarṣayaḥ |
yakṣatvamamaratvaṁ ca rājyāni vividhāni ca || 94 ||
atra dēvāḥ prayacchanti bhūtairārādhitāḥ śubhaiḥ |
āgatāḥ smāśramapadaṁ saumitrē praviśāgrataḥ |
nivēdayēha māṁ prāptamr̥ṣayē sītayā saha || 95 ||
ityārṣē śrīmadrāmāyaṇē vālmīkīyē ādikāvyē araṇyakāṇḍē ēkādaśaḥ sargaḥ || 11 ||
గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.