Read in తెలుగు / ಕನ್ನಡ / தமிழ் / देवनागरी / English (IAST)
|| సాహాయ్యకానభ్యుపగమః ||
ఏవమస్మి తదా ముక్తః కథంచిత్తేన సంయుగే |
ఇదానీమపి యద్వృత్తం తచ్ఛృణుష్వ నిరుత్తరమ్ || ౧ ||
రాక్షసాభ్యామహం ద్వాభ్యామనిర్విణ్ణస్తథా కృతః |
సహితో మృగరూపాభ్యాం ప్రవిష్టో దండకావనమ్ || ౨ ||
దీప్తజిహ్వో మహాకాయస్తీక్ష్ణదంష్ట్రో మహాబలః |
వ్యచరం దండకారణ్యం మాంసభక్షో మహామృగః || ౩ ||
అగ్నిహోత్రేషు తీర్థేషు చైత్యవృక్షేషు రావణ |
అత్యంతఘోరో వ్యచరం తాపసాన్ సంప్రధర్షయన్ || ౪ ||
నిహత్య దండకారణ్యే తాపసాన్ ధర్మచరిణః |
రుధిరాణి పిబంతస్తేషాం తథా మాంసాని భక్షయన్ || ౫ ||
ఋషిమాంసాశనః క్రూరస్త్రాసయన్ వనగోచరాన్ |
తథా రుధిరమత్తోఽహం విచరన్ ధర్మదూషకః || ౬ ||
ఆసాదయం తదా రామం తాపసం ధర్మచారిణమ్ |
వైదేహీం చ మహాభాగాం లక్ష్మణం చ మహరథమ్ || ౭ ||
తాపసం నియతాహారం సర్వభూతహితే రతమ్ |
సోఽహం వనగతం రామం పరిభూయ మహాబలమ్ || ౮ ||
తాపసోఽయమితి జ్ఞాత్వా పూర్వవైరమనుస్మరన్ |
అభ్యధావం హి సంక్రుద్ధస్తీక్ష్ణశృంగో మృగాకృతిః || ౯ ||
జిఘాంసురకృతప్రజ్ఞస్తం ప్రహారమనుస్మరన్ |
తేన ముక్తాస్త్రయో బాణాః శితాః శత్రునిబర్హణాః || ౧౦ ||
వికృష్య బలవచ్చాపం సుపర్ణానిలనిస్వనాః |
తే బాణా వజ్రసంకాశాః సుముక్తా రక్తభోజనాః || ౧౧ ||
ఆజగ్ముః సహితాః సర్వే త్రయః సన్నతపర్వణః |
పరాక్రమజ్ఞో రామస్య శరో దృష్టభయః పురా || ౧౨ ||
సముద్భ్రాంతస్తతో ముక్తస్తావుభౌ రాక్షసౌ హతౌ |
శరేణ ముక్తో రామస్య కథంచిత్ప్రాప్య జీవితమ్ || ౧౩ ||
ఇహ ప్రవ్రాజితో యుక్తస్తాపసోఽహం సమాహితః |
వృక్షే వృక్షే చ పశ్యామి చీరకృష్ణాజినాంబరమ్ || ౧౪ ||
గృహీతధనుషం రామం పాశహస్తమివాంతకమ్ |
అపి రామసహస్రాణి భీతః పశ్యామి రావణ || ౧౫ ||
రామభూతమిదం సర్వమరణ్యం ప్రతిభాతి మే |
రామమేవ హి పశ్యామి రహితే రాక్షసాధిప || ౧౬ ||
దృష్ట్వా స్వప్నగతం రామముద్భ్రమామి విచేతనః |
రకారాదీని నామాని రామత్రస్తస్య రావణ || ౧౭ ||
రత్నాని చ రథాశ్చైవ త్రాసం సంజనయంతి మే |
అహం తస్య ప్రభావజ్ఞో న యుద్ధం తేన తే క్షమమ్ || ౧౮ ||
బలిం వా నముచిం వాఽపి హన్యాద్ధి రఘునందనః |
రణే రామేణ యుద్ధ్యస్వ క్షమాం వా కురు రాక్షస || ౧౯ ||
న తే రామకథా కార్యా యది మాం ద్రష్టుమిచ్ఛసి |
బహవః సాధవో లోకే యుక్తా ధర్మమనుష్ఠితాః || ౨౦ ||
పరేషామపరాధేన వినష్టాః సపరిచ్ఛదాః |
సోఽహం తవాపరాధేన వినాశ్యేయం నిశాచర || ౨౧ ||
కురు యత్తే క్షమం తత్త్వమహం త్వాం నానుయామి హ |
రామశ్చ హి మహాతేజా మహాసత్త్వో మహాబలః || ౨౨ ||
అపి రాక్షసలోకస్య న భవేదంతకో హి సః |
యది శూర్పణఖాహేతోర్జనస్థానగతః ఖరః || ౨౩ ||
అతివృత్తో హతః పూర్వం రామేణాక్లిష్టకర్మణా |
అత్ర బ్రూహి యథాతత్త్వం కో రామస్య వ్యతిక్రమః || ౨౪ ||
ఇదం వచో బంధుహితార్థినా మయా
యథోచ్యమానం యది నాభిపత్స్యసే |
సబాంధవస్త్యక్ష్యసి జీవితం రణే
హతోఽద్య రామేణ శరైరజిహ్మగైః || ౨౫ ||
ఇత్యార్షే శ్రీమద్రామాయణే వాల్మీకీయే ఆదికావ్యే అరణ్యకాండే ఏకోనచత్వారింశస్సర్గః || ౩౯ ||
అరణ్యకాండ చత్వారింశః సర్గః (౪౦) >>
సంపూర్ణ వాల్మీకి రామాయణే అరణ్యకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
