Read in తెలుగు / ಕನ್ನಡ / தமிழ் / देवनागरी / English (IAST)
|| భరద్వాజామంత్రణమ్ ||
పూర్ణే చతుర్దశే వర్షే పంచమ్యాం లక్ష్మణాగ్రజః |
భరద్వాజాశ్రమం ప్రాప్య వవందే నియతో మునిమ్ || ౧ ||
సోఽపృచ్ఛదభివాద్యైనం భరద్వాజం తపోధనమ్ |
శృణోషి కచ్చిద్భగవన్సుభిక్షానామయం పురే || ౨ ||
కచ్చిచ్చ యుక్తో భరతో జీవంత్యపి చ మాతరః |
ఏవముక్తస్తు రామేణ భరద్వాజో మహామునిః || ౩ ||
ప్రత్యువాచ రఘుశ్రేష్ఠం స్మితపూర్వం ప్రహృష్టవత్ |
పంకదిగ్ధస్తు భరతో జటిలస్త్వాం ప్రతీక్షతే || ౪ ||
పాదుకే తే పురస్కృత్య సర్వం చ కుశలం గృహే |
త్వాం పురా చీరవసనం ప్రవిశంతం మహావనమ్ || ౫ ||
స్త్రీతృతీయం చ్యుతం రాజ్యాద్ధర్మకామం చ కేవలమ్ |
పదాతిం త్యక్తసర్వస్వం పితుర్వచనకారిణమ్ || ౬ ||
సర్వభోగైః పరిత్యక్తం స్వర్గచ్యుతమివామరమ్ |
దృష్ట్వా తు కరుణా పూర్వం మమాసీత్సమితింజయ || ౭ ||
కైకేయీవచనే యుక్తం వన్యమూలఫలాశినమ్ |
సాంప్రతం సుసమృద్ధార్థం సమిత్రగణబాంధవమ్ || ౮ ||
సమీక్ష్య విజితారిం త్వాం మమ ప్రీతిరనుత్తమా |
సర్వం చ సుఖదుఃఖం తే విదితం మమ రాఘవ || ౯ ||
యత్త్వయా విపులం ప్రాప్తం జనస్థానవధాదికమ్ |
బ్రాహ్మణార్థే నియుక్తస్య రక్షితుః సర్వతాపసాన్ || ౧౦ ||
రావణేన హృతా భార్యా బభూవేయమనిందితా |
మారీచదర్శనం చైవ సీతోన్మథనమేవ చ || ౧౧ ||
కబంధదర్శనం చైవ పంపాభిగమనం తథా |
సుగ్రీవేణ చ తే సఖ్యం యచ్చ వాలీ హతస్త్వయా || ౧౨ ||
మార్గణం చైవ వైదేహ్యాః కర్మ వాతాత్మజస్య చ |
విదితాయాం చ వైదేహ్యాం నలసేతుర్యథా కృతః || ౧౩ ||
యథా వా దీపితా లంకా ప్రహృష్టైర్హరియూథపైః |
సపుత్రబాంధవామాత్యః సబలః సహవాహనః || ౧౪ ||
యథా వినిహతః సంఖ్యే రావణో దేవకంటకః |
సమాగమశ్చ త్రిదశైర్యథా దత్తశ్చ తే వరః || ౧౫ ||
సర్వం మమైతద్విదితం తపసా ధర్మవత్సల |
అహమప్యత్ర తే దద్మి వరం శస్త్రభృతాం వర || ౧౬ ||
అర్ఘ్యమద్య గృహాణేదమయోధ్యాం శ్వో గమిష్యసి |
తస్య తచ్ఛిరసా వాక్యం ప్రతిగృహ్య నృపాత్మజః || ౧౭ ||
బాఢమిత్యేవ సంహృష్టో ధీమాన్వరమయాచత |
అకాలే ఫలినో వృక్షాః సర్వే చాపి మధుస్రవాః || ౧౮ || [వ్రతాః]
ఫలాన్యమృతకల్పాని బహూని వివిధాని చ |
భవంతు మార్గే భగవన్నయోధ్యాం ప్రతి గచ్ఛతః || ౧౯ ||
తథేతి చ ప్రతిజ్ఞాతే వచనాత్సమనంతరమ్ |
అభవన్పాదపాస్తత్ర స్వర్గపాదపసన్నిభాః || ౨౦ ||
నిష్ఫలాః ఫలినశ్చాసన్విపుష్పాః పుష్పశాలినః |
శుష్కాః సమగ్రపత్రాస్తే నగాశ్చైవ మధుస్రవాః |
సర్వతో యోజనా త్రీణి గచ్ఛతామభవంస్తదా || ౨౧ ||
తతః ప్రహృష్టాః ప్లవగర్షభాస్తే
బహూని దివ్యాని ఫలాని చైవ |
కామాదుపాశ్నంతి సహస్రశస్తే
ముదాన్వితాః స్వర్గజితో యథైవ || ౨౨ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే సప్తవింశత్యుత్తరశతతమః సర్గః || ౧౨౭ ||
యుద్ధకాండ అష్టావింశత్యుత్తరశతతమః సర్గః (౧౨౮) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
