Read in తెలుగు / ಕನ್ನಡ / தமிழ் / देवनागरी / English (IAST)
|| గాంధర్వాస్త్రమోహనమ్ ||
స ప్రవిశ్య సభాం రాజా దీనః పరమదుఃఖితః |
నిషసాదాసనే ముఖ్యే సింహః క్రుద్ధ ఇవ శ్వసన్ || ౧ ||
అబ్రవీచ్చ స తాన్సర్వాన్బలముఖ్యాన్మహాబలః |
రావణః ప్రాంజలిర్వాక్యం పుత్రవ్యసనకర్శితః || ౨ ||
సర్వే భవంతః సర్వేణ హస్త్యశ్వేన సమావృతాః |
నిర్యాంతు రథసంఘైశ్చ పాదాతైశ్చోపశోభితాః || ౩ ||
ఏకం రామం పరిక్షిప్య సమరే హంతుమర్హథ |
వర్షంతః శరవర్షేణ ప్రావృట్కాల ఇవాంబుదాః || ౪ ||
అథవాఽహం శరైస్తీక్ష్ణైర్భిన్నగాత్రం మహారణే |
భవద్భిః శ్వో నిహంతాస్మి రామం లోకస్య పశ్యతః || ౫ ||
ఇత్యేతద్రాక్షసేంద్రస్య వాక్యమాదాయ రాక్షసాః |
నిర్యయుస్తే రథైః శీఘ్రైర్నానానీకైః సుసంవృతాః || ౬ ||
పరిఘాన్పట్టిశాంశ్చైవ శరఖడ్గపరశ్వధాన్ |
శరీరాంతకరాన్సర్వే చిక్షిపుర్వానరాన్ప్రతి || ౭ ||
వానరాశ్చ ద్రుమాన్ శైలాన్రాక్షసాన్ప్రతి చిక్షిపుః |
స సంగ్రామో మహాన్భీమః సూర్యస్యోదయనం ప్రతి || ౮ ||
రక్షసాం వానరాణాం చ తుములః సమపద్యత |
తే గదాభిర్విచిత్రాభిః ప్రాసైః ఖడ్గైః పరశ్వధైః || ౯ ||
అన్యోన్యం సమరే జఘ్నుస్తదా వానరరాక్షసాః |
ఏవం ప్రవృత్తే సంగ్రామే హ్యుద్భూతం సుమహద్రజః || ౧౦ ||
రక్షసాం వానరాణాం చ శాంతం శోణితవిస్రవైః |
మాతంగరథకూలాశ్చ వాజిమత్స్యా ధ్వజద్రుమాః || ౧౧ ||
శరీరసంఘాటవహాః ప్రసస్రుః శోణితాపగాః |
తతస్తే వానరాః సర్వే శోణితౌఘపరిప్లుతాః || ౧౨ ||
ధ్వజవర్మరథానశ్వాన్నానాప్రహరణాని చ |
ఆప్లుత్యాప్లుత్య సమరే రాక్షసానాం బభంజిరే || ౧౩ ||
కేశాన్కర్ణలలాటాంశ్చ నాసికాశ్చ ప్లవంగమాః |
రక్షసాం దశనైస్తీక్ష్ణైర్నఖైశ్చాపి న్యకర్తయన్ || ౧౪ ||
ఏకైకం రాక్షసం సంఖ్యే శతం వానరపుంగవాః |
అభ్యధావంత ఫలినం వృక్షం శకునయో యథా || ౧౫ ||
తథా గదాభిర్గుర్వీభిః ప్రాసైః ఖడ్గైః పరశ్వధైః |
నిజఘ్నుర్వానరాన్ఘోరాన్రాక్షసాః పర్వతోపమాః || ౧౬ ||
రాక్షసైర్యుధ్యమానానాం వానరాణాం మహాచమూః |
శరణ్యం శరణం యాతా రామం దశరథాత్మజమ్ || ౧౭ ||
తతో రామో మహాతేజా ధనురాదాయ వీర్యవాన్ |
ప్రవిశ్య రాక్షసం సైన్యం శరవర్షం వవర్ష హ || ౧౮ ||
ప్రవిష్టం తు తదా రామం మేఘాః సూర్యమివాంబరే |
నాభిజగ్ముర్మహాఘోరం నిర్దహంతం శరాగ్నినా || ౧౯ ||
కృతాన్యేవ సుఘోరాణి రామేణ రజనీచరాః |
రణే రామస్య దదృశుః కర్మాణ్యసుకరాణి చ || ౨౦ ||
చాలయంతం మహానీకం విధమంతం మహారథాన్ |
దదృశుస్తే న వై రామం వాతం వనగతం యథా || ౨౧ ||
ఛిన్నం భిన్నం శరైర్దగ్ధం ప్రభగ్నం శస్త్రపీడితమ్ |
బలం రామేణ దదృశుర్న రామం శీఘ్రకారిణమ్ || ౨౨ ||
ప్రహరంతం శరీరేషు న తే పశ్యంతి రాఘవమ్ |
ఇంద్రియార్థేషు తిష్ఠంతం భూతాత్మానమివ ప్రజాః || ౨౩ ||
ఏష హంతి గజానీకమేష హంతి మహారథాన్ |
ఏష హంతి శరైస్తీక్ష్ణైః పదాతీన్వాజిభిః సహ || ౨౪ ||
ఇతి తే రాక్షసాః సర్వే రామస్య సదృశాన్రణే |
అన్యోన్యం కుపితా జఘ్నుః సాదృశ్యాద్రాఘవస్య తే || ౨౫ ||
న తే దదృశిరే రామం దహంతమరివాహినీమ్ |
మోహితాః పరమాస్త్రేణ గాంధర్వేణ మహాత్మనా || ౨౬ ||
తే తు రామసహస్రాణి రణే పశ్యంతి రాక్షసాః |
పునః పశ్యంతి కాకుత్స్థమేకమేవ మహాహవే || ౨౭ ||
భ్రమంతీం కాంచనీం కోటిం కార్ముకస్య మహాత్మనః |
అలాతచక్రప్రతిమాం దదృశుస్తే న రాఘవమ్ || ౨౮ ||
శరీరనాభి సత్త్వార్చిః శరీరం నేమికార్ముకమ్ |
జ్యాఘోషతలనిర్ఘోషం తేజోబుద్ధి గుణప్రభమ్ || ౨౯ ||
దివ్యాస్త్రగుణపర్యంతం నిఘ్నంతం యుధి రాక్షసాన్ |
దదృశూ రామచక్రం తత్కాలచక్రమివ ప్రజాః || ౩౦ ||
అనీకం దశసాహస్రం రథానాం వాతరంహసామ్ |
అష్టాదశసహస్రాణి కుంజరాణాం తరస్వినామ్ || ౩౧ ||
చతుర్దశసహస్రాణి సారోహాణాం చ వాజినామ్ |
పూర్ణే శతసహస్రే ద్వే రాక్షసానాం పదాతినామ్ || ౩౨ ||
దివసస్యాష్టమే భాగే శరైరగ్నిశిఖోపమైః |
హతాన్యేకేన రామేణ రక్షసాం కామరూపిణామ్ || ౩౩ ||
తే హతాశ్వా హతరథాః శాంతా విమథితధ్వజాః |
అభిపేతుః పురీం లంకాం హతశేషా నిశాచరాః || ౩౪ ||
హతైర్గజపదాత్యశ్వైస్తద్బభూవ రణాజిరమ్ |
ఆక్రీడమివ రుద్రస్య క్రుద్ధస్య సుమహాత్మనః || ౩౫ ||
తతో దేవాః సగంధర్వాః సిద్ధాశ్చ పరమర్షయః |
సాధు సాధ్వితి రామస్య తత్కర్మ సమపూజయన్ || ౩౬ ||
అబ్రవీచ్చ తదా రామః సుగ్రీవం ప్రత్యనంతరమ్ |
విభీషణం చ ధర్మాత్మా హనూమంతం చ వానరమ్ || ౩౭ ||
జాంబవంతం హరిశ్రేష్ఠం మైందం ద్వివిదమేవ చ |
ఏతదస్త్రబలం దివ్యం మమ వా త్ర్యంబకస్య వా || ౩౮ ||
నిహత్య తాం రాక్షసవాహినీం తు
రామస్తదా శక్రసమో మహాత్మా |
అస్త్రేషు శస్త్రేషు జితక్లమశ్చ
సంస్తూయతే దేవగణైః ప్రహృష్టైః || ౩౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే చతుర్నవతితమః సర్గః || ౯౪ ||
యుద్ధకాండ పంచనవతితమః సర్గః (౯౫) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
