Read in తెలుగు / ಕನ್ನಡ / தமிழ் / देवनागरी / English (IAST)
|| సౌమిత్రిరావణియుద్ధమ్ ||
విభీషణవచః శ్రుత్వా రావణిః క్రోధమూర్ఛితః |
అబ్రవీత్పరుషం వాక్యం వేగేనాభ్యుత్పపాత హ || ౧ ||
ఉద్యతాయుధనిస్త్రింశో రథే సుసమలంకృతే |
కాలాశ్వయుక్తే మహతి స్థితః కాలాంతకోపమః || ౨ ||
మహాప్రమాణముద్యమ్య విపులం వేగవద్దృఢమ్ |
ధనుర్భీమం పరామృశ్య శరాంశ్చామిత్రశాతనాన్ || ౩ ||
తం దదర్శ మహేష్వాసో రథే సుసమలంకృతః |
అలంకృతమమిత్రఘ్నం రాఘవస్యానుజం బలీ || ౪ ||
హనుమత్పృష్ఠమాసీనముదయస్థరవిప్రభమ్ |
ఉవాచైనం సమారబ్ధః సౌమిత్రిం సవిభీషణమ్ || ౫ ||
తాంశ్చ వానరశార్దూలాన్పశ్యధ్వం మే పరాక్రమమ్ |
అద్య మత్కార్ముకోత్సృష్టం శరవర్షం దురాసదమ్ || ౬ ||
ముక్తం వర్షమివాకాశే వారయిష్యథ సంయుగే |
అద్య వో మామకా బాణా మహాకార్ముకనిఃసృతాః || ౭ ||
విధమిష్యంతి గాత్రాణి తూలరాశిమివానలః |
తీక్ష్ణసాయకనిర్భిన్నాన్ శూలశక్త్యష్టితోమరైః || ౮ ||
అద్య వో గమయిష్యామి సర్వానేవ యమక్షయమ్ |
క్షిపతః శరవర్షాణి క్షిప్రహస్తస్య మే యుధి || ౯ ||
జీమూతస్యేవ నదతః కః స్థాస్యతి మమాగ్రతః |
రాత్రియుద్ధే మయా పూర్వం వజ్రాశనిసమైః శరైః || ౧౦ ||
శాయితౌ స్థో మయా భూమౌ విసంజ్ఞౌ సపురఃసరౌ |
స్మృతిర్న తేఽస్తి వా మన్యే వ్యక్తం వా యమసాదనమ్ || ౧౧ ||
ఆశీవిషమివ క్రుద్ధం యన్మాం యోద్ధుం వ్యవస్థితః |
తచ్ఛ్రుత్వా రాక్షసేంద్రస్య గర్జితం లక్ష్మణస్తదా || ౧౨ ||
అభీతవదనః క్రుద్ధో రావణిం వాక్యమబ్రవీత్ |
ఉక్తశ్చ దుర్గమః పారః కార్యాణాం రాక్షస త్వయా || ౧౩ ||
కార్యాణాం కర్మణా పారం యో గచ్ఛతి స బుద్ధిమాన్ |
స త్వమర్థస్య హీనార్థో దురవాపస్య కేనచిత్ || ౧౪ ||
వచో వ్యాహృత్య జానీషే కృతార్థోఽస్మీతి దుర్మతే |
అంతర్ధానగతేనాజౌ యస్త్వయాఽఽచరితస్తదా || ౧౫ ||
తస్కరాచరితో మార్గో నైష వీరనిషేవితః |
యథా బాణపథం ప్రాప్య స్థితోఽహం తవ రాక్షస || ౧౬ ||
దర్శయస్వాద్య తత్తేజో వాచా త్వం కిం వికత్థసే |
ఏవముక్తో ధనుర్భీమం పరామృశ్య మహాబలః || ౧౭ ||
ససర్జ నిశితాన్బాణానింద్రజిత్సమితింజయః |
తే నిసృష్టా మహావేగాః శరాః సర్పవిషోపమాః || ౧౮ ||
సంప్రాప్య లక్ష్మణం పేతుః శ్వసంత ఇవ పన్నగాః |
శరైరతిమహావేగైర్వేగవాన్రావణాత్మజః || ౧౯ ||
సౌమిత్రిమింద్రజిద్యుద్ధే వివ్యాధ శుభలక్షణమ్ |
స శరైరతివిద్ధాంగో రుధిరేణ సముక్షితః || ౨౦ ||
శుశుభే లక్ష్మణః శ్రీమాన్విధూమ ఇవ పావకః |
ఇంద్రజిత్త్వాత్మనః కర్మ ప్రసమీక్ష్యాధిగమ్య చ || ౨౧ ||
వినద్య సుమహానాదమిదం వచనమబ్రవీత్ |
పత్రిణః శితధారాస్తే శరా మత్కార్ముకచ్యుతాః || ౨౨ ||
ఆదాస్యంతేఽద్య సౌమిత్రే జివితం జీవితాంతగాః |
అద్య గోమాయుసంఘాశ్చ శ్యేనసంఘాశ్చ లక్ష్మణ || ౨౩ ||
గృధ్రాశ్చ నిపతంతు త్వాం గతాసుం నిహతం మయా |
[* అధికపాఠః –
అద్య యాస్యతి సౌమిత్రే కర్ణగోచరతాం తవ |
తర్జనం యమదూతానాం సర్వభూతభయావహమ్ |
*]
క్షత్రబంధుః సదానార్యో రామః పరమదుర్మతిః || ౨౪ ||
భక్తం భ్రాతరమద్యైవ త్వాం ద్రక్ష్యతి మయా హతమ్ |
విశస్తకవచం భూమౌ వ్యపవిద్ధశరాసనమ్ || ౨౫ ||
హృతోత్తమాంగం సౌమిత్రే త్వామద్య నిహతం మయా |
ఇతి బ్రువాణం సంరబ్ధం పరుషం రావణాత్మజమ్ || ౨౬ ||
హేతుమద్వాక్యమత్యర్థం లక్ష్మణః ప్రత్యువాచ హ |
వాగ్బలం త్యజ దుర్బుద్ధే క్రూరకర్మాసి రాక్షస || ౨౭ ||
అథ కస్మాద్వదస్యేతత్సంపాదయ సుకర్మణా |
అకృత్వా కత్థసే కర్మ కిమర్థమిహ రాక్షస || ౨౮ ||
కురు తత్కర్మ యేనాహం శ్రద్దధ్యాం తవ కత్థనమ్ |
అనుక్త్వా పరుషం వాక్యం కించిదప్యనవక్షిపన్ || ౨౯ ||
అవికత్థన్వధిష్యామి త్వాం పశ్య పురుషాధమ |
ఇత్యుక్త్వా పంచ నారాచానాకర్ణాపూరితాన్ శితాన్ || ౩౦ ||
నిజఘాన మహావేగాఁల్లక్ష్మణో రాక్షసోరసి |
సుపత్రవాజితా బాణా జ్వలితా ఇవ పన్నగాః || ౩౧ ||
నైరృతోరస్యభాసంత సవితూ రశ్మయో యథా |
స శరైరాహతస్తేన సరోషో రావణాత్మజః || ౩౨ ||
సుప్రయుక్తైస్త్రిభిర్బాణైః ప్రతివివ్యాధ లక్ష్మణమ్ |
స బభూవ తదా భీమో నరరాక్షససింహయోః || ౩౩ ||
విమర్దస్తుములో యుద్ధే పరస్పరజయైషిణోః |
ఉభౌ హి బలసంపన్నావుభౌ విక్రమశాలినౌ || ౩౪ ||
ఉభావపి సువిక్రాంతౌ సర్వశస్త్రాస్త్రకోవిదౌ |
ఉభౌ పరమదుర్జేయావతుల్యబలతేజసౌ || ౩౫ ||
యుయుధాతే తదా వీరౌ గ్రహావివ నభోగతౌ |
బలవృత్రావివాభీతౌ యుధి తౌ దుష్ప్రధర్షణౌ || ౩౬ ||
యుయుధాతే మహాత్మానౌ తదా కేసరిణావివ |
బహూనవసృజంతౌ హి మార్గణౌఘానవస్థితౌ |
నరరాక్షససింహౌ తౌ ప్రహృష్టావభ్యయుధ్యతామ్ || ౩౭ ||
సుసంప్రహృష్టౌ నరరాక్షసోత్తమౌ
జయైషిణౌ మార్గణచాపధారిణౌ |
పరస్పరం తౌ ప్రవవర్షతుర్భృశం
శరౌఘవర్షేణ బలాహకావివ || ౩౮ ||
అభిప్రవృద్ధౌ యుధి యుద్ధకోవిదౌ
శరాసిచండౌ శితశస్త్రధారిణౌ |
అభీక్ష్ణమావివ్యధతుర్మహాబలౌ
మహాహవే శంబరవాసవావివ || ౩౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే అష్టాశీతితమః సర్గః || ౮౮ ||
యుద్ధకాండ ఏకోననవతితమః సర్గః (౮౯) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
