Read in తెలుగు / ಕನ್ನಡ / தமிழ் / देवनागरी / English (IAST)
|| ఇంద్రజిన్మాయాయుద్ధమ్ ||
తతో హతాన్రాక్షసపుంగవాంస్తాన్
దేవాంతకాదిత్రిశిరోతికాయాన్ |
రక్షోగణాస్తత్ర హతావశిష్టా-
-స్తే రావణాయ త్వరితం శశంసుః || ౧ ||
తతో హతాంస్తాన్సహసా నిశమ్య
రాజా ముమోహాశ్రుపరిప్లుతాక్షః |
పుత్రక్షయం భ్రాతృవధం చ ఘోరం
విచింత్య రాజా విపులం ప్రదధ్యౌ || ౨ ||
తతస్తు రాజానముదీక్ష్య దీనం
శోకార్ణవే సంపరిపుప్లువానమ్ |
రథర్షభో రాక్షసరాజసూను-
-స్తమింద్రజిద్వాక్యమిదం బభాషే || ౩ ||
న తాత మోహం ప్రతిగంతుమర్హసి
యత్రేంద్రజిజ్జీవతి రాక్షసేంద్ర |
నేంద్రారిబాణాభిహతో హి కశ్చిత్
ప్రాణాన్సమర్థః సమరేఽభిపాతుమ్ || ౪ ||
పశ్యాద్య రామం సహ లక్ష్మణేన
మద్బాణనిర్భిన్నవికీర్ణదేహమ్ |
గతాయుషం భూమితలే శయానం
శితైః శరైరాచితసర్వగాత్రమ్ || ౫ ||
ఇమాం ప్రతిజ్ఞాం శృణు శక్రశత్రోః
సునిశ్చితాం పౌరుషదైవయుక్తామ్ |
అద్యైవ రామం సహ లక్ష్మణేన
సంతర్పయిష్యామి శరైరమోఘైః || ౬ ||
అద్యేంద్రవైవస్వతవిష్ణుమిత్ర
సాధ్యాశ్వివైశ్వానరచంద్రసూర్యాః |
ద్రక్ష్యంతు మే విక్రమమప్రమేయం
విష్ణోరివోగ్రం బలియజ్ఞవాటే || ౭ ||
స ఏవముక్త్వా త్రిదశేంద్రశత్రు-
-రాపృచ్ఛ్య రాజానమదీనసత్త్వః |
సమారురోహానిలతుల్యవేగం
రథం ఖరశ్రేష్ఠసమాధియుక్తమ్ || ౮ ||
తమాస్థాయ మహాతేజా రథం హరిరథోపమమ్ |
జగామ సహసా తత్ర యత్ర యుద్ధమరిందమః || ౯ ||
తం ప్రస్థితం మహాత్మానమనుజగ్ముర్మహాబలాః |
సంహర్షమాణా బహవో ధనుష్ప్రవరపాణయః || ౧౦ ||
గజస్కంధగతాః కేచిత్కేచిత్ప్రవరవాజిభిః |
ప్రాసముద్గరనిస్త్రింశపరశ్వధగదాధరాః || ౧౧ ||
స శంఖనినదైః పూర్ణైర్భేరీణాం చాపి నిఃస్వనైః |
జగామ త్రిదశేంద్రారిః స్తూయమానో నిశాచరైః || ౧౨ ||
స శంఖశశివర్ణేన ఛత్రేణ రిపుసూదనః |
రరాజ ప్రతిపూర్ణేన నభశ్చాంద్రమసా యథా || ౧౩ ||
అవీజ్యత తతో వీరో హైమైర్హేమవిభూషితైః |
చారుచామరముఖ్యైశ్చ ముఖ్యః సర్వధనుష్మతామ్ || ౧౪ ||
తతస్త్వింద్రజితా లంకా సూర్యప్రతిమతేజసా |
రరాజాప్రతివీరేణ ద్యౌరివార్కేణ భాస్వతా || ౧౫ ||
స సంప్రాప్య మహాతేజా యుద్ధభూమిమరిందమః |
స్థాపయామాస రక్షాంసి రథం ప్రతి సమంతతః || ౧౬ ||
తతస్తు హుతభోక్తారం హుతభుక్సదృశప్రభః |
జుహావ రాక్షసశ్రేష్ఠో మంత్రవద్విధివత్తదా || ౧౭ ||
స హవిర్లాజసంస్కారైర్మాల్యగంధపురస్కృతైః |
జుహువే పావకం తత్ర రాక్షసేంద్రః ప్రతాపవాన్ || ౧౮ ||
శస్త్రాణి శరపత్రాణి సమిధోఽథ విభీతకాః |
లోహితాని చ వాసాంసి స్రువం కార్ష్ణాయసం తథా || ౧౯ ||
స తత్రాగ్నిం సమాస్తీర్య శరపత్రైః సతోమరైః |
ఛాగస్య కృష్ణవర్ణస్య గలం జగ్రాహ జీవతః || ౨౦ ||
సకృదేవ సమిద్ధస్య విధూమస్య మహార్చిషః |
బభూవుస్తాని లింగాని విజయం యాన్యదర్శయన్ || ౨౧ ||
ప్రదక్షిణావర్తశిఖస్తప్తకాంచనభూషణః |
హవిస్తత్ప్రతిజగ్రాహ పావకః స్వయమాస్థితః || ౨౨ ||
సోఽస్త్రమాహారయామాస బ్రాహ్మమింద్రరిపుస్తదా |
ధనుశ్చాత్మరథం చైవ సర్వం తత్రాభ్యమంత్రయత్ || ౨౩ ||
తస్మిన్నాహూయమానేఽస్త్రే హూయమానే చ పావకే |
సార్ధం గ్రహేందునక్షత్రైర్వితత్రాస నభఃస్థలమ్ || ౨౪ ||
స పావకం పావకదీప్తతేజా
హుత్వా మహేంద్రప్రతిమప్రభావః |
సచాపబాణాసిరథాశ్వసూతః
ఖేఽంతర్దధేత్మానమచింత్యరూపః || ౨౫ ||
తతో హయరథాకీర్ణం పతాకాధ్వజశోభితమ్ |
నిర్యయౌ రాక్షసబలం నర్దమానం యుయుత్సయా || ౨౬ ||
తే శరైర్బహుభిశ్చిత్రైస్తీక్ష్ణవేగైరలంకృతైః |
తోమరైరంకుశైశ్చాపి వానరాన్జఘ్నురాహవే || ౨౭ ||
రావణిస్తు తతః క్రుద్ధస్తాన్నిరీక్ష్య నిశాచరాన్ |
హృష్టా భవంతో యుధ్యంతు వానరాణాం జిఘాంసయా || ౨౮ ||
తతస్తే రాక్షసాః సర్వే నర్దంతో జయకాంక్షిణః |
అభ్యవర్షంస్తతో ఘోరాన్వానరాన్ శరవృష్టిభిః || ౨౯ ||
స తు నాలీకనారాచైర్గదాభిర్ముసలైరపి |
రక్షోభిః సంవృతః సంఖ్యే వానరాన్విచకర్త హ || ౩౦ ||
తే వధ్యమానాః సమరే వానరాః పాదపాయుధాః |
అభ్యద్రవంత సహితా రావణిం రణకర్కశమ్ || ౩౧ ||
ఇంద్రజిత్తు తతః క్రుద్ధో మహాతేజా మహాబలః |
వానరాణాం శరీరాణి వ్యధమద్రావణాత్మజః || ౩౨ ||
శరేణైకేన చ హరీన్నవ పంచ చ సప్త చ |
చిచ్ఛేద సమరే క్రుద్ధో రాక్షసాన్సంప్రహర్షయన్ || ౩౩ ||
స శరైః సూర్యసంకాశైః శాతకుంభవిభూషితైః |
వానరాన్సమరే వీరః ప్రమమాథ సుదుర్జయః || ౩౪ ||
తే భిన్నగాత్రాః సమరే వానరాః శరపీడితాః |
పేతుర్మథితసంకల్పాః సురైరివ మహాసురాః || ౩౫ ||
తం తపంతమివాదిత్యం ఘోరైర్బాణగభస్తిభిః |
అభ్యధావంత సంక్రుద్ధాః సంయుగే వానరర్షభాః || ౩౬ ||
తతస్తు వానరాః సర్వే భిన్నదేహా విచేతసః |
వ్యథితా విద్రవంతి స్మ రుధిరేణ సముక్షితాః || ౩౭ ||
రామస్యార్థే పరాక్రమ్య వానరాస్త్యక్తజీవితాః |
నర్దంతస్తేఽభివృత్తాస్తు సమరే సశిలాయుధాః || ౩౮ ||
తే ద్రుమైః పర్వతాగ్రైశ్చ శిలాభిశ్చ ప్లవంగమాః |
అభ్యవర్షంత సమరే రావణిం పర్యవస్థితాః || ౩౯ ||
తద్ద్రుమాణాం శిలానాం చ వర్షం ప్రాణహరం మహత్ |
వ్యపోహత మహాతేజా రావణిః సమితింజయః || ౪౦ ||
తతః పావకసంకాశైః శరైరాశీవిషోపమైః |
వానరాణామనీకాని బిభేద సమరే ప్రభుః || ౪౧ ||
అష్టాదశశరైస్తీక్ష్ణైః స విద్ధ్వా గంధమాదనమ్ |
వివ్యాధ నవభిశ్చైవ నలం దూరాదవస్థితమ్ || ౪౨ ||
సప్తభిస్తు మహావీర్యో మైందం మర్మవిదారణైః |
పంచభిర్విశిఖైశ్చైవ గజం వివ్యాధ సంయుగే || ౪౩ ||
జాంబవంతం తు దశభిర్నీలం త్రింశద్భిరేవ చ |
సుగ్రీవమృషభం చైవ సోఽంగదం ద్వివిదం తథా || ౪౪ ||
ఘోరైర్దత్తవరైస్తీక్ష్ణైర్నిష్ప్రాణానకరోత్తదా |
అన్యానపి తదా ముఖ్యాన్వానరాన్బహుభిః శరైః || ౪౫ ||
అర్దయామాస సంక్రుద్ధః కాలాగ్నిరివ మూర్ఛితః |
స శరైః సూర్యసంకాశైః సుముక్తైః శీఘ్రగామిభిః || ౪౬ ||
వానరాణామనీకాని నిర్మమంథ మహారణే |
ఆకులాం వానరీం సేనాం శరజాలేన మోహితామ్ || ౪౭ ||
హృష్టః స పరయా ప్రీత్యా దదర్శ క్షతజోక్షితామ్ |
పునరేవ మహాతేజా రాక్షసేంద్రాత్మజో బలీ || ౪౮ ||
సంసృజ్య బాణవర్షం చ శస్త్రవర్షం చ దారుణమ్ |
మమర్ద వానరానీకమింద్రజిత్త్వరితో బలీ || ౪౯ ||
స్వసైన్యముత్సృజ్య సమేత్య తూర్ణం
మహారణే వానరవాహినీషు |
అదృశ్యమానః శరజాలముగ్రం
వవర్ష నీలాంబుధరో యథాఽంబు || ౫౦ ||
తే శక్రజిద్బాణవిశీర్ణదేహా
మాయాహతా విస్వరమున్నదంతః |
రణే నిపేతుర్హరయోఽద్రికల్పా
యథేంద్రవజ్రాభిహతా నగేంద్రాః || ౫౧ ||
తే కేవలం సందదృశుః శితాగ్రాన్
బాణాన్రణే వానరవాహినీషు |
మాయానిగూఢం తు సురేంద్రశత్రుం
న చావృతం రాక్షసమభ్యపశ్యన్ || ౫౨ ||
తతః స రక్షోధిపతిర్మహాత్మా
సర్వే దిశో బాణగణైః శితాగ్రైః |
ప్రచ్ఛాదయామాస రవిప్రకాశైః
విషాదయామాస చ వానరేంద్రాన్ || ౫౩ ||
స శూలనిస్త్రింశపరశ్వధాని
వ్యావిధ్య దీప్తానలసన్నిభాని |
సవిస్ఫులింగోజ్జ్వలపావకాని
వవర్ష తీవ్రం ప్లవగేంద్రసైన్యే || ౫౪ ||
తతో జ్వలనసంకాశైః శరైర్వానరయూథపాః |
తాడితాః శక్రజిద్బాణైః ప్రఫుల్లా ఇవ కింశుకాః || ౫౫ ||
తేఽన్యోన్యమభిసర్పంతో నినదంతశ్చ విస్వరమ్ |
రాక్షసేంద్రాస్త్రనిర్భిన్నా నిపేతుర్వానరర్షభాః || ౫౬ ||
ఉదీక్షమాణా గగనం కేచిన్నేత్రేషు తాడితాః |
శరైర్వివిశురన్యోన్యం పేతుశ్చ జగతీతలే || ౫౭ ||
హనుమంతం చ సుగ్రీవమంగదం గంధమాదనమ్ |
జాంబవంతం సుషేణం చ వేగదర్శినమేవ చ || ౫౮ ||
మైందం చ ద్వివిదం నీలం గవాక్షం గజగోముఖౌ |
కేసరిం హరిలోమానం విద్యుద్దంష్ట్రం చ వానరమ్ || ౫౯ ||
సూర్యాననం జ్యోతిముఖం తథా దధిముఖం హరిమ్ |
పావకాక్షం నలం చైవ కుముదం చైవ వానరమ్ || ౬౦ ||
ప్రాసైః శూలైః శితైర్బాణైరింద్రజిన్మంత్రసంహితైః |
వివ్యాధ హరిశార్దూలాన్సర్వాంస్తాన్రాక్షసోత్తమః || ౬౧ ||
స వై గదాభిర్హరియూథముఖ్యాన్
నిర్భిద్య బాణైస్తపనీయపుంఖైః |
వవర్ష రామం శరవృష్టిజాలైః
సలక్ష్మణం భాస్కరరశ్మికల్పైః || ౬౨ ||
స బాణవర్షైరభివర్ష్యమాణో
ధారానిపాతానివ తానచింత్య |
సమీక్షమాణః పరమాద్భుతశ్రీ
రామస్తదా లక్ష్మణమిత్యువాచ || ౬౩ ||
అసౌ పునర్లక్ష్మణ రాక్షసేంద్రో
బ్రహ్మాస్త్రమాశ్రిత్య సురేంద్రశత్రుః |
నిపాతయిత్వా హరిసైన్యముగ్ర-
-మస్మాన్ శరైరర్దయతి ప్రసక్తః || ౬౪ ||
స్వయంభువా దత్తవరో మహాత్మా
ఖమాస్థితోఽంతర్హితభీమకాయః |
కథం ను శక్యో యుధి నష్టదేహో
నిహంతుమద్యేంద్రజిదుద్యతాస్త్రః || ౬౫ ||
మన్యే స్వయంభూర్భగవానచింత్యో
యస్యైతదస్త్రం ప్రభవశ్చ యోఽస్య |
బాణావపాతాంస్త్వమిహాద్య ధీమన్
మయా సహావ్యగ్రమనాః సహస్వ || ౬౬ ||
ప్రచ్ఛాదయత్యేష హి రాక్షసేంద్రః
సర్వా దిశః సాయకవృష్టిజాలైః |
ఏతచ్చ సర్వం పతితాగ్ర్యశూరం
న భ్రాజతే వానరరాజసైన్యమ్ || ౬౭ ||
ఆవాం తు దృష్ట్వా పతితౌ విసంజ్ఞౌ
నివృత్తయుద్ధౌ గతరోషహర్షౌ |
ధ్రువం ప్రవేక్ష్యత్యమరారివాస-
-మసౌ సమాదాయ రణాగ్రలక్ష్మీమ్ || ౬౮ ||
తతస్తు తావింద్రజిదస్త్రజాలైః
బభూవతుస్తత్ర తథా విశస్తౌ |
స చాపి తౌ తత్ర విదర్శయిత్వా
ననాద హర్షాద్యుధి రాక్షసేంద్రః || ౬౯ ||
స తత్తదా వానరసైన్యమేవం
రామం చ సంఖ్యే సహ లక్ష్మణేన |
విషాదయిత్వా సహసా వివేశ
పురీం దశగ్రీవభుజాభిగుప్తామ్ || ౭౦ ||
[* అధికపాఠః –
సంస్తూయమానః స తు యాతుధానైః |
పిత్రే చ సర్వం హృషితోఽభ్యువాచ ||
*]
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే త్రిసప్తతితమః సర్గః || ౭౩ ||
యుద్ధకాండ చతుఃసప్తతితమః సర్గః (౭౪) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
