Read in తెలుగు / ಕನ್ನಡ / தமிழ் / देवनागरी / English (IAST)
|| రావణమన్యుశల్యావిష్కారః ||
అతికాయం హతం శ్రుత్వా లక్ష్మణేన మహౌజసా |
ఉద్వేగమగమద్రాజా వచనం చేదమబ్రవీత్ || ౧ ||
ధూమ్రాక్షః పరమామర్షీ ధన్వీ శస్త్రభృతాం వరః |
అకంపనః ప్రహస్తశ్చ కుంభకర్ణస్తథైవ చ || ౨ ||
ఏతే మహాబలా వీరా రాక్షసా యుద్ధకాంక్షిణః |
జేతారః పరసైన్యానాం పరైర్నిత్యాపరాజితాః || ౩ ||
నిహతాస్తే మహావీర్యా రామేణాక్లిష్టకర్మణా |
రాక్షసాః సుమహాకాయా నానాశస్త్రవిశారదాః || ౪ ||
అన్యే చ బహవః శూరా మహాత్మానో నిపాతితాః |
ప్రఖ్యాతబలవీర్యేణ పుత్రేణేంద్రజితా మమ || ౫ ||
యౌ హి తౌ భ్రాతరౌ వీరౌ బద్ధౌ దత్తవరైః శరైః |
యన్న శక్యం సురైః సర్వైరసురైర్వా మహాబలైః || ౬ ||
మోక్తుం తద్బంధనం ఘోరం యక్షగంధర్వకిన్నరైః |
తన్న జానే ప్రభావైర్వా మాయయా మోహనేన వా || ౭ ||
శరబంధాద్విముక్తౌ తౌ భ్రాతరౌ రామలక్ష్మణౌ |
యే యోధా నిర్గతాః శూరా రాక్షసా మమ శాసనాత్ || ౮ ||
తే సర్వే నిహతా యుద్ధే వానరైః సుమహాబలైః |
తం న పశ్యామ్యహం యుద్ధే యోఽద్య రామం సలక్ష్మణమ్ || ౯ ||
శాసయేత్సబలం వీరం ససుగ్రీవవిభీషణమ్ |
అహో ను బలవాన్రామో మహదస్త్రబలం చ వై || ౧౦ ||
యస్య విక్రమమాసాద్య రాక్షసా నిధనం గతాః |
తం మన్యే రాఘవం వీరం నారాయణమనామయమ్ || ౧౧ ||
తద్భయాద్ధి పురీ లంకా పిహితద్వారతోరణా |
అప్రమత్తైశ్చ సర్వత్ర గుప్తై రక్ష్యా పురీ త్వియమ్ || ౧౨ ||
అశోకవనికాయాం చ యత్ర సీతాఽభిరక్ష్యతే |
నిష్క్రామో వా ప్రవేశో వా జ్ఞాతవ్యః సర్వథైవ నః || ౧౩ ||
యత్ర యత్ర భవేద్గుల్మస్తత్ర తత్ర పునః పునః |
సర్వతశ్చాపి తిష్ఠధ్వం స్వైః స్వైః పరివృతా బలైః || ౧౪ ||
ద్రష్టవ్యం చ పదం తేషాం వానరాణాం నిశాచరాః |
ప్రదోషే వాఽర్ధరాత్రే వా ప్రత్యూషే వాఽపి సర్వతః || ౧౫ ||
నావజ్ఞా తత్ర కర్తవ్యా వానరేషు కదాచన |
ద్విషతాం బలముద్యుక్తమాపతత్కిం స్థితం సదా || ౧౬ ||
తతస్తే రాక్షసాః సర్వే శ్రుత్వా లంకాధిపస్య తత్ |
వచనం సర్వమాతిష్ఠన్యథావత్తు మహాబలాః || ౧౭ ||
స తాన్సర్వాన్సమాదిశ్య రావణో రాక్షసాధిపః |
మన్యుశల్యం వహన్దీనః ప్రవివేశ స్వమాలయమ్ || ౧౮ ||
తతః స సందీపితకోపవహ్నిః
నిశాచరాణామధిపో మహాబలః |
తదేవ పుత్రవ్యసనం విచింతయన్
ముహుర్ముహుశ్చైవ తదా వ్యనిశ్వసత్ || ౧౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ద్విసప్తతితమః సర్గః || ౭౨ ||
యుద్ధకాండ త్రిసప్తతితమః సర్గః (౭౩) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
