Read in తెలుగు / ಕನ್ನಡ / தமிழ் / देवनागरी / English (IAST)
|| వానరపర్యవస్థాపనమ్ ||
స లంఘయిత్వా ప్రాకారం గిరికూటోపమో మహాన్ |
నిర్యయౌ నగరాత్తూర్ణం కుంభకర్ణో మహాబలః || ౧ ||
స ననాద మహానాదం సముద్రమభినాదయన్ |
జనయన్నివ నిర్ఘాతాన్విధమన్నివ పర్వతాన్ || ౨ ||
తమవధ్యం మఘవతా యమేన వరుణేన వా |
ప్రేక్ష్య భీమాక్షమాయాంతం వానరా విప్రదుద్రువుః || ౩ ||
తాంస్తు విప్రద్రుతాన్దృష్ట్వా వాలిపుత్రోఽంగదోఽబ్రవీత్ |
నలం నీలం గవాక్షం చ కుముదం చ మహాబలమ్ || ౪ ||
ఆత్మానమత్ర విస్మృత్య వీర్యాణ్యభిజనాని చ |
క్వ గచ్ఛత భయత్రస్తాః ప్రాకృతా హరయో యథా || ౫ ||
సాధు సౌమ్యా నివర్తధ్వం కిం ప్రాణాన్పరిరక్షథ |
నాలం యుద్ధాయ వై రక్షో మహతీయం విభీషికా || ౬ ||
మహతీముత్థితామేనాం రాక్షసానాం విభీషికామ్ |
విక్రమాద్విధమిష్యామో నివర్తధ్వం ప్లవంగమాః || ౭ ||
కృచ్ఛ్రేణ తు సమాశ్వస్య సంగమ్య చ తతస్తతః |
వృక్షాద్రిహస్తా హరయః సంప్రతస్థూ రణాజిరమ్ || ౮ ||
తే నివృత్య తు సంక్రుద్ధాః కుంభకర్ణం వనౌకసః |
నిజఘ్నుః పరమక్రుద్ధాః సమదా ఇవ కుంజరాః || ౯ ||
ప్రాంశుభిర్గిరిశృంగైశ్చ శిలాభిశ్చ మహాబలః |
పాదపైః పుష్పితాగ్రైశ్చ హన్యమానో న కంపతే || ౧౦ ||
తస్య గాత్రేషు పతితా భిద్యంతే శతశః శిలాః |
పాదపాః పుష్పితాగ్రాశ్చ భగ్నాః పేతుర్మహీతలే || ౧౧ ||
సోఽపి సైన్యాని సంక్రుద్ధో వానరాణాం మహౌజసామ్ |
మమంథ పరమాయత్తో వనాన్యగ్నిరివోత్థితః || ౧౨ ||
లోహితార్ద్రాస్తు బహవః శేరతే వానరర్షభాః |
నిరస్తాః పతితా భూమౌ తామ్రపుష్పా ఇవ ద్రుమాః || ౧౩ ||
లంఘయంతః ప్రధావంతో వానరా నావలోకయన్ |
కేచిత్సముద్రే పతితాః కేచిద్గగనమాశ్రితాః || ౧౪ ||
వధ్యమానాస్తు తే వీరా రాక్షసేన బలీయసా |
సాగరం యేన తే తీర్ణాః పథా తేన ప్రదుద్రువుః || ౧౫ ||
తే స్థలాని తథా నిమ్నం విషణ్ణవదనా భయాత్ |
ఋక్షా వృక్షాన్సమారూఢాః కేచిత్పర్వతమాశ్రితాః || ౧౬ ||
మమజ్జురర్ణవే కేచిద్గుహాః కేచిత్సమాశ్రితాః |
నిషేదుః ప్లవగాః కేచిత్కేచిన్నైవావతస్థిరే || ౧౭ ||
కేచిద్భూమౌ నిపతితాః కేచిత్సుప్తా మృతా ఇవ |
తాన్సమీక్ష్యాంగదో భగ్నాన్వానరానిదమబ్రవీత్ || ౧౮ ||
అవతిష్ఠత యుధ్యామో నివర్తధ్వం ప్లవంగమాః |
భగ్నానాం వో న పశ్యామి పరిగమ్య మహీమిమామ్ || ౧౯ ||
స్థానం సర్వే నివర్తధ్వం కిం ప్రాణాన్పరిరక్షథ |
నిరాయుధానాం ద్రవతామసంగగతిపౌరుషాః || ౨౦ ||
దారా హ్యపహసిష్యంతి స వై ఘాతస్తు జీవినామ్ |
కులేషు జాతాః సర్వే స్మ విస్తీర్ణేషు మహత్సు చ || ౨౧ ||
క్వ గచ్ఛథ భయత్రస్తా హరయః ప్రాకృతా యథా |
అనార్యాః ఖలు యద్భీతాస్త్యక్త్వా వీర్యం ప్రధావత || ౨౨ ||
వికత్థనాని వో యాని తదా వై జనసంసది |
తాని వః క్వ ను యాతాని సోదగ్రాణి మహాంతి చ || ౨౩ ||
భీరుప్రవాదాః శ్రూయంతే యస్తు జీవితి ధిక్కృతః |
మార్గః సత్పురుషైర్జుష్టః సేవ్యతాం త్యజ్యతాం భయమ్ || ౨౪ ||
శయామహేఽథ నిహతాః పృథివ్యామల్పజీవితాః |
దుష్ప్రాపం బ్రహ్మలోకం వా ప్రాప్నుమో యుధి సూదితాః || ౨౫ ||
సంప్రాప్నుయామః కీర్తిం వా నిహత్వా శత్రుమాహవే |
జీవితం వీరలోకస్య మోక్ష్యామో వసు వానరాః || ౨౬ ||
న కుంభకర్ణః కాకుత్స్థం దృష్ట్వా జీవన్గమిష్యతి |
దీప్యమానమివాసాద్య పతంగో జ్వలనం యథా || ౨౭ ||
పలాయనేన చోద్దిష్టాః ప్రాణాన్రక్షామహే వయమ్ |
ఏకేన బహవో భగ్నా యశో నాశం గమిష్యతి || ౨౮ ||
ఏవం బ్రువాణం తం శూరమంగదం కనకాంగదమ్ |
ద్రవమాణాస్తతో వాక్యమూచుః శూరవిగర్హితమ్ || ౨౯ ||
కృతం నః కదనం ఘోరం కుంభకర్ణేన రక్షసా |
న స్థానకాలో గచ్ఛామో దయితం జీవితం హి నః || ౩౦ ||
ఏతావదుక్త్వా వచనం సర్వే తే భేజిరే దిశః |
భీమం భీమాక్షమాయాంతం దృష్ట్వా వానరయూథపాః || ౩౧ ||
ద్రవమాణాస్తు తే వీరా అంగదేన వలీముఖాః |
సాంత్వైశ్చైవానుమానైశ్చ తతః సర్వే నివర్తితాః || ౩౨ ||
ప్రహర్షముపనీతాశ్చ వాలిపుత్రేణ ధీమతా |
ఆజ్ఞాప్రతీక్షాస్తస్థుశ్చ సర్వే వానరయూథపాః || ౩౩ ||
ఋషభశరభమైందధూమ్రనీలాః
కుముదసుషేణగవాక్షరంభతారాః |
ద్వివిదపనసవాయుపుత్రముఖ్యాః
త్వరితతరాభిముఖం రణం ప్రయాతాః || ౩౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే షట్షష్టితమః సర్గః || ౬౬ ||
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
