Read in తెలుగు / ಕನ್ನಡ / தமிழ் / देवनागरी / English (IAST)
|| రావణాభ్యర్థనా ||
స తు రాక్షసశార్దూలో నిద్రామదసమాకులః |
రాజమార్గం శ్రియా జుష్టం యయౌ విపులవిక్రమః || ౧ ||
రాక్షసానాం సహస్రైశ్చ వృతః పరమదుర్జయః |
గృహేభ్యః పుష్పవర్షేణ కీర్యమాణస్తదా యయౌ || ౨ ||
స హేమజాలవితతం భానుభాస్వరదర్శనమ్ |
దదర్శ విపులం రమ్యం రాక్షసేంద్రనివేశనమ్ || ౩ ||
స తత్తదా సూర్య ఇవాభ్రజాలం
ప్రవిశ్య రక్షోఽధిపతేర్నివేశమ్ |
దదర్శ దూరేఽగ్రజమాసనస్థం
స్వయంభువం శక్ర ఇవాసనస్థమ్ || ౪ ||
భ్రాతుః స భవనం గచ్ఛన్రక్షోగణసమన్వితమ్ |
కుంభకర్ణః పదన్యాసైరకంపయత మేదినీమ్ || ౫ ||
సోఽభిగమ్య గృహం భ్రాతుః కక్ష్యామభివిగాహ్య చ |
దదర్శోద్విగ్నమాసీనం విమానే పుష్పకే గురుమ్ || ౬ ||
అథ దృష్ట్వా దశగ్రీవః కుంభకర్ణముపస్థితమ్ |
తూర్ణముత్థాయ సంహృష్టః సన్నికర్షముపానయత్ || ౭ ||
అథాసీనస్య పర్యంకే కుంభకర్ణో మహాబలః |
భ్రాతుర్వవందే చరణౌ కిం కృత్యమితి చాబ్రవీత్ || ౮ ||
ఉత్పత్య చైనం ముదితో రావణః పరిషస్వజే |
స భ్రాత్రా సంపరిష్వక్తో యథావచ్ఛాభినందితః || ౯ ||
కుంభకర్ణః శుభం దివ్యం ప్రతిపేదే వరాసనమ్ |
స తదాసనమాశ్రిత్య కుంభకర్ణో మహాబలః || ౧౦ ||
సంరక్తనయనః కోపాద్రావణం వాక్యమబ్రవీత్ |
కిమర్థమహమాదృత్య త్వయా రాజన్విబోధితః || ౧౧ ||
శంస కస్మాద్భయం తేఽస్తి కోఽద్య ప్రేతో భవిష్యతి |
భ్రాతరం రావణః కుద్ధం కుంభకర్ణమవస్థితమ్ || ౧౨ ||
ఈషత్తు పరివృత్తాభ్యాం నేత్రాభ్యాం వాక్యమబ్రవీత్ |
అద్య తే సుమహాన్కాలః శయానస్య మహాబల || ౧౩ ||
సుఖితస్త్వం న జానీషే మమ రామకృతం భయమ్ |
ఏష దాశరథీ రామః సుగ్రీవసహితో బలీ || ౧౪ ||
సముద్రం సబలస్తీర్త్వా మూలం నః పరికృంతతి |
హంత పశ్యస్వ లంకాయాం వనాన్యుపవనాని చ || ౧౫ ||
సేతునా సుఖమాగమ్య వానరైకార్ణవీకృతమ్ |
యే రక్షసాం ముఖ్యతమా హతాస్తే వానరైర్యుధి || ౧౬ ||
వానరాణాం క్షయం యుద్ధే న పశ్యామి కదాచన |
న చాపి వానరా యుద్ధే జితపూర్వాః కదాచన || ౧౭ ||
తదేతద్భయముత్పన్నం త్రాయస్వేమాం మహాబల |
నాశయ త్వమిమానద్య తదర్థం బోధితో భవాన్ || ౧౮ ||
సర్వక్షపితకోశం చ స త్వమభ్యవపద్య మామ్ |
త్రాయస్వేమాం పురీం లంకాం బాలవృద్ధావశేషితామ్ || ౧౯ ||
భ్రాతురర్థే మహాబాహో కురు కర్మ సుదుష్కరమ్ |
మయైవం నోక్తపూర్వో హి కచ్చిద్భ్రాతః పరంతప || ౨౦ ||
త్వయ్యస్తి తు మమ స్నేహః పరా సంభావనా చ మే |
దైవాసురేషు యుద్ధేషు బహుశో రాక్షసర్షభ || ౨౧ ||
త్వయా దేవాః ప్రతివ్యూహ్య నిర్జితాశ్చాసురా యుధి |
తదేతత్సర్వమాతిష్ఠ వీర్యం భీమపరాక్రమ |
న హి తే సర్వభూతేషు దృశ్యతే సదృశో బలీ || ౨౨ ||
కురుష్వ మే ప్రియహితమేతదుత్తమం
యథాప్రియం ప్రియరణ బాంధవప్రియ |
స్వతేజసా విధమ సపత్నవాహినీం
శరద్ఘనం పవన ఇవోద్యతో మహాన్ || ౨౩ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ద్విషష్టితమః సర్గః || ౬౨ ||
యుద్ధకాండ త్రిషష్టితమః సర్గః (౬౩) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
