Read in తెలుగు / ಕನ್ನಡ / தமிழ் / देवनागरी / English (IAST)
|| ప్రహస్తయుద్ధమ్ ||
అకంపనవధం శ్రుత్వా క్రుద్ధో వై రాక్షసేశ్వరః |
కించిద్దీనముఖశ్చాపి సచివాంస్తానుదైక్షతః || ౧ ||
స తు ధ్యాత్వా ముహూర్తం తు మంత్రిభిః సంవిచార్య చ |
తతస్తు రావణః పూర్వదివసే రాక్షసాధిపః || ౨ ||
పురీం పరియయౌ లంకాం సర్వాన్గుల్మానవేక్షితుమ్ |
తాం రాక్షసగణైర్గుప్తాం గుల్మైర్బహుభిరావృతామ్ || ౩ ||
దదర్శ నగరీం లంకాం పతాకాధ్వజమాలినీమ్ |
రుద్ధాం తు నగరీం దృష్ట్వా రావణో రాక్షసేశ్వరః || ౪ ||
ఉవాచామర్షతః కాలే ప్రహస్తం యుద్ధకోవిదమ్ |
పురస్యోపనివిష్టస్య సహసా పీడితస్య వా || ౫ ||
నాన్యం యుద్ధాత్ప్రపశ్యామి మోక్షం యుద్ధవిశారద |
అహం వా కుంభకర్ణో వా త్వం వా సేనాపతిర్మమ || ౬ ||
ఇంద్రజిద్వా నికుంభో వా వహేయుర్భారమీదృశమ్ |
స త్వం బలమతః శీఘ్రమాదాయ పరిగృహ్య చ || ౭ ||
విజయాయాభినిర్యాహి యత్ర సర్వే వనౌకసః |
నిర్యాణాదేవ తే నూనం చపలా హరివాహినీ || ౮ ||
నర్దతాం రాక్షసేంద్రాణాం శ్రుత్వా నాదం ద్రవిష్యతి |
చపలా హ్యవినీతాశ్చ చలచిత్తాశ్చ వానరాః || ౯ ||
న సహిష్యంతి తే నాదం సింహనాదమివ ద్విపాః |
విద్రుతే చ బలే తస్మిన్రామః సౌమిత్రిణా సహ || ౧౦ ||
అవశస్తే నిరాలంబః ప్రహస్త వశమేష్యతి |
ఆపత్సంశయితా శ్రేయో న తు నిఃసంశయీకృతా || ౧౧ ||
ప్రతిలోమానులోమం వా యద్వా నో మన్యసే హితమ్ |
రావణేనైవముక్తస్తు ప్రహస్తో వాహినీపతిః || ౧౨ ||
రాక్షసేంద్రమువాచేదమసురేంద్రమివోశనా |
రాజన్మంత్రితపూర్వం నః కుశలైః సహ మంత్రిభిః || ౧౩ ||
వివాదశ్చాపి నో వృత్తః సమవేక్ష్య పరస్పరమ్ |
ప్రదానేన తు సీతాయాః శ్రేయో వ్యవసితం మయా || ౧౪ ||
అప్రదానే పునర్యుద్ధం దృష్టమేతత్తథైవ నః |
సోఽహం దానైశ్చ మానైశ్చ సతతం పూజితస్త్వయా || ౧౫ ||
సాంత్వైశ్చ వివిధైః కాలే కిం న కుర్యాం ప్రియం తవ |
న హి మే జీవితం రక్ష్యం పుత్రదారధనాని వా || ౧౬ ||
త్వం పశ్య మాం జుహూషంతం త్వదర్థం జీవితం యుధి |
ఏవముక్త్వా తు భర్తారం రావణం వాహినీపతిః || ౧౭ ||
ఉవాచేదం బలాధ్యక్షాన్ప్రహస్తః పురతః స్థితాన్ |
సమానయత మే శీఘ్రం రాక్షసానాం మహద్బలమ్ || ౧౮ ||
మద్బాణాశనివేగేన హతానాం చ రణాజిరే |
అద్య తృప్యంతు మాంసాదాః పక్షిణః కాననౌకసామ్ || ౧౯ ||
ఇత్యుక్తాస్తే ప్రహస్తేన బలాధ్యక్షాః కృతత్వరాః |
బలముద్యోజయామాసుస్తస్మిన్రాక్షసమందిరే || ౨౦ ||
సా బభూవ ముహూర్తేన తిగ్మనానావిధాయుధైః |
లంకా రాక్షసవీరైస్తైర్గజైరివ సమాకులా || ౨౧ ||
హుతాశనం తర్పయతాం బ్రాహ్మణాంశ్చ నమస్యతామ్ |
ఆజ్యగంధప్రతివహః సురభిర్మారుతో వవౌ || ౨౨ ||
స్రజశ్చ వివిధాకారా జగృహుస్త్వభిమంత్రితాః |
సంగ్రామసజ్జాః సంహృష్టా ధారయన్రాక్షసాస్తదా || ౨౩ ||
సధనుష్కాః కవచినో వేగాదాప్లుత్య రాక్షసాః |
రావణం ప్రేక్ష్య రాజానం ప్రహస్తం పర్యవారయన్ || ౨౪ ||
అథామంత్ర్య చ రాజానం భేరీమాహత్య భైరవామ్ |
ఆరురోహ రథం దివ్యం ప్రహస్తః సజ్జకల్పితమ్ || ౨౫ ||
హయైర్మహాజవైర్యుక్తం సమ్యక్సూతసుసంయతమ్ |
మహాజలదనిర్ఘోషం సాక్షాచ్చంద్రార్కభాస్వరమ్ || ౨౬ ||
ఉరగధ్వజదుర్ధర్షం సువరూథం స్వవస్కరమ్ |
సువర్ణజాలసంయుక్తం ప్రహసంతమివ శ్రియా || ౨౭ ||
తతస్తం రథమాస్థాయ రావణార్పితశాసనః |
లంకాయా నిర్యయౌ తూర్ణం బలేన మహతాఽఽవృతః || ౨౮ ||
తతో దుందుభినిర్ఘోషః పర్జన్యనినదోపమః |
వాదిత్రాణాం చ నినదః పూరయన్నివ సాగరమ్ || ౨౯ ||
శుశ్రువే శంఖశబ్దశ్చ ప్రయాతే వాహినీపతౌ |
నినదంతః స్వరాన్ఘోరాన్రాక్షసా జగ్మురగ్రతః || ౩౦ ||
భీమరూపా మహాకాయాః ప్రహస్తస్య పురఃసరాః |
నరాంతకః కుంభహనుర్మహానాదః సమున్నతః || ౩౧ ||
ప్రహస్తసచివా హ్యేతే నిర్యయుః పరివార్య తమ్ |
వ్యూఢేనైవ సుఘోరేణ పూర్వద్వారాత్స నిర్యయౌ || ౩౨ ||
గజయూథనికాశేన బలేన మహతా వృతః |
సాగరప్రతిమౌఘేన వృతస్తేన బలేన సః || ౩౩ ||
ప్రహస్తో నిర్యయౌ తూర్ణం కాలాంతకయమోపమః |
తస్య నిర్యాణఘోషేణ రాక్షసానాం చ నర్దతామ్ || ౩౪ ||
లంకాయాం సర్వభూతాని వినేదుర్వికృతైః స్వరైః |
వ్యభ్రమాకాశమావిశ్య మాంసశోణితభోజనాః || ౩౫ ||
మండలాన్యపసవ్యాని ఖగాశ్చక్రూ రథం ప్రతి |
వమంత్యః పావకజ్వాలాః శివా ఘోరం వవాశిరే || ౩౬ ||
అంతరిక్షాత్పపాతోల్కా వాయుశ్చ పరుషో వవౌ |
అన్యోన్యమభిసంరబ్ధా గ్రహాశ్చ న చకాశిరే || ౩౭ ||
మేఘాశ్చ ఖరనిర్ఘోషా రథస్యోపరి రక్షసః |
వవృషూ రుధిరం చాస్య సిషిచుశ్చ పురఃసరాన్ || ౩౮ ||
కేతుమూర్ధని గృధ్రోఽస్య నిలీనో దక్షిణాముఖః |
తుదన్నుభయతః పార్శ్వం సమగ్రామహరత్ప్రభామ్ || ౩౯ ||
సారథేర్బహుశశ్చాస్య సంగ్రామమవగాహతః |
ప్రతోదో న్యపతద్ధస్తాత్సూతస్య హయసాదినః || ౪౦ ||
నిర్యాణశ్రీశ్చ యాస్యాసీద్భాస్వరా వసుదుర్లభా |
సా ననాశ ముహూర్తేన సమే చ స్ఖలితా హయాః || ౪౧ ||
ప్రహస్తం త్వభినిర్యాంతం ప్రఖ్యాతబలపౌరుషమ్ |
యుధి నానాప్రహరణా కపిసేనాఽభ్యవర్తత || ౪౨ ||
అథ ఘోషః సుతుములో హరీణాం సమజాయత |
వృక్షానారుజతాం చైవ గుర్వీరాగృహ్ణతాం శిలాః || ౪౩ ||
నదతాం రాక్షసానాం చ వానరాణాం చ గర్జతామ్ |
ఉభే ప్రముదితే సైన్యే రక్షోగణవనౌకసామ్ || ౪౪ ||
వేగితానాం సమర్థానామన్యోన్యవధకాంక్షిణామ్ |
పరస్పరం చాహ్వయతాం నినాదః శ్రూయతే మహాన్ || ౪౫ ||
తతః ప్రహస్తః కపిరాజవాహినీం
అభిప్రతస్థే విజయాయ దుర్మతిః |
వివృద్ధవేగాం చ వివేశ తాం చమూం
యథా ముమూర్షుః శలభో విభావసుమ్ || ౪౬ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే సప్తపంచాశః సర్గః || ౫౭ ||
యుద్ధకాండ అష్టపంచాశః సర్గః (౫౮) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
