Read in తెలుగు / ಕನ್ನಡ / தமிழ் / देवनागरी / English (IAST)
|| ధూమ్రాక్షవధః ||
ధూమ్రాక్షం ప్రేక్ష్య నిర్యాంతం రాక్షసం భీమవిక్రమమ్ |
వినేదుర్వానరాః సర్వే ప్రహృష్టా యుద్ధకాంక్షిణః || ౧ ||
తేషాం సుతుములం యుద్ధం సంజజ్ఞే హరిరక్షసామ్ |
అన్యోన్యం పాదపైర్ఘోరం నిఘ్నతాం శూలముద్గరైః || ౨ ||
ఘోరైశ్చ పరిఘైశ్చిత్రైస్త్రిశూలైశ్చాపి సంహతైః |
రాక్షసైర్వానరా ఘోరైర్వినికృత్తాః సమంతతః || ౩ ||
వానరై రాక్షసాశ్చాపి ద్రుమైర్భూమౌ సమీకృతాః |
రాక్షసాశ్చాపి సంక్రుద్ధా వానరాన్నిశితైః శరైః || ౪ ||
వివ్యధుర్ఘోరసంకాశైః కంకపత్రైరజిహ్మగైః |
తే గదాభిశ్చ భీమాభిః పట్టిశైః కూటముద్గరైః || ౫ ||
విదార్యమాణా రక్షోభిర్వానరాస్తే మహాబలాః |
అమర్షాజ్జనితోద్ధర్షాశ్చక్రుః కర్మాణ్యభీతవత్ || ౬ ||
శరనిర్భిన్నగాత్రాస్తే శూలనిర్భిన్నదేహినః |
జగృహుస్తే ద్రుమాంస్తత్ర శిలాశ్చ హరియూథపాః || ౭ ||
తే భీమవేగా హరయో నర్దమానాస్తతస్తతః |
మమంథూ రాక్షసాన్భీమాన్నామాని చ బభాషిరే || ౮ ||
తద్బభూవాద్భుతం ఘోరం యుద్ధం వానరరక్షసామ్ |
శిలాభిర్వివిధాభిశ్చ బహుభిశ్చైవ పాదపైః || ౯ ||
రాక్షసా మథితాః కేచిద్వానరైర్జితకాశిభిః |
వవమూ రుధిరం కేచిన్ముఖై రుధిరభోజనాః || ౧౦ ||
పార్శ్వేషు దారితాః కేచిత్కేచిద్రాశీకృతా ద్రుమైః |
శిలాభిశ్చూర్ణితాః కేచిత్కేచిద్దంతైర్విదారితాః || ౧౧ ||
ధ్వజైర్విమథితైర్భగ్నైః స్వరైశ్చ వినిపాతితైః | [ఖరైశ్చ]
రథైర్విధ్వంసితైశ్చాపి పతితై రజనీచరైః || ౧౨ ||
గజేంద్రైః పర్వతాకారైః పర్వతాగ్రైర్వనౌకసామ్ |
మథితైర్వాజిభిః కీర్ణం సారోహైర్వసుధాతలమ్ || ౧౩ ||
వానరైర్భీమవిక్రాంతైరాప్లుత్యాప్లుత్య వేగితైః |
రాక్షసాః కరజైస్తీక్ష్ణైర్ముఖేషు వినికర్తితాః || ౧౪ ||
వివర్ణవదనా భూయో విప్రకీర్ణశిరోరుహాః |
మూఢాః శోణితగంధేన నిపేతుర్ధరణీతలే || ౧౫ ||
అన్యే పరమసంక్రుద్ధా రాక్షసా భీమనిఃస్వనాః |
తలైరేవాభిధావంతి వజ్రస్పర్శసమైర్హరీన్ || ౧౬ ||
వానరైరాపతంతస్తే వేగితా వేగవత్తరైః |
ముష్టిభిశ్చరణైర్దంతైః పాదపైశ్చావపోథితాః || ౧౭ ||
వానరైర్హన్యమానాస్తే రాక్షసా విప్రదుద్రువుః |
సైన్యం తు విద్రుతం దృష్ట్వా ధూమ్రాక్షో రాక్షసర్షభః || ౧౮ ||
క్రోధేన కదనం చక్రే వానరాణాం యుయుత్సతామ్ |
ప్రాసైః ప్రమథితాః కేచిద్వానరాః శోణితస్రవాః || ౧౯ ||
ముద్గరైరాహతాః కేచిత్పతితా ధరణీతలే |
పరిఘైర్మథితాః కేచిద్భిందిపాలైర్విదారితాః || ౨౦ ||
పట్టిశైరాహతాః కేచిద్విహ్వలంతో గతాసవః |
కేచిద్వినిహతాః శూలై రుధిరార్ద్రా వనౌకసః || ౨౧ ||
కేచిద్విద్రావితా నష్టాః సంక్రుద్ధై రాక్షసైర్యుధి | [సబలై]
విభిన్నహృదయాః కేచిదేకపార్శ్వేన దారితాః || ౨౨ ||
విదారితాస్త్రిశూలైశ్చ కేచిదాంత్రైర్వినిఃసృతాః |
తత్సుభీమం మహాయుద్ధం హరిరాక్షససంకులమ్ || ౨౩ ||
ప్రబభౌ శబ్దబహులం శిలాపాదపసంకులమ్ |
ధనుర్జ్యాతంత్రిమధురం హిక్కాతాలసమన్వితమ్ || ౨౪ ||
మందస్తనితసంగీతం యుద్ధగాంధర్వమాబభౌ |
ధూమ్రాక్షస్తు ధనుష్పాణిర్వానరాన్రణమూర్ధని || ౨౫ ||
హసన్విద్రావయామాస దిశస్తు శరవృష్టిభిః |
ధూమ్రాక్షేణార్దితం సైన్యం వ్యథితం వీక్ష్య మారుతిః || ౨౬ || [దృశ్య]
అభ్యవర్తత సంక్రుద్ధః ప్రగృహ్య విపులాం శిలామ్ |
క్రోధాద్ద్విగుణతామ్రాక్షః పితృతుల్యపరాక్రమః || ౨౭ ||
శిలాం తాం పాతయామాస ధూమ్రాక్షస్య రథం ప్రతి |
ఆపతంతీం శిలాం దృష్ట్వా గదాముద్యమ్య సంభ్రమాత్ || ౨౮ ||
రథాదాప్లుత్య వేగేన వసుధాయాం వ్యతిష్ఠత |
సా ప్రమథ్య రథం తస్య నిపపాత శిలా భువి || ౨౯ ||
సచక్రకూబరం సాశ్వం సధ్వజం సశరాసనమ్ |
స భంక్త్వా తు రథం తస్య హనుమాన్మారుతాత్మజః || ౩౦ ||
రక్షసాం కదనం చక్రే సస్కంధవిటపైర్ద్రుమైః |
విభిన్నశిరసో భూత్వా రాక్షసాః శోణితోక్షితాః || ౩౧ ||
ద్రుమైః ప్రవ్యథితాశ్చాన్యే నిపేతుర్ధరణీతలే |
విద్రావ్య రాక్షసం సైన్యం హనుమాన్మారుతాత్మజః || ౩౨ ||
గిరేః శిఖరమాదాయ ధూమ్రాక్షమభిదుద్రువే |
తమాపతంతం ధూమ్రాక్షో గదాముద్యమ్య వీర్యవాన్ || ౩౩ ||
వినర్దమానః సహసా హనుమంతమభిద్రవత్ |
తతః క్రుద్ధస్తు వేగేన గదాం తాం బహుకంటకామ్ || ౩౪ ||
పాతయామాస ధూమ్రాక్షో మస్తకే తు హనూమతః |
తాడితః స తయా తత్ర గదయా భీమరూపయా || ౩౫ ||
స కపిర్మారుతబలస్తం ప్రహారమచింతయన్ |
ధూమ్రాక్షస్య శిరోమధ్యే గిరిశృంగమపాతయత్ || ౩౬ ||
స విహ్వలితసర్వాంగో గిరిశృంగేణ తాడితః |
పపాత సహసా భూమౌ వికీర్ణ ఇవ పర్వతః || ౩౭ ||
ధూమ్రాక్షం నిహతం దృష్ట్వా హతశేషా నిశాచరాః |
త్రస్తాః ప్రవివిశుర్లంకాం వధ్యమానాః ప్లవంగమైః || ౩౮ ||
స తు పవనసుతో నిహత్య శత్రుం
క్షతజవహాః సరితశ్చ సన్నికీర్య |
రిపువధజనితశ్రమో మహాత్మా
ముదమగమత్కపిభిశ్చ పూజ్యమానః || ౩౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ద్విపంచాశః సర్గః || ౫౨ ||
యుద్ధకాండ త్రిపంచాశః సర్గః (౫౩) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
