Read in తెలుగు / ಕನ್ನಡ / தமிழ் / देवनागरी / English (IAST)
|| కపిబలావేక్షణమ్ ||
తద్వచః పథ్యమక్లీబం సారణేనాభిభాషితమ్ |
నిశమ్య రావణో రాజా ప్రత్యభాషత సారణమ్ || ౧ ||
యది మామభియుంజీరన్దేవగంధర్వదానవాః |
నైవ సీతాం ప్రదాస్యామి సర్వలోకభయాదపి || ౨ ||
త్వం తు సౌమ్య పరిత్రస్తో హరిభిర్నిర్జితో భృశమ్ |
ప్రతిప్రదానమద్యైవ సీతాయాః సాధు మన్యసే || ౩ ||
కో హి నామ సపత్నో మాం సమరే జేతుమర్హతి |
ఇత్యుక్త్వా పరుషం వాక్యం రావణో రాక్షసాధిపః || ౪ ||
ఆరురోహ తతః శ్రీమాన్ప్రసాదం హిమపాండురమ్ |
బహుతాలసముత్సేధం రావణోఽథ దిదృక్షయా || ౫ ||
తాభ్యాం చరాభ్యాం సహితో రావణః క్రోధమూర్ఛితః |
పశ్యమానః సముద్రం చ పర్వతాంశ్చ వనాని చ || ౬ ||
దదర్శ పృథివీదేశం సుసంపూర్ణం ప్లవంగమైః |
తదపారమసంఖ్యేయం వానరాణాం మహద్బలమ్ || ౭ ||
ఆలోక్య రావణో రాజా పరిపప్రచ్ఛ సారణమ్ |
ఏషాం వానరముఖ్యానాం కే శూరాః కే మహాబలాః || ౮ ||
కే పూర్వమభివర్తంతే మహోత్సాహాః సమంతతః |
కేషాం శృణోతి సుగ్రీవః కే వా యూథపయూథపాః || ౯ ||
సారణాచక్ష్వ తత్త్వేన కే ప్రధానాః ప్లవంగమాః |
సారణో రాక్షసేంద్రస్య వచనం పరిపృచ్ఛతః || ౧౦ ||
ఆచచక్షేఽథ ముఖ్యజ్ఞో ముఖ్యాంస్తాంస్తు వనౌకసః |
ఏష యోభిముఖో లంకాం నర్దంస్తిష్ఠతి వానరః || ౧౧ ||
యూథపానాం సహస్రాణాం శతేన పరివారితః |
యస్య ఘోషేణ మహతా సప్రాకారా సతోరణా || ౧౨ ||
లంకా ప్రవేపతే సర్వా సశైలవనకాననా |
సర్వశాఖామృగేంద్రస్య సుగ్రీవస్య మహాత్మనః || ౧౩ ||
బలాగ్రే తిష్ఠతే వీరో నీలో నామైష యూథపః |
బాహూ ప్రగృహ్య యః పద్భ్యాం మహీం గచ్ఛతి వీర్యవాన్ || ౧౪ ||
లంకామభిముఖః క్రోధాదభీక్ష్ణం చ విజృంభతే |
గిరిశృంగప్రతీకాశః పద్మకింజల్కసన్నిభః || ౧౫ ||
స్ఫోటయత్యభిసంరబ్ధో లాంగూలం చ పునః పునః |
యస్య లాంగూలశబ్దేన స్వనంతి ప్రదిశో దశ || ౧౬ ||
ఏష వానరరాజేన సుగ్రీవేణాభిషేచితః |
యౌవరాజ్యేంగదో నామ త్వామాహ్వయతి సంయుగే || ౧౭ ||
వాలినః సదృశః పుత్రః సుగ్రీవస్య సదా ప్రియః |
రాఘవార్థే పరాక్రాంతః శక్రార్థే వరుణో యథా || ౧౮ ||
ఏతస్య సా మతిః సర్వా యద్దృష్టా జనకాత్మజా |
హనూమతా వేగవతా రాఘవస్య హితైషిణా || ౧౯ ||
బహూని వానరేంద్రాణామేష యూథాని వీర్యవాన్ |
పరిగృహ్యాభియాతి త్వాం స్వేనానీకేన దుర్జయః || ౨౦ ||
అను వాలిసుతస్యాపి బలేన మహతావృతః |
వీరస్తిష్ఠతి సంగ్రామే సేతుహేతురయం నలః || ౨౧ ||
యే తు విష్టభ్య గాత్రాణి క్ష్వేలయంతి నదంతి చ |
ఉత్థాయ చ విజృంభంతే క్రోధేన హరిపుంగవాః || ౨౨ ||
ఏతే దుష్ప్రసహా ఘోరశ్చండాశ్చండపరాక్రమాః |
అష్టౌ శతసహస్రాణి దశకోటిశతాని చ || ౨౩ ||
య ఏనమనుగచ్ఛంతి వీరాశ్చందనవాసినః |
ఏషైవాశంసతే లంకాం స్వేనానీకేన మర్దితుమ్ || ౨౪ ||
శ్వేతో రజతసంకాశశ్చపలో భీమవిక్రమః |
బుద్ధిమాన్వానరో వీరస్త్రిషు లోకేషు విశ్రుతః || ౨౫ ||
తూర్ణం సుగ్రీవమాగమ్య పునర్గచ్ఛతి సత్వరః |
విభజన్వానరీం సేనామనీకాని ప్రహర్షయన్ || ౨౬ ||
యః పురా గోమతీతీరే రమ్యం పర్యేతి పర్వతమ్ |
నామ్నాం సంకోచనో నామ నానానగయుతో గిరిః || ౨౭ ||
తత్ర రాజ్యం ప్రశాస్త్యేష కుముదో నామ యూథపః |
యోఽసౌ శతసహస్రాణాం సహస్రం పరికర్షతి || ౨౮ ||
యస్య వాలా బహువ్యామా దీర్ఘా లాంగూలమాశ్రితాః |
తామ్రాః పీతాః సితాః శ్వేతాః ప్రకీర్ణాఘోరకర్మణః || ౨౯ ||
అదీనో రోషణశ్చండః సంగ్రామమభికాంక్షతి |
ఏషోఽప్యాశంసతే లంకాం స్వేనానీకేన మర్దితుమ్ || ౩౦ ||
యస్త్వేష సింహసంకాశః కపిలో దీర్ఘలోచనః |
నిభృతః ప్రేక్షతే లంకాం దిధక్షన్నివ చక్షుషా || ౩౧ ||
వింధ్యం కృష్ణగిరిం సహ్యం పర్వతం చ సుదర్శనమ్ |
రాజన్సతతమధ్యాస్తే రంభో నామైష యూథపః || ౩౨ ||
శతం శతసహస్రాణాం త్రింశచ్చ హరిపుంగవాః |
యమేతే వానరాః శూరాశ్చండాశ్చండపరాక్రమాః || ౩౩ ||
పరివార్యానుగచ్ఛంతి లంకాం మర్దితుమోజసా |
యస్తు కర్ణౌ వివృణుతే జృంభతే చ పునః పునః || ౩౪ ||
న చ సంవిజతే మృత్యోర్న చ యుద్ధాద్విధావతి |
ప్రకంపతే చ రోషేణ తిర్యక్చ పునరీక్షతే || ౩౫ ||
పశ్యఁల్లాంగూలమపి చ క్ష్వేలతే చ మహాబలః |
మహాజవో వీతభయో రమ్యం సాల్వేయపర్వతమ్ || ౩౬ ||
రాజన్సతతమధ్యాస్తే శరభో నామ యూథపః |
ఏతస్య బలినః సర్వే విహారా నామ యూథపాః || ౩౮ ||
రాజన్ శతసహస్రాణి చత్వారింశత్తథైవ చ |
యస్తు మేఘ ఇవాకాశం మహానావృత్య తిష్ఠతి || ౩౮ ||
మధ్యే వానరవీరాణాం సురాణామివ వాసవః |
భేరీణామివ సన్నాదో యస్యైష శ్రూయతే మహాన్ || ౩౯ ||
ఘోషః శాఖామృగేంద్రాణాం సంగ్రామమభికాంక్షతామ్ |
ఏష పర్వతమధ్యాస్తే పారియాత్రమనుత్తమమ్ || ౪౦ ||
యుద్ధే దుష్ప్రసహో నిత్యం పనసో నామ యూథపః |
ఏనం శతసహస్రాణాం శతార్ధం పర్యుపాసతే || ౪౧ ||
యూథపా యూథపశ్రేష్ఠం యేషాం యూథాని భాగశః |
యస్తు భీమాం ప్రవల్గంతీం చమూం తిష్ఠతి శోభయన్ || ౪౨ ||
స్థితాం తీరే సముద్రస్య ద్వితీయ ఇవ సాగరః |
ఏష దర్దరసంకాశో వినతో నామ యూథపః || ౪౩ ||
పిబంశ్చరతి పర్ణాసాం నదీనాముత్తమాం నదీమ్ |
షష్టిః శతసహస్రాణి బలమస్య ప్లవంగమాః || ౪౪ ||
త్వామాహ్వయతి యుద్ధాయ క్రోధనో నామ యూథపః |
విక్రాంతా బలవంతశ్చ యథా యూథాని భాగశః || ౪౫ ||
యస్తు గైరికవర్ణాభం వపుః పుష్యతి వానరః |
అవమత్య సదా సర్వాన్వానరాన్బలదర్పితాన్ || ౪౬ ||
గవయో నామ తేజస్వీ త్వాం క్రోధాదభివర్తతే |
ఏనం శతసహస్రాణి సప్తతిః పర్యుపాసతే || ౪౭ ||
ఏషైవాశంసతే లంకాం స్వేనానీకేన మర్దితుమ్ |
ఏతే దుష్ప్రసహా ఘోరా బలినః కామరూపిణః |
యూథపా యూథపశ్రేష్ఠా యేషాం యుథాని భాగశః || ౪౮ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే షడ్వింశః సర్గః || ౨౬ ||
యుద్ధకాండ సప్తవింశః సర్గః (౨౭) >>
సంపూర్ణ శ్రీవాల్మీకి రామాయణ యుద్ధకాండ చూడండి
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
