Read in తెలుగు / ಕನ್ನಡ / தமிழ் / देवनागरी / English (IAST)
|| సముద్రసంక్షోభః ||
తతః సాగరవేలాయాం దర్భానాస్తీర్య రాఘవః |
అంజలిం ప్రాఙ్ముఖః కృత్వా ప్రతిశిశ్యే మహోదధేః || ౧ ||
బాహుం భుజగభోగాభముపధాయారిసూదనః |
జాతరూపమయైశ్చైవ భూషణైర్భూషితం పురా || ౨ ||
వరకాంచనకేయూరముక్తాప్రవరభూషణైః |
భుజైః పరమనారీణామభిమృష్టమనేకధా || ౩ ||
చందనాగరుభిశ్చైవ పురస్తాదధివాసితమ్ |
బాలసూర్యప్రతీకాశైశ్చందనైరుపశోభితమ్ || ౪ ||
శయనే చోత్తమాంగేన సీతాయాః శోభితం పురా |
తక్షకస్యేవ సంభోగం గంగాజలనిషేవితమ్ || ౫ ||
సంయుగే యుగసంకాశం శత్రూణాం శోకవర్ధనమ్ |
సుహృదానందనం దీర్ఘం సాగరాంతవ్యపాశ్రయమ్ || ౬ ||
అస్యతా చ పునః సవ్యం జ్యాఘాతవిగతత్వచమ్ |
దక్షిణో దక్షిణం బాహుం మహాపరిఘసన్నిభమ్ || ౭ ||
గోసహస్రప్రదాతారముపధాయ మహద్భుజమ్ |
అద్య మే మరణం వాఽథ తరణం సాగరస్య వా || ౮ ||
ఇతి రామో మతిం కృత్వా మహాబాహుర్మహోదధిమ్ |
అధిశిశ్యే చ విధివత్ప్రయతో నియతో మునిః || ౯ ||
తస్య రామస్య సుప్తస్య కుశాస్తీర్ణే మహీతలే |
నియమాదప్రమత్తస్య నిశాస్తిస్రోఽతిచక్రముః || ౧౦ ||
స త్రిరాత్రోషితస్తత్ర నయజ్ఞో ధర్మవత్సలః |
ఉపాసత తదా రామః సాగరం సరితాం పతిమ్ || ౧౧ ||
న చ దర్శయతే మందస్తదా రామస్య సాగరః |
ప్రయతేనాపి రామేణ యథార్హమభిపూజితః || ౧౨ ||
సముద్రస్య తతః క్రుద్ధో రామో రక్తాంతలోచనః |
సమీపస్థమువాచేదం లక్ష్మణం శుభలక్షణమ్ || ౧౩ ||
అవలేపః సముద్రస్య న దర్శయతి యత్స్వయమ్ |
ప్రశమశ్చ క్షమా చైవ ఆర్జవం ప్రియవాదితా || ౧౪ ||
అసామర్థ్యం ఫలంత్యేతే నిర్గుణేషు సతాం గుణాః |
ఆత్మప్రశంసినం దుష్టం ధృష్టం విపరిధావకమ్ || ౧౫ ||
సర్వత్రోత్సృష్టదండం చ లోకః సత్కురుతే నరమ్ |
న సామ్నా శక్యతే కీర్తిర్న సామ్నా శక్యతే యశః || ౧౬ ||
ప్రాప్తుం లక్ష్మణ లోకేఽస్మిన్ జయో వా రణమూర్ధని |
అద్య మద్బాణనిర్భిన్నైర్మకరైర్మకరాలయమ్ || ౧౭ ||
నిరుద్ధతోఽయం సౌమిత్రే ప్లవద్భిః పశ్య సర్వతః |
మహాభోగాని మత్స్యానాం కరిణాం చ కరానిహ || ౧౮ ||
భోగినాం పశ్య నాగానాం మయా ఛిన్నాని లక్ష్మణ |
సశంఖశుక్తికాజాలం సమీనమకరం శరైః || ౧౯ ||
అద్య యుద్ధేన మహతా సముద్రం పరిశోషయే |
క్షమయా హి సమాయుక్తం మామయం మకరాలయః || ౨౦ ||
అసమర్థం విజానాతి ధిక్ క్షమామీదృశే జనే |
న దర్శయతి సామ్నా మే సాగరో రూపమాత్మనః || ౨౧ ||
చాపమానయ సౌమిత్రే శరాంశ్చాశీవిషోపమాన్ |
సాగరం శోషయిష్యామి పద్భ్యాం యాంతు ప్లవంగమాః || ౨౨ ||
అద్యాక్షోభ్యమపి క్రుద్ధః క్షోభయిష్యామి సాగరమ్ |
వేలాసు కృతమర్యాదం సహసోర్మిసమాకులమ్ || ౨౩ ||
నిర్మర్యాదం కరిష్యామి సాయకైర్వరుణాలయమ్ |
మహార్ణవం క్షోభయిష్యే మహానక్రసమాకులమ్ || ౨౪ || [దానవ]
ఏవముక్త్వా ధనుష్పాణిః క్రోధవిస్ఫారితేక్షణః |
బభూవ రామో దుర్ధర్షో యుగాంతాగ్నిరివ జ్వలన్ || ౨౫ ||
సంపీడ్య చ ధనుర్ఘోరం కంపయిత్వా శరైర్జగత్ |
ముమోచ విశిఖానుగ్రాన్వజ్రానివ శతక్రతుః || ౨౬ ||
తే జ్వలంతో మహావేగాస్తేజసా సాయకోత్తమాః |
ప్రవిశంతి సముద్రస్య సలిలం త్రస్తపన్నగమ్ || ౨౭ ||
తోయవేగః సముద్రస్య సనక్రమకరో మహాన్ |
సంబభూవ మహాఘోరః సమారుతరవస్తదా || ౨౮ ||
మహోర్మిజాలవితతః శంఖశుక్తిసమావృతః |
సధూమపరివృత్తోర్మిః సహసాఽఽసీన్మహోదధిః || ౨౯ ||
వ్యథితాః పన్నగాశ్చాసన్దీప్తాస్యా దీప్తలోచనాః |
దానవాశ్చ మహావీర్యాః పాతాలతలవాసినః || ౩౦ ||
ఊర్మయః సింధురాజస్య సనక్రమకరాస్తదా |
వింధ్యమందరసంకాశాః సముత్పేతుః సహస్రశః || ౩౧ ||
ఆఘూర్ణితతరంగౌఘః సంభ్రాంతోరగరాక్షసః |
ఉద్వర్తితమహాగ్రాహః సంవృత్తః సలిలాశయః || ౩౨ ||
తతస్తు తం రాఘవముగ్రవేగం
ప్రకర్షమాణం ధనురప్రమేయమ్ |
సౌమిత్రిరుత్పత్య సముచ్ఛ్వసంతం
మా మేతి చోక్త్వా ధనురాలలంబే || ౩౩ ||
[* అధికశ్లోకాః –
ఏతద్వినాపి హ్యుదధేస్తవాద్య
సంపత్స్యతే వీరతమస్య కార్యమ్ |
భవద్విధాః కోపవశం న యాంతి
దీర్ఘం భవాన్పశ్యతు సాధువృత్తమ్ || ౩౪ ||
అంతర్హితైశ్చైవ తథాంతరిక్షే
బ్రహ్మర్షిభిశ్చైవ సురర్షిభిశ్చ |
శబ్దః కృతః కష్టమితి బ్రువద్భి-
-ర్మా మేతి చోక్త్వా మహతా స్వరేణ || ౩౫ ||
*]
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ఏకవింశః సర్గః || ౨౧ ||
యుద్ధకాండ ద్వావింశః సర్గః (౨౨) >>
సంపూర్ణ శ్రీవాల్మీకి రామాయణ యుద్ధకాండ చూడండి
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
