Read in తెలుగు / ಕನ್ನಡ / தமிழ் / देवनागरी / English (IAST)
|| విభీషణసంగ్రహనిర్ణయః ||
అథ రామః ప్రసన్నాత్మా శ్రుత్వా వాయుసుతస్య హ |
ప్రత్యభాషత దుర్ధర్షః శ్రుతవానాత్మని స్థితమ్ || ౧ ||
మమాపి తు వివక్షాఽస్తి కాచిత్ప్రతి విభీషణమ్ |
శ్రోతుమిచ్ఛామి తత్సర్వం భవద్భిః శ్రేయసి స్థితైః || ౨ ||
మిత్రభావేన సంప్రాప్తం న త్యజేయం కథంచన |
దోషో యద్యపి తస్య స్యాత్సతామేతదగర్హితమ్ || ౩ ||
సుగ్రీవస్త్వథ తద్వాక్యమాభాష్య చ విమృశ్య చ |
తతః శుభతరం వాక్యమువాచ హరిపుంగవః || ౪ ||
సుదుష్టో వాఽప్యదుష్టో వా కిమేష రజనీచరః |
ఈదృశం వ్యసనం ప్రాప్తం భ్రాతరం యః పరిత్యజేత్ || ౫ ||
కో నామ స భవేత్తస్య యమేష న పరిత్యజేత్ |
వానరాధిపతేర్వాక్యం శ్రుత్వా సర్వానుదీక్ష్య చ || ౬ ||
ఈషదుత్స్మయమానస్తు లక్ష్మణం పుణ్యలక్షణమ్ |
ఇతి హోవాచ కాకుత్స్థో వాక్యం సత్యపరాక్రమః || ౭ ||
అనధీత్య చ శాస్త్రాణి వృద్ధాననుపసేవ్య చ |
న శక్యమీదృశం వక్తుం యదువాచ హరీశ్వరః || ౮ ||
అస్తి సూక్ష్మతరం కించిద్యదత్ర ప్రతిభాతి మే |
ప్రత్యక్షం లౌకికం వాఽపి విద్యతే సర్వరాజసు || ౯ ||
అమిత్రాస్తత్కులీనాశ్చ ప్రాతిదేశ్యాశ్చ కీర్తితాః |
వ్యసనేషు ప్రహర్తారస్తస్మాదయమిహాగతః || ౧౦ ||
అపాపాస్తత్కులీనాశ్చ మానయంతి స్వకాన్హితాన్ |
ఏష ప్రాయో నరేంద్రాణాం శంకనీయస్తు శోభనః || ౧౧ ||
యస్తు దోషస్త్వయా ప్రోక్తో హ్యాదానేఽరిబలస్య చ |
తత్ర తే కీర్తయిష్యామి యథాశాస్త్రమిదం శృణు || ౧౨ ||
న వయం తత్కులీనాశ్చ రాజ్యకాంక్షీ చ రాక్షసః |
పండితా హి భవిష్యంతి తస్మాద్గ్రాహ్యో విభీషణః || ౧౩ ||
అవ్యగ్రాశ్చ ప్రహృష్టాశ్చ న భవిష్యంతి సంగతాః |
ప్రణాదశ్చ మహానేష తతోఽస్య భయమాగతమ్ || ౧౪ || [ప్రవాదః]
ఇతి భేదం గమిష్యంతి తస్మాద్గ్రాహ్యో విభీషణః |
న సర్వే భ్రాతరస్తాత భవంతి భరతోపమాః || ౧౫ ||
మద్విధా వా పితుః పుత్రాః సుహృదో వా భవద్విధాః |
ఏవముక్తస్తు రామేణ సుగ్రీవః సహలక్ష్మణః || ౧౬ ||
ఉత్థాయేదం మహాప్రాజ్ఞః ప్రణతో వాక్యమబ్రవీత్ |
రావణేన ప్రణిహితం తమవేహి విభీషణమ్ || ౧౭ ||
తస్యాహం నిగ్రహం మన్యే క్షమం క్షమవతాం వర |
రాక్షసో జిహ్మయా బుద్ధ్యా సందిష్టోఽయమిహాగతః || ౧౮ ||
ప్రహర్తుం త్వయి విశ్వస్తే ప్రచ్ఛన్నో మయి వాఽనఘ |
లక్ష్మణే వా మహాబాహో స వధ్యః సచివైః సహ || ౧౯ ||
రావణస్య నృశంసస్య భ్రాతా హ్యేష విభీషణః |
ఏవముక్త్వా రఘుశ్రేష్ఠం సుగ్రీవో వాహినీపతిః || ౨౦ ||
వాక్యజ్ఞో వాక్యకుశలం తతో మౌనముపాగమత్ |
సుగ్రీవస్య తు తద్వాక్యం శ్రుత్వా రామో విమృశ్య చ || ౨౧ ||
తతః శుభతరం వాక్యమువాచ హరిపుంగవమ్ |
సుదుష్టో వాప్యదుష్టో వా కిమేష రజనీచరః || ౨౨ ||
సూక్ష్మమప్యహితం కర్తుం మమాశక్తః కథంచన |
పిశాచాందానవాన్యక్షాన్పృథివ్యాం చైవ రాక్షసాన్ || ౨౩ ||
అంగుల్యగ్రేణ తాన్హన్యామిచ్ఛన్హరిగణేశ్వర |
శ్రూయతే హి కపోతేన శత్రుః శరణమాగతః || ౨౪ ||
అర్చితశ్చ యథాన్యాయం స్వైశ్చ మాంసైర్నిమంత్రితః |
స హి తం ప్రతిజగ్రాహ భార్యాహర్తారమాగతమ్ || ౨౫ ||
కపోతో వానరశ్రేష్ఠ కిం పునర్మద్విధో జనః |
ఋషేః కణ్వస్య పుత్రేణ కండునా పరమర్షిణా || ౨౬ ||
శృణు గాథాం పురా గీతాం ధర్మిష్ఠాం సత్యవాదినా |
బద్ధాంజలిపుటం దీనం యాచంతం శరణాగతమ్ || ౨౭ ||
న హన్యాదానృశంస్యార్థమపి శత్రుం పరంతప |
ఆర్తో వా యది వా దృప్తః పరేషాం శరణాగతః || ౨౮ ||
అరిః ప్రాణాన్పరిత్యజ్య రక్షితవ్యః కృతాత్మనా |
స చేద్భయాద్వా మోహాద్వా కామాద్వాఽపి న రక్షతి || ౨౯ ||
స్వయా శక్త్యా యథాసత్త్వం తత్పాపం లోకగర్హితమ్ | [త్వయా,న్యాయం]
వినష్టః పశ్యతస్తస్యారక్షిణః శరణాగతః || ౩౦ ||
ఆదాయ సుకృతం తస్య సర్వం గచ్ఛేదరక్షితః |
ఏవం దోషో మహానత్ర ప్రపన్నానామరక్షణే || ౩౧ ||
అస్వర్గ్యం చాయశస్యం చ బలవీర్యవినాశనమ్ |
కరిష్యామి యథార్థం తు కండోర్వచనముత్తమమ్ || ౩౨ ||
ధర్మిష్ఠం చ యశస్యం చ స్వర్గ్యం స్యాత్తు ఫలోదయే |
సకృదేవ ప్రపన్నాయ తవాస్మీతి చ యాచతే || ౩౩ ||
అభయం సర్వభూతేభ్యో దదామ్యేతద్వ్రతం మమ |
ఆనయైనం హరిశ్రేష్ఠ దత్తమస్యాభయం మయా || ౩౪ ||
విభీషణో వా సుగ్రీవ యది వా రావణః స్వయమ్ |
రామస్య తు వచః శ్రుత్వా సుగ్రీవః ప్లవగేశ్వరః || ౩౫ ||
ప్రత్యభాషత కాకుత్స్థం సౌహార్దేనాభిచోదితః |
కిమత్ర చిత్రం ధర్మజ్ఞ లోకనాథ సుఖావహ || ౩౬ ||
యత్త్వమార్యం ప్రభాషేథాః సత్త్వవాన్సత్పథే స్థితః |
మమ చాప్యంతరాత్మాఽయం శుద్ధం వేత్తి విభీషణమ్ || ౩౭ ||
అనుమానాచ్చ భావాచ్చ సర్వతః సుపరీక్షితః |
తస్మాత్క్షిప్రం సహాస్మాభిస్తుల్యో భవతు రాఘవ |
విభీషణో మహాప్రాజ్ఞః సఖిత్వం చాభ్యుపైతు నః || ౩౮ ||
తతస్తు సుగ్రీవవచో నిశమ్య
తద్ధరీశ్వరేణాభిహితం నరేశ్వరః |
విభీషణేనాశు జగామ సంగమం
పతత్త్రిరాజేన యథా పురందరః || ౩౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే అష్టాదశః సర్గః || ౧౮ ||
యుద్ధకాండ ఏకోనవింశః సర్గః (౧౯) >>
సంపూర్ణ శ్రీవాల్మీకి రామాయణ యుద్ధకాండ చూడండి
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
