Read in తెలుగు / ಕನ್ನಡ / தமிழ் / देवनागरी / English (IAST)
|| లంకాదుర్గాదికథనమ్ ||
సుగ్రీవస్య వచః శ్రుత్వా హేతుమత్పరమార్థవిత్ |
ప్రతిజగ్రాహ కాకుత్స్థో హనూమంతమథాబ్రవీత్ || ౧ ||
తపసా సేతుబంధేన సాగరోచ్ఛోషణేన వా |
సర్వథా సుసమర్థోఽస్మి సాగరస్యాస్య లంఘనే || ౨ ||
కతి దుర్గాణి దుర్గాయా లంకాయా బ్రూహి తాని మే |
జ్ఞాతుమిచ్ఛామి తత్సర్వం దర్శనాదివ వానర || ౩ ||
బలస్య పరిమాణం చ ద్వారదుర్గక్రియామపి |
గుప్తికర్మ చ లంకాయా రక్షసాం సదనాని చ || ౪ ||
యథాసుఖం యథావచ్చ లంకాయామసి దృష్టవాన్ |
సర్వమాచక్ష్వ తత్త్వేన సర్వథా కుశలో హ్యసి || ౫ ||
శ్రుత్వా రామస్య వచనం హనూమాన్మారుతాత్మజః |
వాక్యం వాక్యవిదాం శ్రేష్ఠో రామం పునరథాబ్రవీత్ || ౬ ||
శ్రూయతాం సర్వమాఖ్యాస్యే దుర్గకర్మవిధానతః |
గుప్తా పురీ యథా లంకా రక్షితా చ యథా బలైః || ౭ ||
రాక్షసాశ్చ యథా స్నిగ్ధా రావణస్య చ తేజసా |
పరాం సమృద్ధిం లంకాయాః సాగరస్య చ భీమతామ్ || ౮ ||
విభాగం చ బలౌఘస్య నిర్దేశం వాహనస్య చ |
ఏవముక్త్వా హరిశ్రేష్ఠః కథయామాస తత్త్వతః || ౯ || [కపి]
హృష్టా ప్రముదితా లంకా మత్తద్విపసమాకులా |
మహతీ రథసంపూర్ణా రక్షోగణసమాకులా || ౧౦ ||
వాజిభిశ్చ సుసంపూర్ణా సా పురీ దుర్గమా పరైః |
దృఢబద్ధకవాటాని మహాపరిఘవంతి చ || ౧౧ ||
ద్వారాణి విపులాన్యస్యాశ్చత్వారి సుమహాంతి చ |
తత్రేషూపలయంత్రాణి బలవంతి మహాంతి చ || ౧౨ ||
ఆగతం పరసైన్యం తు తత్ర తైః ప్రతిహన్యతే | [ప్రతిసైన్యం]
ద్వారేషు సంస్కృతా భీమాః కాలాయసమయాః శితాః || ౧౩ ||
శతశో రోచితా వీరైః శతఘ్న్యో రక్షసాం గణైః |
సౌవర్ణశ్చ మహాంస్తస్యాః ప్రాకారో దుష్ప్రధర్షణః || ౧౪ ||
మణివిద్రుమవైడూర్యముక్తావిరచితాంతరః |
సర్వతశ్చ మహాభీమాః శీతతోయవహాః శుభాః || ౧౫ ||
అగాధా గ్రాహవత్యశ్చ పరిఖా మీనసేవితాః |
ద్వారేషు తాసాం చత్వారః సంక్రమాః పరమాయతాః || ౧౬ ||
యంత్రైరుపేతా బహుభిర్మహద్భిర్గృహపంక్తిభిః |
త్రాయంతే సంక్రమాస్తత్ర పరసైన్యాగమే సతి || ౧౭ ||
యంత్రైస్తైరవకీర్యంతే పరిఖాసు సమంతతః |
ఏకస్త్వకంప్యో బలవాన్ సంక్రమః సుమహాదృఢః || ౧౮ ||
కాంచనైర్బహుభిః స్తంభైర్వేదికాభిశ్చ శోభితః |
స్వయం ప్రకృతిసంపన్నో యుయుత్సూ రామ రావణః || ౧౯ ||
ఉత్థితశ్చాప్రమత్తశ్చ బలానామనుదర్శనే |
లంకా పునర్నిరాలంబా దేవదుర్గా భయావహా || ౨౦ ||
నాదేయం పార్వతం వాన్యం కృత్రిమం చ చతుర్విధమ్ |
స్థితా పారే సముద్రస్య దూరపారస్య రాఘవ || ౨౧ ||
నౌపథోఽపి చ నాస్త్యత్ర నిరాదేశశ్చ సర్వతః |
శైలాగ్రే రచితా దుర్గా సా పూర్దేవపురోపమా || ౨౨ ||
వాజివారణసంపూర్ణా లంకా పరమదుర్జయా |
పరిఖాశ్చ శతఘ్న్యశ్చ యంత్రాణి వివిధాని చ || ౨౩ ||
శోభయంతి పురీం లంకాం రావణస్య దురాత్మనః |
అయుతం రక్షసామత్ర పూర్వద్వారం సమాశ్రితమ్ || ౨౪ ||
శూలహస్తా దురాధర్షాః సర్వే ఖడ్గాగ్రయోధినః |
నియుతం రక్షసామత్ర దక్షిణద్వారమాశ్రితమ్ || ౨౫ ||
చతురంగేణ సైన్యేన యోధాస్తత్రాప్యనుత్తమాః |
ప్రయుతం రక్షసామత్ర పశ్చిమద్వారమాశ్రితమ్ || ౨౬ ||
చర్మఖడ్గధరాః సర్వే తథా సర్వాస్త్రకోవిదాః |
న్యర్బుదం రక్షసామత్ర ఉత్తరద్వారమాశ్రితమ్ || ౨౭ ||
రథినశ్చాశ్వవాహాశ్చ కులపుత్రాః సుపూజితాః |
శతశోఽథ సహస్రాణి మధ్యమం స్కంధమాశ్రితాః || ౨౮ ||
యాతుధానా దురాధర్షాః సాగ్రకోటిశ్చ రక్షసామ్ |
తే మయా సంక్రమా భగ్నాః పరిఖాశ్చావపూరితాః || ౨౯ ||
దగ్ధా చ నగరీ లంకా ప్రాకారాశ్చావసాదితాః |
బలైకదేశః క్షపితో రాక్షసానాం మహాత్మనామ్ || ౩౦ ||
యేన కేన చ మార్గేణ తరామ వరుణాలయమ్ |
హతేతి నగరీ లంకా వానరైరవధార్యతామ్ || ౩౧ ||
అంగదో ద్వివిదో మైందో జాంబవాన్ పనసో నలః |
నీలః సేనాపతిశ్చైవ బలశేషేణ కిం తవ || ౩౨ ||
ప్లవమానా హి గత్వా తాం రావణస్య మహాపురీమ్ |
సపర్వతవనాం భిత్త్వా సఖాతాం సప్రతోరణామ్ || ౩౩ ||
సప్రాకారాం సభవనామానయిష్యంతి రాఘవ |
ఏవమాజ్ఞాపయ క్షిప్రం బలానాం సర్వసంగ్రహమ్ |
ముహూర్తేన తు యుక్తేన ప్రస్థానమభిరోచయ || ౩౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే తృతీయః సర్గః || ౩ ||
సంపూర్ణ శ్రీవాల్మీకి రామాయణ యుద్ధకాండ చూడండి
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
