Read in తెలుగు / ಕನ್ನಡ / தமிழ் / देवनागरी / English (IAST)
[గమనిక: ఈ స్తోత్రము “శ్రీ శివ స్తోత్రనిధి” పారాయణ గ్రంథములో కూడా ఉన్నది.]
ఓమిత్యేతద్యస్య బుధైర్నామ గృహీతం
యద్భాసేదం భాతి సమస్తం వియదాది |
యస్యాజ్ఞాతః స్వస్వపదస్థా విధిముఖ్యా-
-స్తం ప్రత్యంచం దక్షిణవక్త్రం కలయామి || ౧ ||
నమ్రాంగాణాం భక్తిమతాం యః పురుషార్థాన్
దత్వా క్షిప్రం హంతి చ తత్సర్వవిపత్తీః |
పాదాంభోజాధస్తనితాపస్మృతిమీశం
తం ప్రత్యంచం దక్షిణవక్త్రం కలయామి || ౨ ||
మోహధ్వస్త్యై వైణికవైయాసికిముఖ్యాః
సంవిన్ముద్రాపుస్తకవీణాక్షగుణాన్యమ్ |
హస్తాంభోజైర్బిభ్రతమారాధితవంత-
-స్తం ప్రత్యంచం దక్షిణవక్త్రం కలయామి || ౩ ||
భద్రారూఢం భద్రదమారాధయితౄణాం
భక్తిశ్రద్ధాపూర్వకమీశం ప్రణమంతి |
ఆదిత్యా యం వాంఛితసిద్ధ్యై కరుణాబ్ధిం
తం ప్రత్యంచం దక్షిణవక్త్రం కలయామి || ౪ ||
గర్భాంతఃస్థాః ప్రాణిన ఏతే భవపాశ-
-చ్ఛేదే దక్షం నిశ్చితవంతః శరణం యమ్ |
ఆరాధ్యాంఘ్రిప్రస్ఫురదంభోరుహయుగ్మం
తం ప్రత్యంచం దక్షిణవక్త్రం కలయామి || ౫ ||
వక్త్రం ధన్యాః సంసృతివార్ధేరతిమాత్రా-
-ద్భీతాః సంతః పూర్ణశశాంకద్యుతి యస్య |
సేవంతేఽధ్యాసీనమనంతం వటమూలం
తం ప్రత్యంచం దక్షిణవక్త్రం కలయామి || ౬ ||
తేజఃస్తోమైరంగదసంఘట్టితభాస్వ-
-న్మాణిక్యోత్థైర్భాసితవిశ్వో రుచిరైర్యః |
తేజోమూర్తిం ఖానిలతేజఃప్రముఖాబ్ధిం
తం ప్రత్యంచం దక్షిణవక్త్రం కలయామి || ౭ ||
దధ్యాజ్యాదిద్రవ్యకకర్మాణ్యఖిలాని
త్యక్త్వా కాంక్షాం కర్మఫలేష్వత్ర కరోతి |
యజ్జిజ్ఞాసారూపఫలార్థీ క్షితిదేవ-
-స్తం ప్రత్యంచం దక్షిణవక్త్రం కలయామి || ౮ ||
క్షిప్రం లోకే యం భజమానః పృథుపుణ్యః
ప్రధ్వస్తాధిః ప్రోజ్ఝితసంసృత్యఖిలార్తిః |
ప్రత్యగ్భూతం బ్రహ్మ పరం సన్ రమతే య-
-స్తం ప్రత్యంచం దక్షిణవక్త్రం కలయామి || ౯ ||
ణానేత్యేవం యన్మనుమధ్యస్థితవర్ణా-
-న్భక్తాః కాలే వర్ణగృహీత్యై ప్రజపంతః |
మోదంతే సంప్రాప్తసమస్తశ్రుతితంత్రా-
-స్తం ప్రత్యంచం దక్షిణవక్త్రం కలయామి || ౧౦ ||
మూర్తిశ్ఛాయానిర్జితమందాకినికుంద-
-ప్రాలేయాంభోరాశిసుధాభూతిసురేభా |
యస్యాభ్రాభా హాసవిధౌ దక్షశిరోధి-
-స్తం ప్రత్యంచం దక్షిణవక్త్రం కలయామి || ౧౧ ||
తప్తస్వర్ణచ్ఛాయజటాజూటకటాహ-
-ప్రోద్యద్వీచీవల్లివిరాజత్సురసింధుమ్ |
నిత్యం సూక్ష్మం నిత్యనిరస్తాఖిలదోషం
తం ప్రత్యంచం దక్షిణవక్త్రం కలయామి || ౧౨ ||
యేన జ్ఞాతేనైవ సమస్తం విదితం స్యా-
-ద్యస్మాదన్యద్వస్తు జగత్యాం శశశృంగమ్ |
యం ప్రాప్తానాం నాస్తి పరం ప్రాప్యమనాదిం
తం ప్రత్యంచం దక్షిణవక్త్రం కలయామి || ౧౩ ||
మత్తో మారో యస్య లలాటాక్షిభవాగ్ని-
-స్ఫూర్జత్కీలప్రోషితభస్మీకృతదేహః |
తద్భస్మాసీద్యస్య సుజాతః పటవాస-
-స్తం ప్రత్యంచం దక్షిణవక్త్రం కలయామి || ౧౪ ||
హ్యంభోరాశౌ సంసృతిరూపే లుఠతాం తత్
పారం గంతుం యత్పదభక్తిర్దృఢనౌకా |
సర్వారాధ్యం సర్వగమానందపయోధిం
తం ప్రత్యంచం దక్షిణవక్త్రం కలయామి || ౧౫ ||
మేధావీ స్యాదిందువతంసం ధృతవీణం
కర్పూరాభం పుస్తకహస్తం కమలాక్షమ్ |
చిత్తే ధ్యాయన్ యస్య వపుర్ద్రాఙ్నిమిషార్ధం
తం ప్రత్యంచం దక్షిణవక్త్రం కలయామి || ౧౬ ||
ధామ్నాం ధామ ప్రౌఢరుచీనాం పరమం యత్
సూర్యాదీనాం యస్య స హేతుర్జగదాదేః |
ఏతావాన్యో యస్య న సర్వేశ్వరమీడ్యం
తం ప్రత్యంచం దక్షిణవక్త్రం కలయామి || ౧౭ ||
ప్రత్యాహారప్రాణనిరోధాదిసమర్థై-
-ర్భక్తైర్దాంతైః సంయతచిత్తైర్యతమానైః |
స్వాత్మత్వేన జ్ఞాయత ఏవ త్వరయా య-
-స్తం ప్రత్యంచం దక్షిణవక్త్రం కలయామి || ౧౮ ||
జ్ఞాంశీభూతాన్ ప్రాణిన ఏతాన్ ఫలదాతా
చిత్తాంతఃస్థః ప్రేరయతి స్వే సకలేఽపి |
కృత్యే దేవః ప్రాక్తనకర్మానుసరః సం-
-స్తం ప్రత్యంచం దక్షిణవక్త్రం కలయామి || ౧౯ ||
ప్రజ్ఞామాత్రం ప్రాపితసంబిన్నిజభక్తం
ప్రాణాక్షాదేః ప్రేరయితారం ప్రణవార్థమ్ |
ప్రాహుః ప్రాజ్ఞా యం విదితానుశ్రవతత్త్వా-
-స్తం ప్రత్యంచం దక్షిణవక్త్రం కలయామి || ౨౦ ||
యస్యాజ్ఞానాదేవ నృణాం సంసృతిబోధో
యస్య జ్ఞానాదేవ విమోక్షో భవతీతి |
స్పష్టం బ్రూతే వేదశిరో దేశికమాద్యం
తం ప్రత్యంచం దక్షిణవక్త్రం కలయామి || ౨౧ ||
ఛన్నేఽవిద్యారూపపటేనైవ చ విశ్వం
యత్రాధ్యస్తం జీవపరేశత్వమపీదమ్ |
భానోర్భానుష్వంబువదస్తాఖిలభేదం
తం ప్రత్యంచం దక్షిణవక్త్రం కలయామి || ౨౨ ||
స్వాపస్వప్నౌ జాగ్రదవస్థాపి న యత్ర
ప్రాణశ్చేతః సర్వగతో యః సకలాత్మా |
కూటస్థో యః కేవలసచ్చిత్సుఖరూప-
-స్తం ప్రత్యంచం దక్షిణవక్త్రం కలయామి || ౨౩ ||
హా హేత్యేవం విస్మయమీయుర్మునిముఖ్యా
జ్ఞాతే యస్మిన్ స్వాత్మతయానాత్మవిమోహః |
ప్రత్యగ్భూతే బ్రహ్మణి యాతః కథమిత్థం
తం ప్రత్యంచం దక్షిణవక్త్రం కలయామి || ౨౪ ||
యైషా రమ్యైర్మత్తమయూరాభిధవృత్తై-
-రాదౌ క్లుప్తా యన్మనువర్ణైర్మునిభంగీ |
తామేవైతాం దక్షిణవక్త్రః కృపయాసా-
-వూరీకుర్యాద్దేశికసమ్రాట్ పరమాత్మా || ౨౫ ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ శ్రీ దక్షిణామూర్తి వర్ణమాలా స్తోత్రమ్ ||
గమనిక: పైన ఇవ్వబడిన స్తోత్రము, ఈ క్రింది పుస్తకములో కూడా ఉన్నది.
శ్రీ శివ స్తోత్రనిధి
(నిత్య పారాయణ గ్రంథము)
మరిన్ని శ్రీ శివ స్తోత్రాలు చూడండి. మరిన్ని శ్రీ దక్షిణామూర్తి స్తోత్రాలు చూడండి.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
