Read in తెలుగు / ಕನ್ನಡ / தமிழ் / देवनागरी / English (IAST)
|| śānti pāṭhaḥ ||
ōṁ āpyāyantu mamāṅgāni vākprāṇaścakṣuḥ śrōtramathō balamindriyāṇi ca sarvāṇi | sarvaṁ brahmaupaniṣadaṁ mā:’haṁ brahma nirākuryāṁ mā mā brahma
nirākarōdanirākaraṇamastvanirākaraṇaṁ mē:’stu | tadātmani niratē ya upaniṣatsu dharmāstē mayi santu tē mayi santu |
ōṁ śāntiḥ śāntiḥ śāntiḥ ||
|| prathama khaṇḍaḥ ||
ōṁ kēnēṣitaṁ patati prēṣitaṁ manaḥ
kēna prāṇaḥ prathamaḥ praiti yuktaḥ |
kēnēṣitāṁ vācamimāṁ vadanti
cakṣuḥ śrōtraṁ ka u dēvō yunakti || 1 ||
śrōtrasya śrōtraṁ manasō manō ya-
-dvācō ha vācaṁ sa u prāṇasya prāṇaḥ |
cakṣuṣaścakṣuratimucya dhīrāḥ
prētyāsmāllōkādamr̥tā bhavanti || 2 ||
na tatra cakṣurgacchati na vāggacchati nō manō na vidmō na vijānīmō yathaitadanuśiṣyādanyadēva tadviditādathō aviditādadhi |
iti śuśruma pūrvēṣāṁ yē nastadvyācacakṣirē || 3 ||
yadvācā:’nabhyuditaṁ yēna vāgabhyudyatē |
tadēva brahma tvaṁ viddhi nēdaṁ yadidamupāsatē || 4 ||
yanmanasā na manutē yēnāhurmanō matam |
tadēva brahma tvaṁ viddhi nēdaṁ yadidamupāsatē || 5 ||
yaccakṣuṣā na paśyati yēna cakṣūgṁṣi paśyati |
tadēva brahma tvaṁ viddhi nēdaṁ yadidamupāsatē || 6 ||
yacchrōtrēṇa na śr̥ṇōti yēna śrōtramidagṁ śrutam |
tadēva brahma tvaṁ viddhi nēdaṁ yadidamupāsatē || 7 ||
yatprāṇēna na prāṇiti yēna prāṇaḥ praṇīyatē |
tadēva brahma tvaṁ viddhi nēdaṁ yadidamupāsatē || 8 ||
|| dvitīyaḥ khaṇḍaḥ ||
yadi manyasē suvēdēti dabhramēvāpi
nūnaṁ tvaṁ vēttha brahmaṇō rūpam |
yadasya tvaṁ yadasya dēvēṣvatha nu
mīmāṁsyamēva tē manyē viditam || 1 ||
nāhaṁ manyē suvēdēti nō na vēdēti vēda ca |
yō nastadvēda tadvēda nō na vēdēti vēda ca || 2 ||
yasyāmataṁ tasya mataṁ mataṁ yasya na vēda saḥ |
avijñātaṁ vijānatāṁ vijñātamavijānatām || 3 ||
pratibōdhaviditaṁ matamamr̥tatvaṁ hi vindatē |
ātmanā vindatē vīryaṁ vidyayā vindatē:’mr̥tam || 4 ||
iha cēdavēdīdatha satyamasti
na cēdihāvēdīnmahatī vinaṣṭiḥ |
bhūtēṣu bhūtēṣu vicitya dhīrāḥ
prētyāsmāllōkādamr̥tā bhavanti || 5 ||
|| tr̥tīyaḥ khaṇḍaḥ ||
brahma ha dēvēbhyō vijigyē tasya ha brahmaṇō
vijayē dēvā amahīyanta || 1 ||
ta aikṣantāsmākamēvāyaṁ vijayō:’smākamēvāyaṁ mahimēti |
taddhaiṣāṁ vijajñau tēbhyō ha prādurbabhūva tanna vyajānata
kimidaṁ yakṣamiti || 2 ||
tē:’gnimabruvañjātavēda ētadvijānīhi
kimētadyakṣamiti tathēti || 3 ||
tadabhyadravattamabhyavadatkō:’sītyagnirvā
ahamasmītyabravījjātavēdā vā ahamasmīti || 4 ||
tasmiṁstvayi kiṁ vīryamityapīdagṁ sarvaṁ
dahēyaṁ yadidaṁ pr̥thivyāmiti || 5 ||
tasmai tr̥ṇaṁ nidadhāvētaddahēti |
tadupaprēyāya sarvajavēna tanna śaśāka dagdhuṁ sa tata ēva
nivavr̥tē naitadaśakaṁ vijñātuṁ yadētadyakṣamiti || 6 ||
atha vāyumabruvanvāyavētadvijānīhi
kimētadyakṣamiti tathēti || 7 ||
tadabhyadravattamabhyavadatkō:’sīti vāyurvā
ahamasmītyabravīnmātariśvā vā ahamasmīti || 8 ||
tasmiṁstvayi kiṁ vīryamityapīdagṁ
sarvamādadīya yadidaṁ pr̥thivyāmiti || 9 ||
tasmai tr̥ṇaṁ nidadhāvētadādatsvēti
tadupaprēyāya sarvajavēna tanna śaśākādātuṁ sa tata ēva
nivavr̥tē naitadaśakaṁ vijñātuṁ yadētadyakṣamiti || 10 ||
athēndramabruvanmaghavannētadvijānīhi kimētadyakṣamiti tathēti
tadabhyadravattasmāttirōdadhē || 11 ||
sa tasminnēvākāśē striyamājagāma bahuśōbhamānāmumāgṁ
haimavatīṁ tāgṁ hōvāca kimētadyakṣamiti || 12 ||
|| caturthaḥ khaṇḍaḥ ||
sā brahmēti hōvāca brahmaṇō vā ētadvijayē mahīyadhvamiti
tatō haiva vidāṁcakāra brahmēti || 1 ||
tasmādvā ētē dēvā atitarāmivānyāndēvānyadagnirvāyurindrastēna
hyēnannēdiṣṭhaṁ paspr̥śustē hyēnatprathamō vidāṁcakāra brahmēti || 2 ||
tasmādvā indrō:’titarāmivānyāndēvānsa hyēnannēdiṣṭhaṁ pasparśa sa hyēnatprathamō vidāṁcakāra brahmēti || 3 ||
tasyaiṣa ādēśō yadētadvidyutō vyadyutadā 3
itīnnyamīmiṣadā 3 ityadhidaivatam || 4 ||
athādhyātmaṁ yadētadgacchatīva ca manō:’nēna
caitadupasmaratyabhīkṣṇagṁ saṅkalpaḥ || 5 ||
taddha tadvanaṁ nāma tadvanamityupāsitavyaṁ sa ya ētadēvaṁ vēdābhi
hainagṁ sarvāṇi bhūtāni saṁvāñchanti || 6 ||
upaniṣadaṁ bhō brūhītyuktā ta upaniṣadbrāhmīṁ vāva ta upaniṣadamabrūmēti || 7 ||
tasai tapō damaḥ karmēti pratiṣṭhā vēdāḥ sarvāṅgāni satyamāyatanam || 8 ||
yō vā ētāmēvaṁ vēdāpahatya pāpmānamanantē svargē lōkē jyēyē pratitiṣṭhati pratitiṣṭhati || 9 ||
|| śānti pāṭhaḥ ||
ōṁ āpyāyantu mamāṅgāni vākprāṇaścakṣuḥ śrōtramathō balamindriyāṇi ca sarvāṇi | sarvaṁ brahmaupaniṣadaṁ mā:’haṁ brahma nirākuryāṁ mā mā brahma
nirākarōdanirākaraṇamastvanirākaraṇaṁ mē:’stu | tadātmani niratē ya upaniṣatsu dharmāstē mayi santu tē mayi santu |
ōṁ śāntiḥ śāntiḥ śāntiḥ ||
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.