Read in తెలుగు / ಕನ್ನಡ / தமிழ் / देवनागरी / English (IAST)
|| హనూమజ్జానకీసంవాదోపక్రమః ||
సోఽవతీర్య ద్రుమాత్తస్మాద్విద్రుమప్రతిమాననః |
వినీతవేషః కృపణః ప్రణిపత్యోపసృత్య చ || ౧ ||
తామబ్రవీన్మహాతేజా హనూమాన్మారుతాత్మజః |
శిరస్యంజలిమాధాయ సీతాం మధురయా గిరా || ౨ ||
కా ను పద్మపలాశాక్షి క్లిష్టకౌశేయవాసిని |
ద్రుమస్య శాఖామాలంబ్య తిష్ఠసి త్వమనిందితే || ౩ ||
కిమర్థం తవ నేత్రాభ్యాం వారి స్రవతి శోకజమ్ |
పుండరీకపలాశాభ్యాం విప్రకీర్ణమివోదకమ్ || ౪ ||
సురాణామసురాణాం వా నాగగంధర్వరక్షసామ్ |
యక్షాణాం కిన్నరాణాం వా కా త్వం భవసి శోభనే || ౫ ||
కా త్వం భవసి రుద్రాణాం మరుతాం వా వరాననే |
వసూనాం వా వరారోహే దేవతా ప్రతిభాసి మే || ౬ ||
కిం ను చంద్రమసా హీనా పతితా విబుధాలయాత్ |
రోహిణీ జ్యోతిషాం శ్రేష్ఠా శ్రేష్ఠా సర్వగుణాన్వితా || ౭ ||
కా త్వం భవసి కల్యాణి త్వమనిందితలోచనే |
కోపాద్వా యది వా మోహాద్భర్తారమసితేక్షణే || ౮ ||
వసిష్ఠం కోపయిత్వా త్వం నాసి కల్యాణ్యరుంధతీ |
కో ను పుత్రః పితా భ్రాతా భర్తా వా తే సుమధ్యమే || ౯ ||
అస్మాల్లోకాదముం లోకం గతం త్వమనుశోచసి |
రోదనాదతినిఃశ్వాసాద్భూమిసంస్పర్శనాదపి || ౧౦ ||
న త్వాం దేవీమహం మన్యే రాజ్ఞః సంజ్ఞావధారణాత్ |
వ్యంజనాని చ తే యాని లక్షణాని చ లక్షయే || ౧౧ ||
మహిషీ భూమిపాలస్య రాజకన్యాఽసి మే మతా |
రావణేన జనస్థానాద్బలాదపహృతా యది || ౧౨ ||
సీతా త్వమసి భద్రం తే తన్మమాచక్ష్వ పృచ్ఛతః |
యథా హి తవ వై దైన్యం రూపం చాప్యతిమానుషమ్ || ౧౩ ||
తపసా చాన్వితో వేషస్త్వం రామమహిషీ ధ్రువమ్ |
సా తస్య వచనం శ్రుత్వా రామకీర్తనహర్షితా || ౧౪ ||
ఉవాచ వాక్యం వైదేహీ హనుమంతం ద్రుమాశ్రితమ్ |
పృథివ్యాం రాజసింహానాం ముఖ్యస్య విదితాత్మనః || ౧౫ ||
స్నుషా దశరథస్యాహం శత్రుసైన్యప్రమాథినః | [ప్రతాపినః]
దుహితా జనకస్యాహం వైదేహస్య మహాత్మనః || ౧౬ ||
సీతా చ నామ నామ్నాహం భార్యా రామస్య ధీమతః |
సమా ద్వాదశ తత్రాహం రాఘవస్య నివేశనే || ౧౭ ||
భుంజానా మానుషాన్భోగాన్సర్వకామసమృద్ధినీ |
తత్ర త్రయోదశే వర్షే రాజ్యేనేక్ష్వాకునందనమ్ || ౧౮ ||
అభిషేచయితుం రాజా సోపాధ్యాయః ప్రచక్రమే |
తస్మిన్సంభ్రియమాణే తు రాఘవస్యాభిషేచనే || ౧౯ ||
కైకేయీ నామ భర్తారం దేవీ వచనమబ్రవీత్ |
న పిబేయం న ఖాదేయం ప్రత్యహం మమ భోజనమ్ || ౨౦ ||
ఏష మే జీవితస్యాంతో రామో యద్యభిషిచ్యతే |
యత్తదుక్తం త్వయా వాక్యం ప్రీత్యా నృపతిసత్తమ || ౨౧ ||
తచ్చేన్న వితథం కార్యం వనం గచ్ఛతు రాఘవః |
స రాజా సత్యవాగ్దేవ్యా వరదానమనుస్మరన్ || ౨౨ ||
ముమోహ వచనం శ్రుత్వా కైకేయ్యాః క్రూరమప్రియమ్ |
తతస్తు స్థవిరో రాజా సత్యే ధర్మే వ్యవస్థితః || ౨౩ ||
జ్యేష్ఠం యశస్వినం పుత్రం రుదన్రాజ్యమయాచత |
స పితుర్వచనం శ్రీమానభిషేకాత్పరం ప్రియమ్ || ౨౪ ||
మనసా పూర్వమాసాద్య వాచా ప్రతిగృహీతవాన్ |
దద్యాన్న ప్రతిగృహ్ణీయాన్న బ్రూయత్కించిదప్రియమ్ || ౨౫ ||
అపి జీవితహేతోర్వా రామః సత్యపరాక్రమః |
స విహాయోత్తరీయాణి మహార్హాణి మహాయశాః || ౨౬ ||
విసృజ్య మనసా రాజ్యం జనన్యై మాం సమాదిశత్ |
సాఽహం తస్యాగ్రతస్తూర్ణం ప్రస్థితా వనచారిణీ || ౨౭ ||
న హి మే తేన హీనాయా వాసః స్వర్గేఽపి రోచతే |
ప్రాగేవ తు మహాభాగః సౌమిత్రిర్మిత్రనందనః || ౨౮ ||
పూర్వజస్యానుయాత్రార్థే ద్రుమచీరైరలంకృతః |
తే వయం భర్తురాదేశం బహుమాన్య దృఢవ్రతాః || ౨౯ ||
ప్రవిష్టాః స్మ పురాదృష్టం వనం గంభీరదర్శనమ్ |
వసతో దండకారణ్యే తస్యాహమమితౌజసః || ౩౦ ||
రక్షసాఽపహృతా భార్యా రావణేన దురాత్మనా |
ద్వౌ మాసౌ తేన మే కాలో జీవితానుగ్రహః కృతః |
ఊర్ధ్వం ద్వాభ్యాం తు మాసాభ్యాం తతస్త్యక్ష్యామి జీవితమ్ || ౩౧ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే త్రయస్త్రింశః సర్గః || ౩౩ ||
సుందరకాండ – చతుస్త్రింశః సర్గః (౩౪) >>
సంపూర్ణ వాల్మీకి సుందరకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
