Read in తెలుగు / ಕನ್ನಡ / தமிழ் / देवनागरी / English (IAST)
|| సారథివిజ్ఞేయమ్ ||
స తు మోహాత్సుసంక్రుద్ధః కృతాంతబలచోదితః |
క్రోధసంరక్తనయనో రావణః సూతమబ్రవీత్ || ౧ ||
హీనవీర్యమివాశక్తం పౌరుషేణ వివర్జితమ్ |
భీరుం లఘుమివాసత్త్వం విహీనమివ తేజసా || ౨ ||
విముక్తమివ మాయాభిరస్త్రైరివ బహిష్కృతమ్ |
మామవజ్ఞాయ దుర్బుద్ధే స్వయా బుద్ధ్యా విచేష్టసే || ౩ ||
కిమర్థం మామవజ్ఞాయ మచ్ఛందమనవేక్ష్య చ |
త్వయా శత్రోః సమక్షం మే రథోఽయమపవాహితః || ౪ ||
త్వయాఽద్య హి మమానార్య చిరకాలసమార్జితమ్ |
యశో వీర్యం చ తేజశ్చ ప్రత్యయశ్చ వినాశితః || ౫ ||
శత్రోః ప్రఖ్యాతవీర్యస్య రంజనీయస్య విక్రమైః |
పశ్యతో యుద్ధలుబ్ధోఽహం కృతః కాపురుషస్త్వయా || ౬ ||
యస్త్వం రథమిమం మోహాన్న చోద్వహసి దుర్మతే |
సత్యోఽయం ప్రతితర్కో మే పరేణ త్వముపస్కృతః || ౭ ||
న హి తద్విద్యతే కర్మ సుహృదో హితకాంక్షిణః |
రిపూణాం సదృశం చైతన్న త్వయైతత్స్వనుష్ఠితమ్ || ౮ ||
నివర్తయ రథం శీఘ్రం యావన్నోపైతి మే రిపుః |
యది వాఽధ్యుషితో వాఽసి స్మర్యంతే యది వా గుణాః || ౯ ||
ఏవం పరుషముక్తస్తు హితబుద్ధిరబుద్ధినా |
అబ్రవీద్రావణం సూతో హితం సానునయం వచః || ౧౦ ||
న భీతోఽస్మి న మూఢోఽస్మి నోపజప్తోఽస్మి శత్రుభిః |
న ప్రమత్తో న నిఃస్నేహో విస్మృతా న చ సత్క్రియా || ౧౧ ||
మయా తు హితకామేన యశశ్చ పరిరక్షతా |
స్నేహప్రస్కన్నమనసా ప్రియమిత్యప్రియం కృతమ్ || ౧౨ ||
నాస్మిన్నర్థే మహారాజ త్వం మాం ప్రియహితే రతమ్ |
కశ్చిల్లఘురివానార్యో దోషతో గంతుమర్హసి || ౧౩ ||
శ్రూయతాం త్వభిధాస్యామి యన్నిమిత్తం మయా రథః |
నదీవేగ ఇవాభోగే సంయుగే వినివర్తితః || ౧౪ ||
శ్రమం తవావగచ్ఛామి మహతా రణకర్మణా |
న హి తే వీర సౌముఖ్యం ప్రహర్షం వోపధారయే || ౧౫ ||
రథోద్వహనఖిన్నాశ్చ త ఇమే రథవాజినః |
దీనా ఘర్మపరిశ్రాంతా గావో వర్షహతా ఇవ || ౧౬ ||
నిమిత్తాని చ భూయిష్ఠం యాని ప్రాదుర్భవంతి నః |
తేషు తేష్వభిపన్నేషు లక్షయామ్యప్రదక్షిణమ్ || ౧౭ ||
దేశకాలౌ చ విజ్ఞేయౌ లక్షణానీంగితాని చ |
దైన్యం ఖేదశ్చ హర్షశ్చ రథినశ్చ బలాబలమ్ || ౧౮ ||
స్థలనిమ్నాని భూమేశ్చ సమాని విషమాణి చ |
యుద్ధకాలశ్చ విజ్ఞేయః పరస్యాంతరదర్శనమ్ || ౧౯ ||
ఉపయానాపయానే చ స్థానం ప్రత్యపసర్పణమ్ |
సర్వమేతద్రథస్థేన జ్ఞేయం రథకుటుంబినా || ౨౦ ||
తవ విశ్రమహేతోశ్చ తథైషాం రథవాజినామ్ |
రౌద్రం వర్జయతా ఖేదం క్షమం కృతమిదం మయా || ౨౧ ||
న మయా స్వేచ్ఛయా వీర రథోఽయమపవాహితః |
భర్తృస్నేహపరీతేన మయేదం యత్కృతం విభో || ౨౨ ||
ఆజ్ఞాపయ యథాతత్త్వం వక్ష్యస్యరినిషూదన |
తత్కరిష్యామ్యహం వీర గతానృణ్యేన చేతసా || ౨౩ ||
సంతుష్టస్తేన వాక్యేన రావణస్తస్య సారథేః |
ప్రశస్యైనం బహువిధం యుద్ధలుబ్ధోఽబ్రవీదిదమ్ || ౨౪ ||
రథం శీఘ్రమిమం సూత రాఘవాభిముఖం కురు |
నాహత్వా సమరే శత్రూన్నివర్తిష్యతి రావణః || ౨౫ ||
ఏవముక్త్వా తతస్తుష్టో రావణో రాక్షసేశ్వరః |
దదౌ తస్మై శుభం హ్యేకం హస్తాభరణముత్తమమ్ |
శ్రుత్వా రావణవాక్యం తు సారథిః సన్న్యవర్తత || ౨౬ ||
తతో ద్రుతం రావణవాక్యచోదితః
ప్రచోదయామాస హయాన్స సారథిః |
స రాక్షసేంద్రస్య తతో మహారథః
క్షణేన రామస్య రణాగ్రతోఽభవత్ || ౨౭ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే షడుత్తరశతతమః సర్గః || ౧౦౬ ||
యుద్ధకాండ సప్తోత్తరశతతమః సర్గః (౧౦౭) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
