Read in తెలుగు / ಕನ್ನಡ / தமிழ் / देवनागरी / English (IAST)
|| సంకులాంతఃపురమ్ ||
తస్యాలయవరిష్ఠస్య మధ్యే విపులమాయతమ్ |
దదర్శ భవనశ్రేష్ఠం హనుమాన్మారుతాత్మజః || ౧ ||
అర్ధయోజనవిస్తీర్ణమాయతం యోజనం హి తత్ |
భవనం రాక్షసేంద్రస్య బహుప్రాసాదసంకులమ్ || ౨ ||
మార్గమాణస్తు వైదేహీం సీతామాయతలోచనామ్ |
సర్వతః పరిచక్రామ హనుమానరిసూదనః || ౩ ||
ఉత్తమం రాక్షసావాసం హనుమానవలోకయన్ |
ఆససాదాథ లక్ష్మీవాన్ రాక్షసేంద్రనివేశనమ్ || ౪ ||
చతుర్విషాణైర్ద్విరదైస్త్రివిషాణైస్తథైవ చ |
పరిక్షిప్తమసంబాధం రక్ష్యమాణముదాయుధైః || ౫ ||
రాక్షసీభిశ్చ పత్నీభీ రావణస్య నివేశనమ్ |
ఆహృతాభిశ్చ విక్రమ్య రాజకన్యాభిరావృతమ్ || ౬ ||
తన్నక్రమకరాకీర్ణం తిమింగిలఝషాకులమ్ |
వాయువేగసమాధూతం పన్నగైరివ సాగరమ్ || ౭ ||
యా హి వైశ్రవణే లక్ష్మీర్యా చేంద్రే హరివాహనే |
సా రావణగృహే సర్వా నిత్యమేవానపాయినీ || ౮ ||
యా చ రాజ్ఞః కుబేరస్య యమస్య వరుణస్య చ |
తాదృశీ తద్విశిష్టా వా ఋద్ధీ రక్షోగృహేష్విహ || ౯ ||
తస్య హర్మ్యస్య మధ్యస్థం వేశ్మ చాన్యత్సునిర్మితమ్ |
బహునిర్యూహసంకీర్ణం దదర్శ పవనాత్మజః || ౧౦ ||
బ్రహ్మణోఽర్థే కృతం దివ్యం దివి యద్విశ్వకర్మణా |
విమానం పుష్పకం నామ సర్వరత్నవిభూషితమ్ || ౧౧ ||
పరేణ తపసా లేభే యత్కుబేరః పితామహాత్ |
కుబేరమోజసా జిత్వా లేభే తద్రాక్షసేశ్వరః || ౧౨ ||
ఈహామృగసమాయుక్తైః కార్తస్వరహిరణ్మయైః |
సుకృతైరాచితం స్తంభైః ప్రదీప్తమివ చ శ్రియా || ౧౩ ||
మేరుమందరసంకాశైరుల్లిఖద్భిరివాంబరమ్ |
కూటాగారైః శుభాకారైః సర్వతః సమలంకృతమ్ || ౧౪ ||
జ్వలనార్కప్రతీకాశం సుకృతం విశ్వకర్మణా |
హేమసోపానసంయుక్తం చారుప్రవరవేదికమ్ || ౧౫ ||
జాలవాతాయనైర్యుక్తం కాంచనైః స్ఫాటికైరపి |
ఇంద్రనీలమహానీలమణిప్రవరవేదికమ్ || ౧౬ ||
విద్రుమేణ విచిత్రేణ మణిభిశ్చ మహాధనైః |
నిస్తులాభిశ్చ ముక్తాభిస్తలేనాభివిరాజితమ్ || ౧౭ ||
చందనేన చ రక్తేన తపనీయనిభేన చ |
సుపుణ్యగంధినా యుక్తమాదిత్యతరుణోపమమ్ || ౧౮ ||
కూటాగారైర్వరాకారైర్వివిధైః సమలంకృతమ్ |
విమానం పుష్పకం దివ్యమారురోహ మహాకపిః || ౧౯ ||
తత్రస్థః స తదా గంధం పానభక్ష్యాన్నసంభవమ్ |
దివ్యం సమ్మూర్ఛితం జిఘ్రద్రూపవంతమివానిలమ్ || ౨౦ ||
స గంధస్తం మహాసత్త్వం బంధుర్బంధుమివోత్తమమ్ |
ఇత ఏహీత్యువాచేవ తత్ర యత్ర స రావణః || ౨౧ ||
తతస్తాం ప్రస్థితః శాలాం దదర్శ మహతీం శుభామ్ |
రావణస్య మనఃకాంతాం కాంతామివ వరస్త్రియమ్ || ౨౨ ||
మణిసోపానవికృతాం హేమజాలవిరాజితామ్ | [విభూషితామ్]
స్ఫాటికైరావృతతలాం దంతాంతరితరూపికామ్ || ౨౩ ||
ముక్తాభిశ్చ ప్రవాలైశ్చ రూప్యచామీకరైరపి |
విభూషితాం మణిస్తంభైః సుబహుస్తంభభూషితామ్ || ౨౪ ||
సమైరృజుభిరత్యుచ్చైః సమంతాత్సువిభూషితైః |
స్తంభైః పక్షైరివాత్యుచ్చైర్దివం సంప్రస్థితామివ || ౨౫ ||
మహత్యా కుథయాస్తీర్ణాం పృథివీలక్షణాంకయా |
పృథివీమివ విస్తీర్ణాం సరాష్ట్రగృహమాలినీమ్ || ౨౬ ||
నాదితాం మత్తవిహగైర్దివ్యగంధాధివాసితామ్ |
పరార్ధ్యాస్తరణోపేతాం రక్షోధిపనిషేవితామ్ || ౨౭ ||
ధూమ్రామగరుధూపేన విమలాం హంసపాండురామ్ |
చిత్రాం పుష్పోపహారేణ కల్మాషీమివ సుప్రభామ్ || ౨౮ ||
మనఃసంహ్లాదజననీం వర్ణస్యాపి ప్రసాదినీమ్ |
తాం శోకనాశినీం దివ్యాం శ్రియః సంజననీమివ || ౨౯ ||
ఇంద్రియాణీంద్రియార్థైశ్చ పంచపంచభిరుత్తమైః |
తర్పయామాస మాతేవ తదా రావణపాలితా || ౩౦ ||
స్వర్గోఽయం దేవలోకోఽయమింద్రస్యేయం పురీ భవేత్ |
సిద్ధిర్వేయం పరా హి స్యాదిత్యమన్యత మారుతిః || ౩౧ ||
ప్రధ్యాయత ఇవాపశ్యత్ప్రదీపాంస్తత్ర కాంచనాన్ |
ధూర్తానివ మహాధూర్తైర్దేవనేన పరాజితాన్ || ౩౨ ||
దీపానాం చ ప్రకాశేన తేజసా రావణస్య చ |
అర్చిర్భిర్భూషణానాం చ ప్రదీప్తేత్యభ్యమన్యత || ౩౩ ||
తతోఽపశ్యత్కుథాసీనం నానావర్ణాంబరస్రజమ్ |
సహస్రం వరనారీణాం నానావేషవిభూషితమ్ || ౩౪ ||
పరివృత్తేఽర్ధరాత్రే తు పాననిద్రావశం గతమ్ |
క్రీడిత్వోపరతం రాత్రౌ సుష్వాప బలవత్తదా || ౩౫ ||
తత్ప్రసుప్తం విరురుచే నిఃశబ్దాంతరభూషణమ్ |
నిఃశబ్దహంసభ్రమరం యథా పద్మవనం మహత్ || ౩౬ ||
తాసాం సంవృతదంతాని మీలితాక్షాణి మారుతిః |
అపశ్యత్పద్మగంధీని వదనాని సుయోషితామ్ || ౩౭ ||
ప్రబుద్ధానీవ పద్మాని తాసాం భూత్వా క్షపాక్షయే |
పునః సంవృతపత్రాణి రాత్రావివ బభుస్తదా || ౩౮ ||
ఇమాని ముఖపద్మాని నియతం మత్తషట్పదాః |
అంబుజానీవ ఫుల్లాని ప్రార్థయంతి పునః పునః || ౩౯ ||
ఇతి చామన్యత శ్రీమానుపపత్త్యా మహాకపిః |
మేనే హి గుణతస్తాని సమాని సలిలోద్భవైః || ౪౦ ||
సా తస్య శుశుభే శాలా తాభిః స్త్రీభిర్విరాజితా |
శారదీవ ప్రసన్నా ద్యౌస్తారాభిరభిశోభితా || ౪౧ ||
స చ తాభిః పరివృతః శుశుభే రాక్షసాధిపః |
యథా హ్యుడుపతిః శ్రీమాంస్తారాభిరభిసంవృతః || ౪౨ ||
యాశ్చ్యవంతేఽమ్బరాత్తారాః పుణ్యశేషసమావృతాః |
ఇమాస్తాః సంగతాః కృత్స్నా ఇతి మేనే హరిస్తదా || ౪౩ ||
తారాణామివ సువ్యక్తం మహతీనాం శుభార్చిషామ్ |
ప్రభా వర్ణప్రసాదాశ్చ విరేజుస్తత్ర యోషితామ్ || ౪౪ ||
వ్యావృత్తగురుపీనస్రక్ప్రకీర్ణవరభూషణాః |
పానవ్యాయామకాలేషు నిద్రాపహృతచేతసః || ౪౫ ||
వ్యావృత్తతిలకాః కాశ్చిత్కాశ్చిదుద్భ్రాంతనూపురాః |
పార్శ్వే గలితహారాశ్చ కాశ్చిత్పరమయోషితః || ౪౬ ||
ముక్తాహారావృతాశ్చాన్యాః కాశ్చిద్విస్రస్తవాససః |
వ్యావిద్ధరశనాదామాః కిశోర్య ఇవ వాహితాః || ౪౭ ||
సుకుండలధరాశ్చాన్యా విచ్ఛిన్నమృదితస్రజః |
గజేంద్రమృదితాః ఫుల్లా లతా ఇవ మహావనే || ౪౮ ||
చంద్రాంశుకిరణాభాశ్చ హారాః కాసాంచిదుత్కటాః |
హంసా ఇవ బభుః సుప్తాః స్తనమధ్యేషు యోషితామ్ || ౪౯ ||
అపరాసాం చ వైడూర్యాః కాదంబా ఇవ పక్షిణః |
హేమసూత్రాణి చాన్యాసాం చక్రవాకా ఇవాభవన్ || ౫౦ ||
హంసకారండవాకీర్ణాశ్చక్రవాకోపశోభితాః |
ఆపగా ఇవ తా రేజుర్జఘనైః పులినైరివ || ౫౧ ||
కింకిణీజాలసంకోశాస్తా హైమవిపులాంబుజాః |
భావగ్రాహా యశస్తీరాః సుప్తా నద్య ఇవాబభుః || ౫౨ ||
మృదుష్వంగేషు కాసాంచిత్కుచాగ్రేషు చ సంస్థితాః |
బభూవుర్భూషణానీవ శుభా భూషణరాజయః || ౫౩ ||
అంశుకాంతాశ్చ కాసాంచిన్ముఖమారుతకంపితాః |
ఉపర్యుపరి వక్త్రాణాం వ్యాధూయంతే పునః పునః || ౫౪ ||
తాః పతాకా ఇవోద్ధూతాః పత్నీనాం రుచిరప్రభాః |
నానావర్ణః సువర్ణానాం వక్త్రమూలేషు రేజిరే || ౫౫ ||
వవల్గుశ్చాత్ర కాసాంచిత్కుండలాని శుభార్చిషామ్ |
ముఖమారుతసంసర్గాన్మందం మందం సుయోషితామ్ || ౫౬ ||
శర్కరాసవగంధైశ్చ ప్రకృత్యా సురభిః సుఖః |
తాసాం వదననిఃశ్వాసః సిషేవే రావణం తదా || ౫౭ ||
రావణాననశంకాశ్చ కాశ్చిద్రావణయోషితః |
ముఖాని స్మ సపత్నీనాముపాజిఘ్రన్పునః పునః || ౫౮ ||
అత్యర్థం సక్తమనసో రావణే తా వరస్త్రియః |
అస్వతంత్రాః సపత్నీనాం ప్రియమేవాచరంస్తదా || ౫౯ ||
బాహూనుపనిధాయాన్యాః పారిహార్యవిభూషితాన్ |
అంశుకాని చ రమ్యాణి ప్రమదాస్తత్ర శిశ్యిరే || ౬౦ ||
అన్యా వక్షసి చాన్యస్యాస్తస్యాః కాశ్చిత్పునర్భుజమ్ |
అపరా త్వంకమన్యస్యాస్తస్యాశ్చాప్యపరా భుజౌ || ౬౧ ||
ఊరుపార్శ్వకటీపృష్ఠమన్యోన్యస్య సమాశ్రితాః |
పరస్పరనివిష్టాంగ్యో మదస్నేహవశానుగాః || ౬౨ ||
అన్యోన్యస్యాంగసంస్పర్శాత్ప్రీయమాణాః సుమధ్యమాః |
ఏకీకృతభుజాః సర్వాః సుషుపుస్తత్ర యోషితః || ౬౩ ||
అన్యోన్యభుజసూత్రేణ స్త్రీమాలా గ్రథితా హి సా |
మాలేవ గ్రథితా సూత్రే శుశుభే మత్తషట్పదా || ౬౪ ||
లతానాం మాధవే మాసి ఫుల్లానాం వాయుసేవనాత్ |
అన్యోన్యమాలాగ్రథితం సంసక్తకుసుమోచ్చయమ్ || ౬౫ ||
వ్యతివేష్టితసుస్కంధమన్యోన్యభ్రమరాకులమ్ |
ఆసీద్వనమివోద్ధూతం స్త్రీవనం రావణస్య తత్ || ౬౬ ||
ఉచితేష్వపి సువ్యక్తం న తాసాం యోషితాం తదా |
వివేకః శక్య ఆధాతుం భూషణాంగాంబరస్రజామ్ || ౬౭ ||
రావణే సుఖసంవిష్టే తాః స్త్రియో వివిధప్రభాః |
జ్వలంతః కాంచనా దీపాః ప్రైక్షంతానిమిషా ఇవ || ౬౮ ||
రాజర్షిపితృదైత్యానాం గంధర్వాణాం చ యోషితః |
రాక్షసానాం చ యాః కన్యాస్తస్య కామవశం గతాః || ౬౯ ||
యుద్ధకామేన తాః సర్వా రావణేన హృతాః స్త్రియః |
సమదా మదనేనైవ మోహితాః కాశ్చిదాగతాః || ౭౦ ||
న తత్ర కాశ్చిత్ప్రమదాః ప్రసహ్య
వీర్యోపపన్నేన గుణేన లబ్ధాః |
న చాన్యకామాపి న చాన్యపూర్వా
వినా వరార్హాం జనకాత్మజాం తామ్ || ౭౧ ||
న చాకులీనా న చ హీనరూపా
నాదక్షిణా నానుపచారయుక్తా |
భార్యాఽభవత్తస్య న హీనసత్త్వా
న చాపి కాంతస్య న కామనీయా || ౭౨ ||
బభూవ బుద్ధిస్తు హరీశ్వరస్య
యదీదృశీ రాఘవధర్మపత్నీ |
ఇమా యథా రాక్షసరాజభార్యాః
సుజాతమస్యేతి హి సాధుబుద్ధేః || ౭౩ ||
పునశ్చ సోఽచింతయదార్తరూపో
ధ్రువం విశిష్టా గుణతో హి సీతా |
అథాయమస్యాం కృతవాన్మహాత్మా
లంకేశ్వరః కష్టమనార్యకర్మ || ౭౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే నవమః సర్గః || ౯ ||
సంపూర్ణ వాల్మీకి సుందరకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
