Read in తెలుగు / ಕನ್ನಡ / தமிழ் / देवनागरी / English (IAST)
శ్రీమాన్వేంకటనాథార్యః కవితార్కికకేసరీ |
వేదాంతాచార్యవర్యో మే సన్నిధత్తాం సదా హృది ||
ఈశానాం జగతోఽస్య వేంకటపతేర్విష్ణోః పరాం ప్రేయసీం
తద్వక్షఃస్థలనిత్యవాసరసికాం తత్క్షాంతిసంవర్ధినీమ్ |
పద్మాలంకృత పాణిపల్లవయుగాం పద్మాసనస్థాం శ్రియం
వాత్సల్యాది గుణోజ్జ్వలాం భగవతీం వందే జగన్మాతరం ||
మానాతీతప్రథితవిభవాం మంగళం మంగళానాం
వక్షఃపీఠీం మధువిజయినో భూషయంతీం స్వకాంత్యా |
ప్రత్యక్షానుశ్రవికమహిమప్రార్థినీనాం ప్రజానాం
శ్రేయోమూర్తిం శ్రియమశరణస్త్వాం శరణ్యాం ప్రపద్యే || ౧ ||
ఆవిర్భావః కలశజలధావధ్వరే వాఽపి యస్యాః
స్థానం యస్యాః సరసిజవనం విష్ణువక్షఃస్థలం వా |
భూమా యస్యా భువనమఖిలం దేవి దివ్యం పదం వా
స్తోకప్రజ్ఞైరనవధిగుణా స్తూయసే సా కథం త్వమ్ || ౨ ||
స్తోతవ్యత్వం దిశతి భవతీ దేహిభిః స్తూయమానా
తామేవ త్వామనితరగతిః స్తోతుమాశంసమానః |
సిద్ధారంభః సకలభువనశ్లాఘనీయో భవేయం
సేవాపేక్షా తవ చరణయోః శ్రేయసే కస్య న స్యాత్ || ౩ ||
యత్సంకల్పాద్భవతి కమలే యత్ర దేహిన్యమీషాం
జన్మస్థేమప్రళయరచనా జంగమాజంగమానామ్ |
తత్కల్యాణం కిమపి యమినామేకలక్ష్యం సమాధౌ
పూర్ణం తేజః స్ఫురతి భవతీపాదలాక్షారసాంకమ్ || ౪ ||
నిష్ప్రత్యూహప్రణయఘటితం దేవి నిత్యానపాయం
విష్ణుస్త్వం చేత్యనవధిగుణం ద్వంద్వమన్యోన్యలక్ష్యమ్ |
శేషశ్చిత్తం విమలమనసాం మౌలయశ్చ శ్రుతీనాం
సంపద్యంతే విహరణవిధౌ యస్య శయ్యావిశేషాః || ౫ ||
ఉద్దేశ్యత్వం జనని భజతోరుజ్ఝితోపాధిగంధం
ప్రత్యగ్రూపే హవిషి యువయోరేకశేషిత్వయోగాత్ |
పద్మే పత్యుస్తవ చ నిగమైర్నిత్యమన్విష్యమాణో
నావచ్ఛేదం భజతి మహిమా నర్తయన్మానసం నః || ౬ ||
పశ్యంతీషు శ్రుతిషు పరితః సూరిబృందేన సార్థం
మధ్యేకృత్య త్రిగుణఫలకం నిర్మితస్థానభేదమ్ |
విశ్వాధీశప్రణయినీ సదా విభ్రమద్యూతవృత్తౌ
బ్రహ్మేశాద్యా దధతి యువయోరక్షశారప్రచారమ్ || ౭ ||
అస్యేశానా త్వమసి జగతః సంశ్రయంతీ ముకుందం
లక్ష్మీః పద్మా జలధితనయా విష్ణుపత్నీందిరేతి |
యన్నామాని శ్రుతిపరిపణాన్యేవమావర్తయంతో
నావర్తంతే దురితపవనప్రేరితే జన్మచక్రే || ౮ ||
త్వామేవాహుః కతిచిదపరే త్వత్ప్రియం లోకనాథం
కిం తైరంతఃకలహమలినైః కించిదుత్తీర్య మగ్నైః |
త్వత్సంప్రీత్యై విహరతి హరౌ సమ్ముఖీనాం శ్రుతీనాం
భావారూఢౌ భగవతి యువాం దంపతీ దైవతం నః || ౯ ||
ఆపన్నార్తిప్రశమనవిధౌ బద్ధదీక్షస్య విష్ణో-
-రాచఖ్యుస్త్వాం ప్రియసహచరీమైకమత్యోపపన్నామ్ |
ప్రాదుర్భావైరపి సమతనుః ప్రాధ్వమన్వీయసే త్వం
దూరోత్క్షిప్తైరివ మధురతా దుగ్ధరాశేస్తరంగైః || ౧౦ ||
ధత్తే శోభాం హరిమరకతే తావకీ మూర్తిరాద్యా
తన్వీ తుంగస్తనభరనతా తప్తజాంబూనదాభా |
యస్యాం గచ్ఛంత్యుదయవిలయైర్నిత్యమానందసింధా-
-విచ్ఛావేగోల్లసితలహరీవిభ్రమం వ్యక్తయస్తే || ౧౧ ||
ఆసంసారం వితతమఖిలం వాఙ్మయం యద్విభూతి-
-ర్యద్భ్రూభంగాత్కుసుమధనుషః కింకరో మేరుధన్వా |
యస్యాం నిత్యం నయనశతకైరేకలక్ష్యో మహేంద్రః
పద్మే తాసాం పరిణతిరసౌ భావలేశైస్త్వదీయైః || ౧౨ ||
అగ్రే భర్తుః సరసిజమయే భద్రపీఠే నిషణ్ణా-
-మంభోరాశేరధిగతసుధాసంప్లవాదుత్థితాం త్వామ్ |
పుష్పాసారస్థగితభువనైః పుష్కలావర్తకాద్యైః
క్లుప్తారంభాః కనకకలశైరభ్యషించన్గజేంద్రాః || ౧౩ ||
ఆలోక్య త్వామమృతసహజే విష్ణువక్షఃస్థలస్థాం
శాపాక్రాంతాః శరణమగమన్సావరోధాః సురేంద్రాః |
లబ్ధ్వా భూయస్త్రిభువనమిదం లక్షితం త్వత్కటాక్షైః
సర్వాకారస్థిరసముదయాం సంపదం నిర్విశంతి || ౧౪ ||
ఆర్తత్రాణవ్రతిభిరమృతాసారనీలాంబువాహై-
-రంభోజానాముషసి మిషతామంతరంగైరపాంగైః |
యస్యాం యస్యాం దిశి విహరతే దేవి దృష్టిస్త్వదీయా
తస్యాం తస్యామహమహమికాం తన్వతే సంపదోఘాః || ౧౫ ||
యోగారంభత్వరితమనసో యుష్మదైకాంత్యయుక్తం
ధర్మం ప్రాప్తుం ప్రథమమిహ యే ధారయంతే ధనాయామ్ |
తేషాం భూమేర్ధనపతిగృహాదంబరాదంబుధేర్వా
ధారా నిర్యాంత్యధికమధికం వాంఛితానాం వసూనామ్ || ౧౬ ||
శ్రేయస్కామాః కమలనిలయే చిత్రమామ్నాయవాచాం
చూడాపీడం తవ పదయుగం చేతసా ధారయంతః |
ఛత్రచ్ఛాయాసుభగశిరసశ్చామరస్మేరపార్శ్వాః
శ్లాఘాశబ్దశ్రవణముదితాః స్రగ్విణః సంచరంతి || ౧౭ ||
ఊరీకర్తుం కుశలమఖిలం జేతుమాదీనరాతీన్
దూరీకర్తుం దురితనివహం త్యక్తుమాద్యామవిద్యామ్ |
అంబ స్తంబావధికజననగ్రామసీమాంతరేఖా-
-మాలంబంతే విమలమనసో విష్ణుకాంతే దయాం తే || ౧౮ ||
జాతాకాంక్షా జనని యువయోరేకసేవాధికారే
మాయాలీఢం విభవమఖిలం మన్యమానాస్తృణాయ |
ప్రీత్యై విష్ణోస్తవ చ కృతినః ప్రీతిమంతో భజంతే
వేలాభంగప్రశమనఫలం వైదికం ధర్మసేతుమ్ || ౧౯ ||
సేవే దేవి త్రిదశమహిళామౌళిమాలార్చితం తే
సిద్ధిక్షేత్రం శమితవిపదాం సంపదాం పాదపద్మమ్ |
యస్మిన్నీషన్నమితశిరసో యాపయిత్వా శరీరం
వర్తిష్యంతే వితమసి పదే వాసుదేవస్య ధన్యాః || ౨౦ ||
సానుప్రాసప్రకటితదయైః సాంద్రవాత్సల్యదిగ్ధై-
-రంబ స్నిగ్ధైరమృతలహరీలబ్ధసబ్రహ్మచర్యైః |
ఘర్మే తాపత్రయవిరచితే గాఢతప్తం క్షణం మా-
-మాకించన్యగ్లపితమనఘైరాద్రియేథాః కటాక్షైః || ౨౧ ||
సంపద్యంతే భవభయతమీభానవస్త్వత్ప్రసాదా-
-ద్భావాః సర్వే భగవతి హరౌ భక్తిముద్వేలయంతః |
యాచే కిం త్వామహమతిభయశ్శీతలోదారశీలా-
-న్భూయో భూయో దిశసి మహతాం మంగళానాం ప్రబంధాన్ || ౨౨ ||
మాతా దేవి త్వమసి భగవాన్వాసుదేవః పితా మే
జాతః సోఽహం జనని యువయోరేకలక్ష్యం దయాయాః |
దత్తో యుష్మత్పరిజనతయా దేశికైరప్యతస్త్వం
కిం తే భూయః ప్రియమితి కిల స్మేరవక్రా విభాసి || ౨౩ ||
కల్యాణానామవికలనిధిః కాఽపి కారుణ్యసీమా
నిత్యామోదా నిగమవచసాం మౌళిమందారమాలా |
సంపద్దివ్యా మధువిజయినః సన్నిధత్తాం సదా మే
సైషా దేవీ సకలభువనప్రార్థనాకామధేనుః || ౨౪ ||
ఉపచితగురుభక్తేరుత్థితం వేంకటేశా-
-త్కలికలుషనివృత్త్యై కల్ప్యమానం ప్రజానామ్ |
సరసిజనిలయాయాః స్తోత్రమేతత్పఠంతః
సకలకుశలసీమా సార్వభౌమా భవంతి || ౨౫ ||
ఇతి శ్రీమద్వేదాంతదేశికవిరచితా శ్రీస్తుతిః |
గమనిక: పైన ఇవ్వబడిన స్తోత్రము, ఈ పుస్తకములో కూడా ఉన్నది.
శ్రీ లక్ష్మీ స్తోత్రనిధి
(నిత్య పారాయణ గ్రంథము)
మరిన్ని శ్రీ లక్ష్మీ స్తోత్రాలు చూడండి.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
