Read in తెలుగు / ಕನ್ನಡ / தமிழ் / English (IAST)
చతుశ్చత్వారింశదశకమ్ (౪౪) – నామకరణసంస్కారాది
గూఢం వసుదేవగిరా కర్తుం తే నిష్క్రియస్య సంస్కారాన్ |
హృద్గతహోరాతత్వో గర్గమునిస్త్వద్గృహం విభో గతవాన్ || ౪౪-౧ ||
నన్దోఽథ నన్దితాత్మా వృన్దిష్టం మానయన్నముం యమినామ్ |
మన్దస్మితార్ద్రమూచే త్వత్సంస్కారాన్ విధాతుముత్సుకధీః || ౪౪-౨ ||
యదువంశాచార్యత్వాత్సునిభృతమిదమార్య కార్యమితి కథయన్ |
గర్గో నిర్గతపులకశ్చక్రే తవ సాగ్రజస్య నామాని || ౪౪-౩ ||
కథమస్య నామ కుర్వే సహస్రనామ్నో హ్యనన్తనామ్నో వా |
ఇతి నూనం గర్గమునిశ్చక్రే తవ నామ నామ రహసి విభో || ౪౪-౪ ||
కృషిధాతుణకారాభ్యాం సత్తానన్దాత్మతాం కిలాభిలపత్ |
జగదఘకర్షిత్వం వా కథయదృషిః కృష్ణనామ తే వ్యతనోత్ || ౪౪-౫ ||
అన్యాంశ్చ నామభేదాన్ వ్యాకుర్వన్నగ్రజే చ రామాదీన్ |
అతిమానుషానుభావం న్యగదత్త్వామప్రకాశయన్పిత్రే || ౪౪-౬ ||
స్నిహ్యతి యస్తవ పుత్రే ముహ్యతి స న మాయికైః పునశ్శోకైః |
ద్రుహ్యతి యస్స తు నశ్యేదిత్యవదత్తే మహత్త్వమృషివర్యః || ౪౪-౭ ||
జేష్యతి బహుతరదైత్యాన్ నేష్యతి నిజబన్ధులోకమమలపదమ్ |
శ్రోష్యతి సువిమలకీర్తీరస్యేతి భవద్విభూతిమృషిరూచే || ౪౪-౮ ||
అమునైవ సర్వదుర్గం తరితాస్థ కృతాస్థమత్ర తిష్ఠధ్వమ్ |
హరిరేవేత్యనభిలపన్నిత్యాది త్వామవర్ణయత్స మునిః || ౪౪-౯ ||
గర్గేఽథ నిర్గతేఽస్మిన్ నన్దితనన్దాదినన్ద్యమానస్త్వమ్ |
మద్గదముద్గతకరుణో నిర్గమయ శ్రీమరుత్పురాధీశ || ౪౪-౧౦ ||
ఇతి చతుశ్చత్వారింశదశకం సమాప్తమ్ |
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
