Kishkindha Kanda Sarga 47 – కిష్కింధాకాండ సప్తచత్వారింశః సర్గః (౪౭)


|| కపిసేనాప్రత్యాగమనమ్ ||

దర్శనార్థం తు వైదేహ్యాః సర్వతః కపియూథపాః |
వ్యాదిష్టాః కపిరాజేన యథోక్తం జగ్మురంజసా || ౧ ||

సరాంసి సరితః కక్షానాకాశం నగరాణి చ |
నదీదుర్గాంస్తథా శైలాన్ విచిన్వంతి సమంతతః || ౨ ||

సుగ్రీవేణ సమాఖ్యాతాః సర్వే వానరయూథపాః |
ప్రదేశాన్ ప్రవిచిన్వంతి సశైలవనకాననాన్ || ౩ ||

విచిత్య దివసం సర్వే సీతాధిగమనే ధృతాః |
సమాయాంతి స్మ మేదిన్యాం నిశాకాలేషు వానరాః || ౪ ||

సర్వర్తుకామాన్ దేశేషు వానరాః సఫలాన్ ద్రుమాన్ |
ఆసాద్య రజనీం శయ్యాం చక్రుః సర్వేష్వహఃసు తే || ౫ ||

తదహః ప్రథమం కృత్వా మాసే ప్రస్రవణం గతాః |
కపిరాజేన సంగమ్య నిరాశాః కపియూథపాః || ౬ ||

విచిత్య తు దిశం పూర్వాం యథోక్తాం సచివైః సహ |
అదృష్ట్వా వినతః సీతామాజగామ మహాబలః || ౭ ||

ఉత్తరాం చ దిశం సర్వాం విచిత్య స మహాకపిః |
ఆగతః సహ సైన్యేన వీరః శతవలిస్తదా || ౮ ||

సుషేణః పశ్చిమామాశాం విచిత్య సహ వానరైః |
సమేత్య మాసే సంపూర్ణే సుగ్రీవముపచక్రమే || ౯ ||

తం ప్రస్రవణపృష్ఠస్థం సమాసాద్యాభివాద్య చ |
ఆసీనం సహ రామేణ సుగ్రీవమిదమబ్రువన్ || ౧౦ ||

విచితాః పర్వతాః సర్వే వనాని గహనాని చ |
నిమ్నగాః సాగరాంతాశ్చ సర్వే జనపదాశ్చ యే || ౧౧ ||

గుహాశ్చ విచితాః సర్వాస్త్వయా యాః పరికీర్తితాః |
విచితాశ్చ మహాగుల్మా లతావితతసంతతాః || ౧౨ ||

గహనేషు చ దేశేషు దుర్గేషు విషమేషు చ |
సత్త్వాన్యతిప్రమాణాని విచితాని హతాని చ || ౧౩ ||

ఉదారసత్త్వాభిజనో మహాత్మా
స మైథీలీం ద్రక్ష్యతి వానరేంద్రః |
దిశం తు యామేవ గతా తు సీతా
తామాస్థితో వాయుసుతో హనూమాన్ || ౧౪ ||

ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే సప్తచత్వారింశః సర్గః || ౪౭ ||


గమనిక: రాబోయే ఆషాఢ నవరాత్రుల సందర్భంగా "శ్రీ వారాహీ స్తోత్రనిధి" పుస్తకము అందుబాటులో ఉంది. Click here to buy.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed