Read in తెలుగు / ಕನ್ನಡ / தமிழ் / देवनागरी / English (IAST)
|| nāgabaddharāmalakṣmaṇapradarśanam ||
pratipraviṣṭē laṅkāṁ tu kr̥tārthē rāvaṇātmajē |
rāghavaṁ parivāryārtā rarakṣurvānararṣabhāḥ || 1 ||
hanumānaṅgadō nīlaḥ suṣēṇaḥ kumudō nalaḥ |
gajō gavākṣō gavayaḥ śarabhō gandhamādanaḥ || 2 ||
jāmbavānr̥ṣabhaḥ skandhō rambhaḥ śatavaliḥ pr̥thuḥ |
vyūḍhānīkāśca yattāśca drumānādāya sarvataḥ || 3 ||
vīkṣamāṇā diśaḥ sarvāstiryagūrdhvaṁ ca vānarāḥ |
tr̥ṇēṣvapi ca cēṣṭatsu rākṣasā iti mēnirē || 4 ||
rāvaṇaścāpi saṁhr̥ṣṭō visr̥jyēndrajitaṁ sutam |
ājuhāva tataḥ sītārakṣiṇī rākṣasīstadā || 5 ||
rākṣasyastrijaṭā caiva śāsanātsamupasthitāḥ |
tā uvāca tatō hr̥ṣṭō rākṣasī rākṣasādhipaḥ || 6 ||
hatāvindrajitā:’:’khyāta vaidēhyā rāmalakṣmaṇau |
puṣpakaṁ ca samārōpya darśayadhvaṁ hatau raṇē || 7 ||
yadāśrayādavaṣṭabdhā nēyaṁ māmupatiṣṭhati |
sō:’syā bhartā saha bhrātrā nirastō raṇamūrdhani || 8 ||
nirviśaṅkā nirudvignā nirapēkṣā ca maithilī |
māmupasthāsyatē sītā sarvābharaṇabhūṣitā || 9 ||
adya kālavaśaṁ prāptaṁ raṇē rāmaṁ salakṣmaṇam |
avēkṣya vinivr̥ttāśā nānyāṁ gatimapaśyatī || 10 ||
nirapēkṣā viśālākṣī māmupasthāsyatē svayam |
tasya tadvacanaṁ śrutvā rāvaṇasya durātmanaḥ || 11 ||
rākṣasyastāstathētyuktvā jagmurvai yatra puṣpakam |
tataḥ puṣpakamādāya rākṣasyō rāvaṇājñayā || 12 ||
aśōkavanikāsthāṁ tāṁ maithilīṁ samupānayan |
tāmādāya tu rākṣasyō bhartr̥śōkaparājitām || 13 ||
sītāmārōpayāmāsurvimānaṁ puṣpakaṁ tadā |
tataḥ puṣpakamārōpya sītāṁ trijaṭayā saha || 14 ||
jagmurdarśayituṁ tasyai rākṣasyō rāmalakṣmaṇau |
rāvaṇōkārayallaṅkāṁ patākādhvajamālinīm || 15 ||
prāghōṣayata hr̥ṣṭaśca laṅkāyāṁ rākṣasēśvaraḥ |
rāghavō lakṣmaṇaścaiva hatāvindrajitā raṇē || 16 ||
vimānēnāpi sītā tu gatvā trijaṭayā saha |
dadarśa vānarāṇāṁ tu sarvaṁ sainyaṁ nipātitam || 17 ||
prahr̥ṣṭamanasaścāpi dadarśa piśitāśanān |
vānarāṁścāpi duḥkhārtānrāmalakṣmaṇapārśvataḥ || 18 ||
tataḥ sītā dadarśōbhau śayānau śaratalpayōḥ |
lakṣmaṇaṁ cāpi rāmaṁ ca visañjñau śarapīḍitau || 19 ||
vidhvastakavacau vīrau vipraviddhaśarāsanau |
sāyakaiśchinnasarvāṅgau śarastambamayau kṣitau || 20 ||
tau dr̥ṣṭvā bhrātarau tatra vīrau sā puruṣarṣabhau |
śayānau puṇḍarīkākṣau kumārāviva pāvakī || 21 ||
śaratalpagatau vīrau tathā bhūtau nararṣabhau |
duḥkhārtā subhr̥śaṁ sītā suciraṁ vilalāpa ha || 22 ||
bhartāramanavadyāṅgī lakṣmaṇaṁ cāsitēkṣaṇā |
prēkṣya pāṁsuṣu vēṣṭantau rurōda janakātmajā || 23 ||
sā bāṣpaśōkābhihatā samīkṣya
tau bhrātarau dēvasamaprabhāvau |
vitarkayantī nidhanaṁ tayōḥ sā
duḥkhānvitā vākyamidaṁ jagāda || 24 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē saptacatvāriṁśaḥ sargaḥ || 47 ||
yuddhakāṇḍa aṣṭacatvāriṁśaḥ sargaḥ (48) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: శరన్నవరాత్రుల సందర్భంగా "శ్రీ లలితా స్తోత్రనిధి" మరియు "శ్రీ దుర్గా స్తోత్రనిధి" పుస్తకములు కొనుగోలుకు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
