Trisuparnam – trisuparṇam


(tai-ā-10-38:40)

oṃ brahma̍metu̱ mām | madhu̍metu̱ mām |
brahma̍me̱va madhu̍metu̱ mām |
yāste̍ soma pra̱jā va̱thso’bhi̱ so a̱ham |
duṣṣva̍pna̱handu̍ruṣva̱ha |
yāste̍ soma prā̱ṇāgṃstāñju̍homi |
trisu̍parṇa̱mayā̍citaṃ brāhma̱ṇāya̍ dadyāt |
bra̱hma̱ha̱tyāṃ vā e̱te ghna̍nti |
ye brā̎hma̱ṇāstrisu̍parṇa̱ṃ paṭha̍nti |
te soma̱ṃ prāpnu̍vanti |
ā̱sa̱ha̱srātpa̱ṅktiṃ puna̍nti |
om || 1

brahma̍ me̱dhayā̎ |
madhu̍ me̱dhayā̎ |
brahma̍me̱va madhu̍ me̱dhayā̎ |
a̱dyā no̍ deva savitaḥ pra̱jāva̍tsāvī̱ssaubha̍gam |
parā̍ du̱ṣvapni̍yagṃ suva |
viśvā̍ni deva savitarduri̱tāni̱ parā̍suva |
yadbha̱draṃ tanma̱ āsu̍va |
madhu̱ vātā̍ ṛtāya̱te madhu̍ kṣaranti̱ sindha̍vaḥ |
mādhvī̎rnassa̱ntvoṣa̍dhīḥ |
madhu̱ nakta̍mu̱toṣasi̱ madhu̍ma̱tpārthi̍va̱g̱ṃ raja̍: |
madhu̱ dyaura̍stu naḥ pi̱tā |
madhu̍ mānno̱ vana̱spati̱rmadhu̍māgṃ astu̱ sūrya̍: |
mādhvī̱rgāvo̍ bhavantu naḥ |
ya i̱maṃ trisu̍parṇa̱mayā̍citaṃ brāhma̱ṇāya̍ dadyāt |
bhrū̱ṇa̱ha̱tyāṃ vā e̱te ghna̍nti |
ye brā̎hma̱ṇāstrisu̍parṇa̱ṃ paṭha̍nti |
te soma̱ṃ prāpnu̍vanti |
ā̱sa̱ha̱srātpa̱ṅktiṃ puna̍nti |
om || 2

brahma̍ me̱dhavā̎ |
madhu̍ me̱dhavā̎ |
brahma̍me̱va madhu̍ me̱dhavā̎ |
bra̱hmā de̱vānā̎ṃ pada̱vīḥ ka̍vī̱nāmṛṣi̱rviprā̍ṇāṃ mahi̱ṣo mṛ̱gāṇā̎m |
śye̱no gṛddhrā̍ṇā̱g̱ṃ svadhi̍ti̱rvanā̍nā̱g̱ṃ soma̍: pa̱vitra̱matye̍ti̱ rebhann̍ |
ha̱g̱ṃsaśśu̍ci̱ṣadvasu̍rantarikṣa̱saddhotā̍ vedi̱ṣadati̍thirduroṇa̱sat |
nṛ̱ṣadva̍ra̱sadṛ̍ta̱sadvyo̍ma̱sada̱bjā go̱jā ṛ̍ta̱jā a̍dri̱jā ṛ̱taṃ bṛ̱hat |
ṛ̱ce tvā̍ ru̱ce tvā̱ samitsra̍vanti sa̱rito̱ na dhenā̎: |
a̱ntarhṛ̱dā mana̍sā pū̱yamā̍nāḥ |
ghṛ̱tasya̱ dhārā̍ a̱bhicā̍kaśīmi |
hi̱ra̱ṇyayo̍ veta̱so maddhya̍ āsām |
tasmi̎nthsupa̱rṇo ma̍dhu̱kṛt ku̍lā̱yī bhaja̍nnāste̱ madhu̍ de̱vatā̎bhyaḥ |
tasyā̍sate̱ hara̍yassa̱pta tīre̎ sva̱dhāṃ duhā̍nā a̱mṛta̍sya̱ dhārā̎m |
ya i̱daṃ trisu̍parṇa̱mayā̍citaṃ brāhma̱ṇāya̍ dadyāt |
vī̱ra̱ha̱tyāṃ vā e̱te ghnanti |
ye brā̎hma̱ṇāstrisu̍parṇa̱ṃ paṭha̍nti |
te soma̱ṃ prāpnu̍vanti |
ā̱sa̱ha̱srātpa̱ṅktiṃ puna̍nti |
oṃ || 3

oṃ śānti̱: śānti̱: śānti̍: |


See more vēda sūktāni for chanting.


పైరసీ ప్రకటన : నాగేంద్రాస్ న్యూ గొల్లపూడి వీరాస్వామి సన్ మరియు శ్రీఆదిపూడి వెంకటశివసాయిరామ్ గారు కలిసి మా రెండు పుస్తకాలను ("శ్రీ వారాహీ స్తోత్రనిధి" మరియు "శ్రీ శ్యామలా స్తోత్రనిధి") ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed