Read in తెలుగు / ಕನ್ನಡ / தமிழ் / देवनागरी / English (IAST)
|| rāvaṇaśaṅkānivāraṇam ||
tasyāstadvacanaṁ śrutvā hanumānhariyūthapaḥ |
duḥkhādduḥkhābhibhūtāyāḥ sāntvamuttaramabravīt || 1 ||
ahaṁ rāmasya sandēśāddēvi dūtastavāgataḥ |
vaidēhi kuśalī rāmastvāṁ ca kauśalamabravīt || 2 ||
yō brāhmamastraṁ vēdāṁśca vēda vēdavidāṁ varaḥ |
sa tvāṁ dāśarathī rāmō dēvi kauśalamabravīt || 3 ||
lakṣmaṇaśca mahātējā bhartustē:’nucaraḥ priyaḥ |
kr̥tavān śōkasantaptaḥ śirasā tē:’bhivādanam || 4 ||
sā tayōḥ kuśalaṁ dēvī niśamya narasiṁhayōḥ |
prītisaṁhr̥ṣṭasarvāṅgī hanumantamathābravīt || 5 ||
kalyāṇī bata gāthēyaṁ laukikī pratibhāti mā |
ēti jīvantamānandō naraṁ varṣaśatādapi || 6 ||
tayā samāgatē tasminprītirutpāditā:’dbhutā |
parasparēṇa cālāpaṁ viśvastau tau pracakratuḥ || 7 ||
tasyāstadvacanaṁ śrutvā hanumānhariyūthapaḥ |
sītāyāḥ śōkadīnāyāḥ samīpamupacakramē || 8 ||
yathā yathā samīpaṁ sa hanumānupasarpati |
tathā tathā rāvaṇaṁ sā taṁ sītā pariśaṅkatē || 9 ||
ahō dhigduṣkr̥tamidaṁ kathitaṁ hi yadasya mē |
rūpāntaramupāgamya sa ēvāyaṁ hi rāvaṇaḥ || 10 ||
tāmaśōkasya śākhāṁ sā vimuktvā śōkakarśitā |
tasyāmēvānavadyāṅgī dharaṇyāṁ samupāviśat || 11 ||
hanumānapi duḥkhārtāṁ tāṁ dr̥ṣṭvā bhayamōhitām |
avandata mahābāhustatastāṁ janakātmajām || 12 ||
sā cainaṁ bhayavitrastā bhūyō naivābhyudaikṣata |
taṁ dr̥ṣṭvā vandamānaṁ tu sītā śaśinibhānanā || 13 ||
abravīddīrghamucchvasya vānaraṁ madhurasvarā |
māyāṁ praviṣṭō māyāvī yadi tvaṁ rāvaṇaḥ svayam || 14 ||
utpādayasi mē bhūyaḥ santāpaṁ tanna śōbhanam |
svaṁ parityajya rūpaṁ yaḥ parivrājakarūpadhr̥t || 15 ||
janasthānē mayā dr̥ṣṭastvaṁ sa ēvāsi rāvaṇaḥ |
upavāsakr̥śāṁ dīnāṁ kāmarūpa niśācara || 16 ||
santāpayasi māṁ bhūyaḥ santaptāṁ tanna śōbhanam |
athavā naitadēvaṁ hi yanmayā pariśaṅkitam || 17 ||
manasō hi mama prītirutpannā tava darśanāt |
yadi rāmasya dūtastvamāgatō bhadramastu tē || 18 ||
pr̥cchāmi tvāṁ hariśrēṣṭha priyā rāmakathā hi mē |
guṇānrāmasya kathaya priyasya mama vānara || 19 ||
cittaṁ harasi mē saumya nadīkūlaṁ yathā rayaḥ |
ahō svapnasya sukhatā yāhamēvaṁ cirāhr̥tā || 20 ||
prēṣitaṁ nāma paśyāmi rāghavēṇa vanaukasam |
svapnē:’pi yadyahaṁ vīraṁ rāghavaṁ sahalakṣmaṇam || 21 ||
paśyēyaṁ nāvasīdēyaṁ svapnō:’pi mama matsarī |
nāhaṁ svapnamimaṁ manyē svapnē dr̥ṣṭvā hi vānaram || 22 ||
na śakyō:’bhyudayaḥ prāptuṁ prāptaścābhyudayō mama |
kiṁ nu syāccittamōhō:’yaṁ bhavēdvātagatistviyam || 23 ||
unmādajō vikārō vā syādiyaṁ mr̥gatr̥ṣṇikā |
athavā nāyamunmādō mōhō:’pyunmādalakṣaṇaḥ || 24 ||
sambudhyē cāhamātmānamimaṁ cāpi vanaukasam |
ityēvaṁ bahudhā sītā sampradhārya balābalam || 25 ||
rakṣasāṁ kāmarūpatvānmēnē taṁ rākṣasādhipam |
ētāṁ buddhiṁ tadā kr̥tvā sītā sā tanumadhyamā || 26 ||
na prativyājahārātha vānaraṁ janakātmajā |
sītāyāścintitaṁ buddhvā hanumānmārutātmajaḥ || 27 ||
śrōtrānukūlairvacanaistadā tāṁ sampraharṣayat |
āditya iva tējasvī lōkakāntaḥ śaśī yathā || 28 ||
rājā sarvasya lōkasya dēvō vaiśravaṇō yathā |
vikramēṇōpapannaśca yathā viṣṇurmahāyaśāḥ || 29 ||
satyavādī madhuravāgdēvō vācaspatiryathā |
rūpavānsubhagaḥ śrīmānkandarpa iva mūrtimān || 30 ||
sthānakrōdhaḥ prahartā ca śrēṣṭhō lōkē mahārathaḥ |
bāhucchāyāmavaṣṭabdhō yasya lōkō mahātmanaḥ || 31 ||
apakr̥ṣyāśramapadānmr̥garūpēṇa rāghavam |
śūnyē yēnāpanītāsi tasya drakṣyasi yatphalam || 32 ||
na cirādrāvaṇaṁ saṅkhyē yō vadhiṣyati vīryavān |
rōṣapramuktairiṣubhirjvaladbhiriva pāvakaiḥ || 33 ||
tēnāhaṁ prēṣitō dūtastvatsakāśamihāgataḥ |
tvadviyōgēna duḥkhārtaḥ sa tvāṁ kauśalamabravīt || 34 ||
lakṣmaṇaśca mahātējāḥ sumitrānandavardhanaḥ |
abhivādya mahābāhuḥ sa tvāṁ kauśalamabravīt || 35 ||
rāmasya ca sakhā dēvi sugrīvō nāma vānaraḥ |
rājā vānaramukhyānāṁ sa tvāṁ kauśalamabravīt || 36 ||
nityaṁ smarati rāmastvāṁ sasugrīvaḥ salakṣmaṇaḥ |
diṣṭyā jīvasi vaidēhi rākṣasīvaśamāgatā || 37 ||
na cirāddrakṣyasē rāmaṁ lakṣmaṇaṁ ca mahābalam |
madhyē vānarakōṭīnāṁ sugrīvaṁ cāmitaujasam || 38 ||
ahaṁ sugrīvasacivō hanumānnāma vānaraḥ |
praviṣṭō nagarīṁ laṅkāṁ laṅghayitvā mahōdadhim || 39 ||
kr̥tvā mūrdhni padanyāsaṁ rāvaṇasya durātmanaḥ |
tvāṁ draṣṭumupayātō:’haṁ samāśritya parākramam || 40 ||
nāhamasmi tathā dēvi yathā māmavagacchasi |
viśaṅkā tyajyatāmēṣā śraddhatsva vadatō mama || 41 ||
ityārṣē śrīmadrāmāyaṇē vālmīkīyē ādikāvyē sundarakāṇḍē catustriṁśaḥ sargaḥ || 34 ||
sundarakāṇḍa pañcatriṁśaḥ sargaḥ (35)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
