Read in తెలుగు / ಕನ್ನಡ / தமிழ் / देवनागरी / English (IAST)
|| aśōkavanikāvicayaḥ ||
sa muhūrtamiva dhyātvā manasā cādhigamya tām |
avaplutō mahātējāḥ prākāraṁ tasya vēśmanaḥ || 1 ||
sa tu saṁhr̥ṣṭasarvāṅgaḥ prākārasthō mahākapiḥ |
puṣpitāgrānvasantādau dadarśa vividhāndrumān || 2 ||
sālānaśōkānbhavyāṁśca campakāṁśca supuṣpitān |
uddālakānnāgavr̥kṣāṁścūtānkapimukhānapi || 3 ||
athāmravaṇasañchannāṁ latāśatasamāvr̥tām |
jyāmukta iva nārācaḥ pupluvē vr̥kṣavāṭikām || 4 ||
sa praviśya vicitrāṁ tāṁ vihagairabhināditām |
rājataiḥ kāñcanaiścaiva pādapaiḥ sarvatō vr̥tām || 5 ||
vihagairmr̥gasaṅghaiśca vicitrāṁ citrakānanām |
uditādityasaṅkāśāṁ dadarśa hanumānkapiḥ || 6 ||
vr̥tāṁ nānāvidhairvr̥kṣaiḥ puṣpōpagaphalōpagaiḥ |
kōkilairbhr̥ṅgarājaiśca mattairnityaniṣēvitām || 7 ||
prahr̥ṣṭamanujē kālē mr̥gapakṣisamākulē |
mattabarhiṇasaṅghuṣṭāṁ nānādvijagaṇāyutām || 8 ||
mārgamāṇō varārōhāṁ rājaputrīmaninditām |
sukhaprasuptānvihagānbōdhayāmāsa vānaraḥ || 9 ||
utpatadbhirdvijagaṇaiḥ pakṣaiḥ sālāḥ samāhatāḥ |
anēkavarṇā vividhā mumucuḥ puṣpavr̥ṣṭayaḥ || 10 ||
puṣpāvakīrṇaḥ śuśubhē hanumānmārutātmajaḥ |
aśōkavanikāmadhyē yathā puṣpamayō giriḥ || 11 ||
diśaḥ sarvāḥ pradhāvantaṁ vr̥kṣaṣaṇḍagataṁ kapim |
dr̥ṣṭvā sarvāṇi bhūtāni vasanta iti mēnirē || 12 ||
vr̥kṣēbhyaḥ patitaiḥ puṣpairavakīrṇā pr̥thagvidhaiḥ |
rarāja vasudhā tatra pramadēva vibhūṣitā || 13 ||
tarasvinā tē taravastarasābhiprakampitāḥ |
kusumāni vicitrāṇi sasr̥juḥ kapinā tadā || 14 ||
nirdhūtapatraśikharāḥ śīrṇapuṣpaphalā drumāḥ |
nikṣiptavastrābharaṇā dhūrtā iva parājitāḥ || 15 ||
hanūmatā vēgavatā kampitāstē nagōttamāḥ |
puṣpaparṇaphalānyāśu mumucuḥ puṣpaśālinaḥ || 16 ||
vihaṅgasaṅghairhīnāstē skandhamātrāśrayā drumāḥ |
babhūvuragamāḥ sarvē mārutēnēva nirdhutāḥ || 17 ||
nirdhūtakēśī yuvatiryathā mr̥ditavarṇakā |
niṣpītaśubhadantōṣṭhī nakhairdantaiśca vikṣatā || 18 ||
tathā lāṅgūlahastaiśca caraṇābhyāṁ ca marditā |
babhūvāśōkavanikā prabhagnavarapādapā || 19 ||
mahālatānāṁ dāmāni vyadhamattarasā kapiḥ |
yathā prāvr̥ṣi vindhyasya mēghajālāni mārutaḥ || 20 ||
sa tatra maṇibhūmīśca rājatīśca manōramāḥ |
tathā kāñcanabhūmīśca dadarśa vicarankapiḥ || 21 ||
vāpīśca vividhākārāḥ pūrṇāḥ paramavāriṇā |
mahārhairmaṇisōpānairupapannāstatastataḥ || 22 ||
muktāpravālasikatāḥ sphāṭikāntarakuṭ-ṭimāḥ |
kāñcanaistarubhiścitraistīrajairupaśōbhitāḥ || 23 ||
phullapadmōtpalavanāścakravākōpakūjitāḥ |
natyūharutasaṅghuṣṭā haṁsasārasanāditāḥ || 24 ||
dīrghābhirdrumayuktābhiḥ saridbhiśca samantataḥ |
amr̥tōpamatōyābhiḥ śivābhirupasaṁskr̥tāḥ || 25 ||
latāśatairavatatāḥ santānakusumāvr̥tāḥ |
nānāgulmāvr̥taghanāḥ karavīrakr̥tāntarāḥ || 26 ||
tatō:’mbudharasaṅkāśaṁ pravr̥ddhaśikharaṁ girim |
vicitrakūṭaṁ kūṭaiśca sarvataḥ parivāritam || 27 ||
śilāgr̥hairavatataṁ nānāvr̥kṣaiḥ samākulam | [samāvr̥tam]
dadarśa hariśārdūlō ramyaṁ jagati parvatam || 28 ||
dadarśa ca nagāttasmānnadīṁ nipatitāṁ kapiḥ |
aṅkādiva samutpatya priyasya patitāṁ priyām || 29 ||
jalē nipatitāgraiśca pādapairupaśōbhitām |
vāryamāṇāmiva kruddhāṁ pramadāṁ priyabandhubhiḥ || 30 ||
punarāvr̥ttatōyāṁ ca dadarśa sa mahākapiḥ |
prasannāmiva kāntasya kāntāṁ punarupasthitām || 31 ||
tasyādūrācca padminyō nānā dvijagaṇāyutāḥ | [-sa]
dadarśa hariśārdūlō hanumānmārutātmajaḥ || 32 ||
kr̥trimāṁ dīrghikāṁ cāpi pūrṇāṁ śītēna vāriṇā |
maṇipravarasōpānāṁ muktāsikataśōbhitām || 33 ||
vividhairmr̥gasaṅghaiśca vicitrāṁ citrakānanām |
prāsādaiḥ sumahadbhiśca nirmitairviśvakarmaṇā || 34 ||
kānanaiḥ kr̥trimaiścāpi sarvataḥ samalaṅkr̥tām |
yē kēcitpādapāstatra puṣpōpagaphalōpagāḥ || 35 ||
sacchatrāḥ savitardīkāḥ sarvē sauvarṇavēdikāḥ |
latāpratānairbahubhiḥ parṇaiśca bahubhirvr̥tām || 36 ||
kāñcanīṁ śiṁśupāmēkāṁ dadarśa hanumānkapiḥ |
vr̥tāṁ hēmamayībhistu vēdikābhiḥ samantataḥ || 37 ||
sō:’paśyadbhūmibhāgāṁśca gartaprasravaṇāni ca |
suvarṇavr̥kṣānaparāndadarśa śikhisannibhān || 38 ||
tēṣāṁ drumāṇāṁ prabhayā mērōriva divākaraḥ |
amanyata tadā vīraḥ kāñcanō:’smīti vānaraḥ || 39 ||
tāṁ kāñcanaistarugaṇairmārutēna ca vījitām |
kiṅkiṇīśatanirghōṣāṁ dr̥ṣṭvā vismayamāgamat || 40 ||
sa puṣpitāgrāṁ rucirāṁ taruṇāṅkurapallavām |
tāmāruhya mahābāhuḥ śiṁśupāṁ parṇasaṁvr̥tām || 41 ||
itō drakṣyāmi vaidēhīṁ rāmadarśanalālasām |
itaścētaśca duḥkhārtāṁ sampatantīṁ yadr̥cchayā || 42 ||
aśōkavanikā cēyaṁ dr̥ḍhaṁ ramyā durātmanaḥ |
campakaiścandanaiścāpi vakulaiśca vibhūṣitā || 43 ||
iyaṁ ca nalinī ramyā dvijasaṅghaniṣēvitā |
imāṁ sā rāmamahiṣī dhruvamēṣyati jānakī || 44 || [nūnaṁ]
sā rāmā rāmamahiṣī rāghavasya priyā satī |
vanasañcārakuśalā dhruvamēṣyati jānakī || 45 || [nūnaṁ]
athavā mr̥gaśābākṣī vanasyāsya vicakṣaṇā |
vanamēṣyati sāryēha rāmacintānukarśitā || 46 ||
rāmaśōkābhisantaptā sā dēvī vāmalōcanā |
vanavāsē ratā nityamēṣyatē vanacāriṇī || 47 ||
vanēcarāṇāṁ satataṁ nūnaṁ spr̥hayatē purā |
rāmasya dayitā bhāryā janakasya sutā satī || 48 ||
sandhyākālamanāḥ śyāmā dhruvamēṣyati jānakī |
nadīṁ cēmāṁ śivajalāṁ sandhyārthē varavarṇinī || 49 ||
tasyāścāpyanurūpēyamaśōkavanikā śubhā |
śubhā yā pārthivēndrasya patnī rāmasya sammatā || 50 ||
yadi jīvati sā dēvī tārādhipanibhānanā |
āgamiṣyati sā:’vaśyamimāṁ śivajalāṁ nadīm || 51 ||
ēvaṁ tu matvā hanumānmahātmā
pratīkṣamāṇō manujēndrapatnīm |
avēkṣamāṇaśca dadarśa sarvaṁ
supuṣpitē parṇaghanē nilīnaḥ || 52 ||
ityārṣē śrīmadrāmāyaṇē vālmīkīyē ādikāvyē sundarakāṇḍē caturdaśaḥ sargaḥ || 14 ||
sundarakāṇḍa pañcadaśaḥ sargaḥ (15)>>
See Complete vālmīki sundarakāṇḍa for chanting.
గమనిక: శరన్నవరాత్రుల సందర్భంగా "శ్రీ లలితా స్తోత్రనిధి" మరియు "శ్రీ దుర్గా స్తోత్రనిధి" పుస్తకములు కొనుగోలుకు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
