Read in తెలుగు / ಕನ್ನಡ / தமிழ் / देवनागरी / English (IAST)
|| mandōdarīdarśanam ||
tatra divyōpamaṁ mukhyaṁ sphāṭikaṁ ratnabhūṣitam |
avēkṣamāṇō hanumān dadarśa śayanāsanam || 1 ||
dāntakāñcanacitrāṅgairvaiḍūryaiśca varāsanaiḥ |
mahārhāstaraṇōpētairupapannaṁ mahādhanaiḥ || 2 ||
tasya caikatamē dēśē sō:’gryamālāvibhūṣitam |
dadarśa pāṇḍuraṁ chatraṁ tārādhipatisannibham || 3 ||
jātarūpaparikṣiptaṁ citrabhānusamaprabham |
aśōkamālāvitataṁ dadarśa paramāsanam || 4 ||
vālavyajanahastābhirvījyamānaṁ samantataḥ |
gandhaiśca vividhairjuṣṭaṁ varadhūpēna dhūpitam || 5 ||
paramāstaraṇāstīrṇamāvikājinasaṁvr̥tam |
dāmabhirvaramālyānāṁ samantādupaśōbhitam || 6 ||
tasmin jīmūtasaṅkāśaṁ pradīptōttamakuṇḍalam |
lōhitākṣaṁ mahābāhuṁ mahārajatavāsasam || 7 ||
lōhitēnānuliptāṅgaṁ candanēna sugandhinā |
sandhyāraktamivākāśē tōyadaṁ sataṭidgaṇam || 8 ||
vr̥tamābharaṇairdivyaiḥ surūpaṁ kāmarūpiṇam |
savr̥kṣavanagulmāḍhyaṁ prasuptamiva mandaram || 9 ||
krīḍitvōparataṁ rātrau varābharaṇabhūṣitam |
priyaṁ rākṣasakanyānāṁ rākṣasānāṁ sukhāvaham || 10 ||
pītvāpyuparataṁ cāpi dadarśa sa mahākapiḥ |
bhāsvarē śayanē vīraṁ prasuptaṁ rākṣasādhipam || 11 ||
niḥśvasantaṁ yathā nāgaṁ rāvaṇaṁ vānararṣabhaḥ |
āsādya paramōdvignaḥ sō:’pāsarpatsubhītavat || 12 ||
athārōhaṇamāsādya vēdikāntaramāśritaḥ |
suptaṁ rākṣasaśārdūlaṁ prēkṣatē sma mahākapiḥ || 13 ||
śuśubhē rākṣasēndrasya svapataḥ śayanōttamam |
gandhahastini saṁviṣṭē yathā prasravaṇaṁ mahat || 14 ||
kāñcanāṅgadanaddhau ca dadarśa sa mahātmanaḥ |
vikṣiptau rākṣasēndrasya bhujāvindradhvajōpamau || 15 ||
airāvataviṣāṇāgrairāpīḍanakr̥tavraṇau |
vajrōllikhitapīnāṁsau viṣṇucakraparikṣatau || 16 ||
pīnau samasujātāṁsau saṅgatau balasamyutau |
sulakṣaṇanakhāṅguṣṭhau svaṅgulīyakalakṣitau || 17 || [-tala]
saṁhatau parighākārau vr̥ttau karikarōpamau |
vikṣiptau śayanē śubhrē pañcaśīrṣāvivōragau || 18 ||
śaśakṣatajakalpēna suśītēna sugandhinā |
candanēna parārdhyēna svanuliptau svalaṅkr̥tau || 19 ||
uttamastrīvimr̥ditau gandhōttamaniṣēvitau |
yakṣapannagagandharvadēvadānavarāviṇau || 20 ||
dadarśa sa kapistasya bāhū śayanasaṁsthitau |
mandarasyāntarē suptau mahāhī ruṣitāviva || 21 ||
tābhyāṁ sa paripūrṇābhyāṁ bhujābhyāṁ rākṣasēśvaraḥ |
śuśubhē:’calasaṅkāśaḥ śr̥ṅgābhyāmiva mandaraḥ || 22 ||
cūtapunnāgasurabhirvakulōttamasamyutaḥ |
mr̥ṣṭānnarasasamyuktaḥ pānagandhapuraḥsaraḥ || 23 ||
tasya rākṣasasiṁhasya niścakrāma mahāmukhāt |
śayānasya viniḥśvāsaḥ pūrayanniva tadgr̥ham || 24 ||
muktāmaṇivicitrēṇa kāñcanēna virājitam |
mukuṭēnāpavr̥ttēna kuṇḍalōjjvalitānanam || 25 ||
raktacandanadigdhēna tathā hārēṇa śōbhinā |
pīnāyataviśālēna vakṣasābhivirājitam || 26 ||
pāṇḍarēṇāpaviddhēna kṣaumēṇa kṣatajēkṣaṇam |
mahārhēṇa susaṁvītaṁ pītēnōttamavāsasā || 27 ||
māṣarāśipratīkāśaṁ niḥśvasantaṁ bhujaṅgavat |
gāṅgē mahati tōyāntē prasuptamiva kuñjaram || 28 ||
caturbhiḥ kāñcanairdīpairdīpyamānacaturdiśam |
prakāśīkr̥tasarvāṅgaṁ mēghaṁ vidyudgaṇairiva || 29 ||
pādamūlagatāścāpi dadarśa sumahātmanaḥ |
patnīḥ sa priyabhāryasya tasya rakṣaḥpatērgr̥hē || 30 ||
śaśiprakāśavadanāścārukuṇḍalabhūṣitāḥ |
amlānamālyābharaṇā dadarśa hariyūthapaḥ || 31 ||
nr̥ttavāditrakuśalā rākṣasēndrabhujāṅkagāḥ |
varābharaṇadhāriṇyō niṣaṇṇā dadr̥śē hariḥ || 32 ||
vajravaiḍūryagarbhāṇi śravaṇāntēṣu yōṣitām |
dadarśa tāpanīyāni kuṇḍalānyaṅgadāni ca || 33 ||
tāsāṁ candrōpamairvaktraiḥ śubhairlalitakuṇḍalaiḥ |
virarāja vimānaṁ tannabhastārāgaṇairiva || 34 ||
madavyāyāmakhinnāstā rākṣasēndrasya yōṣitaḥ |
tēṣu tēṣvavakāśēṣu prasuptāstanumadhyamāḥ || 35 ||
aṅgahāraistathaivānyā kōmalairnr̥ttaśālinī |
vinyastaśubhasarvāṅgī prasuptā varavarṇinī || 36 ||
kācidvīṇāṁ pariṣvajya prasuptā samprakāśatē |
mahānadīprakīrṇēva nalinī pōtamāśritā || 37 ||
anyā kakṣagatēnaiva maḍḍukēnāsitēkṣaṇā |
prasuptā bhāminī bhāti bālaputrēva vatsalā || 38 ||
paṭahaṁ cārusarvāṅgī pīḍya śētē śubhastanī |
cirasya ramaṇaṁ labdhvā pariṣvajyēva bhāminī || 39 ||
kācidvaṁśaṁ pariṣvajya suptā kamalalōcanā |
rahaḥ priyatamaṁ gr̥hya sakāmēva ca kāminī || 40 ||
vipañcīṁ parigr̥hyānyā niyatā nr̥ttaśālinī |
nidrāvaśamanuprāptā sahakāntēva bhāminī || 41 ||
anyā kanakasaṅkāśairmr̥dupīnairmanōramaiḥ |
mr̥daṅgaṁ paripīḍyāṅgaiḥ prasuptā mattalōcanā || 42 ||
bhujapārśvāntarasthēna kakṣagēna kr̥śōdarī |
paṇavēna sahānindyā suptā madakr̥taśramā || 43 ||
ḍiṇḍimaṁ parigr̥hyānyā tathaivāsaktaḍiṇḍimā |
prasuptā taruṇaṁ vatsamupagūhyēva bhāminī || 44 ||
kācidāḍambaraṁ nārī bhujasamyōgapīḍitam |
kr̥tvā kamalapatrākṣī prasuptā madamōhitā || 45 ||
kalaśīmapaviddhyānyā prasuptā bhāti bhāminī |
vasantē puṣpaśabalā mālēva parimārjitā || 46 ||
pāṇibhyāṁ ca kucau kācitsuvarṇakalaśōpamau |
upagūhyābalā suptā nidrābalaparājitā || 47 ||
anyā kamalapatrākṣī pūrṇēndusadr̥śānanā |
anyāmāliṅgya suśrōṇīṁ prasuptā madavihvalā || 48 ||
ātōdyāni vicitrāṇi pariṣvajyāparāḥ striyaḥ |
nipīḍya ca kucaiḥ suptāḥ kāminyaḥ kāmukāniva || 49 ||
tāsāmēkāntavinyastē śayānāṁ śayanē śubhē |
dadarśa rūpasampannāmaparāṁ sa kapiḥ striyam || 50 ||
muktāmaṇisamāyuktairbhūṣaṇaiḥ suvibhūṣitām |
vibhūṣayantīmiva tatsvaśriyā bhavanōttamam || 51 ||
gaurīṁ kanakavarṇāṅgīmiṣṭāmantaḥpurēśvarīm |
kapirmandōdarīṁ tatra śayānāṁ cārurūpiṇīm || 52 ||
sa tāṁ dr̥ṣṭvā mahābāhurbhūṣitāṁ mārutātmajaḥ |
tarkayāmāsa sītēti rūpayauvanasampadā |
harṣēṇa mahatā yuktō nananda hariyūthapaḥ || 53 ||
āsphōṭayāmāsa cucumba pucchaṁ
nananda cikrīḍa jagau jagāma |
stambhānarōhannipapāta bhūmau
nidarśayansvāṁ prakr̥tiṁ kapīnām || 54 ||
ityārṣē śrīmadrāmāyaṇē vālmīkīyē ādikāvyē sundarakāṇḍē daśamaḥ sargaḥ || 10 ||
sundarakāṇḍa ēkādaśa sargaḥ(11)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
